Raici rawa e dua na isema
E a se mataboko tu mai o Chen, Yang Su-yuan mai na yabaki 1981, ena gauna sa tekivu ca mai kina na matana ni oti e dua na veisele ni matana a saila. Ia ni sa mai sega ni rai rawa oqo sa vukea kina me raica rawa na kosipeli ka veivuke sara vakalevu vua me raica na bibi ni cakacaka ni valetabu kei na tuva kawa.
Ni sa mai mataboko toka ena dua na gauna sa oti, e a sega ni kila o Sisita Chen ni o irau na goneyalewa erau kere wai erau daukaulotu. Na nona a sureti rau e loma a veisautaka na nona bula.
“E vuqa na tamata era kaya niu tawayaga baleta niu mataboko,” e kaya o Sisita Chen. “Ia o ya e sega ni ka e vinakata na Kalou me tukuna vei au. E a vakauti rau mai na daukaulotu niu sa mataboko oqo me rau tuberi au meu kila ni da sa luve ni Kalou taucoko ka sa volia na noda bula ena dua na isau sa cecere sara. Au sa kila na kequ ivoli ni sa sauma o Jisu. Au sega ni voli rawa.”
Mai na gauna o ya, sa lesi oti o Sisita Chen ki na vuqa sara na veikacivi ena Tabanalevu o Chung Li First Ward, ena Iteki o Tao Yuan Taiwan, ka vakakina na nona cakacaka ena valetabu vakatekivu mai na 1992.
Ia ena sega walega ni ko ya na veivakatovolei ena sotava o Sisita Chen na nona sa mai mataboko oqo. Ena 1987 a voleka ni mate o koya ni a tauvi koya e dua na mate vuce ka a sele laivi kina e dua na sui ni sarisarina. E a bula mai kina, ia na isau ni nona qaravi vakavuniwai a vakaotia sara ga kina na ilavo maroroi ni nona bula taucoko. E a lomatarotarotaka voli se cava e sega ni kauti koya kina na Kalou.
E kaya o koya ni kaya na Kalou, “E levu na ka e dodonu mo cakava.”
Ni oti toka ga vakalailai, a yaco yani vua na veikacivi ni tuva kawa.
“Au a vakasamataka voli, ni’u na cakava beka vakacava na noqu tuva kawa kevaka au sega tu ni rai rawa?” e kaya o koya. “Ia e a sega ni takali rawa na yalo veivakauqeti o ya.”
Mai na nona veivuke e dua na itokani voleka, e sa vakadikeva rawa o koya e 22 na itabatamata ni nona kawa ni matavuvale taumada ka vakayacora rawa na nodra cakacakatabu vakalotu na marama. E sa cakacaka tiko oqo o koya ena veitabana veisemati. Ni toso tiko na cakacaka, sa yaco me kila rawa o koya na kedrau isema tudei na cakacaka ni valetabu kei na tuva kawa.
“E vuqa sara na cakacakatabu vakalotu eda ciqoma ena loma ni valetabu, ka ra sa bibi dina kece sara,” e kaya o Sisita Chen. “Ia e dodonu me da cakava na noda tuva kawa. Eda sega ni rawa ni vakayacora na nodra cakacakatabu vakalotu na tubuda taumada ke sega na tuva kawa ni matavuvale.”
“E rau sa duabau ga, na cakacaka ni valetabu kei na cakacaka ni tuva kawa” e kaya o Elder Dennis B. Neuenschwander ena Vitisagavulu. “Na vakadidike ni tuva kawa e dodonu me imatai tiko ni ivurevure ni yaca me baleta na cakacakatabu vakalotu e valetabu, ka ra sa inaki taumada ni kena vakayacori na vakadidike ni tuva kawa.”1
E sa tauvi Sisita Chen tiko ena gauna oqo e dua na mate vou kei na revurevu ni dua na mate ni uto vakasauri. Ni oti e ruasagavulu na yabaki mai na gauna a taroga kina na Kalou se cava na vuna a biuti koya kina, sa vaka me taroga tale tiko o koya na taro o ya—ka dua tikoga mai na kena isau. “E sega beka niu sa tukuna oti vei iko?” e vakila ni kaya mai o Koya . “E se vo tiko na nomu cakacaka ni valetabu.”
Sa mai tomana tiko kina na veiqaravi ena valetabu o Sisita Chen me yadua na macawa ena veivula.
“Sai koya oqo na veika me da na vakayacora me baleti ira na noda itubutubu taumada ni ra sega ni rawa ni ra cakava vakai ira,” e kaya o koya. “Ena kequ ituvaki, sa sega ni rawa vei au meu vakagaunataka na noqu cakacaka me vakataki ira era cakacaka tu kei na veika tale eso. Sa gadrevi ga meu sa cakacaka ga vakaukauwa ena gauna oqo ni’u se rawata tiko.”