Ang Perpetual Education Fund Nag-uswag sa Milabay nga Siyam ka Tuig
Si Tyson Kemege, nasakit og polyo ug nailong tuwapos sa pagkabata, midako didto sa Nairobi, Kenya diin siya wala sukad makahigda og matres ug panagsa nga makakaon kaduha sa usa ka adlaw. Makalihok lamang siya uban sa panabang sa usa ka parisan nga sungkod.
Mihukom siya sa pag-eskwela sa Augustana College sa Kenya aron sa pagtuon og information technology , apan walay pamilya ug walay salapi, ang iyang kaugmaon ingon og walay kahimoan.
Si Brother Kemege, kinsa nagpamiyembro sa Simbahan sa unang pipila ka mga tuig human matapos sa iyang sekondarya nga edukasyon, nakigkita og magtiayon nga misyonaryo ug misulti kanila sa iyang mga tinguha. Ang mga misyonaryo miduso kaniya ngadto sa komite sa Perpetual Education Fund (PEF). Usa ka pahulam sa PEF mitabang kaniya nga madawat ngadto sa eskwelahan.
“Ako ang pinakaswerte nga tawo sa yuta,” kasagaran nga isulti ni Brother Kemege sa mga misyonaryo.
Mialagad si Brother Kemege isip presidente sa organisasyon sa estudyante sa Unibersidad sa Augustana ug adunay duha ka mga calling sa iyang ward.
Siyam ka tuig human si Presidente Gordon B. Hinckley (1910–2008) unang mianunsyo sa PEF, ang programa dihay labaw pa sa 38,000 ka mga partisipante sa 42 ka mga nasud. Bisan pa sa tibuok kalibutan nga ekonomikanhong mga kalisud, ang Perpetual Education Fund lig-on ug nagtabang sa mga tawo sama ni Tyson Kemege sa pagkab-ut og edukasyon, paglingkawas sa ka kabus, ug sa pagtabang sa ilang mga komunidad.
Labaw pa kay sa 87 ka porsiyento sa mga partisipante kinsa nakahuman sa ilang pag-eskwela nga sa karon nagtrabaho.
Pagbuntog sa mga Hagit
Bisan ang programa wala mahulga pinaagi sa ekonomikanhon nga pagkunhod, kadtong nagdumala sa programa nag-ingon nga kini kinahanglan nga mobuntog og pipila ka mga hagit. Usa sa pinakadako nga hagit nga giatubang sa programa mao ang nagtubo nga gidaghanon sa mga partisipante.
“Ang usa sa mga babag nga kinahanglan atong atubangon mao ang pagbuntog sa kasagaran nga mga babag nga nag-uban sa kusog nga pagtubo ug ang usa ka tibuok kalibutan nga paningkamot,” miingon si Elder John K. Carmack, usa ka miyembro nga emeritus sa Seventy ug tigdumala nga direktor sa pundo. “Ang pipila sa mga babag naglakip sa pagpahibalo, pagtuman sa mga gikinahanglan ug ang pagkaanaa nga mahibaloan, ug pagsuporta sa mga partisipante.”
Ang programa gipadagan sa mga punoang buhatan sa Simbahan pinaagi sa gamay nga grupong administratiba, naglakip og pipila ka mga empleyado, mga magtiayon nga misyonaryo, ug lokal nga mga boluntaryo. Kini gidumala pinaagi sa duha ka emeritus nga General Authority, nga sila si Elder Carmack ug Elder Richard E. Cook.
Aron sa pagdumala sa dako nga programa, ang mga empleyado ug mga misyonaryo nagtrabaho uban sa mga Presidente sa Area sa pagbansay og mga lider sa area, kinsa motrabaho usab uban sa lokal nga mga lider, mga empleyado, mga boluntaryo, ug mga partisipante.
“Kini sa kaniadto ug sa karon usa ka ingon nga binag-o nga pasiugda,” miingon si Rex Allen, direktor sa pagbansay ug mga komunikasyon alang sa programa. “Kini bag-o sa matag bahin, busa ang komunikasyon ug pagbansay importante.
Unsa ang mga Pamaagi Niini
Ang programa nahimo nga posible pinaagi sa gatusan ka mga tawo kinsa midonar og salapi ngadto sa pundo. Ang tanan nga mga salapi gamiton sa pagsuporta sa mga partisipante.
Alang sa mga partisipante, ang proseso nagsugod sa usa ka panahon sa pagpangandam nga gipaangay ngadto sa programa sa institute of religion diin ang partisipante nag-enrol. Uban sa panabang sa mga LDS employment resource center, ang mga partisipante nagtambong og “Planning for Success” nga mga kurso ug mga workshop sa panarbaho sa dili pa humanon ang online nga pag-apply og loan.
Sa higayon nga maaprobahan ang mga loan, ang mga partisipante mopadayon sa ilang mga edukasyon uban sa pagsabut nga sila mobayad sa ilang utang aron ang uban mahimo nga makapahimulos usab gikan sa pundo. Ang mga partisipante mobayad og balik labaw kay sa US $2.5 milyon ngadto sa ilang mga loan matag tuig.
Si Elder Carmack miingon nga ang programa nagmalampuson dili lamang tungod sa dagkong pinansyal nga suporta sa mga miyembro apan tungod usab sa maayo kaayo nga pagpangulo. “Ang amahan sa Perpetual Education Fund mao si Gordon B. Hinckley,” miingon siya, “apan ang suporta ug interes ni Presidente [Thomas S.] Monson ingon usab lamang ka dako kaayo sama kang Presidente Hinckley kaniadto. Si [Presidente Monson] diha na sa proseso gikan sa sinugdanan ug nagdumala niini karon uban sa usa ka mapanagnaon nga panan-aw.
Ang mga Resulta
Sa pag-anunsyo sa programa sa Abril 2001 nga kinatibuk-ang komperensya, si Presidente Hinckley miingon: “Uban sa maayo nga mga kahanas sa panarbaho, kining batan-on nga mga lalaki ug mga babaye makabarug gikan sa ka kabus nga wala mahibalo-i nila ug sa mga henerasyon nga nag-una kanila. Sila mas maayo nga mosangkap sa ilang mga pamilya. Moalagad sila sa simbahan ug molambo sa pagpangulo ug responsibilidad. Sila mobayad sa ilang mga loan aron paghimo niini nga posible alang sa uban nga mapanalanginan ingon nga sila napanalanginan” (“The Perpetual Education Fund,” Liahona, Hulyo 2001, 60; Ensign, Mayo 2001, 51).
Ang mga lider sa programa nagpadayon sa pagkakita sa katumanan sa mga pulong ni Presidente Hinckley. Ingon kadaghan sa 10 ngadto sa 15 porsiyento sa mga lider sa Simbahan karon diha sa pipila ka PEF nga giaprobahan nga mga nasud mga tinabangan sa pundo.
“Dili kini walay kapuslanan nga damgo,” miingon si Presidente Hinckley “Kita adunay mga kapanguhaan pinaagi sa kaayo ug sa kalooy sa talagsaon ug manggihatagon nga mga higala. Kita adunay organisasyon. Kita adunay mga tawo ug kasaligan nga mga sulugoon sa Ginoo nga mohimo niini nga malampuson. Kini usa ka boluntaryong paningkamot nga walay pagabayran ang Simbahan. Mapainubsanon ug mapasalamaton kaming nag-ampo nga ang Dios mopauswag niini nga paningkamot ug kini makahatag og mga panalangin, buhong ug talagsaon, diha sa mga ulo sa kaliboan ingon lamang nga ang nag-una niini nga organisasyon, ang Perpetual Emigration Fund, nakahatag og dili matukib nga mga panalangin diha sa mga kinabuhi niadtong kinsa miambit sa mga oportunidad niini.”
Siyam ka tuig ang milabay, ang programa nagpadayon sa paglambo, nahimo nga posible, sumala ni Brother Allen, “pinaagi sa maayo kaayo nga pagtinabangay ug hilabihan kadako nga hugot nga pagtuo.”
Ang makasarang nga mga miyembro mahimong mapanalanginan …
pinaagi sa pag-ambit sa mga bunga sa Perpetual Education Fund …
ug pinaagi sa pagbayad og balik aron ang uban makapahimulos usab.
Mga paghulagway pinaagi ni Brad Teare