CAVU IKALAWA VATA ENA VAKABAUTA
Sa Wanonovi Iko Tiko o Vuravura
Mo dina vua na Turaga kei na Nona Lotu. Mo dau masu ka wilika na ivolanikalou. Maroroya na nomu veiyalayalati ka dau vakarorogo ki na vakasolokakana ni Yalotabu. Ena vukei iko na Turaga ni ko sotava na veivakatovolei kei na bolebole.
Oqo na gauna ni toso ki liu ena vakabauta. Oqo na gauna mo laurai ni ko muria tiko na vunau ni Kalou. Mo bulataka tiko kina na nomu vakabauta ena masumasu kei na talairawarawa. Ni ko bula voli ena vakabauta ena nomuni vakamuria vakadodonu sara tiko na ivakatagedegede oqo, ko na kune marau kina ka levu na madigi mo wasea kina na kosipeli kei na nomu vakabauta vei ira na tani. Ko na bula vakacegu ka sega ni ko vesuki tu ni ko muria na ivakatagedegede oqo.
Ni ko toso ki liu ena vakabauta, ko na tauca na veivakalougatataki sa yalataki tu ka na sovaraka vei iko na Turaga na Nona Yalotabu. Ni sa dusimaki iko tiko na Nona Yalotabu, ko na kila na ka mo cakava kei na ka mo rawata ena veituvaki kece, ko na maroroya tiko kina na nomu veiyalayalati ni papitaiso ka dau nanumi Koya tikoga.
Era sa vakasalataki na iliuliu ni itabagone ena yabaki ni bula kece me ra bula voli ena vakabauta ka talairawarawa vakaidina. O iratou o Nifai, Josefa Simici, Ruci, kei na vuqa tale era a bula voli ena vakabauta ni ra talairawarawa tiko vua naTuraga kei ira na Nona parofita.
Sa ikemuni na itabagone sucu turaga, e dua na itabatamata vakaturaga vakaivotavota. Ena vakamawe na nomuni vakabauta ena dua na vuravura e vakasaqara tiko na vinaka kei na rarama. Sa wanonova tiko o vuravura na nomuni ivakaraitaki kei na veiliutaki. O koya gona “me caudre vakakina na nomudou rarama ena matadra na tamata, me ra raica na nomudou ivalavala vinaka, ka vakarokorokotaka kina na Tamamudou sa tiko mai lomalagi” (Maciu 5:16).