Puhlaik Tuhkuh ke Luhlahlfongi Lasr ke Jisus Kraist
Ke kuht ahkkahlwemye puhlaik lasr in sulaclah ma wo, luhlahlfongi lasr ke Kraist ahkkweyeyuck.
Kuht pwacnguhl Prestuhn Rosemary Chibota nuhke mwet kol luhlahp luhn Alu uh. Sramsram kacl uh sie srihkasrak nuhke puhlaik ma tuhkuh ke luhlahlfongi ke Jisus Kraist.
Ke Rosemary el yac singucul-itkohsr ah el sokwack puk srihsrihk se kacl Joseph Smith ma misrinacri tuh fihliyac lohm sel ah e Zimbabwe. El ritwelah na in pacl sac na el eis lohoh ke nguhn muh pwacye; Joseph el liye God Pahpah ac Wen Nahtuhl, Jisus Kraist. Lutiyuck el ac el pacptaislac ac el eklac sie srihkasrak nuh sin pahpah ninac kiyacl, suc welah Alu uh yac 19 tohkoh.
Luhlahlfongi ac puhlaik pa akucl luhn mwet tuhma lutlut luhn Jisus Kraist.
Jisus Kraist pa Wen fuhlwact nuhtin God. El tuhkuh nuh facluh ke ohiyac ma puhsisacl emet. El moulkihn moul suwohs se. El luti kuht lah kuh ac moul fuhkah ke moul fin facl se inge ac lah kuht ac ahkolah fuhkah nuhke moul ma pahtpaht. Ke srihpen luhngse yohk Lal nuh sesr ma wacngihn kapsra nuhkac, El use mwe sang se ma El muhkwena kuh in use, kweok ke ma koluk lasr, lwelah nuh sesr in auliyak ac eis nuhnakmuhnahs. El srihpsrihpyak fin sahkseng soko, ke wolacna ke plwacn luhn Pahpah tuhmasr Inkuhsrao, moulyak ke lwen ahk tolu. Ke sripen El moulyak liki kuclyuck uh, kuht ac wi pac moulyak. Fuhkah wolacnaiyacn srihpac luhn God lasr ac fuhkah yohkiyacn ahkfuhlwact lasr nuh sin Mwet Lahngo lasr.
Puhlaik in Nguhn
In ekihn mwet tuhma lutlut pwacye Lal, kuhtanglah facluh, liyacacng masap Lal, ac Luhlahlfongwel ac olwelah Lal uh tiac mwena ahkpwacr. Ke ip luhn nguhn an, puhlaik uh kuhtanglah mwe kohsrkohsr, ahlohloh, ac sahngweng, ke sulaclah ma pwacye.
In eis puhlaik ke nguhn uh pacl nuhkwewa, tuhkuh ke luhlahlfongi ke Jisus Kraist, in ekihn mwet tuhma lutlut Lal. “Nga muhkwena,” Moroni el sihm. “Pahpah tuhmuhk [ac sucu nuhkwewa luhk] acnwucki ke mweun ah, .. ac wacngihn kawuck luhk kuh acn nga ac som nuh we.”
Ke mwet lokoalok lal unwelah mwet nuhkwewa ma tiac lahfwekihn Kraist, ke puhlaik lal, el fahkwack, “Ac nga, Moroni, ac fah tiac lahfwekihn Kraist.”
Facl lasr uh tiac oacna pacl lal Moroni ah, tuhsruhk moul in etahwi uh enenuh puhlaik pacl nuhkwewa. Ahlohloh, mwe lusrong, ac mwe kiacpwelah ke lwen lasr kuh in ahkuhtweyac ke kahs luhn Mwet Sap Paul: “Tia un mwet se pa kut mweuni uh, a ngun fohkfohk yen engyeng uh, mwet leum ac wal ac nguhn koluk ma leumi mwet uh, ac ku lun we lohsr se inge.”
Facluh se lasr inge kwacna oasr in fohs. Kuht kwacna sruok ac orekmakihn fon nahtuhsr uh, sukok kahs in kahsruh, kahs ma tiac pwacye, ac kahs ma tuhkuh ke ma oreklac ke lahlmwetmwet luhn facluh suc ma use fohs ac tikuclkucl nuhke puhla lasr.
Nga mahtuhlah ke sie acn srihsrihk in orek mil. Ke puhlan pacl sac kaho ekahsr nahtuhsr inge muhta apkuhran nuhke sie fohloh. Apkuhran in litutacng nuhkwewa ke suhmer sac tukun ituck mil tari, nga ac sroacng nuh fin ohsr nuhtihk ac pwacnlah kaho inge nuhke acn tuhpahsrpahsr lucngah in mongo mah, wacngihn swacl fon, wacngihn mwe lohngyuck, wacngihn on, wacngihn twacks. Lwen na fohn sacn, nga na ac kaho ah, muhkwena ke nuhnak luhk. Pacl uh eklac, tuh nguhnasr tiac eklac. Kuht enenuh mihs in ahkkapye luhlahlfongi lasr in Kraist.
Luhlahlfongi ac Puhlaik
Ke kuht sulaclah luhlahlfongi ke Kraist, El ahkinsewowoye kuht ke puhlaik, kuhtuh pacl uh ke ma na upac ma sikyak, in sulaclah ma wo, ac ke kuht ahkkahlwemye puhlaik lasr in sulaclah ma wo, luhlahlfongi lasr ke Kraist ahkkweyeyuck.
Kuht enganack ke luhlahlfongi ke Jisus Kraist ac ke puhlaik ke nguhn ma kuht liye suwos, mempucr lasr ke Alu fin facluh nohfohn.
Luhlahlfongi lasr ke Jisus Kraist pa use puhlaik nuh sesr in sikuckmuhtuhntei ke puhsisacl ac pruhe nuh sin Pahpah tuhmasr Inkuhsrao. Ke pacl mihs ma kuht muhkwena sifacna, sramsram nuh sin Pahpah tuhmasr Inkuhsrao, yohkwaclihk puhlaik lasr in sulaclah ma wo. Ke nga mukul fuhsr ah, Nga lohng Prestuhn David O. McKay el fahk, “Mweun yohk emet ke moul uh pa kom acnwuhk nuhke ma suhkahs ma oasr lun nguhnum sifacna.” Ke kuht puhlaik kuhtanglah mweun in nguhnasr, luhlahlfongi lasr ke Mwet Lahngo lasr yohkwaclihk.
Kais sie wik kuht pruhe eis sackracmacn ac lohoh ye muhtuhn God, ac ye muhtuhn mwet sahyac, lah kuht “insese in eis nuh [facsr] inen [Jisus Kraist], ac esamuhl pacl nuhkwewa, ac liyacacng masap Lal.” Ke, puhlaik, kuht pwacye ke olwelah lasr, ac na tohkoh, Leum el ahkinsewowoye kuht ke luhlahlfongi yohk.
Luhlahlfongi lasr ke Jisus Kraist pa use puhlaik lasr in eis pahng sin mwet kol luhn pristut finne kuht puhla suhfahl kuh suhfallac pacl lasr in eis kunohkohn sacn.
Ke el ekihn sie ohtohrni fuhsr, Prestuhn Dallin H. Oaks el tuh insacnweacng orekma ke sie ohfuhs luhn masap ma arlac etweyuck, weacng pac elos orekma in ekuh ac Sactte. Prestuhn ke stek lal pahnglol nuhke mwet kahsruh ke u luhn prestuhn luhn misrin, suc ma enenuh in orekma ekuh tolu nuhke ahkosr ke kais sie wik. Prestuhn Oaks el esam, “Ke orekmakihnyacn luhlahlfongi luhk kwewa, Nga eis pahng sac.” Prestuhn Oaks el ahkuhtweyac ma se inge muh sie sulaclah na yohk srihpac ke moul lal. Luhlahlfongi lal ahkkweye puhlaik lal, ac sulaclah lal use luhlahlfongi yohk.
Luhlahlfongi lasr ke Jisus Kraist pa use puhlaik lasr in kahsruh mwet sahyac, moulkihn Kahs in Lahlmwetmwet, liyacacng masap luhn nwacsnwacs, ahkfuhlwactye lwen Sahpuht, suwohs ke sie tahfuh singucul, ac luhlahlfongi ke Pahpah ac Wen Nahtuhl ke pacl mas ma tiac kuh in liyeyuck, elyah ke mani, kuh kuhnanuclac luhn acn ma ekuhlwack moul lasr uh.
Mahlwem tari ah nga weluhl Prestuhn Dieter F. Uchtdorf nuh Spokane, Washington, ke acn ma e fihrihr sac kuhnahoslah lohm puhs liki 800. Kuht muhtwacta nuh yurin mempucr ma acn lalos ah lihksrweni muhsahllah. “Sucu lasr uh sef,” Cody ac Haylee Woodbury elos fahk nuh sihk, “ac luhlahlfongi lasr uh tu kuh. Kuht kuh in muhsaheack siepac lohm.” Luhlahlfongi lalos ke Jisus Kraist ahkkweye puhlaik lalos, ac puhlaik lalos ah ahkyohkyelah luhlahlfongi lalos.
Luhlahlfongi luhn mukul ac muhtwacn fuhsr wowo tausin fin facluh pa sang puhlaik nuh selos in tuhkahkwek met liki faht ah takwack in wi siminacri, in kuhlwacnsap ke misrin, ac ke fohlohk, in pahyuckyak ac sramtweack sie sucu. Ac nuh selos ma tiac kuh in pahyuck, puhlaik lalos kahsrwelos in moul pwacye nuhke olwelah lalos.
Ke luhlahlfongi ke Kraist ac puhlaik utuftuf, sie ninac fuhsr ahkolah tuhlihk srihsrihk nahtuhl nuhke Alu ah, el etuh lah kuhtuh Sacnri uh ac oacwac in mweun in pain moullac likina in som ahksasucye nguhn.
Luhlahlfongi lasr in Kraist pa use puhlaik in nguhn lasr in sramsram nuh sin mwet sahyac ke Mwet Lahngo, oraclah olwelah lun lohm sin Leum, auliyak ac eis nuhnakmuhnahs, fahsr tukun mwet pahluh moul, ac in kolyuck ke kohkoh mihs luhn Nguhn Muhtahl.
Pacl fototo somlah sie muhtwacn na oa ac fokoko luhlahlfongi la sruhmuhn testimoni lal ke alu ah. Ke lukmac, Nga etuh lah el arlac toasrlah ke ahklahlfon luhn mukul tuhmwacl. Tuh ke puhlaik ma tuhkuh ke luhlahlfongi, el fahkwack ke kuh lah ke pacl engan kuh pacl ahsor upac, el luhlahlfongi ke yot kuh luhn molwelah lal, Mwet Lahngo lal, Jisus Kraist.
Ke luhlahlfongi lasr moulna in Kraist, finne ke ma upac pucspucs luhn moul se inge, kuht wi pacna, oacna ke Mwet Sap Paul el fahk, “akkeokyeyuk kut, tusruktu kut tiana kunausyukla; … alolo, tusruktu tiana fuhleak.”
Olwelah ac Fahkwack Pwacye
Nga olwelah nuh sum lah ke kom ahkkweye luhlahlfongi lom ke Jisus Kraist ke kom luhlahlfongi ac fahsr Tohkohl ac liyacacng masap Lal, top lom ac fah tuhkuh, kuh luhn nguhnum ac fah yohkwaclihk, ac puhlaik lom in fahsr tukun Kraist ac taflwelah ohiyom.
Mwet Lahngo el fahkwack, “Kutena mwet su long, ac liayaung ma sap luk: Pahpah tuhmuhk El fah lungse pac el, na nga ac Papa tumuk fah tuku nu yorol ac muta yorol.”
Peter ac John tuh muhta infuckihl sac ke Kraist suc moulyak el sikyang nuh sin Mwet Sap ah. “Ngetma liye pouk ac niuk,” Jisus el fahk, “lah nga pa inge: kahlyuwi, ac liye.”
Tiac paht tukun ohiyac oa se inge sikyak ah, mwet kol suc suhlahlahlfongi sonol Peter ac John ke elos ahkkweyelah sie mukul ma tiac kuh in fahsr. “Sessesla ke Ngun Mutal,” Peter ac John puhlaik fahkwack, “kowos fin kusen siyuk nuh sesr misenge … lah [mwet ul] lah akkeyeyukla el fuka; Lela kowos … nukewa … in etu lah ke inen Jesus Christ lun Nazareth, su kowos tuh uniya fin sakseng, su God El akmoulyauk liki misa, lah ke sripacl mwet se tu ye motowos inge el kwela na pwacye.”
Oacpacna Peter ac John pacl met ah, Nga wi pac lohoh ke pwacyeiyacn “Jesus Christ luhn Nazareth.” El moul. El kol orekma muhtahl se inge, pa wosasuc fohlohkihnyuckyak luhn Jisus Kraist Ke inen Jisus Kraist, emacn.