Sam Tingting blong FAMlE Haos Naet

Liahona ia i gat ol stori mo aktiviti we yu save yusum long famle haos naet. Olgeta ia oli sam long ol eksampol.

“Kam wan Gudfala Man Naoia,” p. 45: Soemaot sam aetem (olsem eksampol, wan pensel, Buk blong Momon, Liahona, ol sus), mo invaetem ol famle memba blong oli talemaot wijwan long ol aetem ia i impoten kasem hemia we i no impoten. Toktok raon long olsem wanem oli mekem ol joes blong olgeta. Wanem nao ol kwaliti we i mekem laef blong wan man i impoten? Leftemap tingting blong wanwan man blong mekem wan spesel samting long wik we i stap kam ia blong kam wan man o woman wetem gud kwaliti.

“Eli Sandei Moning,” p. 56: Invaetem wanwan famle memba blong oli tingting long wan neiba we oli save visitim o mekem wan aksen blong seves long hem. Plan blong mekem wan samting long wik ia blong man o woman ia. Ridim Mosaea 18:7–10, mo toktok raon long olsem wanem taem yumi helpem ol narafalawan hem i wan wei blong kipim kavenan blong baptaes blong yumi.

“Taem Ol Dakdak Oli No Flot,” p. 58: Listim sam rul blong famle blong yu, mo toktok raon long olsem wanem ol rul ia oli protektem famle blong yu. Mo tu, listim sam long ol komanmen blong Papa long Heven, mo toktok raon long olsem wanem ol komanmen ia oli protektem yumi long saed blong bodi mo long spirit.

Hapi Famle Haos Naet

Sam yia i bin pas finis, hasban blong mi i askem famle blong mitufala blong rere blong wan spesel haos naet. Mitufala i bin askem smol gel blong mitufala we i gat fo (4) yia blong hem i singim “Mi Pikinini blong God.” Smol boe blong mitufala we i gat 10 yia i bin mekem fas prea. Mifala i bin filim strong mo naesfala paoa blong Spirit.

Hasban blong mi i bin serem sam tingting blong ol Jos lida mo i bin leftemap tingting blong mifala blong stap wan long gospel blong Jisas Kraes. Afta hem i bin givim wan blesing blong papa long smol gel blong mitufala. Mama blong mi mo mi i kasem blesing tu, mo laswan nao smol boe blong mitufala. Bifo hem i putum ol han blong hem antap long hed blong boe blong mitufala, hasban blong mi i bin talemaot tangkyu blong hem from prishud mo i bin leftemap tingting blong hem blong hem i stap klin inaf long atoriti ia.

Kolosap wan yia mo haf i bin pas, gel blong mitufala i bin talem, “Yumi mekem wan moa famle haos naet olsem we yumi bin mekem wan taem finis ia.” Mi save wanem hem i minim, be mi gohed blong askem hem se wij famle haos naet ia hem i stap tokbaot. Hem i bin ansa, “Hemia we yumi bin krae plante mo yumi bin hapi tumas!”

Marlúsia Susa de Jisas Kosta, Bahia, Brasil

Famle Haos Naet Ia we Yu Laekem Tumas

Sendem wan stori blong famle haos naet blong yu we yu laekem tumas i go long [e-mail].