O Afioga a Keriso—O Lo Tatou Liahona Faaleagaga
Ia tatou tuuina ma le faatuatua ia afioga a Keriso i totonu o o tatou mafaufau ma totonu o o tatou loto.
Ou te iloa o se faaaloaloga ma se faamanuiaga le auai faatasi ma tagata o le Ekalesia i le lalolagi atoa i le lagolagoina o le Au Peresitene Sili ma le Korama a Aposetolo e Toasefululua o ni aposetolo, tagata vaai ma tali faaaliga. Matou te tautino atu ma le lotomaualalo e faapea, o i latou o ni “molimau faapitoa o le suafa o Keriso i le lalolagi atoa …” (MFF 107:23). Matou te molimau atu latou te “tautala atu e pei ona musuia i latou i le Agaga Paia. Soo se mea foi o le a latou tautala atu ai pe a musuia i latou i le Agaga Paia, o le a faia ma tusitusiga paia, ma loto o le Alii, ma mafaufauga o le Alii, ma upu a le Alii, ma leo o le Alii, atoa ma le mana o le Atua i le faaolataga” (MFF 68:3–4). Na fetalai mai le Faaola: “Pe fai atu i lo’u lava leo po o le leo o a’u auauna, ua tusa lava ia” (MFF 1:38). Tatou te folafola atu i le lalolagi o nei auauna a le Alii i aso e gata ai e saunoa atu i afioga a Keriso.
Na fetalai mai le Faaola, “E suesue outou i tusi; aua … o loo molimau ia te au” (Ioane 5:39). Na tusi atu le Aposetolo o Paulo i lana soa faatuatuaina o Timoteo e faapea: “O Tusi Paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu” (2 Timoteo 3:16). Matou te folafola atu i le lalolagi e faapea, o le Tusi a Mamona o le tusitusiga paia, na tuuina mai e ala i musumusuga a le Atua. E aoga foi e aoao ai, e aoai ai, e faatonu ai, ma e faapoto ai foi i le amiotonu.
Matou te matuā folafola atu o le Tusi a Mamona o le Afioga a le Atua, na faaliliuina mai faamaumauga anamua e ala i le meaalofa ma le mana o le Atua. O lenei faamaumauga anamua sa tusia ma faasaosaoina ina ia oo mai i le faataunuuina o valoaga, e avea o se tusitusiga paia e vaavaalua ma le Tusi Paia—o tusi e lua ina ia avea ma se tusi e tasi i aao o le Alii (tagai Esekielu 37:16–20). I totonu o le Tusi a Mamona, ua apoapoaiina ai i tatou ina ia “fiafia i afioga a Keriso; aua faauta, e faaalia mai ia te outou i le afioga a Keriso mea uma tou te faia” (2 Nifae 32:3). Matou te molimau atu o le Tusi a Mamona o le molimau lona lua lea i le soifuaga ma le misiona a le Faaola. E moni lava, o se “Tasi Molimau ia Iesu Keriso.” Matou te folafola atu o le Tusi a Mamona o loo i ai afioga a Keriso.
I le ono selau tausaga ao lei soifua mai le Keriso, na faatonuina ai e le Alii le Perofeta o Liae anamua, e tuua e ia ma lona aiga ia Ierusalema ae malaga atu i se faigamalaga ofoofogia, o le a aveina atu ai i latou i le isi itu o sami e tele, i se nuu o le a avea ma se “nuu ua folafolaina” mo i latou. O le Tusi a Mamona o le faamaumauga faatusitusiga paia o le i ai o nei tagata i le konetineta o Amerika anamua. O loo i ai tusitusiga ma faaaliga faaperofeta na tuuina atu i nei tagata. O loo aofia ai foi i nei fesootaiga paia ia le tele o valoaga e uiga i le soifua mai o le Faaola, Lana talaiga, ma Lana taulaga togiola maoae. Sa latou faamatalaina Lona faasatauroga ma lona Toetu, ma muai faailoa mai foi Lona afio ifo i na tagata Amerika anamua. Tatou te faitau i le Tusi a Mamona e faapea, ina ua mavae Lona toetu mai, ma ina ua mavae Lona afio ae i le lagi, na faaali moni atu Iesu Keriso lava Ia ia i latou. Faafofoga ma lagona le faamatalaina o lenei mea ofoofogia i le talafaasolopito.
“O lenei foi, ua oo ina faapotopotoina faatasi le motu o tagata e toatele …
“Ua latou … fetautalatalaai ia Iesu Keriso, o Le na tuuina mai ai le faailoga i lona maliu.
“Ua oo foi … ina o latou fetautalatalaai faapea, ua latou faalogo i le leo, e peiseai ua sau mai le lagi; ma … ua le malamalama ia te i latou le leo na latou faalogoina; … e le o se leo saua, e le o se leo tele; e ui lava, … ina itiiti le leo, ua ati ai i totonu o i latou o e na faalogo i ai, ua iu ina leai se itu o latou tino ua le faagateteina; ioe, ua ati lava i o latou agaga, ma ua mu ai o latou loto.
“Ua oo foi … ina toe lagona e i latou le leo, a ua le malamalama ai ia te i latou.
“Ua atu tolu foi ona latou lagona le leo, ma ua uai atu o latou taliga e faalogologo i ai; ma ua faasaga atu o latou mata i le mea na sau ai le leo; ma ua latou tulimatai ae i le lagi, i le mea na sau ai le leo.
“Faauta foi, o le atu tolu ua malamalama ai ia te i latou le leo na latou faalogoina, ma ua fetalai mai ia te i latou:
“Faauta, o lo’u Atalii Pele, ou te fiafia ia te ia, ua ou faamamaluina lo’u igoa ia te ia—ia outou faalogologo ia te ia.
“Ua oo … ina ua malamalama ia te i latou, ua latou toe faasaga ae o latou mata i le lagi; faauta foi, ua latou iloa atu le Tagata ua afio ifo nai le lagi; ma ua ofu o ia i le ofu sinasina; ma ua afio ifo ma tu o ia i totonu ia te i latou; …
“Ma ua oo foi ina faaloaloa atu e ia lona aao, ma ua fetalai atu i le nuu, ua faapea atu:
“Faauta, o au o Iesu Keriso, o Le na molimau ai Perofeta, e sau i le lalolagi.
“Faauta, o au o le malamalama ma le ola o le lalolagi; ua ou inu foi i lena ipu oona na tuuina mai ia te au e le Tama, ma ua ou faamamaluina le Tama i le aveina i ou luga o agasala a le lalolagi, ua tigaina au i le finagalo o le Tama i mea uma talu le amataga.
“Ua oo foi ina fetalai atu e Iesu o nei upu, ona faapauu ai lea le motu o tagata uma i le eleele, aua ua latou manatua, sa valoia ia te i latou, e faaali Keriso e ia lava ia te i latou, pe a mavae lona afio ae i le lagi” (3 Nifae 11:1–12).
Sa faamanuiaina e le Faaola ia tagata ma aoao atu ia i latou Lana talalelei mamalu, e pei lava sa Ia faia i Ierusalema. Ua faamanuiaina i tatou i le i ai i totonu o itulau o le Tusi a Mamona ia Ana afioga, e moni lava o afioga lava a Keriso, e pei ona fetalaia i na tagata o anamua.
Ina ua poloaiina ia Liae ma lona aiga e tuua Ierusalema, sa tuuina atu ia i latou se meafaigaluega paia lea na galue o se tapasa mo i latou, na faaali atu ai ia i latou le ala e tatau ona latou malaga ai. Tatou te faitau ai, na o lo latou faatuatua lava i le Atua na mafai ai ona galue le tapasa. O Alema, o se perofeta o le Tusi a Mamona, sa ia tau atu i lona atalii o Helamana e faapea, o le tapasa sa taua o le “Liahona” (tagai Alema 37:38). Sa ia faapea atu:
“O lenei foi, lou atalii e, ou te loto ina ia malamalama ia te oe, e le aunoa nei mea ma le ata, aua e pei ona faapaie o tatou tama i lenei tapasa, (o lenei, o la le tino nei mea), sa le manuia ai i latou; e faapea lava i mea i la le agaga.
“Aua faauta, e tusa le faigofie o le usiusitai i le afioga a Keriso e faasino ia te oe le ala sao i le olioli faavavau, ma le usiusitai o tatou tama i lenei tapasa, na faasino ia te i latou le ala sao i le nuu sa folafolaina.
“O lenei foi, ou te fai atu, e le o i ai ea le faatusa i lenei mea? Aua e pei ona faamaoni lenei faasino ala i le taitaiina o tatou tama i le nuu sa folafolaina, ina ua latou savavali i lona ala, e faapea lava ona avea i tatou e le afioga a Keriso, i tala atu o le vanu o le puapuaga, i le nuu e sili ona lelei ua folafolaina, pe a tatou savavali i lona ala.
“Ioe, lou atalii e, aua nei tatou faapaie ona o le faigofie o le ala” (Alema 37:43–46).
Uso e ma tuafafine, o lea ua tatou iloa, e mafai ona avea afioga a Keriso ma Liahona mo i tatou taitoatasi, e faasino mai ia i tatou le ala. Aua nei tatou faapaie ona o le faigofie o le ala. Ia tatou tuuina ma le faatuatua ia afioga a Keriso i totonu o o tatou mafaufau ma loto, e pei ona tusia i tusitusiga paia ma e pei foi ona fofogaina mai e perofeta soifua, tagata vaai ma talifaaaliga. Ia tatou faatuatua ma maelega i le fiafia ai i afioga a Keriso, aua o afioga a Keriso o le a avea ma o tatou Liahona faaleagaga, latou te tau mai ia i tatou mea uma e tatau ona tatou faia. Ou te tuuina atu lau molimau faamaoni e uiga i lenei mea, i le suafa o Iesu Keriso, amene.