Mauaina o le Olioli i le Faigamalaga
Ia tatou olioli i le olaga a o tatou ola ai, saili ia maua le olioli i le malaga ma faasoa atu lo tatou alofa i uo ma aiga.
Ou uso e ma tuafafine pele, ua faalotomaualaloina lava au e tu atu i o outou luma i lenei taeao. Ou te talosagaina lo outou faatuatua ma talosaga mo au, a o ou tautala atu e uiga i na mea ua oo mai i lo’u mafaufau, ma ua uunaia au ou te faasoa atu ia te outou.
Ou te amata atu i le ta’ua o se tasi o vaega aupito tupito o o tatou olaga i luga o le fogaeleele, ma o lena mea o le suiga. E i ai se taimi ua tatou faalogo uma ai lava i se ituaiga o anaga masani e faapea: “E leai lava se mea e oo mai pea lava pea e pei o le suiga.”
I o tatou olaga atoa, e tatau lava ona tatou feagai ma suiga. O nisi suiga e talia, a o nisi foi e leai. E i ai suiga i o tatou olaga e faafuasei, e pei o le maliu faafuasei o se pele, o se gasegase e lei muai iloa, o le leiloa atu o se meatotino tatou te faapelepele i ai. Peitai, o le tele lava o suiga e faato’ato’a ma faifai malie.
O le konafesi lenei ua atoa i ai le 45 tausaga talu ona tofia au i le Korama a Aposetolo e Toasefululua. I le avea ai ma le uso aupito fou o le Toasefululua i lena taimi, sa ou vaavaai a’e i tamalii e toa 14 o e sa sinia ia te au i le Toasefululua ma le Au Peresitene Sili. Ua taitasi, ma toe taliu atu nei tamalii i luga. Ina ua tuumalo Peresitene Hinckley i le valu masina talu ai, sa ou iloaina ua avea au ma Aposetolo sinia. O suiga o se vaitau e 45 tausaga lea sa auaua’i a ua foliga mai ua matua maoae naua.
O le vaiaso a sau nei, o le a ma faamanatuina ai ma Sister Monson le 60 tausaga o la ma faaipoipoga. Pe a ou toe tepa i lo ma amataga, ona ou iloa ai lea o le tele o le suiga o o ma olaga talu mai lena taimi. Ua maliliu o ma matua pele, o e sa matou tutu faatasi ina ua amata la maua malaga fai faatasi. O le ma fanau e toatolu, o e ua faatumulia atoa o maua olaga mo le tele o tausaga, ua matutua ma ua fai foi o latou lava aiga. Ua matutua foi le toatele o a latou fanau, ma o lea ua toafa fanau a a latou fanau.
O lea aso ma lea aso, o lea minute ma lea minute, sekone ma lea sekone, sa ma malaga mai ai i le mea lea ua ma i ai i le taimi nei. Ioe, o olaga o i tatou uma, e tali faapena foi fetuutuunaiga ma suiga e feagai ai. O le eseesega o suiga i lo’u olaga ma suiga o outou soifuaga, ua na o ni faamatalaga. E le tumau le taimi i le mea e tasi; e tatau ona savali punouai i luma, o le savaliga foi e aumai ai ma suiga.
Na pau lenei o lo tatou avanoa i le olaga faitino—o iinei ma le taimi nei. O le umi ona tatou ola, o le tele foi lena o lo tatou iloa e puupuu. E oo mai avanoa, ona toe mou atu foi lea. Ou te talitonu o nisi o lesona silisili e tatau ona tatou aoaoina i lenei malaga puupuu i le fogaeleele, o lesona ia e fesoasoani tatou te iloa ai po o le a le mea e taua, ae o le a foi le mea e le taua. Ou te aioi atu ia te outou, ina ia aua lava nei e faaseloaina na mea aupito taua, a o e fuafua mo lena lumanai taufaasese ma e le’i oo mai, pe a i ai sou taimi e fai uma ai mea uma e te manao e fai. Nai lo lena, ia e maua le olioli i le malaga—i le taimi nei.
E faaigoa au e lo’u toalua o Frances o se “faamama’i i faafiafiaga.” Ou te fiafia lava i ata faamusika, ma o se tasi ou te fiafia lava i ai, sa tusia e se fatutala Amerika o Meredith Wilson e faaulutala “The Music Man.” O Polofesa Harold Hill, o se tasi o tagata autu o le ata, na ia faaleoina mai se lapataiga lea o le a ou faasoa atu ia te outou. Fai mai a ia: “A lava ni taeao e te faaputuputuina, ona e iloa lea o le tele o ananafi gaogao sa e aoina.”1
Ou uso e ma tuafafine, e leai se taeao e manatua pe afai tatou te le faia se mea i le aso.
Sa ou faamatalaina atu talu ai se faataitaiga o lenei tofamanino. Ou te talitonu e le afaina le toe fai atu. E tele tausaga ua mavae, sa tusia ai e Arthur Gordon i se mekasini a le atunuu, ma ou te faitauina atu:
“Ina ua tusa ua sefulutolu o’u tausaga ae sefulu lo’u uso, sa folafola mai e Tama e ave i ma’ua i se faaaliga. Ae ina ua oo i le ‘aiga o le aoauli, sa i ai se telefoni: e i ai se pisinisi faatopetope na manaomia ai o ia i le taulaga. Sa ma sauniuni mo se tala le fiafia. Ona ma faalogo atu lea ia te ia o [fai i le telefoni], ‘Leai, ou te le alu atu. E tatau ona faatali.’
Ina ua toe sau o ia i le laulau, sa ataata Tina. ‘E te iloa oe, e toe foi mai foi le faaaliga,’ [o le tala lea a le tina].
“‘Ou te iloa,’ le tala a Tama, ‘ae e le toe foi mai le olaga faatamaitiiti.’”2
Afai e i ai sau fanau ua tutupu ae ma o ese atu, atonu e te lagonaina i lea taimi ma lea taimi lagona matuitui o le mou atu, ma le iloa e te lei talisapaia lena taimi o le olaga i le mea sili sa tatau ona e faia ai. Ioe, e leai se toe foi i tua, ae na o le alu i luma. Nai lo lou nopiai i le taimi ua tuanai, ua tatau ona tatou faia le mea silisili i le taimi nei, iinei i le taimi nei, ia faia mea uma tatou te mafaia ina ia saunia ai ni manatua matagofie mo le lumanai.
Afai o lena lava e te i ai i le faagasologa o le tausiga o fanau, ia e nofouta i nai tulagalima laiti e vaaia e toetoe o folaluga uma ua faatoa uma ona faamama, o meataalo e paepae solo i le fale, o faaputuga o tagamea e tatau ona fai, o le a vave ona mou atu ma o le a e—ofo—i lou matua misia.
E mai mafatiaga i o tatou olaga tusa lava pe o a o tatou tulaga e i ai. E tatou ona tatou taulimaina i le mea sili tatou te mafaia. Peitai, e le tatau ona tatou faatagaina na mea e faalavelave ai le mea e aupito sili ona taua—ma o le mea e aupito sili ona taua, e toetoe o taimi uma e aofia ai tagata o loo siomia ai i tatou. E tele taimi tatou te faapea ai; ua tatau ona latou iloa le tele o lo tatou alolofa ia i latou. Peitai ia aua lava nei o tatou manatu faapea lava; e ao ona tatou ta’u atu i ai ia latou iloa. Na tusia e Viliamu Siekisipia, “Latou te le alolofa pe a le faaalia mai lo latou alofa.”3 O le a tatou le faanoanoa lava i upu agalelei e tautalagia po o le agaalofa foi e faaalia. Ae, o le a oo mai lo tatou faanoanoa pe afai e aveesea na mea mai a tatou fegalegaleaiga ma i latou e sili ona tatou alolofa i ai.
Auina atu lena feau i se uo sa e le amanaiaina; opo atu lau tama; opo atu i ou matua; fai soo atu i ai “Ou te alofa ia te oe”; ia faailoa atu e le aunoa lau faafetai. Ia aua lava nei avea le foiaina o se faafitauli ma mea e sili ona taua nai lo se tagata e tatau ona e alofa i ai. E siitia uo, e tutupu ae fanau, e maliliu foi e pele. E matua taua lava ona le manatu mamafa i isi, seia oo i lena aso ina ua mou ese atu i latou mai o tatou olaga ae tuua ai i tatou ma lagona o le “e a pe a” ma le “maimau pe a na.” Fai mai le tusitala o Harriett Beecher Stowe, “O loimata aupito oona e maligi i luga o tuugamau, o loimata ia o upu e lei faaleoina ma galuega e lei faia.”4
I le vaitau o le 1960, i le taimi o le Taua i Vatename, sa fanaina ai i Viatename Matu ia Jay Hess, o se avevaalele, ma o se tagata o le Ekalesia. E lua tausaga e le o iloa e lona aiga pe ua maliu o ia pe o soifua foi. Sa iu ina faatagaina o ia e i latou na faapagotaina o ia, e tusi i lona aiga, ae ia i lalo ifo o le 25 upu lana feau. Mata o le a se mea e te fai atu ai ma ou fai atu ai i o tatou aiga pe a na o tatou i ai i lena lava tulaga—ua silia ma le lua tausaga e le o fevaaia’i, ma e le mailoa foi pe toe fevaaia’i? O le manao ina ia ta’u atu i lona aiga se mea e mafai ai ona latou iloa o se feau mai ia te ia, ma le manao foi ina ia tuu atu ia i latou se fautuaga taua, na tusia ai e Uso Hess—ma ou te faitauina atu: “O mea nei e taua: faaipoipoga i le malumalu, misiona, kolisi. Fetuleni atu i luma, faatutu ni sini, tusi talafaasolopito, tapue taifaalua ata i le tausaga.”5
Ia tatou olioli i le olaga a o tatou ola ai, saili ia maua le olioli i le malaga ma faasoa atu lo tatou alofa i uo ma aiga. E i ai se aso, o le a tofu le toe maua ai e i tatou ni taeao.
I le tusi a Ioane i le Feagaiga Fou, mataupu e sefulutolu, fuaiupu e tolusefulufa, o loo apoapoai mai ai le Faaola ia i tatou: “Ia outou fealofani, faapei ona ou alofa atu ia te outou.”
Atonu e masani nisi o outou i le tala faatino masani o le O Lo Tatou Taulaga. Afai tou te masani ai, o le a outou manatua le taulaga o Grover’s Corners, lea e fai ai le tala lea. I le tala, na maliu Emily Webb ina ua fanauina sana tama, ma ua tatou faitau ai i le matua faanoanoa o lona toalua talavou o George, ua tuua ma lona atalii e fa tausaga le matua. E le manao Emily e maliu filemu; e manao o ia e toe oo i mea sa olioli ai i lona olaga. Sa to atu ia te ia le avanoa e toe foi mai ai i le fogaeleele ma toe faamanatu lona aso fanau lona 12. I le taimi muamua, sa mālie le toe talavou, ae na vave ona toe mou atu le manaia. Sa leai se fiafia e maua i se aso, ua iloa nei e Emily le mea o loo teuina i le lumanai. E matua le mafai ona onosaia le tiga o le iloa, na te matuai le iloa lava le uiga ma le matagofie o le olaga a o ola. A o lei toe foi atu i lona tuugamau, sa tagiaue Emily, “O … silafia ea e tagata soifua le olaga a o latou soifua ai, i minute uma, taitasi?”
O lo tatou iloaina o le mea e aupito sili ona taua i le olaga e o faatasi ma le lotofaafetai mo o tatou faamanuiaga.
Fai mai se tasi tusitala logologoa: “O le tamaoaiga ma le leai [o se tamaoaiga] e i ai faatasi lava i o tatou olaga, o ni mea moni e faafeagai. O la tatou filifiliga mautinoa e le aunoa lava po o le fea togalaau natia tatou te ano i ai … A tatou filifili e aua nei taulai atu i mea e le o i ai i o tatou olaga, ae lotofaafetai i mea e tele o loo i ai—alofa, soifua maloloina, aiga, uo, galuega, ma olioliga o le natura ma tulimataiga patino ia tatou te maua ai le [fiafia]—ona mou ese atu ai lea o le nuu tafuna taufaasese ae tatou iloaina le Lagi i le fogaeleele.”6
I le Mataupu Faavae ma Feagaiga, vaega e 88, fuaiupu e 33, ua ta’u mai ai ia i tatou, “Aua se a le aoga i se tagata afai ua foai atu ia te ia se mea alofa ae na te le talia le mea alofa? Faauta, e le olioli o ia i le mea ua foaiina atu ia te ia, e le olioli foi i le na foaiina atu ai le mea alofa.”
Na aoao mai le faitofamanino anamua a Roma o Horace, “Po o le a lava le taimi e faamanuiaina ai oe e le Atua, ia talia ma le faafetai, pe tolopoina lou fiafia mai lea tausaga i lea tausaga, ae afai o fea lava sa e i ai, e mafai ona e faapea, sa e ola fiafia ai.”
O ni tausaga se tele ua mavae, sa faagaeetia ai lava au i le tala ia Borghild Dahl. Sa fanau o ia i Minesota i le 1890 e ni matua Nouei, ma mai lava i lona laitiiti sa matua pagatia o ia i le faaletonu o lana vaai. Sa naunau lava o ia e auai i gaoioiga fai o le olaga i aso uma, e ui lava ina le atoatoa lona malosi ma, o le malosi o lona naunautai, sa faamanuiaina ai [o ia] na toetoe lava i mea uma sa ia faia. E ui lava ina sa feteenai ma le fautuaga a faiaoga, o e na manatu na tuga tele ona mafatiaga, ae sa a’oga lava o ia i le kolisi, ma maua ai lona tikeri o le tagata malaga mai le Iunivesite o Minesota. Sa aoga mulimuli ane o ia i le Iunivesite o Kolomupia ma le Iunivesite o Oslo. Na iu lava ina avea o ia ma puleaoga i ni aoga se valu i Minesota i sisifo ma North Dakota.
Sa ia tusia faapenei i se tasi o tusi e 17 sa ia tusia: “Sa na o le tasi lo’u mata, ma sa ufitia uma i mailaila mafiafia, o lea sa ou faaaogaina ai sina tamai avanoa o le mata tauagavale ou te taupulapula ai. Faatoa ou iloa se tusi pe a faapipii mai i ou foliga ma matuai toso lo’u mata e tasi i le malosi ou te mafaia i le tauagavale.”7
O le mea e ofo ai, i le 1943—ina ua silia ma le 50 ona tausaga—na atiina ae ai se faiga fou lea na iu ai ina toe maua le tele o lana vaaiga lea ua leva na te lei mauaina. Na tatalaina se lalolagi fou ma le matagofie i ona luma. E matua fiafia tele o ia i mea laiti lea e le amanaiaina e le toatele o i tatou, e pei o le matamata i se manulele o lele, matauina ataata o le la i oa fasimoli o lana masini fufuluipu po o le matauina o foliga o le masina i po taitasi. Sa ia faaiuina se tasi o ana tusi i upu nei: “Le Tama … pele oi le lagi, ou te faafetai i Lau Afio. Ou te faafetai i Lau Afio.”8
O Borghild Dahl, a o lei maua ma ina ua toe maua lana vaaiga, sa faatumulia i le loto faafetai mo ona faamanuiaga.
I le 1982, i le lua tausaga a o lei maliu o ia i le 92 o ona tausaga, na lolomiina ai lana tusi mulimuli. Na faaigoaina: Fiafia i Lo’u Olaga Atoa. O ona uiga o le loto faafetai na mafai ai ona ia talisapaia ona faamanuiaga ma ola ai i se olaga fiafia ma le tamaoaiga e ui lava i ona luitau.
I le Tesalonia Muamua i le Feagaiga Fou, mataupu e 5, fuaiupu e 18, o loo tau mai ai e le Aposetolo o Paulo ia i tatou, “Ia outou faafetai i mea uma lava: aua o le finagalo lea o le Atua.”
Tatou mafaufau faatasi i le tala i lepela e toa 10:
“Ua oo atu [Iesu] i le tasi aai, ona fetaiai lea ma ia o tagata lepela e toatinoagafulu, ua tutu mamao mai i latou:
“Ua latou alalaga mai, ua faapea mai, Le Alii e, Iesu, ia e alofa mai ia te i matou.
“Ua silafia e ia, ona fetalai atu lea o ia ia te i latou, Ina o ia, ia faaali atu outou i faitaulaga. Ua latou o, ona faamamaina lea o i latou.
“O le tasi o i latou, ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele,
“Ua faapau fao ia i ona vae, ua faafetai mai ia te ia: o le Samaria foi o ia.
“Ona fetalai atu lea o Iesu, ua faapea atu, E lei faamamaina ea le toatinoagafulu? A o ifea le toaiva?
“Ua le iloa ni e toe foi mai e vivii atu i le Atua, na o lenei tagata ese.”9
Na fetalai le Alii i se faaaliga na tuuina mai e ala i le Perofeta o Iosefa Samita, “E leai se mea e faia e tagata e tausuai ai le Atua, pe faatupuina ai lona toasa i nisi, tau lava o e le tautino atu e i ai lana pule i mea uma.”10 Talosia ia maua faatasi i tatou ma i latou o e tuuina atu la tatou faafetai i lo tatou Tama Faalelagi. Afai ua faitaulia le le lotofaafetai i agasala ua sili ona mamafa, o lona uiga foi o le loto faafetai e i ai lona nofoaga i uiga e sili ona mamalu.
E ui lava i suiga o loo faapea ona oo mai i o tatou olaga, ae faatasi ai ma ni loto faafetai, ia tatou faatumulia o tatou aso—i le tele e mafai ona tatou faia—i na mea e sili ona taua. Talosia ia tatou faapelepele ia i latou o e pele ia i tatou ma faailoa atu lo tatou alolofa ia te i latou i le upu ma le amio.
I le faaiuga, ou te tatalo mo i tatou uma ina ia tatou faaali atu le agaga faafetai mo lo tatou Alii ma le Faaola o Iesu Keriso. O Lana talalelei matagofie ua aumai ai tali i fesili e sili ona taua o le olaga: O fea na ou sau ai? Aisea ua ou i ai iinei? O fea e alu i ai lou agaga pe a ou oti?
Sa Ia aoao mai ia i tatou le ala e tatalo ai. Sa Ia aoao mai ia i tatou le ala e auauna atu ai. Sa Ia aoao mai ia i tatou le ala e ola ai. O Lona soifua o se talatuu o le alofa. Sa Ia faamalolo i e mamai; sa Ia sii ae i e puapuagatia; sa Ia faaolaina le tagata agasala.
Na oo mai le taimi na tuua ai na o Ia. Sa masalosalo nisi o Aposetolo; na faalataina o Ia e le isi. Na tutui e fitafita Roma Lona itu. Na fasiotia o Ia e tagata leaga. Ae o loo tagitagi mai pea i le mauga o Kolokota Lana fetalaiga agalelei, “Lou Tama e, faamagalo i latou; aua ua latou le iloa le mea ua latou faia.”11
I se taimi na muamua atu, atonu sa [Ia] silafiaina lava le faaiuga o Lana misiona i le lalolagi, sa Ia fetalai ai i le auega lenei, “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.”12 O le “leai o se avanoa i le faletalimalo”13 sa le o se faaaliga e tasi o le teenaina—ae ua na o le taimi muamua lena. Ae ua Ia valaaulia oe ma au ina ia maua o Ia. “Faauta, ou te tu atu i le puipui ma tuitui atu: ai se tasi e faalogo mai i lou leo, ma tatala mai le puipui, ou te ulufale atu ia te ia, ma te talisua foi ma ia, o ia foi ma au.”14
O ai lenei Tagata faanoanoa, na masani ma le tiga? O ai le Tupu mamalu, le Alii o au? O Ia o lo tatou Matai. O Ia o lo tatou Faaola. O Ia o le Alo o le Atua. O Ia o le Pogai o lo tatou faaolataga. O loo Ia valaau mai, “Mulimuli mai ia te au.”15 O loo Ia fetalai mai, “Ina alu ia, ma ia e faapea ona fai.”16 O loo Ia augani mai, “Tausi au poloaiga.”17
Ia tatou mulimuli atu ia te Ia. Ia tatou faataitai i Ana faataitaiga. Ia tatou usitai i Ana afioga. O le faia faapea, ua tatou avatu ai ia te Ia le meaalofa faalelagi o le lotofaafetai.
Uso e ma tuafafine, o la’u tatalo faamaoni, talosia ia tatou masani i suiga i o tatou olaga, ma ia tatou iloa mea e taua, ina ia tatou faaali atu o tatou lotofaafetai e le aunoa, ma maua ai le olioli i le faigamalaga. I le suafa o Iesu Keriso, amene.