Tō tātou hoa tāmau
’Outou ’e ’o vau nei e rāve’a tā tātou ’ia vai mai te Vārua Maita’i ’ei hoa tāmau nō tātou.
E au mau taea’e ’e mau tuahine here, i roto i teie ’āmuira’a, ’ua ha’amaita’ihia tātou ’e te hō’ē nīni’ira’a rahi o te heheura’a. ’Ua fa’ahiti mai ’e e parau te mau tāvini o te Fatu ’o Iesu Mesia i te mau parau mau, te fa’aitoitora’a ’e te arata’ira’a.
’Ua ha’aputapūhia vau e te mau ’itera’a pāpū tei hōpoihia mai i roto i teie ’āmuira’a ē, tē paraparau nei te Fatu ia tātou iho nā roto i te Vārua Maita’i. ’A pure ai tātou ’e ’a ha’apa’o maita’i ai tātou i muri iho i te mau muhumuhura’a a te Vārua, e fa’ari’i tātou i te mau mana’o ’e te mau ha’amaita’ira’a nō te arata’i ia tātou nā roto i te mau mahana e rahi noa atu ra te fifi i mua nei.
’Ua fa’aro’o fa’ahou tātou i te fa’aarara’a a te peresideni Russell M. Nelson, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i ».1
’Ua arata’i teie fa’aarara’a a te perophete iā’u ’ia feruri i te mea ’o tā’u e nehenehe e ha’api’i i tā’u mau tamari’i, mau mo’otua ’e mau hina nō ni’a, e nāhea ’ia roa’a teie arata’ira’a faufa’a roa i roto i te mau mahana fifi rahi i mua nei nō rātou.
Nō reira, teie parau poro’i i teie mahana ’o te hō’ē rata poto i tā’u mau hua’ai ’o te nehenehe e tauturu ia rātou, ’ia ’ore ana’e au i rotopū ia rātou i roto i te mau mahana fa’ahiahia mau i mua nei. Tē hina’aro nei au ’ia ’ite rātou i te mea tā’u i ’apo mai ’o te nehenehe e tauturu ia rātou.
’Ua ti’a iā’u ’ia māramarama maita’i a’e au i te mea e tītauhia ia tātou ’ia fa’ari’i, te fa’aurura’a tāmau a te Vārua Maita’i i roto i te mau mahana e ora mai ai rātou. ’E ’ua fa’auruhia vau e paraparau atu i teie mahana, i tō’u iho ’itera’a ’ia tītau manihini i te Vārua Maita’i, hau atu mai tā’u e nehenehe, ’ia riro ’ei hoa tāmau nō’u. Tā’u pure ’oia ho’i ’ia ti’a iā’u e fa’aitoito ia rātou.
E ha’amata vau te reira ma te feruri ’e ma te pure nō ni’a i te mau tamaiti a Helamana, ’o Nephi ’e ’o Lehi, ’e te tahi atu mau tāvini o te Fatu tei ’ohipa ’e ’o rāua. ’Ua fa’aruru rātou i te pāto’ira’a ’ū’ana. ’Ua tāvini rātou i roto i te hō’ē vāhi ’ino ’e e ti’a ia rātou e fa’aruru i te mau ha’avarera’a ri’ari’a. E fa’aitoito vau, ’e e nehenehe ’outou, nā roto noa mai i teie noa ’īrava o te pāpa’ira’a a Helamana :
« ’E i te hitu ’ahuru ’e ma iva o te matahiti ’ua tupu ihora te mārōra’a rahi. ’Āre’a rā i muri a’era, ’ua ha’api’i atu Nephi ’e Lehi ’e tō rāua mau taea’e e rave rahi i te mau ta’ata, ’e ’ua ’ite ho’i rātou i te parau mau nō ni’a i te mau tufa’a nō te mau ha’api’ira’a tumu, nō te mea ’ua fāri’i rātou i te mau heheura’a i te mau mahana ato’a, ’e nō reira ho’i ’ua fa’a’ore rātou i tā rātou mārōra’a i taua iho matahiti ra ».2
’Ua fa’a’itoito teie ’īrava iā’u, ’e e nehenehe ato’a te reira e fa’aitoito ia ’outou. ’Ua ha’api’ihia te mau tamaiti a Helamana ’e ’ua arata’ihia nā roto i te hō’ē ’āpapara’a o te mau ’ohipa i tupu ’e te Vārua Maita’i. Nā te reira e ha’apāpū mai iā’u ē, e nehenehe tātou e ha’api’ihia ’e e ’apo mai nā roto mai i te Vārua, reni i ni’a i te rēni, ma te fa’ari’i i te mea tā tātou e hina’aro, ’e i muri iho, ’ua ineine tātou, e fa’ari’i hau atu ā tātou.
Mai te reira huru ato’a vau i te fa’aitoitora’ahia e te ’ā’amu o Nephi tei tītau ’ia ho’i i Ierusalema nō te mau ’api veo a Labana. Tē ha’amana’o ra ’outou i te mā’itira’a tāna i rave. ’Ua parau ’oia, « e haere au e rave i te mau mea tā te Fatu i fa’aue mai ».3
Te ’ohipa i tupu nō Nephi ’e te Vārua Maita’i i roto i taua tere ra, ’ua fa’aitoito iā’u e rave rahi taime ’a rave ai au i te mau ’ohipa tā’u i ’ite e mau ’ohipa nā te Fatu, mai te huru rā, ’ua hau roa atu te reira i tō’u mau ’itera’a tahito ’e i ni’a a’e i te mea tā’u i ’ite mai tō’u mau ’aravihi.
Tē ha’amana’o ra ’outou i te mea tā Nephi i parau nō ni’a i te ’ohipa i tupu nōna : « ’E ru’i ihora ; ’e ’ua fa’aue atu ra vau ’ia fa’atāpuni [tō’u mau taea’e] ia rātou iho i rāpae’au i te ’āua. E i muri iho i tō rātou fa’atāpunira’a ia rātou iho, ’ua haere huna atu ra vau, ’o Nephi, i roto i te ’oire, e haere ti’a atu ra i te fare o Labana ra ».
’Ua nā ’ō fa’aho ā ’oia, « ’ua arata’ihia vau e te Vārua, ’e ’aore au i ’ite nā mua roa i te mau mea tā’u e ti’a ’ia rave ».4
’Ua fa’aitoitohia vau i te ’itera’a ē, ’ua arata’ihia Nephi ’e te Vārua i te mau minuti ato’a, i te roara’a o te pō, i roto i te ’ohipa a te Fatu.
E hina’aro tātou, ’e e hina’aro ā ’outou i te auhoara’a tāmau a te Vārua Maita’i. I teienei, e hina’aro tātou i te reira, ’ua ’ite rā tātou nā roto i te mau ’ohipa i tupu ē, ’e ’ere i te mea ’ōhie ’ia fa’atupu i te reira. Tātou tāta’itahi tē feruri nei ’e tē parau nei ’e tē rave nei i te mau ’ohipa i roto i tō tātou orara’a i te mau mahana ato’a, ’o tē nehenehe e fa’a’ino’ino i te Vārua.
’Ia tupu ana’e te reira, e tupu mau ihoā te reira, e nehenehe tātou e ’ite i te fa’ari’i-’ore-ra’a o te Fatu. ’E e nehenehe tātou e fa’ahemahia ’ia feruri ē, ’o tātou ana’e. E mea faufa’a roa ’ia ha’amana’o i te fafaura’a pāpū tā tātou e fa’ari’i i te hepetoma tāta’itahi, ’a tātarahapa ai tātou ’e ’a rave ai i te ’ōro’a mo’a, « ’ia vai noa tōna Vārua i roto ia rātou ē a muri noa atu ».5
Mai te mea ʼua putapū ʼoutou i te fa’aurura’a a te Vārua Maitaʼi i teie mahana, e nehenehe ’outou e feruri mai te hō’ē fa’a’itera’a marū ē, tē ʼohipa nei te tāraʼehara i roto i tō ʼoutou oraraʼa.
Mai tā Elder Jeffrey R. Holland i para : « I te mau taime ato’a e tupu mai teie mau taime ta’a ’ē roa, ’eiaha tātou e fati i mua i te mata’u ē, ’ua fa’aru’e te Atua ia tātou ’aore rā, ’aita ’oia i fa’aro’o i tā tātou pure. Tē fa’aro’o nei ’oia ia tātou. Tē ’ite mai nei ’oia ia tātou. Tē here nei ’oia ia tātou ».6
’Ua tauturu taua ha’apāpūra’a ra iā’u. ’Ia ’ite ana’e au ’ua ātea vau i te Fatu, ’ia taere ana’e te mau pāhonora’a i tā’u mau pure, ’ua ha’api’i mai au ’ia pe’e i te parau a’o a te peresideni Nelson, ’ia hi’o fa’ahou i tō’u orara’a nō te ’ite i te mau taime nō te tātarahapa. ’Ua fa’aha’amana’o mai ’oia ia tātou : « ’O te tātarahapa tāmahana te ’ē’a o te vi’ivi’i ’ore, ’e nā te vi’ivi’i ’ore e fa’atae mai i te mana ».7
Mai te peu tē fifi ra ’outou ’ia putapū i te Vārua Maita’i, e nehenehe ’outou e uiui ia ’outou iho, tē vai ra ānei te hō’ē mea e ti’a ia ’outou ’ia tātarahapa ’e ’ia fa’ari’i i te fa’a’orera’a hapa.8 E nehenehe ’outou e pure ma te fa’aro’o nō te ’ite e aha te mea e rave ’ia tāmāhia, ’ia ti’a ia tātou ’ia fa’ari’i i te auhoara’a tāmau a te Vārua Maita’i.
Mai te mea e hina’aro ’outou e fa’ari’i i te auhoara’a a te Vārua Maita’i, e ti’a ia ’outou ’ia hina’aro i te reira nō te mau tumu maita’i. E ti’a i tā ’outou fā ’ia riro ’ei a te Fatu. Mai te peu e mea ’ōpipiri tā ’outou mau fa’aitoitora’a, e mea fifi nō ’outou ’ia fa’ari’i ’e ’ia putāpu i te mau muhumuhu a te Vārua.
Te tāviri nō’u ’e nō ’outou ’o te hina’arora’a ïa i te mea tā te Fa’aora e hina’aro. E ti’a i tō tātou mau hina’aro ’ia tura’ihia e te here mau o te Mesia. E ti’a i tā tātou pure ’ia riro i « te mau mea ato’a tā’u e hina’aro, o tā ’oe ato’a ïa e hina’aro. ’Ia ha’apa’ohia tō ’oe hina’aro ».
Tē tāmata nei au i te ha’amana’o i te tusia o te Fa’aora ’e tōna here iā’u. I muri iho, ’ia pure ana’e au i te Metua i te ao ra nō te ha’amāuruuru iāna, e putapū vau i te here ’e i te ha’apāpūra’a ē, ’ua fa’aro’ohia tā’u pure, ’e e fa’ari’i au i te mea maita’i a’e nō’u ’e nō te feiā tā’u i here. E ha’apūai te reira i tō’u ’itera’a pāpū.
Nō te mau mea ato’a tā te Vārua Maita’i e fa’a’ite pāpū nei, te mea faufa’a roa a’e nō tātou, ’oia ho’i ’o Iesu te Mesia, te Tamaiti ora a te Atua. ’Ua fafau mai te Fa’aora, « ’ia tae mai rā te fa’aa’o nō ’ō mai i te Metua ra, nā’u e tono mai, o te vārua parau mau nō ’ō ’oia i te Metua ra, nāna vau e fa’a’ite ».9
Tau matahiti i ma’iri, ’ua fa’ari’i au i te hō’ē niuniu mai roto mai i te hō’ē metua vāhine ahoaho. ’Ua parau mai ’oia iā’u ē, ’ua haere tāna tamāhine e ora i te ātea ’ē roa iāna. Nō te iti te taime ’a fārerei ai ’oia i tāna tamāhine, ’ua feruri ’oia ē, tē vai ra te hō’ē fifi rahi. ’Ua tāparu mai ’oia iā’u ’ia tauturu iāna.
’Ua ’itehia iā’u ’o vai te taea’e hāhaere o te tamāhine. E nehenehe ’outou e parau ma teie i’oa ē, tei reira ’oia e mea maoro i teienei. ’Ua niuniu atu vau iāna. E mea ’āpī roa ’oia. ’Ua parau mai ’oia iā’u ē, ’ua fa’aarahia rāua tōna hoa hāhaere i te pō ma te mana’o pe’ape’a nō te reira tamāhine, te fa’aurura’a ato’a ē, tē rave nei ’oia i te mau mā’itira’a o tē fa’atupu mai i te ’oto ’e te ’ati. Nā roto i taua fa’aurura’a a te Vārua, haere atu ra rāua e hi’o iāna.
I te ’ōmuara’a, ’aita ’oia e hina’aro e paraparau ia rāua i tōna huru orara’a. I raro a’e i te fa’aurura’a, ’ua tāparu rāua iāna ’ia tātarahapa ’e ’ia mā’iti i te ’ē’a tā te Fatu i fa’ata’a nōna. ’Ua ’ite a’era ’oia ē, ’ua ti’aturi au nā roto i te Vārua, te rāve’a hō’ē roa i ’ite ai rāua i te huru o tōna orara’a, mea nā roto mai ïa i te Atua. ’Ua tu’u te hō’ē metua vahine i tōna mau ha’ape’ape’ara’a here i tō tātou Metua i te ao ra ’e i te Fa’aora. ’Ua tonohia te Vārua Maita’i i terā nā taea’e hāhaere nō te mea ’ua hina’aro rāua e tāvini i te Fatu. ’Ua ha’apa’o rāua i te mau parau a’o ’e te fafaura’a i roto i Te Ha’api’ira’a Tumu ’e te mau Fafaura’a :
« ’Ia ’ī noa ato’a ho’i tō ’oe ’ā’au i te here i te mau ta’ata ato’a, ’e i te ’utuāfare fa’aro’o, ’e ’ia fa’a’una’una noa te parauti’a i tō ’oe ferurira’a i te mau taime ato’a ; ’ei reira tō ’oe ti’aturira’a e pūai roa ai i mua i te aro o te Atua ; ’e e ma’iri mai te mau ha’api’ira’a tumu nō te autahu’ara’a i ni’a i tō ’oe vārua mai te hupe nō te ra’i mai.
« ’E e riro te Vārua Maita’i ’ei ’āpiti nō ’oe i te mau taime ato’a, ’e tā ’oe sēpeta ’ei sēpeta taui ’ore nō te parauti’a ’e te parau mau ; ’e e riro tō ’oe mana ’ei mana mure ’ore, ’e e tae noa mai te reira ia ’oe ma te fa’ahepo ’ore ē a muri ē a muri noa atu ».10
Tē fa’a’ite pāpū nei au ē, ’ua tāpe’a te Fatu i tāna parau fafau. E tonohia te Vārua Maita’i i te mau melo ha’apa’o maita’i o te fafaura’a a te ’Ēkālesia a Iesu Mesia. E riro tō ’outou mau ’itera’a ’ei mau ’itera’a ta’a ’ē, ’e e arata’i te Vārua ia ’outou mai tei au i tō ’outou fa’aro’o ’e i tō ’outou ti’ara’a ’ia fa’ari’i i te heheura’a nō ’outou ’e nō te feiā tei herehia ’e tei tāvinihia e ’outou. Tē pure nei au ma tō’u ’ā’au ato’a ’ia tupu tō ’outou ti’aturira’a i te rahi.
Tē fa’a’ite nei au i tō’u ’itera’a pāpū ē, tē ora nei te Atua te Metua. ’Ua here ’oia ia ’outou. Tē fa’aro’o nei ’oia i tā ’outou pure tāta’itahi. ’Ua pure Iesu Mesia i te Metua ’ia tono mai i te Vārua Maita’i nō te arata’i, nō te tāmāhanahana, ’e nō te fa’a’ite pāpū i te parau mau ia tātou. ’Ua fā mai te Metua ’e tāna Tamaiti Here ia Iosepha Semita i roto i te hō’ē uru rā’au. ’Ua ’īriti Iosepha Semita i te Buka a Moromona nā roto i te hōro’a ’e te mana o te Atua.
’Ua fa’aho’i mai te mau ve’a nō te ra’i i te mau tāviri o te autahu’ara’a. ’O te peresideni Russell M. Nelson te peropheta a te Atua nō te fenua ato’a.
’Ei ’ite nō Iesu Mesia, ’ua ’ite au ē, tē ora nei ’oia ’e tē fa’atere nei ’oia i tāna ’Ēkālesia. E nehenehe ’outou ’e ’o vau ato’a nei e fa’ari’i i te Vārua Maita’i ’ei hoa tāmau, ’e ’ia ’ite i te ha’apāpūra’a o teie mau parau mau ’ia ha’amana’o ana’e tātou ’e ’ia here tātou i te Fa’aora, ’ia tātarahapa ’e ’ia ani tātou ’ia vai tōna here i roto i tō tātou ’ā’au. Tē pure nei au ē, ’ia fa’ari’i tātou i terā ha’amaita’ira’a ’e te auhoara’a o te Vārua Maita’i i teie mahana ’e i te mau mahana ato’a o tō tātou orara’a. ’Ua here au ia ’outou. Nā roto i te i’oa mo’a o Iesu Mesia, ’āmene.