Pagpunting diha sa Buhat sa Ginoo kabahin sa Kaluwasan

Kini nga interbyu gihimo pinaagi ni LaRene Porter Gaunt kawani [staff] sa mga magasin sa Simbahan.

Sa usa ka interbyu sa mga magasin sa Simbahan, si Julie B. Beck, kinatibuk-ang presidente sa Relief Society, mipakigbahin sa iyang pagpamatuod kalabut sa Relief Society.

Imahe

Julie B. Beck

Unsa ang tahas sa Relief Society sa pagpalambo sa buhat sa Manluluwas?

Sister Beck: Isip mga sister sa Relief Society, kita nagkahiusa una ug labaw sa tanan tungod sa atong hugot nga pagtuo ni Jesukristo. Siya ang atong lider ug ehemplo. Ako mopamatuod sa pagkatinuod sa Iyang Pag-ula. Ako mopamatuod nga Siya buhi ug ang Iyang gahum tinuod.

Isip mga Santos sa Ulahing mga Adlaw, kita buot moduol ngadto kang Kristo. Sa dihang gitukod ni Propeta Joseph Smith ang Relief Society, siya miingon nga ang kababayen-an dili lamang mag-atiman sa mga kabus apan sa pagluwas usab sa mga kalag.¹ Kini mao gihapon ang atong katuyoan. Kita gikinahanglan nga moabag sa buhat sa Ginoo sa kaluwasan, nga mao “ang pagpahinabo sa pagka-imortal ug kinabuhing dayon sa tawo” (Moises 1:39).

Kita makasugod pinaagi sa pagpalig-on sa atong mga kaugalingon sa pagka-espirituhanon pinaagi sa pag-ampo ug paghimo nga sa kaugaligon mapaningkamuton diha sa kahibalo sa kasulatan. Kita modawat sa mga ordinansa, mga pakigsaad, ug mga kasugoan nga ang Ginoo mihatag kanato.

Kita makatabang sa pagpundok sa nagkatibulaag nga Israel. Aduna kitay katungdanan sa pagtabang sa pag-andam og mga misyonaryo, sa pagsangyaw sa ebanghelyo, ug sa pagtabang nga magpabilin kadtong kinsa nabunyagan. Aduna kitay responsibilidad sa pagtabang sa atong mga kaugalingon ug mga miyembro sa pamilya sa pagpangandam alang sa templo. Makatigum kita sa atong family history ug makatabang sa mga anak sa Ginoo nga mabugkos ngadto sa mahangturong mga pamilya.

Sa matag lakang, sa Relief Society kita makatabang sa matag usa sa pagduol ngadto kang Kristo pinaagi sa paghimo sa buhat nga kita gitukod sa pagbuhat.

Unsaon sa nagkapuliki nga sister sa Relief Society paghimo niining tanan?

Sister Beck: Ang maayo kaayo nga mga babaye niini nga Simbahan makasarang sa pagbuhat niini ug daghan pa—dili lamang nato mabuhat tanan og kausa. Mao nga importante kaayo nga unahon ang angay unahon ug sa paggamit sa atong mga kapanguhaan ug panahon diin kini magamit sa labing maayo—pag-abag sa buhat sa Ginoo.

Ang matag sister kinahanglang maningkamot sa pagbaton sa Espiritu Santo sa paggiya kaniya. Kon siya nagtabang sa Ginoo sa Iyang buhat, siya adunay katungod alang sa Iyang panabang.

Unsa ang nagtabang kaninyo nga makakat-on sa ka importante sa Relief Society?

Sister Beck: Sa dihang bata pa ako, ang akong amahan mialagad isip presidente sa nag-inusarang misyon sa Brazil. Dihay ubos pa sa 4,000 ka mga miyembro—kadaghanan kinsa adunay dakong potensyal apan dili pa andam nga mangulo. Dihay gamay lamang nga mga branch nga adunay Relief Society.

Ang akong inahan gitawag aron sa pagtukod og mga Relief Society sa misyon. Siya dili makasulti og Portuguese ug walay mga manwal. Unsa lamang ang diha kaniya mao ang pagpamatuod sa ebanghelyo ug sa Relief Society. Siya ug ang iyang mga magtatambag misugod pinaagi sa pagtabang sa mga sister sa pagkat-on unsaon nga mahimong mga visiting teacher.

Sila misugod sa ilang pagbansay sa usa ka branch sa São Paulo. Pito ka mapainubsanong mga babaye ang miapil sa miting. Ang magtatambag sa akong inahan, usa ka Brazilian, miabi-abi sa mga sister. Human sa pag-ampo, siya mibarug uban sa nagkurog nga mga kamot ug mibasa og usa ka mensahe nga nagpasabut sa visiting teaching. Dayon ang akong inahan mibarug. Siya nasayud og upat ka han-ay nga mga pulong sa Portuguese: “Ako nasayud nga ang Dios buhi. Ako nasayud nga si Jesus mao ang Kristo. Ako nasayud nga kita adunay buhi nga propeta. Sa pangalan ni Jesukristo, amen.” Ang miting nahuman. Siya migakos sa mga babaye ug nanamilit kanila.

Unsa ka mapainubsanong sinugdanan sa ingon nga talagsaong buhat! Sa katapusan, ang Relief Society natukod sa matag branch sa Brazil. Ang mga sister mitrabaho aron sa pagpangandam alang sa usa ka stake ug sa unang templo sa Habagatang Amerika. Sila nakat-on kabahin sa mga ordinansa ug mga pakigsaad ug unsaon pagluwas sa mga kalag.

Sa usa ka bahin, tungod kay ang mga sister sa Relief Society mitabang sa pagpalambo sa buhat sa Ginoo, ang Simbahan sa Brazil karon miabut na og kapin sa usa ka milyon nga mga miyembro. Sama niining mga sister sa Brazil, kita kinahanglan gayud nga mobuhat sa atong bahin. Walay usa nga makabuhat niini alang kanato. Kita dili makatugyan sa atong mga responsibilidad sa pagtukod sa gingharian ngadto ni bisan kinsa. Ato kini nga buhat. Ato kining dawaton ug magpakalabing maayo sa pag-ugmad og hugot nga pagtuo, paglig-on sa mga pamilya, ug sa paghatag og kahupayan.

Unsa ang mga panalangin sa pagpunting sa mga kalihokan sa Relief Society ngadto sa buhat sa Ginoo kabahin sa kaluwasan?

Sister Beck: Samtang kita nagpadayon sa buhat sa Ginoo sa pagluwas ug sa pagpanalangin sa mga kinabuhi, kita magkahiusa ug makatawag sa mga panalangin sa langit. Ako adunay panan-awon sa mga babaye niining Simbahan nga nagkahiusa sa gamhanang mga pamaagi. Ako nagtuo nga kon kita magtumong diha sa importante ug mobiya sa mga walay hinungdan, kita makabaton og pagsalig ug ang atong mga espiritu pagabayawon. Kita makasugakod nga mas maayo ug mobati nga wala kaayo bug-ati. Kita mahimong, sa tinuod, magkapuliki gihapon, apan kita magkapuliki sa pagbuhat sa buhat sa kaluwasan.

Unsaon sa Relief Society pagtabang kanato sa paghupot sa husto nga panglantaw sa kinabuhi niining nagkagubot nga kalibutan?

Sister Beck: Ang Relief Society maghatag og pagpanalipod niining makuyaw nga mga panahon. Ang leksyon matag Dominggo, mga kalihokan sa Relief Society ug mga miting, ug mga visiting teaching mao ang paagi unsaon nato pagbuhat ang buhat sa Dios ug paglig-on sa mga indibidwal ug mga pamilya.

Bisan tuod kita gihulga og mga isyu sama sa diborsyo, pagkadili masulundon, utang, pagkasubo, pagkawalay pagbati, ug adiksyon, kita dili mahimong makalimot nga kita usab nagpuyo og usa ka panahon nga ang Espiritu sa Dios gibu-bu ngari kanato. Kini mao ang adlaw sa diha nga ang ebanghelyo gisangyaw sa tibuok kalibutan, sa diha nga ang mga anak ni Israel gipundok, sa diha nga ang mga templo anaa sa yuta, ug sa diha nga kita adunay panalipod sa mga pakigsaad ug mga ordinansa sa priesthood.

Kita kinahanglan gayud nga mangayo og mas lapad nga panan-awon aron makita unsa ang nakita sa Ginoo. Kini nga buhat mas dako kay sa atong gihunahuna. Kita makahimong magmalampuson batok sa malimbungon ug determinado nga mga kaaway. Ang atong mga panimalay makahimo ug kinahanglan nga mahimong mga dapit nga kadangpan.

Unsa ang mabuhat sa mga leksyon sa Dominggo sa Relief Society?

Sister Beck: Ang katuyoan sa atong mga miting sa Dominggo mao ang pagtuon og dungan sa mga doktrina sa ebanghelyo. Ang mga babaye kinsa gitawag sa pag-alagad sa Primary, Young Women, ug ubang mga katungdanan makakat-on usab sa doktrina sa ebanghelyo diha sa ilang mga calling. Tungod kay ang atong tun-anan importante kaayo, ato gayud nga himoon nga ang sinugdanang bahin sa Relief Society mubo ug ligdong aron sa pagdani sa Espiritu alang sa pagtuon sa ebanghelyo nga mosunod.

Sa Relief Society kita magtuon sa Mga Pagtulun-an sa mga Presidente sa Simbahan, nga sunod-sunod nga mga manwal nga naghatag og propetikanhong mga pagtulun-an ug usa ka personal nga librariya niadtong mga pagtulun-an ngadto sa mga lalaki ug mga babaye sa Simbahan. Ang mga pulong sa mga propeta tataw ug dinasig. Kita dili makahimo—kita kinahanglan gayud dili—mahimong nunot-nunot ug walay pagpanumbaling sa atong pagtuon niini.

Kita nagtuon sa mga pulong ni Propeta Joseph Smith gikan sa labing nindot nga tinigum sa iyang mga sinulat nga sukad nahimo. Kini nga manwal mao ang resulta sa mga tuig nga pagsiksik ug mabinantayon nga pagribyu. Samtang ang mga kasulatan ug mga magasin sa Simbahan makapabuhong sa usa ka panaghisgutan, kita dili kinahanglang modugang sa mga pulong sa mga propeta og laing mga kasulatan, ilabi na og dili gikan sa Simbahan nga mga tinubdan.

Kita naghangyo sa atong mga magtutudlo sa pagpangutana og makahuluganong mga pangutana ug pag-awhag og dayag nga pag-ambitay. Ang Espiritu mao ang magtutudlo, ug kita kinahanglan gayud nga mangandam sa paagi nga Siya maanaa sa matag Dominggo nga leksyon.

Unsa ang mabuhat sa Relief Society nga mga miting sulod sa adlaw sa semana?

Sister Beck: Sa mga miting sa Relief Society sulod sa adlaw sa semana, atong gamiton ang mga doktrina sa kaluwasan. Ang atong panaghiusa ug panag-inigsoonay moabut sa natural nga paagi isip resulta sa pagtinabangay sa usag usa. Pananglitan, kita makakat-on sa kahanas sa pagsangyaw sa ebanghelyo ug sa pag-andam og mga misyonaryo. Kita makakat-on sa usag usa pinaagi sa family history. Samtang kita nagpalambo sa atong mga kahanas sa homemaking sama sa pagpanglimpyo, paghan-ay, pagluto, pagpanahi, ug paghimo og garden, kita nagkat-on sa pagmugna og usa ka kahimtang sa pag-amuma ug espirituhanong pagtubo sa atong mga panimalay.

Kita kinahanglan gayud usab makakat-on nga sa kaugalingon mapaningkamuton sa temporal nga mga butang sama sa edukasyon, pagpalambo sa panginabuhi, ug padayong pagkat-on sa teknolohiya. Kita kinahanglang magtipig og tagana sa pagkaon, ug kita kinahanglan makahibalo unsaon sa pagbadyet sa atong kwarta. Kita usab kinahanglang magtrabaho aron sa pagpalambo sa pisikal ug mental nga kahimsog.

Kon magplano niini nga mga miting ug mga kalihokan, atong kinahanglang timbang-timbangon ang atong bililhon nga mga kapanguhaan sa oras, enerhiya ug gipahinungod nga mga pundo. Gamita lamang kini sa pagtabang kanato sa pagpuyo sa ebanghelyo diha sa atong mga panimalay ug sa pagpalambo sa buhat sa Dios.

Unsaon nato pagtabang ang atong mga batan-ong babaye sa paghimo sa panahon sa pagbalhin ngadto sa Relief Society?

Sister Beck: Ang atong may talento nga mga batan-ong babaye nagtubo gikan sa pagkabatan-on ngadto sa pagkahamtong, ug ang mga sister sa Relief Society adunay katungdanan sa pagsiguro nga walay usa nga mawala kanila.

Ang mga batan-ong babaye natudloan sa paghupot sa ilang mga pakigsaad sa bunyag, ug diha sa Relief Society kita motabang kanila sa pag-andam og paghimog mga pakigsaad sa templo. Ang dyesiotso anyos nga mga sister sa Relief Society makapangulo og mga komite, makatudllo og mga kahanas, makatabang sa misyonaryo nga buhat, makaalagad isip mga visiting teacher, makaapil sa family history ug mga proyekto sa templo, ug bug-os nga mga kauban sa buhat sa pagluwas og mga kalag.

Unsa ang mabuhat sa visiting teaching?

Sister Beck: Ang mga visiting teacher nag-alagad alang sa Manluluwas. Ang atong mga kamot Iyang mga kamot, ang atong gugma Iyang gugma, ug ang atong serbisyo Iyang serbisyo.² Ang maayong mga visiting teacher nakaila sa sister nga ilang bisitahan. Sila nahigugma kanila, nag-alagad kanila, ug nagtabang kanila sa pagkat-on sa ebanghelyo pinaagi sa Espiritu. Sila nagpunting sa pagpalig-on sa mga panimalay ug mga kinabuhi. Walay laing mas nindot nga pribilihiyo kay sa magbantay ug maglig-on og ubang tawo—kini mao sa tinuod ang buluhaton sa kaluwasan.

Unsaon sa Relief Society paghimo og kalainan sa kalibutan?

Sister Beck: Ako nakigkita og usa sa grupo sa kababayen-an nga mga ministro sa kabinite ug mga miyembro sa parlamento gikan sa Kasadpang Africa kinsa nangutana kanako giunsa nato sa pagtabang ang mga babaye sa Africa? Ako mipasabut nga sa ilang mga nasud kita adunay daghang mga gipangtukod nga mga grupo sa kababayen-an, gitawag og mga Relief Society. Kami mipadala sa Handbook sa mga Panudlo sa Simbahan ngadto sa mga presidente sa matag grupo. Ang mga babaye magpundok sa kanunay aron magtuon sa ebanghelyo ug magkat-on unsaon sa pag-amuma sa ilang mga pamilya.

Ang presidente mobahin sa mga babaye sa Relief Society ngadto sa usa ka paresan ug mobisita sa mga babaye sa ilang mga panimalay, diin sila motimbang-timbang sa ilang mga panginahanglan. Aduna bay bisan kinsa nga nasakit? Aduna ba silay igong pagkaon ug sinina? Aduna ba silay igong edukasyon nga ilang gikinahanglan? Human sa mga pagbisita ang mga babaye mo-report unsa ang ilang nakita. Adunay usa nga nanginahanglan og sapatos, adunay usa nanganak, ug usa kanila nanginahanglan og trabaho. Sila mangutana kon sa ilang grupo aduna ba sila sa gikinahanglan nga mga kapanguhaan. Kasagaran aduna sila. Mao kana unsa ang among gibuhat ngadto sa atong kababayen-an sa Africa.

Samtang ako nag-istorya, kini nga mga babaye miyango sa ilang mga ulo ug mipahiyom. Ang usa kanila misulti ngari kanako, “Kana nga panig-ingnan epektibo alang sa among kababayen-an.”

Ako nagtuo nga ang Relief Society usa ka panig-ingnan nga epektibo sa tibuok kalibutan ug nga ang atong mga sister mao ang labing maayo, labing makahimo, labing dakong pwersa alang sa kaayohan sa yuta karon. Ako adunay pagsalig sa atong abilidad sa pagpalambo sa buhat sa Ginoo kabahin sa kaluwasan nga magkauban.

Paghulagway ni Sister Beck sa Busath Photography; paghulagway sa litrato PINAAGI NI John Luke; detalye gikan sa Si Kristo ug ang Batan-ong Adunahan nga Magmamando, ni Heinrich Hofmann, sa maayong kabubut-on sa C. Harrison Conroy Co.

Paghulagway sa litrato pinaagi ni Matthew Reier