Auala e Ola Lelei Ai i le Lotolotoi o le Amioleaga
A faaauau pea ona taulai atu lou mafaufau ma lou loto i [le Alii], o le a fesoasoani o Ia ia te oe ina ia e maua se olaga tamaoaiga ma le fiafia, tusa lava pe o a mea e tutupu i le lalolagi o loo siomia ai oe.
Ua tuuina mai i lenei konafesi ni fautuaga silisili e tetee atu ai i le tulaga vaivai ua i ai le lalolagi. Ua tuu i tatou e se perofeta a le Atua, Peresitene Gordon B. Hinckley, i tulaga ma avanoa i se vaaiga manino atoatoa. O loo faamanino mai i ni ana saunoaga se lua talu ai nei i taitai perisitua ma ausilali, lena faaaliga faaperofeta. Muamua, e faatatau i le lu’itau ua tatou feagai:
“O le aiga e masani ai, ua matuai osofa’ia lava. Ou te le iloa le leaga o mea sa i ai i le taimi o Sotoma ma Komoro… . Ua tatou vaaia ia tulaga faapena i nei aso. Ua manumalo i le salafa o le lalolagi. Ou te manatu ua tatau ona tutulu lo tatou Tama a o Ia silasila ifo i Ona atalii ma afafine le usiusitai.”1
O le taimi nei, e tusa ai ma o tatou avanoa tulaga ese:
“Mata lava o ai na iilu ma talotalo i popofou o le Ekalesia, e mafai ona tatou maua lenei vaitau o avanoa lea ua tatou ola ai? … O loo i ai le Ekalesia i se tulaga matagofie … O le a tuputupu ae ma malosi… . Ua ia te i tatou le avanoa ma se luitau e faaauau ai lenei galuega tele, e le mafuatia i manatu lona lumanai.”2
Ua ia te oe se filifiliga. E mafai ona milomilo ou lima ma le atuatuvale mo le lumanai, pe filifili foi e faaaoga apoapoaiga na tuu mai e le Alii, e ola ai i le filemu ma le fiafia i se lalolagi ua tumu i le leaga. Afai e te filifili e gaua’i atu i le itu pogisa, o mealeaga o le a oulua fetaia’i. O le tele o le lalolagi, ua lilofia i se tafega o se vaitafe o mea mataga, ua lafoa’i ese ai le amioatua, amiotonu, faamaoni patino, faaipoipoga e masani ai, ma le olaga faaleaiga. O Sotoma ma Komoro o le faataitaiga masani lea o le olaga e le pa’ia i le Feagaiga Tuai. Ae sa ma’oti i le taimi lena; ae o le taimi nei, ua salalau lena tulaga i le lalolagi. Ua faaaogaina ma le poto e Satani le malosi o ituaiga ala o faasalalauga ma fesootaiga. O le manuia o ana taumafaiga, ua matua faateleina ai le maua o na faatosinaga mataga ma le faatauma’oi i le lalolagi atoa. O aso ua mavae, sa manaomia ai se taumafaiga e sailia ai na mea leaga. O le taimi nei, ua matua susu pala le tele o vaega o tulimanu uma o le lalolagi. E le mafai ona tatou faamātūina le siisii a’e o le vaitafe o faatosinaga leaga, aua e afua mai i le faaaogaina o le saolotoga e filifili ai lea na tuuina mai e lo Tatou Tama Faalelagi. Peitai e mafai, ma e tatau lava ona lapata’ia i tatou ma le manino, i taunuuga o le latalata atu i lona tai fana’e faatosina, ma le faataumaoi.
Tatou tilotilo nei i le itu lelei. E ui a i vaega e leaga ai, ae o le lalolagi lava ia i lona aotelega e maeu le matagofie, e tumu i mea lelei e tele ma tagata faamaoni. Ua saunia e le Atua se ala e ola ai i lenei lalolagi e aunoa ma le faaleagaina i uunaiga toilalo ua salalau ai. E mafai ona e ola i se olaga amioatua, tamaoaiga, ma le amiotonu, e ala i le mulimuli i le ata o le puipuiga sa faia e lou Tama oi le Lagi: O Lana ata o le fiafia. O loo maua lea i tusitusiga paia, ma tautinoga musuia a Ana perofeta. Sa ia faaofuina lou malamalama i le agaga, ma ua mafai ai e oe ona e olioli i le matagofie o se tino faaletino. A e faaaogaina lena tino i le ala na poloai mai ai o Ia, o le a tupu lou malosi ma e te gafatia foi ona aloese mai le agasala, ma manuia tele ai.
Ina ua faaali mai le Atua, lo tatou Tama e Faavavau, ma Lona Alo Pele ia Iosefa Samita i lena faaaliga paia i le Vao Paia, sa amata iina ona La toe tuu mai i le lalolagi lena ata o le fiafia, ma toefuatai mai ai mea uma e manaomia mo le lagolagoina o lena fuafuaga. O se vaega o lena toefuataiga, e aofia ai isi tusitusiga paia faaopoopo, ina ia atoa ai faamaumauga taua o le Tusi Paia. O nei tusitusiga paia taua, o loo i ai i le Tusi a Mamona, o le Mataupu Faavae ma Feagaiga, ma le Penina Tau Tele. Sa silafia e lo tatou Tama o tatou aso. Sa Ia saunia tusitusiga paia, ma saunia se taiala faalelagi faifai pea e lagolagoina ai i tatou. O lena fesoasoani o le a mautinoa ai, e mafai ona e ola i le filemu ma le fiafia i le lotolotoi o le amioleaga ua faateleina.
Mafaufau i fuaiupu nei:
“A o mea uma e ao ina oo mai i ona aso. [Sa silafia lelei e le Atua ia lu’itau o le a tatou fetaiai, o lea na aumai ai lenei apoapoaiga.]
“O le mea lea, aua ne’i loto vaivai i le faia o mea lelei, aua o loo oulua faataatia le faavae o le galuega tele. O mea iti foi e tutupu mai ai mea tetele.
“Faauta, e ao ina ave i le Alii le loto ma le mafaufau matala; ma o e gaua’i ma usiusita’i o le a aai i mea lelei o le laueleele o Siona i nei aso e gata ai.”3
O se folafolaga e le mafaatauina. A faaauau pea ona taulai atu lou mafaufau ma lou loto ia te Ia, o le a fesoasoani o Ia ia te oe ina ia e maua se olaga tamaoaiga ma le fiafia, tusa lava pe o a mea e tutupu i le lalolagi o loo siomia ai oe.
Sa aoao mai ma le poto e Paulo: “Aua le faatoilaloina oe i le leaga, ae ia e faatoilaloina le leaga i le lelei.”4
E tatau ona tatou faaaoao ia Iosua: “Ina filifili ia o outou i le aso nei, po o ai tou te auauna i ai … A o a’u nei ma lo’u aiga, matou te auauna ia Ieova.”5
Sa aoao mai e Iesu: “Ia onosai i puapuaga, aua e tele puapuaga e te maua; peitai, ia onosa’i pea i ai, aua faauta, ou te i ai faatasi ma oe, e oo atu lava i le iuga o ou aso.”6 “O le faamaoni foi o le a manumalo i mea uma, ma siitia i luga i le aso amuli.”7
O le mea mulimuli o lenei mamanu o le manumalo: “O mai ia ia Keriso, ina ia faaatoatoaina outou e ia … ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma … ina ia atoatoa ai outou ia Keriso i lona alofa tunoa.”8
Ou te iloa o le ata o le fiafia, e mafai ona siitia ma faamanuia ai i latou e ola ai, i soo se mea.
I le po a o lumanai le Kerisimasi, i le 37 tausaga talu ai, i le susulu o le masina ua atoa, sa ou a’e ai i se tama’i a’ega i le nuu maotua o Quiriza, i Polivia. E toafa i matou ma isi faifeau talavou, sa matou a’ea’e i luga o se mafa i se auala matautia, i le aso atoa. Ona matou tauasa atu lea i se auvai o se vaitafe e vaai pe mafai ona fesoasoani aoaoga a le Faaola i se nuu matitiva. O le matua faaloto vaivai lava o le mea sa matou vaai i ai i lena aso—o tamaiti tino leaga, o tagata matutua e ola i nai fua itiiti o le fanua, o nisi foi sa taupulapula mai mata, sa faaaogaina le ava malosi ma fualaau oona e saili ai se to’a. Sa ou vaavaai atu i si tamai nuu naumati sa i lalo ifo; i nai faleoo e ato i le palapala ma vaovao i lenei siosiomaga matautia. Na pau lava le mea na iloa ai se ola, o taifau sa ou i le sueina o ni meaai. Sa leai se eletise, telefoni, vai, auala, fale lelei e agai i ai, e leai foi ni fomai. Sa foliga e leai se faamoemoe. Ae, sa faamaonia mai i se tatalo ma le loto, e tatau ona matou o i ai. Sa matou maua atu i ai ni tagata lotomaulalo, sa latou talia le talalelei ma le naunautai e ola ai. Sa latou faia lena mea, i lalo o ni tulaga matautia, o le mea sa taatele ai le mativa a’ia’i, ava malosi, fualaau oona, o faataulaitu, ma le ola le mama.
I lalo o le taitaiga a ni faifeautalai tulaga ese, sa aoaoina ai e tagata le galulue malosi e atiina ae le laueleele. Sa latou maua mai ai se seleselega o fualaau fai sua lelei tele, ma fagaga lapiti e maua ai le polotini sili. Ae o lesona sili lava na maua mai i faifeautalai, sa aoaoina i latou, e i ai se Atua alofa, ma se Faaola na ofoina atu Lona soifua ina ia manuia ai. Sa amata ona sui o latou foliga vaaia. Sa susulu mai i o latou foliga fiafia le malamalama o le upumoni. Sa aoao ma le onosai e nei sui alolofa o le Alii, o faifeautalai, se nuu naunautai. Sa aoaoina e tane ma ava, le ala e ola fiafia ai, aoao upumoni i a latou fanau, tatalo ma iloa le taitaiga a le Agaga.
Sa ou matauina se tamaitiiti e ono tausga, sa ia mataituina lelei le matou uluai sauniga o le papatisoga, ma sa ia faata’ita’ia i lona tuafafine laitiiti le mea sa ia vaaia. Sa tago ua tuu faalelei lima o lona tuafafine, ona sii lea o si ona tamai lima i luga, memumemu ni upu, ona tuutuu ifo lea o ia i le palapala ua matua aasa i le la, ona taitai atu lea o ia i se maa e fai ai le faamauga, ona faatalofa atu lea ia te ia. E ese le vave o le aoao a le talavou. Sa latou usiusitai i le malamalama o le upumoni, lea sa aoaoina ai e faifeautalai, faapea foi ma o latou matua. O le faatuatua ma le usiusitai, ua ou vaaia ai le ala na mafai ai e se augatupulaga se tasi na papatiso ai ni talavou, ona manumalo i se lumanai sa matua foliga mai e leai se faamoemoe. Ua avea nisi ma ni faifeautalai, ua faauu nisi mai iunivesite, ma ua faamauina i le malumalu. O lo latou filiga ma le usiusitai, ua latou maua ai se faamoemoega ma le manuia i le olaga, e ui lava i toatuga faaletino sa o latou uluai feagai, ma se siosiomaga sa lilofia i mea leaga. Afai la e mafai ona faia i Quiriza, e mafai foi ona faia i soo se mea.
Pe ua outou matauina le auala o loo galue ai Satani e tapu’e mafaufau ma lagona i ni ata faaemoemo, o musika leoleoā, ma soo se ituaiga o lagona malolosi faaosofia? Ua taumafai ma le filiga [Satani] e faatumulia le olaga i faatinoga, o faafiafiaga, ma lagona faaosofia, ina ia le mafai ai ona e se tagata ona mafaufau loloto i taunuuga o ana faatosinaga taufaaosooso. Mafaufau i ai. Ua tofotofoina nisi e soli poloaiga ona o ala o faasalalauga, lea ua foliga mai ai e le afaina le solia o poloaiga aupito taua a le Atua. Ua faia nei mea ina ia foliga mananaia, ma manaomia. E foliga mai e leai se taunuuga matuia e i ai, a o se olioli ma le fiafia e tumau. Peitai, ia iloa, o na faatinoga e faafoe i upu tusitusia ma tagata e faatinoina. O le faaiuga e faia, e faapena foi ona faatino i le mea e manao ai lē e faafoeina.
E le faapena le olaga. Ioe, o le saolotoga e filifili ai, e faataga ai lou filifilia pe o le a le ituaiga tagata e avea ai oe, ae e le mafai ona e pulea le taunuuga o na filifiliga. E le tutusa ma foafoaga taufaasese a tagata, o lo tatou Tama Faalelagi na te fuafuaina taunuuga o au filifiliga. O le usiusitai e maua ai le fiafia, a o le solia o Ana poloaiga e le maua ai.
Manatu i ola o i latou ua gaosia ni mea ua manatu nisi o ata faatosina o le olaga. E masani ona latou fiafia i mea e aupito mataga o faatosinaga faataumaoi, o mea ia ua latou fai mai e sili ona matagofie i le ala o faasalalauga. Atonu e mauoa i latou, ae o loo faanoanoa ma ua aunoa ma se mafaufau manino. E fetaui lelei lava i o latou olaga, le saunoaga a Alema, o se perofeta musuia ma o se tamā alofa: “o le amioleaga, e le o le fiafia lea.”9
Afai e faaosoosoina oe e faata’ita’i i faatosinaga matagofie a Lusifelo, ia e faavasegaina muamua lava ma le toafimalie taunuuga e le maalofia o na filifiliga, ona le faaleagaina ai lea o lou olaga. E le mafai ona outou faata’ita’ia mea e faasa i le Atua, e aunoa ma le faataumaoia ai o le fiafia ma aveesea ai le taitaiga faaleagaga o se tagata.
Afai ua e lavelavea i le faiga o ni filifiliga leaga, faamolemole ia e filifili e toe foi mai nei. Ua e iloa le mea e amata ai. Fai nei loa. Matou te alolofa ia te oe. Matou te manaomia lava oe. O le a fesoasoani le Atua ia te oe.
O oe na le alii po o le tamaitai talavou, e ui ina foliga e faigata le olaga i le taimi nei, ae pipii mau i lena ai u’amea o le upumoni. E te le o iloa, o lena e lelei lou alualu i luma. O au tauiviga o loo faatupulaia ai lou tagata, amio pulea, ma le talitonuga i folafolaga a lou Tama i le Lagi ma le Faaola, pe a e tumau i le usiusitai i a La’ua poloaiga. E taua tele oe. E matua manaomia lava oe. E matua toaitiiti i latou ua naunau e faia le osigataulaga lena e te faia, ina ia ola amiotonu. E mafai ona e atiina ae le malamalama, alofa, ma le agalelei ina ia maua ai le fiafia maoae i totonu o le feagaiga o se faaipoipoga e faavavau. O le a e faamanuiaina lau fanau i se malamalama e le mafai e le lalolagi ona avatu i ai. O lau faataitaiga o le a seti ai se kosi mo lo latou olaga manuia, a o faateleina le faigata o le lalolagi. E manaomia oe e faamalosi i le malo ua faatupula’ia o le Alii, ma ia avea ma faataitaiga taulamua mo le anoanoai e le o maua le malamalama o le upumoni lena e ia te oe.
Ia aloese ai mai le amioleaga o le lalolagi. Ia iloa o loo faafoeina e le Atua. E oo mai le taimi, e toilalo popo ai Satani, ma faasalaina ai i ana amioleaga. Ua ia te Ia se fuafuaga patino mo lou olaga. O le a Ia faailoa mai ia te oe vaega o lena fuafuaga, pe a e saili atu i ai ma le faatuatua ma tumau i le usiusitai. Ua uma ona faasaoloto oe e Lona Alo—e le [o faasaoloto] mai taunuuga o au faatinoga, ae o le saolotoga e faia ai filifiliga. O le faamoemoega e faavavau o le Atua, ia e manuia i lenei olaga i la le tino. Tusa lava pe o le a le amioleaga o le lalolagi, e mafai lava ona e maua lena faamanuiaga. Saili ma ia e faalogo ma le toto’a i le taitaiga patino e avatu ia te oe e ala atu i le Agaga Paia. Ia tumau lou agavaa ia e maua ai. Aapa atu i isi ua tautevateva, ma ua fenumia’i, ua le iloa pe o fea le ala e mulimuli ai.
O lou maluapapa ua i le Atua lou Tama ma Lona Alo Pele, o Iesu Keriso. I le avea ai ma se tasi o Ana Aposetolo ua faamaonia e molimau atu ia te Ia, ou te tautino atu ai ma le paia, ua ou iloa o loo soifua le Faaola, o Ia o se peresona toetu, mamalu, ma le alofa atoatoa. O Ia o lou faamoemoe, o lou Fautua, ma lou Togiola. O le usiusitai, Na te taitai ai oe i le filemu ma le fiafia i le lotolotoi o le amioleaga ua faateleina i le lalolagi, i le suafa o Iesu Keriso, amene.