A Moktek er a Dios a Melai er Kau el Mormei

Mla er a Elder Patrick Kearon

Er a Chelechad er a Teruich me a terung el Apostol

A rokui el uldesuel a Chedam el mora Rengelekel a ruul el mo melai er a rokui el mo remei.

Ng soak lochotii omereng el saul el kiriu ra nglunguchiu er chelechal kumechela el meruul a rokui el kirel tial okedong, lokiu a President Nelson, el mo mesiou el Apostol er a Rubak el Jesus Kristo. Kom locha ungil medengei el omelchesuar el tiang a ngiluu a renguk el meriou, e tia mle taem el ngodech el ngarbab el teletael me a mo ungil lomes er a klengar er ngak. Tia meral klou el chetengakl el mo mesiou er a Osobel, er ngii di el deruchall, e mobengkemiu el omerk a ungil chais er a ebangkelio er Ngii el meksid urunguled.

E a ngarmedal tiang, eng mla medung el kmo a ngarullel a beches el Apostol a dechor a mechas a rengul el delal a bechil. Ng diak kudengei el kmo tiang meral mla medung, eng di denguu er tial mla mekedmokl, eng sebechel meral dilubech. A kultelechakl el delal a bechik el dikea lobengked a diak a tomer er ngii er a chesil a rengul.

Sesel buil ra memong, e ngak ma bechik a mloldingel er a tara beluu el kirel a kakeous lurreor er a Ikelesia, ak milekiis er a tara tutau e ulemes el kora mekikngit osengek lomes er a mado er a hotel el morrikl. Ngariou er tial meseked el rael, e ak milsa melenget a mlai el ngara rael el ngar ngii a re bulis loluut a mlai sel le mei er ngii. Sera kot, eng di mle mekesai el mlai a merrael er tial rael a ble lolluut er tir. Engdi a omerolel a taem el mong eng mlo betok a mlai, betok er ngii a di mle stob e mla mo betok lulech.

Me ak ngar tia rebab el mado, lomes er a bulis el ual kora soal tial klisiich el merrob a mlai e oluut er a rechad el mo cheroid. E merang, leng kora omiboid a lorael, el ual kora soal meliloik, sel lorael a derta el mlai el mer tial telenget el rael. Alsekum me a omekall a kora checherd a rengul er tial telenget el rael, ea bulis a dimlak lemeues el olngeseu malechub el chubteterir. Ng di blechoel el melmesim er a btelul e melutk er a tara rael.

A re sechelik, ma re keldemek el merael er tial rael ra klengar e ra klechad, a Demad a klebokel a uldesuel, molmuut ersel “mengasireng” luldesuel, ¹ el ruul el melai er kau el mo remei, el diak el loltobed er kau.² Ng dirkak a mla tongetengii a rael e nguu a chad lolia er ngii me loluut er a rechad el mo cheroid. E a merar engii, ng diak el uaisei. A Dios a di kelekall el melai er kau. Ngii a “soal a rokui el ngelekel a lolilt el lemuut el mo er Ngii,”³e Ngii a olab a rokui el bedengel a teletael el lemuut el melai er kau el mong.

A oubeltikelreng el Chedam a ulemes er a Blebelel tial beluulechad el moktek er ngii a omskau a techall me ngak el melisiich e meleketek a klemedengei er kid ra beluulechad, a techall el mo ousbech a blal beskid a Dios el mimokl el melilt er Ngii,⁴mo mesuub, mo mukeroul, mo mecheuid, mo ouchel, moubeltikel reng ra Dios me a ngar bita er kid, me a tara klebesei e deluut el mo remei el mo er Ngii.

Ng uldureklii a mekreos el Betik ra Rengul el Ngelekel el mei er tial mla ruebet el beluulechad el mo soiseb er a mui el bedengel a teletael el chad a mo er ngii, el mo meskid a okesiu el mora rokui el Ngelekel el mo oltirakl, e mo melngakireng e mengikiid. A sel ngarbab el melngakireng el sengk er a Kristo a melubet a rokuii el melenget ra rael er a bedenged me a reng el ngii a mora kodall tia mo choridid er a blil el mo cherechar.

A rokui el uldesuel a Chedam el mora Rengelekel e ruul el mo melai er a rokui el mo remei.

A re mesiungel a Dios, me a re profet er Ngii, ngera tomekedong er tial uldasu er a Oluut el ngara chedaol llechukl? Te omekedong er ngii el kmo uldasu er a mengikiid,⁵uldasu er a klechubechub, ⁶ngarbab el uldasu er a deuelreng,⁷me a uldasu er a mo suobel, el ngii a mora rokui, “lokiu a rsechel a Dita el Ngelekek.”⁸

Sel moktek er Chedam er a ngarbab el uldasu er a deureng a deureng er kau, er tiang, er chelechal taem, me a diak a ulebengelel. Tiang a diak el bo lorrob er a deureng er kau e bol rellau el mo simbai e medakt.

Sel moktek er a Chedam er a uldasu ra mengikiid a merang er ngii a mengikiid, lolsobel er kau lokiu ongarm me a kodellel a Jesus Kristo,⁹e mo mimokl er a kelebsengel a klengit me a kodall. Tia diak el bechikau mel di le kau me sel teletelem.

Sel moktek er Chedam er uldesuel er a klechubechub a mo odersii a klechubechubsel om luut el mo er Ngii e mengull a telbiil er a otireklem er Ngii. Tiang a diak bol cheridii a klechubechub e lomekcharem a ringel me a klengit el reng.

Sel moktek er a Chedam er uldesuel er a mo suobel a mera er ngii a olsobel er kau el morsel kot el ngarbab el klebkall sel om nguu a “klaumerang er kau er a Jesus”¹⁰ e mo odersii a rengum el rokir el mo er Ngii.¹¹ Tia diak el bo loltobed er kau.

Tiang a belkul a kmo a ngidil ngerang a sebechel el diak el iior er a teletelel a de kiei a klengar er kid? E a teletelel a dolilt lousbech er sel llemelted el melilt ng diak a belkul? El kmo kid ng sebeched loltirakl malechub eng diak a llechul a Dios? Ng diak, el sebechel. A meral tara blechoel okedongel me a ongtil a Jesus seral temel mesiou a kmo ke dobult e ouchel a rengud e mo er Ngii.¹² Klou a belkul e lulecholt er a uchelel a rokui el Osisecheklel el mora ngarbab el rael er a kldung¹³a okedong el merael el mo ruchei, lomult er kid loba klaumerang er a Kristo, el mo nguu a klou el beltel a rengud.¹⁴

A Dios a soal kid a de mesisiich ra belted er a bechelelingaol me a klengarbab er reng lomeruul, mengoit er a klechad ra beluulechad,¹⁵me kid bo “dorael, e diak ke deluut el meruul a klengit.”¹⁶

Alsekum meke doumerang er a moktek er a tial lomerk el mora rokui el uldesuel a Chedam el mo olsobel er kid, mengikiid er kid, e oldars er a klechubechub el merkid, meng sebeched el nguu a deureng, e ngera kuk moktek er a Ngalek el okiu ngii e tial uldasu a mlo sebechel morngii?

A Ngelekel a ouchais er kid el Kirel: “E le ak mla ra babeluades el mei, el diak kuruul er a soak, e bai soal ngikel uldureklak.”¹⁷

A soal a Jesus a sel blekokouii el soal a Demal! Ngii a soal rulii meng sebechel a rokui el ngelekel a Chedam el mo nguu sel mo dubech el ngara moktek er a uldasu—el diak a ulebenglel klengar Lobengterir. Ng diak a diak luldimukl er tial chedaol el teletael.

Alsekum meke melchesiu el kora bekikl el kmo ngdiak el sebechem el lotireklii, malechub esel beltikel reng ra Kristo loldars ersel diak a ulebengelel el Tngakireng el klubechub a mora bekl el chad, e diak el lekor kau, e kau a cheluid. A Diak a UlebengeIel a belkul a diak a ulebengelel. Diak a Ulebengelel a omsau er kau me tirkel betik a rengum er tir.¹⁸

A Nephi a silodii tial klebokel el klemerang: “A Jesus Kristo a diak a ngeral loruul el diak el bol klungiolir a rechad ra beluulechad; le ngii el betik a rengul er a beluulechad, meng mle tongetengii a klengar ngii me bol sebechel ngoititerir a rokui el chad el mo er ngii. Nguaisei, ngii a diak lolekebai er a ngidi el chad el soal mo suobel.”¹⁹

A Osobel, ngii a Ungil Mengkar, e merael el mosiik er a mla remiid el chermel di le merekmo lebetik er tir.²⁰ Ng diak el “soal a ngiidi el tar tir el remiid.”²¹

“A chimak er a klechubechub a kuldars er ngii el morkau, me alsekum ke mei, eak ngoikau.”²²

“A lengarngii a resmecher er a delongeliu? Mngititerir el mei. Te ngarngii ar chitechut, me a lechub e te meiko me a lechub e te tiuach me a lechub e te sechudel, me a lechub e te chebedes, me a lechub e te chelisemsum, me a lechub e tirkel mechad, me a lechub e te chuarm er a ngii di lengerang? Mngititerir el mei me bo kumekungil er tir, leng mekente renguk er kemiu.”²³

Ng dimlak el becherei ngkel redil el merael a rsechel; Ng dimlak el bol mekii er a chebedes, Ng dimlak el bolikrii ngkel redil mlo melaok a rengul; Ng dimlak lotngeklii a ouchel a rengul—el diak el iior er a kngtil. Me Ngii a diak bol lodngeklau malechub tirkel betik ra rengum sel obsa chelemuul me a delmedemek el reng. Tiang a diakel moktek er Ngii malechub el lilechesii, malechub el Uldesuel, moktek, urungulel, malechub e loureng er ngii.

Ngdiak, Ngii a diak lolenget malechub e lolecha sersel; Ngii a bai meledaes. Ngii a diak el bechikau me dim ngar rikl; Ngii a mengemedaol er kau el me soiseb.²⁴ A omesiungel sera le ngara beluulechad a olechotel tial moktek er ngii.

E dirrek el uaisei el ngarngii sel uldersel er a melngakireng er Ngii, el ngii a meringel er kid el moungil medengelii, lengelakl er a kuk di klemedengei er kid a rechad. Engdi, tiang a klou a belkul “engdi,” kid a medengei, sebeched el medenglii, sel chedaol, olsobel el ngii a moktek er a melngakireng er Ngii e luldersii.

Sel kateng er a templo a miltat el mo erung sera lemad a Jesus er a kerus a belkul tiang a techall er a rael lemuut el mora medal a Chedam a mla metat e obok—el mora rokui el obult el mo er Ngii, oumerang er Ngii, chemoit a lolab el berraod el mo er Ngii, e nguu a chelngelel me tobang lokiu ra ulak el telbiil.²⁵

A tara tekoi, a uldesuel a Chedam a diak el kirel a telenget el rael. Ng dirkak a tang mel uaisei; a diak a tang me bol uaisei. Ngarngii a tekoi el kired el mo meruul, llach el mo oltirakl, teletelel a klechad er kid el bodolodech? Choi. Engdi ngokiu a krasia er Ngii, e a ikang a sebeched el ngmai, diak el cheroid er kid.

Tiang a kmal ungil chais! Ng diak a ngerang kdung ngdi dmolech lomereng el saul er a ikal beot el klemerang. A llecheklel a uldesuel a Chedam, Uldesuel, moktek er Ngii, soal, me a urungulel a rokui el mo omekungil er kau, rokui el mo meskau a budech, rokui el mo ngoikau, me tirkel betik er a rengum, el mo remei. Aikang ak sioning el ngara ngklel a Jesus Kristo, el Ngelekel, amen.