“Josep Smith im M̧are Elōn̄ļo̧k Jān Juon,” Unin Kōnono ko kōn Bwebwenato in Kabun̄ in
“Josep Smith im M̧are Elōn̄ļo̧k Jān Juon”
Josep Smith im M̧are Elōn̄ļo̧k Jān Juon
Armej ro Rekwojarjar ilo Raan Ko Āliktata rej tōmak bwe m̧are juōn wōt—m̧are eo an juon em̧m̧aan im juon kōrā—ej jekjek eo ejim̧we ilo kien m̧are an Irooj.1 Ilo tōre ko etto ilo baibōļ, Irooj ekar kakien jejjo̧ iaan armej ro An n̄an kōm̧m̧ane m̧are eļōn̄ļo̧k jān juon—m̧are eo ikōtaan juon em̧m̧aan im elōn̄ļo̧k jān juon kōrā.2 Jet membōr ro jinointata ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata rekar barāinwōt bōke im pokake kien in kar letok jān rikanaan ro an Anij.
Ālkin an kar bōk juon revelesōn n̄an kakien e bwe en kōm̧m̧ane m̧are elōn̄ļo̧k jen juon, Josep Smith ekar m̧areik elōn̄ļo̧k jān juon pāleen kōrā ro im kar kwaļo̧k kadkadin jekjek in n̄an ro reipaake ilo jerbal. Pedped in katak in ekar iaan men ko reppentata ilo Jepļaaktok eo—n̄an Josep make im n̄an ro jet uwaan Kabun̄ in. M̧are elōn̄ļo̧k jān juon ekar mālijon̄e tōmak im bōk lōn̄tak iakweleel im jum̧ae. Jet Armej ro Rekwojarjar ilo Raan Ko Āliktata rekar karuwaineneik jepļaaktok eo an jekjek in mour in an tōre ko etto ilo baibōļ. Bōtaab elōn̄ tokālik rekar kam̧ool kōn en̄jake ko aer rekajoor me rekar jipan̄ er anjo̧ ioon aer abje im kar leļo̧k n̄an er kajoor n̄an bōk wāween mour in.
Elōn̄ meļeļe ko kōn an kar kōm̧m̧an m̧are elōn̄ļo̧k jān juon m̧oktata ejjeļo̧k jeļā kaki kōnke ro rekar bōk koņaer ie rekar ba bwe ren kattiņoiki m̧akūtkūt ko aer. Rekoot in jem̧aan ko kōn m̧are elōn̄ļo̧k jān juon emāni: jejjo̧ rekoot ko ilo iien ko rej letok meļeļe ko, im tokāļik bwebwenato in etto ko rejjab aolep iien pedped iooer.. Rikwojarjar ro rej kemeemejļo̧k elōn̄ bwebwenato ko reaorōk rej iooklo̧k jerbal in m̧are elōn̄ļo̧k jān juon jān Josep Smith im Armej ro Rekwojarjar ilo Raan Ko Āliktata jen kar m̧oktaļo̧k. N̄an meļeļe ko reļļapļo̧k kōn m̧are elōn̄ļo̧k jān juon kar m̧oktaļo̧k, lale “Plural Marriage in The Church of Jesus Christ of Latter-day Saints,” Gospel Topics Essays, topics.lds.org.
Unin Kōnono ko Āinļo̧k: Joseph Smith Jr., Emma Hale Smith, Fanny Alger, Nauvoo Expositor