Siliyucki ke Olwelah luhn Nguhn Muhtahl
(Doctrine and Covenants 132:7)
Eis akwuck luhn pristut ac ilyak nuhke wuhlweacng muhtahl eltahl step yohk srihpac ke “insacnweacng” in sang insiacsr, nuhnak, ac moul lasr ke kena luhn God.
Nga lotwelah ke lesin na yohk srihpac se ke yac puhs somlah sel Prestuhn Boyd K. Packer. El fahk:
“Tiac elyah lah meah sitisinsip kuh tuhn ke monum, lah mukul kuh muhtwacn, lah orekma fuhkah lom, lah lutlut fuhkah lom, tiac elyah lah fihl fuhkah se kom muhta kac, moul uh fuhfahsryucsr se lasr nuhkwewa, in fohlohk nuh yurin God.
“Akwuck ac Wuhlweacng pa mwe ahkpwacye lasr lah kuht kuh in utyak nuh ye Muhtahl. In eis ma inge ke suwohs pa insacnweacng; in sruokyac nuh tok mwe fosrngah ke moul fin facluh.”
Nga pruhe tuh Nguhn Muhtahl in luti ac ahkkahlwemye nuh sesr kais sie ke kuht motko ke yohk srihpac luhn akwuck ac wuhlweacng oacna mwe ahkpwacye luhn nguhn ke fuhfahsryucsr lasr nuh yurin Pahpah Inkuhsrao.
Puhpuhlyuck ke sie Pahsport
Nga muhtwacwacack ke sie sramsram fototo. Sie pacl ah oasr mukul se tuh luhngse muhtwacta nuh yurin mwet in sucu lal ke siena muhtuhnfacl. El tuh plwacnwelah fahsr se lal inge, ahkolah ap lal ah, ac sohk wi oaksohk nuhke siti se ma sucu lal ah muhta we.
Mukul sac enganwack ke el tifoki liki oaksohk ah ac fahsr nuhke acn ma jackiyuck pahsport ah. Oasr pahsport se lal ma tuh ituckyang sin acn ma orekma ke pahsport ke muhtuhnfacl sel ah. El tuh sang pahsport lal ah nuh sin mwet orekma ke borter ah, suc ahkpwacyei ma ke mukul sac, muhtuhnfacl sel, ac srihpen fahsr se lal nuhke muhtuhnfacl sac. Tuhsruhk mukul sac tuh tiacna liyacacng wo pahsport se lal ah. Sra puk se ma ahkkahlwemye ma ke mukul sac tuhnlac ac koluklac. Oasr pac mihsac se ke sra puk sac ma tepiyucki ac kluiyucki suc tiac lwelah.
Ke ma inge, mwet orekma ke borter sac sruhnga orekmakihn pahsport sac ac tiac luhngse stacmiyac elan kuh in utyak nuhke muhtuhnfacl sac. Mukul sac suhpwacrlac ac nuhkwanlah lah meah el enenuh tohkoh.
Lesin ke sramsram soko inge arulacna fihsrwacsr: pahsport uh enenuh in karihngihnyuhk in orekmakihnyuck ke pacl loeles. Sruok sie pahsport wowo sang inkacnek nuh sin mukul sac in utyak nuhke muhtuhnfacl sac, tuhsruhk pahsport sac fuhnuh orekma sahp el tuh kuh in utyak nuhke muhtuhnfacl sac.
Ahok, ma oacna sie inge oasr sahfflahiyac. Oacpacna koluklac ke sie pahsport luhn moul, mwe sruhf ac ma upac kuht puhlakihn ke tiac koluk lasr tiacna ahksrihkyelah olwelah luhn God nuh sesr kuh kuhnahoslah wuhlweacng lasr.
Wuhlweacng, Akwuck, ac Mwe Insewowo ma Olwelah
Nuh sin mwet tuhma lutlut luhn Jisus Kraist, eis akwuck luhn pristut ac ilyak nuhke wuhlweacng muhtahl eltahl step yohk srihpac ke “insacnweacng” in sang insiacsr, nuhnak, ac moul lasr ke kena luhn God.
Wuhlweacng el olwelah muhtahl se—olwelah se inmahsrlon God ac tuhlihk mukul ac muhtwacn Nahtuhl. God El akiyac ohiyac ke wuhlweacng luhn wosasuc nuhkwewa, ac tuhlihk Nahtuhl orekmakihn sukohsohk in sulaclah lalos in lotwelah kac ac insese nuhke ma El siyuck elos in oruh.
Wuhlweacng uh utuckuh ke akwuck muhtahl. Sie akwuck el mukwikwi muhtahl se orekmakihnyuck ke wal luhn pristut suc oasr srihpac kawihl yohroh ac ma enenweyuck nuh tok ma pahtpaht ac kuhpahsr nuhke masap ac akwuck luhn God. Akwuck uh el oacyacapac luti kuht ke ohiyac luhn wuhlweacng ma kuht eis in moul lasr.
Wuhlweacng ac akwuck ke fohlohkyak luhn wosasuc luhn Mwet Lahngo eltahl mwe ahkpwacye ma luhn nguhn ma kuh in ikacselihk winto inkuhsrao ke ma wo in tuhkuh nuhke moul lasr srihpac wo, kolyuck, ac kuh. God el olwelah nuh sin tuhlihk mukul ac muhtwacn Nahtuhl ke mwe insewowo yohklacna ke eltahl ahkfuhlwactye wuhlweacng lalos, weacng ahkostwen nuhke masap ac akwuck ke wosasuc luhn Jisus Kraist. Liyacacng olwelah el enenweyuck nuhke mwe ahkpwacye ingacn in wo ac ma nuhke mwe insewowo olwelah ma ac tuhkuh.
Nguhn Muhtahl el pa Nguhn Muhtahl luhn Olwelah.
Nguhn Mutahl el mwet in kahsruh ahktolu ke Sifac ke God. El nguhn in luhman mwet se, ahkpwacye ke ma pwacye nuhkwewa, ac mwet loh se ac mwet utuck pweng se luhn Pahpah ac Wen.
Nguhn Muhtahl el oacyacpac ahkuhtweyucki ke ma suhmuhslah ekihn Nguhn Muhtahl luhn Olwelah, suc ahkkweye kuh ahkpwacye insese luhn God ke orekma suwohs luhn tuhlihk Nahtuhl. Yohk liki nuhkwewa, akwuck luhn wosasuc ac wuhlweacng nuhkwewa enenuh in siliyucki ke Nguhn Muhtahl luhn Olwelah. Oacna ke Leum El ikacslah nuh sin Mwet Pahluh Joseph Smith, “Wuhlweacng nuhkwewa … tiac oreklac ac ituckyang ac siliyucki ke Nguhn Muhtahl luhn olwelah … tiac ma ke oaru, ma wo, kuh kuh se kac ac tukihn misac moulyak liki misac.”
Ke siliyucki ke Nguhn Muhtahl luhn Olwelah, akwuck se, olwelah, kuh wuhlweacng el kapsrweni fahluh ac kuhsrao. Siliyucki se inge el tiac kawihl ke moul fin facluh ac kuh in muhsahllah kuh tulokihnyucki ke srihpen sesuwohs.
Eis ke mwe ahkkweyelah luhn sil se inge ke Nguhn Muhtahl pwacyeiyac tiac ma sikyak pacl sefanna; tuhsruhk, el tuhkuh ke pacl puhs ke kuht auliyak ke inse pwacye pacl nuhkwewa, ahkfuhlwactye wuhlweacng lasr, ac fuhlweacng insiacsr nuh sin God. Suk ke mwe insewowo se inge ke pwacye pa “mwe fosrngah ke moul fin facluh,” oacna ahkuhtweyucki sel Prestuhn Packer.
Oacna mukul se ke sramsram se luhk ke pahsport sac enenuh in oreklac sie stacm ah nuhke pahsport se lal ah elacn kuh in ilyak nuhke siena muhtuhnfacl, oruh kais sie sesr enenuh ahkpwacye ke mwe loh luhn Nguhn Muhtahl luhn Olwelah kuht in kuh in eis mwe insewowo nuh tok ma pahtpaht weacng wuhlweacng ac akwuck ke wosasuc luhn Mwet Lahngo.
Kais sie sesr enenuh in arulacna sruikihn inkacnek muhtahl in “fahsr ke akwuck nuhkwewa luhn Leum” ac in eis ke Nguhn Muhtahl luhn Olwelah, “ke pacl fal,” ke sil se ahkkweyeyucklac ma olwelah ke mwe insewowo nuhkwewa ma olwelah tari.
Akwuck luhn Sil
Siliyucki luhn sie mukul ac sie muhtwacn lun lohm sin Leum el susu in wulweacng ac akwuck ke wosasuc luhn Mwet Lahngo. Ac sie ma yohk srihpac, in kahlwem ke yohk srihpaciyen sie akwuk luhn sil ma tuh siliyucki ke Nguhn Muhtahl luhn Olwelah kahsruh in fahkwack, kuhtuh ip, kihsensiyuck lwoal lah sulaclah luhn sie mwet sahyac kuh in eslah mwe insewowo ma pahtpaht luhn mwet luhlahlfongi liyacacng wulweacng se.
Akwuck luhn sil weacng pac ma yohk srihpac luo ac kuhtuh ip sahyac: (1) toeni ma pahtpaht luhn mukul se ac muhtwacn se ke pahyuck—kahlwem muh oacna in siliyucki kuhpahsr se, ac (2) siliyucki luhn mukul tuhma ac muhtwacn kiac nuhke sucu ma pahtpaht luhn God ac ke kuhpahsrweni luhn sucu ke fihl nuhkwewa—kahlwem muh oacna in sil suwohswohs se. Kwewana ip ke akwuck uh yohk srihpac.
Kena ac pruhe nuhke ma sikyak ke siliyucki ke tempuhl inmahsrlon sie mukul ac muhtwacn weacng kapkapwack ke nguhn, kihsackuhnlah nuhke pahyuck, suwohs, tuhkweni orekma in kuhtwanglah ahlohloh ac mwe fosrngah ke moul fin facluh, ac suk engan.
Kuhtuh pacl uh, koluk ohiyac, kena ac pruhe nuhke ma sikyak wo tiac na tuhkuh. Ma koluk luhn mwet kom pahyuck se, sesuwohs, forlah liki ma pwacye lom, kuh kuhtuh ma upac sahyac kuh in pwen fohs, sriyucklac, kuh finne tifohrs. Ke ohiyac inge nuhkwewa, sie mwet pahyuck wowo el kuh in siyuck, “Kuh mwet sesuwohs se kuh in orekmakihn sukohsohk in sulaclah luhn siena mwet in pisrwaclah ma God El olwelah nuh sihk tari?” Top nuhke kihsensiyuck se inge pa moh na upac!
Ma suhfal luhn mwet pahyuck sacn use na pwacye inse muhsahllah ac ahsor nuh sin mwet pahyuck se sahyac an ac mwet in sucu sacn. Tuhsruhktuh, ma suhfal luhn sie mwet tiac kuh in kutongyac kuh tulokihnyac luhngse luhn God, kuh, ac mwe insewowo nuh sin siena mwet. Kuh se ke Iwacla wolacna ma pahtpaht luhn Leum kuh in kuhtwanglah ma nuhkwewa, pacl nuhkwewa, acn nuhkwewa, nuh sin mwet nuhkwewa ma sruokyac kuh wuhlweacng lalos Yohrohl.
Mwet pahyuck se ma kuhnahoslah wuhlweacng ac tiac auliyak fuhlweack inkacnek wowo se in eis nuh sel (mukul kuh muhtwacn) ahkweyelah ke sil luhn Nguhn Muhtahl luhn Olwelah nuhke kwewana siliyucki mwet luo ac liyeyacn ip ke akwuck luhn sil.
Mwet pahyuck suwohs se ma ahkfuhlwactye wuhlweacng ac fahsr nuh met ke luhlahlfongi ac srackna suwohs in eis nuh facl (mukul kuh muhhtwacn) sil ma ahkkweyeyucklac ke Nguhn Muhtahl luhn Olwelah nuhke liyeyacn akwuck luhn sil ac in eis mwe insewowo nuhkwewa weacng mwe insewowo luhn kais sie.
Kom kuh in siyuck, “Ma se inge ac fuhkah fin sie macruht tempuhl tiac oraclah nuhke sahflah?”
Mwe luti etweyuck ke Alu luhn Jisus Kraist luhn Mwet Luhlahlfongi Ke lwen-Sahflah tiacna sruhmuhn ke mwe ahkuhtweyac nuhkwewa ac ma pwacye ke kain ohiyac inge. Nga tiac etuh ac koflah ahkuhtweyac na pwacye lah fuhkah ac ngac mwe insewowo inge ac utuckuh uh. Tuhsruhk nga etuh lah mwe insewowo olwelah inge ac fah utuckuh. Wacngihn mwet tuhma lutlut suwohs ac fah tulokihnyucki ke kuhtwena mwe insewowo ma God El olwelah ke srihpen sie mwet sesuwohs sahyac orekmakihn sukohsohk in sulaclah lal ke moul facluh.
Nga ahksahfye ke kahs in ahkkweye lal Tohkohsrah Benjamin: “nga kena tuh kowos in motko ke mwe insewowo ac ohiyac engan lalos suc liyacacng masap luhn God. Tuh liye, elos ahkinsewowoyeyuck ke ma nuhkwewa, kwewana ke ikoac ac nguhn; ac elos fin muhtweng in luhlahlfongi ne ke sahflah elos eisyuck nuh inkuhsrao, tuh ohinge elos fah muhta yurun God ke sie ohiyac engan wacngihn sahflahiyac. O esam, esam lah ma inge pwacye; tuh Leum God El sramsramkihn.”
Nga engan in fahkwack luhlahlfongi ke ma pwacye sel Tohkohsrah Benjamin ke ine muhtahl luhn Leum Jisus Kraist, amen.