Te horo‘a no te iteraa i te tai‘o
Mea au roa na ta maua tamaiti matahiapo i te haere i te haapiiraa tamahou e e au ra e mea maitai roa ta’na haapiiraa. Area râ i to’na haereraa i te piha matamua, ua ite ihora maua e aita ona e tai‘o ra. E tai‘o noa oia i te tahi noa mau parau i te tahi vahi e i te tahi atu vahi e te fifi ra oia i te tai‘o i ta’na mau ohipa no te tai‘o. Ua ma‘iri te mau ava‘e, e mea iti roa te haereraa i mua e itehia ra i roto i ta’na tai‘oraa. Ua haape‘ape‘a rahi roa maua to‘u hoa faaipoipo no te reira.
I te hoê mahana ua haamana‘o ihora vau i te tahi mea ta to‘u peresideni misioni i haapii i te mau matahiti i ma‘iri. Ua piihia vau i roto i te hoê misioni reo êê. Te haapiiraa i te reo Rusia e mea fifi roa ïa na te mau misionare tata‘itahi, e ua faaue te peresideni misioni ia matou ia tai‘o i te Buka a Moromona na roto i te reo Rusia i te mau mahana atoa. Ua fafau oia ia matou e tauturu te mana o te Buka a Moromona ia nehenehe ia matou ia paraparau na roto i te reo Rusia. Ua ti‘a roa oia. Ua manuïa vau i roto i te parauraa e i te taaraa i te reo, e ua tupu to‘u iteraa papû i te rahi.
E rave rahi mau matahiti i muri mai i ta‘u misioni, ua feruri ihora vau e, « mai te mea ua manuïa vau i roto i te reo Rusia eaha ïa e ore ai ta‘u tamaiti e manuïa i roto te reo marite ? » I muri a‘e i to‘u faaiteraa’tu i ta‘u tamaiti i te fifi ta‘u i farii no te haapiiraa mai i te reo Rusia e te a‘oraa a to‘u peresideni misioni, ua ani maua ia’na ia tai‘o ona ana‘e i te Buka a Moromona i te mau mahana atoa. Ua rave oia i te taime no te nana‘o peni i te mau parau Atua e Fatu ia ite ana‘e oia i ni‘a i te mau api. Aita i maoro roa ua na reira atoa oia i te parau Iesu. E i muri iho e iriti mai oia i te mau parau o ta’na i ite atu e e ui mai oia eaha to ratou auraa. E mea haapa‘o roa oia i te tai‘oraa i te mau mahana atoa e i te hopearaa o te matahiti ua maitai atu â ta’na huru tai‘oraa i te huru ta maua i mana‘o.
Tei roto ta maua tamaiti i te piha ono. E taata tai‘o faahiahia roa oia e te tauturu nei oia i te haapii i to’na nau taea‘e e tuahine apî no ni‘a i te horo‘araa ta’na i farii na roto i te tai‘oraa i te Buka a Moromona. Ua noaa i ta maua mau tamarii tata‘itahi te hoê aravihi rahi no te tai‘o e te tai‘o tamauraa i te Buka a moromona. Te haamata nei ratou i te ite i te puai o te varua no te parau mau o te Buka a Moromona a tupu ai to ratou iteraa papû i te rahi.