O Nai Mea Itiiti Na Ia i Matou Na Lava Lea
Na oo mai le Kerisimasi, ae o le tausaga lenei na matou le faamanatuina ai i ni meaai ma ni meataalo se tele. Ua maliu Tama, ma na amata ona maua e Tina sina penisione laitiiti o se tina ua maliu lana tane, faatasi ai ma si tupe laitiiti mai lo matou fale na mautotogi ai se tagata.
Sa matou i ai uma i totonu o le potu malolo o lo matou fale, i Rio de Janeiro, Pasila. Na filemu le potu. Ona faafuasei lea ona ou faalogoina se pao na pei o se tagata ua taunuu mai i fafo o le fale.
Na ou tu i luga ma tilotilo atu i pola o le faamalama, lea na ou iloa atu ai le auala i lo matou fale. Na ou vaaia se fafine e leai sona fale. Na i ai ni nai ana ato ma ofuina ni lavalava masaesae. Na ou mataia o ia mo sina taimi, i lou fia iloa pe o le a lana mea o le a fai. Na ia tatalaina se tagapepa laitiiti, ma aumai i fafo ni nai kuki, ma amata loa ona ai. E lei umi ae ona tatalaina se isi tamai tagapepa na i ai ni nai sene ma amata loa ona faitau.
Na matuai ootia lava lou loto laitiiti, o lea na ou valaau lemu atu ai i lou tina, “O loo i ai se olomatua i fafo. Sau foi laia e vaai.” Na tilotilo atu i ai lou tina, ma na ootia foi o ia. Na fai mai o ia ou te alu e aumai le apa e tuu ai nai a matou tupe iti, ma e aunoa ma sina pao, na ia tuua ai le matou fale ma faatoulu filemu ifo tupe pepa mai le faamalama o le auala savali o le matou falemautotogi.
Sa ou tutu ai lava i le matou faamalama ma vaai atu i le toulu ifo o tupe pepa. Na vaaia e le olomatua le pau ifo o le tasi ma le isi ma le isi. I le taumafai ai e fia iloa po o fea na toulu mai ai le tupe, na tilotilo ae ai o ia i faamalama o le fale. Na tapunipuni uma lava. Ona tupu ai lea o se mea matagofie lava. Na tilotilo ae o ia i le lagi ma faaloloa atu i ai ona lima maanuminumi. Ona ia tuu lea o ona lima i lona fatafata ma faafetai atu mo le meaalofa na ia mauaina.
I tua mai o pola o le faamalama, sa ma fetagisi ai i le agaga faafetai ona o si tupe itiiti sa ia i maua na lava lea e tuuina atu ai le olioli i se tasi na itiiti ifo mea sa na maua.