O Lau Meaalofa Sili o le Kerisimasi
E lei leva lava ona atoa lou lua tausaga ae ma’i tigaina loa lou tina. Ona sa leai se tasi ma te nonofo, o lea na alu ai ma ave au i le falemai i Tupiza, Polevia. E lei umi ae maliu o ia, ma tuua toatasi ai na o au.
I le gasologa o lou laitiiti ma le popofou o ou tausaga o se talavou, na feaveai ai au mai lea nofoaga i le isi, ou te lei iloaina pe na faapei le lagona o le i ai o se aiga, ou te lei mauaina foi soo se ituaiga o meaalofa—e oo lava foi i ou aso fanau pe mo le Kerisimasi.
O le tuua na o au, na ou feagai ai ma le tele o luitau ma mea matautia a o ou tuputupu ae. Ae o le tausaga mulimuli na faatoa ou iloaina ai e lei faapea na tuua moni na o au ma sa i ai se aao e le mavaaia na puipuia au.
Ina ua 15 ou tausaga, na valaaulia ai au ou te nofo i se aiga o le Au Paia o Aso e Gata Ai. Na ave au e le la tama teine, na matua teisi atu nai lo au, i le Mutuale. Sa talia fiafia au e tagata uma iina ma sa popole uma mo au. Mo le taimi muamua i lou olaga talavou, ua fai ai au ma le alofa ma le agalelei e tagata.
Na faamasani atu au i faifeautalai, o e na amata aoaoina au. E lei umi ae ou iloaina na i ai sou Tama Faalelagi alofa, o le na puipuia au i lou olaga atoa. Na ou taliaina le talalelei ma ou papatiso ai i le afiafi na sosoo ma le Kerisimasi i le 1978. O lena afiafi na ou mauaina au lau meaalofa muamua o le Kerisimasi ma o loo ou faapelepele pea i ai: o le avea lea ma se tagata o le Ekalesia a le Alii.
Na mulimuli mai isi meaalofa. E lua tausaga mulimuli ane, na ou feiloai ai i se alii talavou o le sa le auai i le Ekalesia. Sa ou alu ma ave i le lotu, ma ina ua uma ona ia osia ana lava feagaiga o le papatisoga, na ma faaipoipo loa. Mulimuli ane, na faamanuiaina ai e le Tama Faalelagi maua ma lou toalua i se fanau e toatolu, o e na faamauina ia i maua mo le olaga nei ma le faavavau i le Malumalu o Buenos Aires Atenitina.
O aso a o ou laitiiti, na valaau au e tagata uma lava “o le teineitiiti matuaoti mativa.” Ina ua ou toe faamatalaina lenei mea e manatua i le aso, ou te lagona le agaga faafetai aua na ou maua le faamanuiaga o le iloa o loo i ai sou Tama, o le na alofaina lava au i taimi uma. Ua ou tofo ai foi i le alofa e le uma o le Faaola. Na Ia toefuataiina mai Lana Ekalesia e ala i le Perofeta o Iosefa Samita, o le na filifilia i le muai olaga ma na galue ma le filiga e faaliliu le Tusi a Mamona. Ou te iloa o loo i ai le atoatoaga o le talalelei.
Na ou mauaina lau meaalofa muamua ma le sili o le Kerisimasi i le 15 o ou tausaga, ma ua ou olioli ai lava i le agalelei o le Alii talu mai lava lena taimi. O loo ou lagonaina pea le agaga faafetai i lou loto mo lena meaalofa ma ou taumafai pea e tausia ma taulai atu i le olaga a sau, lea ou te faamoemoe ou te faafetai atu ai i le Tama ma le Alo ma nonofo ai e faavavau faatasi ma lou aiga peleina.