Taro kei na Kena iSau

“Ena dua na siga au a wilika tiko na 1 Nifai 7:12, ka tukuna tiko ni sa rawarawa vua na Turaga me cakava na ka kecega ena vukuda kevaka eda sa vakabauti Koya. Eda na vakabauta beka vakacava na Karisito?”

• Na vakabauti Jisu Karisito sa kena ibalebale na dinati Jisu Karisito tiko ka nuitaki Koya ga.

• Na vakabauta sai koya na kaukauwa me na vakaraitaki mai kina na Nona lewa ena nomu bula.

• Na vakabauta, sa isolisoli mai vua na Kalou, e yaco mai ni ko sa bula dodonu tiko.

• E tolu na iwase bibi me baleta na vakabauta me na wiliki o ya na Iperiu 11, Ica 12, kei na Moronai 7.

Liaona

Na vakabauta sai koya na noda dina ka nuidei tiko vua na Turaga. Na nomu vakabauti Koya sa dua na kaukauwa ka na muataki iko mo vakamuria na Nona kosipeli, kei na nomu talairawarawa ena vukea me qaqaco na nomu vakabauta, ka sai koya o ya na isolisoli mai vua na Kalou.

Me vaka e tukuna tu na ivolanikalou, ni kevaka ko sa vakabauta tiko na Turaga, sa rawa me vakayacora na veika kecega o Koya ena vukumu, me vakataka na veivakabulai, veivosoti, veivakacegui, ka veisautaki iko. Ia na vakabauta oqo e sega ni kena ibalebale mo tukuna vua na Kalou na ka me cakava vei iko. Sa kena ibalebale mo nuitaki Koya tiko ka kila vakavinaka ni veivakalougatataki taucoko sara era yaco mai “ni sa rawa vua” (1 Nifai 7:12) kei “na gauna sa lewa ko koya, io ena sala sa kilikili vua” (V&V 88:68). Me kena ivakaraitaki, ena rairai sega beka ni saumi mai vakatotolo na nomu masu. Ia na nomu vakabauta sa na vakadeitaka tiko vei iko ni sa dau rogoca na nomu masu na Tamada Vakalomalagi ka na sauma mai ena kena gauna donu.

Ena kena gadrevi me tauyavutaki ka cakacakataki na nomu vakabauta, (1) mo vulica na vosa ni Kalou, ena nomu wilika na ivolanikalou se vakarorogo kivei ira sa tu vei ira na lewa me ra veivakavulici (raica na Roma 10:17). Ena nomu kila na vosanikalou ena vukea mo raica rawa kina ni Kalou sa dau dina ena Nona iyalayala.

(2) Vakayacora sara na veika o sa vulica rawa, se me vaka e tukuna o Alama, mo vakatovotovo sara ga ena vosanikalou. Na vosanikalou sa vaka e dua na sorenikau. Kevaka sa ka vinaka, ena vakarabailevutaka na ituvaki ni yalomu, ena vakararamataka na nomu vakasama, ka sa na tekivu me kamikamica vei iko (raica na Alama 32:28). Sai koya o ya na nomu veivakadeitaki vakayalo ni sa dina sara na vosanikalou, ka na tara cake na nomu vakabauta.

(3) Talairawarawa ki na ivakaro. Na nomu bula dodonu ena yaco me kadre ena nomu bula na isolisoli ni vakabauta. Vakaraitaka sara na nomu vakabauti Jisu Karisito ena nomu vakamuria na Nona ivakaraitaki kei na ivakavuvuli. Vakayacora ga na veika sa kerea tiko vei iko o Koya ena ivolanikalou, mai na nodra ivakavuvuli na parofita bula, kei na veivakauqeti ni Yalotabu. Kena ivakaraitaki, ko a vakamuria beka na kerekere nei Peresitedi Gordon B. Hinckley mo wilika na iVola i Momani ni bera ni cava na yabaki 2005? Kivei ira era a cakava era a vakayacora ena vakabauta ka ra sa ciqoma na veivakalougatataki sa yalataki kina. (E dina, kevaka o se bera ni wilika vakaoti na iVola i Momani, e se rawa tikoga mo cakava!)

Ena gauna era bula voli tiko kina e lewevuqa na tamata ka ra sega tu ni vakabauta na Turaga, sa dredre sara me ra rawata na bula tawamudu kevaka era sega ni vakabauti Koya. Ena kosipeli walega i Jisu Karisito—kei na vakabauti Koya ka sa imatai ni kena ivakavuvuli—sa rawa me ra marautaka na “bula tawamudu, oqo na isolisoli uasivi duadua ni Kalou” (V&V 14:7).

Dauwiliwili

Au vakabauta ni noda yalodina tiko vua na Karisito kei na Nona kosipeli sai koya na sala vinaka duadua me da vakaraitaka kina ni da sa lomana ka vakabauti Koya tiko. Ena gauna eda sa bulataka tiko kina na Nona ivakavuvuli kei na ivakarau ka muria tikoga na salatu sa vakatakila vei keda, eda sa vakadinadinataka tiko sega kivei Koya walega ia kivei ira talega na tamata ena noda bula oqo. Eda sa vakadinadinataka tiko kina na noda vakavinavinaka ena vuku ni Nona solibula me baleti keda ka vakakina na kena Vakalesuimai na kosipeli.

Jan V., 17, Moravia, Czech Republic

Na noda vakabauti Jisu Karisito sa kena ibalebale me da sa vakararavi sara ga vakatabakidua Vua ka mo sa vakadeitaka tiko ena nomu vakasama kei na yalomu ni sa bula dina tiko o Koya ka sai Koya ga na noda iVakabula. Sa dodonu ga me da nuitaka tiko na Karisito baleta ni sa kila vinaka ga o Koya na ka me vukei keda kina me da vorata rawa na veika dredre ni bula oqo. Ni lailai na noda vakabauti Koya ena vakavuna me da veilecayaki vakalevu ena veika ni noda bula vakayalo ka cakitaka na yalayala ni Kalou kivei keda. Na noqu rai vagumatua tikoga vua na iVakabula sa vukei au meu tudei tikoga ena kosipeli, meu kakua ni rere, ka vorata rawa na veika e veivakataotaki.

Natalia N., 19, Chimborazo, Ecuador

Vaqaqacotaka na nomu vakabauta ena nomu talairawarawa vua na Karisito. Ni sa mate ga na vakabauta ni sa sega na cakacaka. Ni da talairawarawa ka sega ni kila na vuna, eda sa vakaraitaka tiko kina na noda sa vakabauti Koya tiko. Na kena vakamuri na ivakaro sa vakaraitaka tiko ni da sa nuitaki Koya ka vakabauta na veika sa tukuna tiko vei keda me da vakayacora. Na noqu dau masu ka wilika na ivolanikalou ena veisiga sa dau vaqaqacotaka na neirau veiwekani kei na Tamada Vakalomalagi, ka yaco kina meu vakabauti Koya vakalevu cake. Ka vakakina, mo na dau namaka dina tiko ni na saumi mai na nomu masu. Masuta na veivuke mo rawata kina na vakabauta.

Meghan S., 18, Missouri, USA

Sa rawa me da cakacakataka na noda vakabauta ni da vakatara na Turaga me liutaka na noda bula. Ni da nuitaka na Kalou, ka vakamuri Koya, ka cakacaka vagumatua ena kena maroroi na ivakaro, sa rawa me da na vakabauti Koya tikoga. Ni da sa solia taucoko na noda bula Vua, sa rawa me da vakadinadinataka na cakamana cecere ena noda bula kei na nodra bula o ira era bula vakavolivoliti keda tu.

Dmitriy Z., 21, Donetsk, Ukraine

E vuqa sara tu na sala me da cakacakataka kina na noda bauta na Kalou me vakataka na wiliki ni ivolanikalou kei na masu ena veisiga, vakatabuya na Siga ni Vakacecegu, solia na nomu ikatini kei na isolisoli ni lolo, ka qaravi ira na tani, ka solia na yaloda me da maroroya na ivakaro tale eso.

Seng S., 18, Battambang, Cambodia

Ena gauna eda vakabauta kina na veivuke kei na kaukauwa ni Turaga, sa qai rawa kina me da toso yani ki liu ka nuitaki Koya ga. Na noda talairawarawa ki na ivakaro sa ivakaraitaki ni da sa vakabauti Koya tiko. Au sa kila mai na vu ni yaloqu taucoko ni sa vinakata tu o Koya me na vakalougatataki keda vakalevu sara ka sa ka bibi sara kina na talairawarawa kei na vakabauta me rawati kina na veika oqo.

Marco C., 18, Liguria, Italy

Kevaka sa tu vei keda na kila ni kosipeli ka tu vei keda na vakabauta ni kena dina, sa qai gadrevi sara me da bulataka me da rawata kina na kena veivakalougatataki. Ni sa mate ga na vakabauta ni sa sega na cakacaka. Kevaka sa qai tu na vakabauta ka cakacakataki, sa qai qaqaco vakalevu cake kina na vakabauta. Ena 1 Nifai 7:12, sa tukuni tale kina vei keda ni sa dodonu ga me da vakabauta tikoga na Kalou. Na noda yalodina tiko sai imatai ni ikalawa me tarai cake kina na vakabauta.

Otgonchimeg B.,15, Töv, Mongolia

Sa rawa me da vakabauti Jisu Karisito ena noda vakararavi vakatabakidua ka nuitaka tiko na Nona vuku tawayalani rawa kei na kaukauwa tawamudu. E dua na sala totoka me da vakayacora rawa kina na veika oqo o ya me da dau sauma tiko na noda ikatini, ni sala oqo eda sa vakaraitaka tiko kina ni da sa rawa ni biuta na veika vakavuravura ka ciqoma na veivakalougatataki cecere sa yalataki tu.

Samantha L., 15, Zamboanga del Sur, Philippines

Eda sa vakabauta na Karisito ni da laki lotu, dau masu, wilika na ivolanikalou, ciqoma na veikacivi eso, veivutunitaka na noda ivalavala ca, vakaivotavota ena sakaramede, ka gumatuataka na noda ilesilesi.

Adam N., 18, Georgia, USA

Na inaki ni isau ni taro vakaoqo o ya me veivukei ka veivakararamataki, e sega ni vakasama ni vakabauta ni Lotu.

O koya gona ni veigauna kece o vakatovolea kina na nomu vakabauta, o ya, mo cakacaka ena bula kilikili ena dua na kila, ko na ciqoma na ivakadinadina ni Yalotabu. Na veiyalo kece oqo ena vaqaqacotaka na nomu vakabauta. Ni ko vakayacora tikoga na veika o ya ena kaukauwa sara na nomu vakabauta… . Mai na kena vakayacori tikoga ena yaco na vakabauta me dua na kaukauwa veivakayavalati, qaqa, veivakatataki ka veivakauqeti ena nomu bula.”

Elder Richard G. Scott ena Kuoramu ni iApositolo Le Tinikarua, “Na Kaukauwa Veitokoni ni Vakabauta Ena Gauna ni Veilecayaki kei na Veivakatovolei,” Liaona, Me 2003, 76.