Kabaeaki iroun Te Tamnei ae Tabu n te Berita
(Reirei ao Berita aika Tabu 132:7)
Karekean otenanti n te nakoanibonga ao te rin inanon berita aika tabu bon mwaneka aika kakawaki inanon te “ukoran te rikirake inanon maiura” ni kabotaua nanora, ara iango, ao maiura ma ana kantaninga te Atua.
I reiakina te reirei ae kakawaki n ririki aika mwaiti n nako mairoun Beretitenti Boyd K. Packer. E taku:
“I aki tabe bwa tera abam ke am karinan, tao te mwaane ke te aine, i aki tabe bwa tera am mwakuri, I aki tabe bwa tera am reirei, n aki tabe ma te roro are e maeka iai temanna, te maiu bon te mwananga rikaaki nakon te mweenga ibukira ni kabane, nakon te Atua.
“Otenanti ao berita aika tabu a riki bwa ara bwaai aika kakawaki ibukin te oki Nakoina. N tau ni karekei bon ukoran te rikirakei inanon maiura nako; ni kawakin nakon are imwiina bon te kakaewenako n te maiu n rabwata.”
I tataro bwa e na kaeitiira ao ni kamatataira n tatabemanira te Tamnei ae Raoiroi ngkai ti iangoi kakawakin otenanti ao berita aika tabu bwa kariaiakara n tamnei ibukin mwanangara nakon mweengara nakon Tamara are i Karawa.
Taeka ni kaikonaki man te Bwatibooti
N na moanna ma te karaki ae uarereke. N te tai are e tangiria iai te mwaane ni kawariia ana utu n te aba ae raroanako. E babairea aron mwanangana, e katauraoa ana tiutikeeti, ao e mwananga n te wanikiba nakon te tabo are a maeka iai ana koraki.
E mwananga te mwaane ma te ingainga n nano nakon te wanikiba ao e nakonako nakon te tabo are a tuoaki iai bwatibooti. Iai ana bwatibooti ae tuai bane taina ae karaoaki man te tabo are kariaiakaki n te tautaeka n abana. E kaota ana bwatibooti nakon te tia mwakuri, are e kakoaua kinakin te aomata, abana, ao bukin kawaran te aba. Ma e aki tararua raoi ana bwatibooti te mwaane anne. E a memea ao n uruaki baana are oti iai rongorongon te aomata. Ao baana are e raeuaki e a tia ni karaoaki n arona ae aki kariaiakaki n te teibi ao te kuru.
Ao n tokina, e aki butimwaeaki ana bwatibooti ao n rawa n titambwanna are e na kona n rin iai n te aba. E rang n un te mwaane aei ao e aki ataia bwa tera ae nakaraoia imwiina.
E bebete te reirei man te karaki aei; e riai n taainako ni kateimatoaki raoiroin te bwatibooti. Karekean te bwatibooti ae tuai bane taina e karekea ana tai te mwaane n rin n te aba, ma te bwatibooti n tingaia e aki kakoaua ae ko na kona ni kariaiakaki n rin n te aba.
Eng, iai tian te kabotau ae bebete aei. N tiaki aron te bwatibooti ae uruaki, kakaitara ao karawawata aika ti rinanona n akea ara kairua e aki kamaunai ana berita te Atua nakoira ke ni kamaiunai tain ara berita aika tabu.
Berita aika tabu, Otenanti, ao Kakabwaia aika Beritanaki.
Ibukiia ana reirei Iesu Kristo, karekean otenanti n te nakoanibonga ao te rin inanon berita aika tabu bon mwaneka aika kakawaki inanon te “ukoran te rikirake inanon maiura” ni kabotaua nanora, ara iango, ao maiura ma ana kantaninga te Atua.
Te berita ae tabu ao te berita ae matoatoa—te motinnano ae teimatoa imarenan te Atua ao Natina mwaane ao aine. Te Atua e katea te babaire ibukin berita ae tabu n te euangkerio ni kabane, ao a kammwakura inaomataia ae riai Natina n reiakina taekan ao aia kariaia nakon te bwai are E tuangiia bwa ana karaoia.
A karekeaki berita aika tabu rinanon otenanti aika tabu. Te otenanti bon te mwakuri ae tabu are karaoaki man te kariaiakaki n te nakoanibonga are iai te kantaninga n tamnei iai ao kakawakina ae akea tokina ao e irekereke ma ana tua ao ana kaetieti te Atua. A reireiniira naba otenanti aron berita aika tabu aika ti kariaia inanon maiura.
Berita aika tabu ao otenanti n ana euangkerio Te Tia Kamaiu ae kaokaki bon bwaai ni kakoaua n tamnei aika a kona ni kauki nako wintoon karawa ni karekea te kantaninga inanon maiura, te kaetieti, ao te korakora mai karawa. E berita te Atua nakoia Natina mwaane ao aine kakabwaia mai karawa ibukin karinean berita, n raonaki ma otenanti nakon tuua ao otenanti n ana euangkerio Iesu Kristo. Te kakaonimaki ae reitinako e kainnanoaki ibukin konabwai akanne bwa a na teimatoa ao ibukin karekean berita ake a tia ni beritanaki.
Te Tamnei ae Tabu bon Tamnein te Berita ae Tabu
Te Tamnei ae Raoiroi bon te kateniman n te Utu n Atua. Bon te aomata ae te tamnei, e kakoauai koaua ni kabane, ao bon te tia kakoaua ao te tia uarongorongo ibukin te Tama ao te Nati.
E kabwarabwaraaki naba te Tamnei ae Raoiroi inanon booki aika tabu bwa te Tamnei ae Tabu n te Berita ae kakoaua ke ni kamatoaa ae kariaiakana nakon te Atua n raoiroin aia mwakuri Natina. N tokina, a riai otenanti ao berita aika tabu n te euangkerio ni kabane ni kabaeaki n Ana Berita te Tamnei ae Raoiroi ae Tabu. N aron are e kaotia te Uea nakon te Burabeti Iotebwa Timiti, “Berita aika tabu ni kabane … ake a aki karaoaki ao n rinanona ao ni kabaeaki iroun te Tamnei ae Raoiroi … bon akea manenana, tamaroana, ke kakorakorana n te mangauti man te mate.”
Ngke e kabaeaki iroun te Tamnei ae Raoiroi n te Berita, te otenanti, te bau ke te motinnano, ke te berita ae tabu e kabaeaki i aon te aba ao i karawa. E aroaro aron te kabaebae aei n te maiu ae mamate ao e kona ni uruakaki ke ni katabuaki rinanon te aki raoiroi.
Karekean te kabaebae ni kamatoa aei iroun te Tamnei ae Raoiroi tiaki ti ibukin teuana te tai; ma, e roko iaon taina ngkana ti rairananora ao n teimatoa, ni karinei ara berita aika tabu, ao ni kabanei nanora iroun te Atua. Te kakaae ma te raoiroi ibukin te kakabwaia aei bon “te kakaewenako n te maiu ae mamate,” n aron are kabwarabwara Beretitenti Packer.
N aron te mwaane are inanon te karaki n au bwatibooti e kainnanoa te titambwa ni kariaiakaki n ana bwatibooti n rin n te aba n irua, ngaia are ngaira ni kabane ti kainnanoa te tia kakoaua ae te Tamnei ae Tabu n te Berita bwa ti aonga ngaira ni kabane ni karekei kakabwaia aika akea tokiia aika irekereke ma berita aika tabu ao otenanti n ana euangkerio te Tia Kamaiu.
Ti riai ni kakaitau ngaira n tatabemaniira ibukin taai aika tabu n “nakonako i nanon ana otenanti te Uea” ao ni karekea iroun te Tamnei ae Tabu n te Berita “inanon waakin te tai,” ni kamatoa te kabaebae are kakoauai kakabwaia ni kabane ake a tia ni beritanaki.
Te Otenanti ni Kabaebae
Kabaean te mwaane ao te aine inanon ana auti te Uea bon kaotan kakawakin te berita ae tabu ao otenanti n ana euangkerio Iesu Kristo ae kaokaki. Ao ae kakawaki riki, ataakin te reirei iaon kakawakin te otenanti ni kabaebae are e kabaeaki iroun te Tamnei ae Raoiroi n te Berita are ibuobuoki n taekinna, ni mwakorona, am titiraki aika kakawaki n ataia ngkana e kona ana rinerine temanna n totokoa te aomata ae kakaonimaki man karekean kakabwaia aika akea tokiia are e roko man berita aika tabu.
Iai uoua mwakoron te kabaebae n te otenanti ae kakawaki ao n irekereke: (1) reitakin te mwane ao te aine n te mare ae akea tokina—tera ae kona n ataaki n te kabaebae ae akea tokina—ao (2) kabaeakin te bumwane ao te buaine nakoia ana utu te Atua ae akea tokina ao reitakin te aomata rinanon rooro ni kabane—tera ae kona n ataaki bwa te kabaebae ae kakawaki. A kakawaki mwakoron otenanti ake uoua.
Te kantaninga ao te tataro ibukin mwiin te kabaebae n te tembora imarenan te mwaane ao te aine e raonaki ma aam ae matoatoa n rikiraken tamneim inanon maium, te kakaonimaki n te mare, ara kakaonimaki, te uaia ni mwakuri ni kanakoa te nanououa ao kakaewenako n te maiu aei, ao waaki nako mate kukurei.
N tabetai, e ngae n anne, te kantaninga ao te tataro ibukin mwiia akea ae riki. Ana bure te kaainaba, akean te onimaki, kitanan te koaua i bon iroum, ke kangaanga tabeua ake a kona ni karika te kauntaeka mangaongao, te maenako, ao riki te raure. N taian kangaanga aikai, ao e kona te kainaba ae kakaonimaki aei n titiraki, “E kona te mwakuri ae aki raoiroi n te rinerine ae aki riai iroun temanna te aomata n iraeai n te bwai are e a tia te Atua ni beritanna?” Te kaeka nakon te titiraki aei bon tiaki ma e aki mataata raoi!
Ana mwakuri te kaainaba ae aki tau aei e karika te maraki n atu ao te nanokawaki nakon te kaainaba ao kain te utu. E ngae n anne, te aki kororaoi iroun temanna te aomata e aki kona ni karaba ke n totokoa butin ana tangira, korakoran, ao ana kakabwaia te Atua nakon temanna. E kona mwaakan ana Mwakuri ni Kamaiu te Uea ae akea tiana ao akea tokina n tokanikai iaon bwaai ni kabane, n taainako, n taabo nako, ibukiia aomata n tatabemaniia nako ake a taua ni kamatoa aia berita aika tabu ma Ngaia.
Te kainaba ae urui berita aika tabu ao e aki rairananona e kabua kabwaiana ni karekei bon ibukina teuanne ke neienne kamatoan ana kabaebae te Tamnei ae Tabu n te Berita ibukin te otenanti n te kabaebae ae akea tokina ao ae kakawaki.
Te kaainaba ae kakaonimaki ae karinei berita aika tabu ao ni waaki nako n te onimaki e teimatoa n tau ni karekea i bon ibukina ke neienne kabaean te Tamnei ae Tabu n te Berita ibukin aron otenanti n te kabaebae ao ni karekei kakabwaia ake a irekereke ma ngaiia n tatabemania nako.
Ko kona n titiraki, “E na kanga ni kona n riki aei ngkana e aki reitinako aron te mare n te tembora?”
Reirein Ana Ekaretia Iesu Kristo ibukiia Aika Itiaki ni Boong aika Kaitira ae kaokaki e aki taekin taekan ni kabane te kangaanga. I aki ataia ao I aki kona ni kabwarabwara bwa e kanga ao ningai reken kakabwaia n te berita. Ma I ataia bwa a na karekeaki kakabwaia ake a tia ni beritanaki. Akea ana reirei Kristo ae kakaonimaki ae na totokoaki ni karekea te kakabwaia ae akea tokina ae e a tia ni beritanna te Atua ibukin aki kororaoin temanna n ana rinerine ae riai.
N na kabanea ma kakoauaan ana koaua te Uea Beniamina, “I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni kakaonimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki. O uringnga, uringnga bwa a koaua bwaai aikai; bwa e a tia n taekin te Uea ae te Atua.
I kakoaua ma te kukurei nakon koauan ana berita ni burabeti te Uea Beniamina n aran te Uea ae tabu Iesu Kristo, amen.