Faatasia i le Tatalo
O toleniga amata o le Militeli e faigata tele, aemaise lava le faaleagaga. Sa siomia au i gagana masoa ma faatosinaga leaga. O le tatalo ma faamanuiaga faaleperisitua na ou maua ai le malosi e tumau ai pea, ma sa ou naunau lava ina ia sili atu se mea ou te maua nai lo tatalo faaletagata lava ia. Talu ai ona sa faia sa’u misiona, na ou iloaina ai le malosi ma le lotogatasi lea e oo mai i le tatalo faatasi ma se soa. O le lotogatasi o le mea lea e tasi na mautinoa sa le’i i ai i la matou vaega e toa 56 o alii felelei.
Na tuanai le tolu vaiaso o a matou toleniga amata, ae sa matou tauivi lava ina ia matou faifai mea faatasi ma galulue o se au. I le faafesootaia ai o alii ofisa laiti, na ou talosagaina ai se faatagaga e faia ai se lotu i afiafi mo soo se tasi e fia auai. O le mea na ou ofo ai, e le gata ina sa latou malilie i ai ae na latou lagolagoina foi le manatu.
E toaono alii [o le ea] na o mai i le lotu muamua. Ina ua uma ona ili le pu ma tape moli, sa matou faaaogaina loa se moliuila e faitau ai nai fuaiupu mai le Feagaiga Fou na faatatau i luitau na matou feagai. Ona fai lea o le matou tatalo, na talosagaina ai ina ia i ai le Agaga o le Atua ma i matou ma ia matou faafetai mo mea na matou maua.
Na faasolosolo lava ina toatele alii na auai i a matou lotu. E le i umi ae faaopoopoina la matou numera i le 15. O nisi taimi matou te faitauina ai fuaiupu o le Tusi Paia; o nisi o taimi matou te faitau mai le Tusi a Mamona. O afiafi uma lava, soo se tasi lava na manao e tatalo na tuu i ai le avanoa.
O se tasi alii o le na sau i la matou faigalotu na tau lava ina faalogologo i le taimi muamua. Ina ua oo i lona taimi e tatalo ai, sa talosaga mai ina ia faamisi o ia. Ae i ni nai vaiaso mulimuli ane, na auai ai loa, ma tatalo ai i le tasi afiafi ina ia fesoasoani i lona aiga ma faafitauli na i ai, ma ia faamalosia o ia i vaiaso mulimuli o toleniga. Sa ia faapea mai, o le a ia misia a matou faatasiga pe a faauma a matou toleniga ma ua fuafua o ia e fai ana tatalo i po taitasi a o lei moe.
Ao faia la matou tatalo faatasi ma le matou vaega i se taimi mulimuli ane, na ia faaalia ai lona agaga faafetai ona sa taliina ana tatalo mo lona aiga. Ma le isi, sa ia faapea mai, na faamalosia o ia, o lea na maua ai lona lototoa e faaauau ai toleniga amata.
O le po ae matou te le’i taape i aoga faatino na tofia i ai i matou, na faamatala mai e lenei lava alii e faapea, a o le i sau i toleniga amata, na laitiiti ni aoaoga na ia iloaina e uiga i le Atua ma sa le’i talitonu ia te Ia. Ae i le uma ai ona matou faitauina o tusitusiga paia ma vaai i faataitaiga na faia e isi alii na tatalo, na amata ai ona tuputupu ae lona faatuatua. Sa ia faailoa mai o le tatalo muamua na ia faia ma le matou vaega, o le tatalo muamua lea na ia faia i lona olaga.
Ma e pei ona sa ou faamoemoeina, o a matou faigalotu na aumaia ai le lotogatasi i la matou vaega. Ae na sili atu mea na faia ai nai lo lena: na faamalosia ai i matou taitoatasi ma fesoasoani ina ia matou tetepa ae ai i lo tatou Tama Faalelagi.