Mga Panaygon sa Tibuok Nasud
Ang musika ug pagkanta sa kanunay importante gayud sa akong pamilya. Samtang ako nagdako, ang akong igsoong babaye motugtug sa piyano samtang ang laing lima pa ka igsoon ug ako magpundok ug mokanta sa among mga paboritong kanta sa Simbahan. Kini nga panahon mao ang uban sa akong gikawilihan nga mga panunduman.
Human makatapos og high school, ako nagpuyo duol sa akong pamilya hangtud ako naminyo sa usa ka talagsaon nga lalaki kinsa napahimutang sa among lungsod uban sa U.S. Air Force. Usa ka tuig ug tunga ang milabay, ang akong bana ug ako, uban sa duha ka buwan nga anak nga babaye, gibalhin sa usa ka base sa tabok nga nasud. Kami nakabaton og lain nga anak, ug sa kadaghang gastosanan nga moabut uban sa duha ka gagmay nga mga bata, kami wala na nakabalik alang sa pagbisita sa among mga pamilya. Uban sa unom pa ka mga bata sa panimalay, ang akong mga ginikanan dili makahimo sa pagbisita usab kanamo. Nagpuyo nga layo sa akong mga ginikanan ug gimingaw sa akong bana tungod sa kanunay nga trabaho sa militar, ako sa kasagaran ubos sa pagbati nga nag-inusara. Ang mga adlaw nga walay trabaho mas lisud kaayo.
Sa Bisperas sa Pasko sa 1996, samtang ang akong bana ug ako nagbuhat sa among naandang Bisperas sa Pasko nga mga kalihokan uban sa duha ko ka gagmay’ng mga bata, ang akong hunahuna anaa kanunay sa akong mga ginikanan ug mga igsoon. Akong gitan-aw ang relo ug nasayud nga silang tanan naglingkod sa usa ka habol nga giayo sa pagpahiluna sa salog ug nangaon sa “piknik sa pagsaulog sa Pasko” nga may prutas, gagmay nga mga sausage, keso, mga cracker samtang ang akong amahan nagbasa sa kasaysayan sa pagkatawo ni Kristo gikan sa mga kasulatan. Sa akong hunahuna akong gilarawan ang ilang mga nawong. Ang ako lamang nawong ang wala didto.
Samtang ako namalandong, ako nag-ampo og usa ka paagi nga mobati nga mas duol ngadto sa akong pamilya. Diha-diha dayon, ang telepono mibagting, ug nakita nako ang akong kaugalingon nga nakig-istorya ngadto sa akong inahan. Siya miingon kanako nga siya adunay usa ka butang nga gusto niyang ipadungog kanamo. Akong gipindot ang speaker phone, ug kami naminaw samtang ang akong tulo ka manghud nga mga babaye nag-alirong sa piyano sa pamilya ug mikanta sa labing nindot nga bersyon sa “Do You Hear What I Hear?” Mga luha mipuno sa akong mga mata samtang ang akong bana ug ako naminaw sa tulo ka bahin nga ganay gikan sa among telepono. Hapit namo mabati nga ang akong pamilya sama ra nga anaa sa kwarto uban kanamo.
Ang ilang yano nga kanta midala sa among mga panimalay og makalipay nga espiritu sa Bisperas sa Pasko nga kanunay nakong mahalon. Sa tanang mga regalo nga among nadawat niana nga Pasko, daghang pinalit gikan sa mga tindahan ug nindot nga pagkaputos ug gipangmarkahan, kadtong matam-is nga kanta ang labing bililhon kanamo.