Kabatan-onan
Ang Akong Eksperimento sa Hugot nga Pagtuo
Sa nag-edad pa ako og 13, nagsugod ako og basa sa Basahon ni Mormon matag adlaw, ug ako napanalanginan sa matag adlaw sukad niadto.
Ang among klase sa Sunday School sa nanag-edad og 13 wala gayud mailhi nga adunay balaan nga pagtahud. Hinoon, kami adunay talagsaon nga magtutudlo kinsa naningkamot gayud sa pagtudlo sa matag leksyon pinaagi sa Espiritu. Usa niana nga leksyon mao ang pagbasa sa mga kasulatan.
Sa katapusan sa leksyon mihatag siya kanamo og usa ka hagit. Alang kadto kanamong tanan, apan sa pipila ka hinungdan mitan-aw siya direkta gayud kanako samtang siya miingon, “Hagiton ko kamo sa pagbasa sa Basahon ni Mormon sa matag adlaw gayud!” Naghunahuna ko sa kaugalingon, “Akong ipakita kanimo. Akong buhaton kini!”
Akong gisugdan sa 1 Nephi kapitulo 1 niana gayud nga pagkagabii ug padayon nga nagbasa sa matag adlaw. Tingali sa akong pagsugod dili kaayo maayo ang gipakita nakong kinaiya kabahin niini, apan paglabay sa panahon nagkaanam og kanindot ang akong gibati nga magbasa sa Basahon ni Mormon. Ang pagbasa kada gabii nahimo nga makalingaw nga naandang buhaton.
Paglabay sa pipila ka bulan miabut na ako saAlma 32 ug napunting ang akong hunahuna sa ideya sa pag-eksperimento sa hugot nga pagtuo. Sa eskwelahan bag-o lang namong nakat-unan ang paghimo og siyentipiko nga mga eksperimento, busa miluhod ako ug gisultihan ang Langitnong Amahan nga gisugdan na nako ang pag-eksperimento. Mihangyo ako nga mahibaloan unta nako kon ang Basahon ni Mormon tinuod.
Sa paghinumdom niana nga eksperimento, nasayud ako nga ang Langitnong Amahan mitubag sa akong mga pag-ampo sa daghan nang higayon. Ang inadlaw nga pagbasa sa Basahon ni Mormon nakahatag kanako og dugang nga kapasidad sa pagbuntog sa dautan. Akong gibati nga mas duol sa Amahang Langitnon. Akong gibati nga nalig-on pinaagi sa gahum sa Espiritu Santo sa pagbuntog sa mga kalisdanan. Ang gisulti ni Alma mahitungod sa pag-eksperimento sa pulong sa Dios tinuod: “Kini misugod sa pagpadako sa akong kalag; oo, kini misugod sa pagdan-ag sa akong salabutan, oo, kini misugod sa pagkaanindot ngari kanako.” (Alma 32:28).