Malumalu Paia, Feagaiga Paia
O malumalu o ni maota paia ma mamalu. O le punavai o le mana ma le malosi faaleagaga. O ni nofoaga o faaaliga.
Ua tumu lou loto i le olioli ma le agaga faafetai a o ou mafaufau i lenei faatasiga tulaga ese o tamaitai i le lalolagi atoa. O se faamanuiaga le avea ai o se vaega o lenei usoga maoae, ua tasi i lo tatou naunau e faamalosi lo tatou faatuatua i le Alii o Iesu Keriso ma fausia Lona malo. Ou te tatalo ina ia taialaina au e le Agaga a o ou talanoa atu ia te outou i le mataupu e sili ona paia o tapuaiga i le malumalu.
O nofoaga aupito sili ona paia i luga o le fogaeleele o malumalu. O totonu o le malumalu, e maua ai e tagata agavaa o le Ekalesia ia faamanuiaga maoae e sailia e se tagata, a o tatou osifeagaiga ma le Atua. Tatou te fesoasoani foi ia maua e o tatou tuaa na lava faamanuiaga e tasi, o e na maliliu e aunoa ma le mauaina o sauniga tatau o le faaolataga.
O le a ou tautalagia le loloto o le taua o le fausiaina o malumalu, le mafuaaga e manaomia ai sauniga o loo faatinoina i malumalu mo lo tatou faaolataga, ma le auala e saunia ai e ulu atu i le malumalu.
Ua ou molimauina ma matuai faagaeetiaina lava i osigataulaga e onosaia e le toatele o tagata o le ekalesia ina ia oo atu i le malumalu. Sei ou faasoaina atu se tasi o tala faapena.
I le 1976, a o matou nonofo ai i Costa Rica, na talosagaina ai e le peresitene o le misiona lo’u toalua e fesoasoani atu i le faatulagaina o le malaga muamua lava mai le misiona i se malumalu. O le Misiona a Amerika Tutotonu i aso la na aofia ai Costa Rica, Panama, Nicaragua, ma Honduras. O le malumalu na sili ona latalata atu o le Malumalu o Mesa Arisona. O le malaga na manaomia ai ona matou malaga atu i ni aso se lima, ma toe foi mai i ni aso se lima, ma sopoia ai ni tuaoi se ono. O le ositaulaga i tulaga tautupe a le toatele o i latou na malaga sa matua maoae lava. Na latou faataueseina a latou televise, uila, laupapa faasee i le auala, ma soo se mea lava na mafai ona latou faatauina atu. Sa matou malaga i ni pasi se lua na matua le lagolelei i le po ma le ao. O nisi o tagata na faaaogaina uma a latou tupe i le totogiina o pasese o le pasi, ma aveina ai na o ni masi ma pata e taumamafa ai i le ala.
Aisea e faia ai e tagata o le Ekalesia i le lotomalie ma le fiafia ia nei osigataulaga maoae ina ia o atu i le malumalu?
E le mafai ona ou faagaloina le maoae o le liligiina mai o le Agaga na matou lagonaina i aso e tolu na matou faaaluina i le Malumalu o Mesa. Sa matua ou ootia lava a o ou vaaia tagata o aiga o feofoofoai ma le maligi o loimata ina ua maea ona faamauina mo le faavavau.
O le lua sefulufa tausaga mulimuli ane na faapaiaina ai le malumalu o San José, Costa Rica. O nisi o i latou na auai i le sauniga na ou auai, o le toatele o aiga o e na malaga i lena uluai malaga i le malumalu. Sa latou faatalitali ma le faamaoni ma le agavaa mo lenei taimi paia. Ua mafai nei ona latou auai uma e le aunoa i le malumalu, aua e lei mamao atu nei ona faapaiaina se malumalu i Panama ma ua fofogaina mai foi se malumalu mo Honduras.
Na fetalai mai e le aunoa le Alii i Lona nuu ina ia fausia ni malumalu. Na poloaiina Mose e le Alii: “Ia latou faia foi mo au se malumalu; ou te nofo ai faatasi ma i latou.”1 O le malumalu feaveai na latou fausia na avea o se nofoaga tutotonu o tapuaiga a Isaraelu i le taimi o la latou malaga i le nuu o le folafolaga. O lona mamanu ma le fausaga sa faaali mai e le Alii ia Mose. O le a avea ma maota paia o le Alii.
Mulimuli ane, na fausia ai e le Tupu o Solomona se malumalu i Ierusalema na faaaoga ai ni mea faufale sili ona lelei na maua.2
I le taimi o Lana galuega i le lalolagi, na taua ai e le Alii le malumalu o se nofoaga paia ma aoao mai ia faaaloalo i ai.
Na fausia foi e sa Nifae ni malumalu i le Alii i Amerika. Sa latou faapotopoto atu i le malumalu i le taimi na faaali mai ai Keriso ia i latou ina ua mavae Lona Toetu.3
E lei leva ona toefuatai mai le Ekalesia i lenei tisipenisione, ae poloaiina e le Alii le Au Paia ina ia fausia se malumalu: “Ia outou faatulagaina; ia saunia mea tatau uma, ma faatuina se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le tulaga maopoopo atoatoa, o se fale o le Atua.”4
I le tali atu, na fausia ai e le Au Paia le Malumalu o Katelani i se osigataulaga sili ona maoae. I totonu o lenei malumalu paia, na toefuatai mai ai ki taua o le perisitua, ma na faapea ona faaali mai ai le Faaola lava Ia.5
I le taimi nei, ua 128 malumalu o loo faagaoioia i le lalolagi atoa, ma le isi anoano o loo fausia.
Ua faatonuina i tatou ina ia fausia malumalu ina ia mafai ona faataunuuina ai sauniga paia mo e o soifua ma e ua maliliu. O nei sauniga e aofia ai sauniga o le mulumuluga, faaeega paia, faaipoipoga, faamauga, papatisoga mo e ua maliliu, ma faamauga.
O sauniga o le mulumuluga ua tuuina mai ai ia i tatou ni faamanuiaga faapitoa i le taimi nei ma le lumanai.
O le faaeega paia e aofia ai feagaiga paia. E aofia ai le mauaina o faatonuga, mana mai luga, ma le folafolaga o faamanuiaga pe afai tatou te faamaoni i feagaiga tatou te osia.
Na faamatalaina e Peresitene Polika Iaga ia faaeega paia i le ala lenei:
“O lou faaeega paia o le mauaina lea o sauniga uma i le maota o le Alii, ia e tatau mo oe, pe a e tuua lenei olaga, ina ia mafai ai ona e toe foi atu i le afioaga o le Tama … ma maua lou faaeaga e faavavau.”6
O sauniga o le faamauga, e pei o faaipoipoga i le malumalu, e fusia faatasi ai aiga e faavavau.
O feagaiga tatou te osia ma sauniga e o faatasi ai, ia tatou te maua i le malumalu, e avea ma o tatou faamaoniga o le agavaa mo le taliaina i le afioaga o le Atua. O nei feagaiga e siitia ai i tatou i tua atu o tuaoi o o tatou lava mana ma vaaiga. Tatou te osia feagaiga e faaali atu ai lo tatou tuuto i le fausiaina o le malo. E avea i tatou ma tagata o le feagaiga a o tatou osifeagaiga ma le Atua. O faamanuiaga folafolaina uma e a tatou ia e ala i lo tatou faamaoni i na feagaiga.
O le malumalu o se fale o le aoaoga. O le tele o aoaoga e tuuina mai i le malumalu o ni faatusa ma e aoaoina e ala i le Agaga. O le uiga o lenei mea, e aoaoina i tatou mai luga. O feagaiga ma sauniga o le malumalu o se faatusa mamana lea o Keriso ma Lana Togiola. Tatou te mauaina uma faatonuga tutusa, ae o lo tatou malamalama i le uiga o sauniga ma feagaiga o le a faateleina a o tatou foi atu e le aunoa i le malumalu ma le agaga o le aoaoina ma le mafaufau i upu moni e faavavau na aoaoina ai.
O le tapuai i le malumalu e tuuina mai ai avanoa e auauna atu ai i e ua maliliu e ala i le faataunuuina o sauniga sui mo i latou. O le sailia o talafaasolopito o aiga e mafai ona faia e soo se tasi i fafo atu o puipui o le malumalu, ae o sauniga paia e manaomia e o tatou tuaa ua maliliu mo lo latou faaeaga, e na o totonu lava o malumalu e mafai ona faataunuuina ai.
O le malumalu o le maota o le Alii. Na te taitaia tulaga o loo faaaogaina ai, o sauniga e tatau ona faataunuuina, ma tulaga faatonuina tatou te agavaa ai e ulu atu ma auai i tapuaiga i le malumalu.
Na fetalai le Alii ia Mose, “Ina toe ese ia ou seevae i ou vae, aua ua sa lava le eleele o loo e tu ai nei.”7 I le Salamo tatou te faitau ai, “O ai ea se alu ae i le mauga o Ieova? o ai se tumau i lona afioaga paia?
“O le ua i ai lima mama, ma le loto mama, o le ua le naunau lona loto i le mea faatauvaa, ma ua le tauto faaoleole.”8 O Lona maota e paia ma e leai se mea eleelea e mafai ona ulu atu i ai.9
Ua filifilia e le Alii le epikopo ma le peresitene o le siteki e nafa ma le iloiloina o le agavaa o tagata taitasi ina ia maua se pepa faataga e ulu atu ai i Lona maota paia. E tatau ona tatou faamaoni aiai i lo tatou epikopo ma le peresitene o le siteki pe a la faatalanoaina i tatou a o lei tuuina mai se pepa faataga o le malumalu. O le meaalofa tatou te aveina atu i le fata faitaulaga o se loto mama ma se agaga salamo. O le agavaa o le tagata lava ia o se tulaga manaomia taua ina ia olioli ai i faamanuiaga o le malumalu.
Tatou te saunia e ala i le usitai i poloaiga ma saili e fai le finagalo o le Atua. Afai e te lei malaga atu i le malumalu, ia amata sauniuni i le taimi nei, aua a oo i le taimi e te maua ai le avanoa, ua e saunia ma agavaa.
A tatou o atu i le malumalu, ia faamama o tatou mafaufau ma loto mai mafaufauga ma lagona ia e le ogatasi ma aafiaga paia o le malumalu. Tatou te faia foi ni laei tauagafau, ma talafeagai ma le mamalu. O o tatou laei ma foliga vaaia mo lenei sauniga paia, o faailoga ia o lo tatou faaaloalo ma le migao i le Alii ma Lona maota paia. O le taimi lava tatou te oo atu ai i totonu o le malumalu, tatou te sui ai i laei papae, ua faatusaina i le mama ma le atoatoa. Ua tatou saunia loa e auai i le tapuaiga filemu ma le faaaloalo i le malumalu. O lenei faamanuiaga e faavavau e maua e tagata uma o e ua agavaa mo le mauaina.
O a ni mea e mafai ona fai e tamaitai o le Ekalesia e maua ai faamanuiaga o le malumalu?
E ala mai i Ana perofeta, ua valaaulia ai e le Alii i latou o e e lei mauaina le faamanuiaga o le malumalu ina ia faia soo se mea e manaomia e agavaa ai mo le mauaina o faamanuiaga. Ua Ia valaauliaina i latou o e ua uma ona maua nei sauniga ina ia toe foi atu e le aunoa pe a mafai ina ia toe olioli ai i le aafiaga, ia faateleina lo latou silafia ma le malamalamaaga i Lana fuafuaga e faavavau.
Ia tatou agavaa e maua se pepa faataga o loo aoga pea o le malumalu. Ia tatou o atu i le malumalu e faamau o tatou aiga mo le faavavau. Ia tatou toe foi atu e le aunoa i le malumalu pe a faatagaina e o tatou tulaga. Ia tatou tuuina atu i o tatou aiga ua maliliu le avanoa e maua ai sauniga o le faaeaga. Ia tatou olioli i le malosi faaleagaga ma le faaaliga tatou te maua a o tatou auai atu e le aunoa i le malumalu. Ia tatou faamaoni ma ia osia ma tausia feagaiga o le malumalu ina ia maua ai faamanuiaga atoatoa o le Togiola.
Ou te molimau atu ia te outou o malumalu o ni maota paia ma le mamalu. O le punavai o le mana ma le malosi faaleagaga. O ni nofoaga o faaaliga. O ni maota o le Alii. I le suafa paia o lo tatou Faaola ma le Togiola, o Iesu Keriso, amene.