Kaota Kakoauan Iesu Kristo n te Taeka ao n te Mwakuri
Ngkai ti keiaki ni maiuakina maiura n rau ma Ana euangkerio Iesu Kristo, arora a na riki bwa te kakoaua ae maiu ibukin ara Tia Kabooi Maiura.
Teuana mai ibuakon te berita are ti karaoia n te bwabetito bwa ti kukurei ni katokaa i aora aran Iesu Kristo. Au kantaninga n te bong aei bwa N na kauringiira bwa ti kona ni kaotia nakon te Atua bwa ti katoka i aora Aran Natina man kaotan ara koaua n te taetae ao n te mwakuri, ni katoa tai ngkana ti kona, bwa Iesu bon te Kristo.
Ngke e buokiia ao n reireiniia aomata i Amerika imwiin Mangautina, e taku te Tia Kamaiu:
“A tuai ni wareki koroboki aika tabu, are e taku bwa kam na katokaa i aomi aran Kristo, are bon arau? Bwa kam na weteaki n te ara aei n te kabanea ni bong;
“Ao ane e katokaa iaona arau, man teimatoa n uaa te toki, ao e na bon kamaiuaki n te kabanea ni bong.”1
E a tia n reireiniira Beretitenti Russell M. Nelson bwa “katokaan aran te Tia Kamaiu i aora n raonaki ma katanoatan te koaua nakoia tabeman—rinanon ara mwakuri ao ara taetae—bwa Iesu bon te Kristo.”2
Ngkai ngaira membwa n Ana Ekaretia Iesu Kristo ibukiia Aika Itiaki ni Boong aika Kaitira, iai iroura te kakabwaia ao reken te tai n tei bwa taan kakoaua ibukin te Uea ao Arana n taabo nako ake ti mena iai.3 Ngkai ti keiaki ni maiuakina maiura ni katitabooa ma Ana euangkerio Iesu Kristo, arora a na riki bwa te kakoaua ae maiu ibukin ara Tia Kabooi Maiura ao Arana. Ao, ti kakoaua iroun Kristo n te taeka man tibwakina ma tabeman bwa tera ae ti kakoaua, namakinna, ke n ataia ibukin Iesu Kristo.
Ngkana ti tibwaua ara koaua ma te nanorinano iroun te Uea rinanon ara taetae ao n ara mwakuri, e kamatoaa te Tamnei ae Raoiroi4 nakoia naake a nanonna raoi, a kaukii nanoia, ma te iango ae tatauraoi bwa Iesu bon te Kristo.5
I tangiria n tibwai uoua katooto aika a kaunganano i aoia membwa ake a kaotia nakon te Atua bwa a katoka iaoia aran Iesu Kristo man tataekinana ao ni kaota aia kakoaua iaon te Uea ni bootakin te Ekaretia.
Te moan katooto: Ngke kainabau, Elaine, ao Ngai ti nako Tibein n 2022, ti ira te Reirei n Tabati n te iunite ae uarereke n te Ekaretia ikekei. Ngke I tekateka mai moa ao kainabau ibuakoia kaain te taromauri, I noria bwa e tekateka irarikin temanna te unaine. Ngke e bwara te bootaki n toa, I mwananga ni kawara Elaine ao n tuangnga bwa e na kabwarabwaraai nakon raoraona ae boou. E karaoia ao e kaotia bwa te aine aio, are tiaki kaain te Ekaretia, e a tia n roroko n te Ekaretia n te maan ae uoua te ririki. Ngke I ongo, I titirakina te aine ae mamaka te Atua aei bwa tera ae e karikia bwa e na okioki ao n iriira ara bootaki n taromauri n te tai ae maan. E kaeka te aine ma te tangira, “I tangiria n roko ikai ibukina bwa kam taetaekina Iesu Kristo n ami bootaki n taromauri.”
E oota, membwa n te Ekaretia i Tibein n te iunite anne a taetae, reirei, ao a kaota koauan Kristo inanon aia bootaki n taromauri.
Te kauoua ni katooto: I mwiin au beku n Aonon Brazil, e roko katabeakiu ae boou bwa N na beku n ana etekuata te Ekaretia. Ngke ti mwaing nako Salt Lake City ni banen Turai n te ririki aei, ti kaei taromauri n te Tabati n ara uoote ae kakateke ae boou. Teuana te bootaki bon tabatin te aki mamatam ao ni kaoti koaua. Imwiin anakin te toa ma te karinerine, a teirake membwa ao ni kaota aia koaua mai inanoia iaon te Tia Kamaiu temanna imwiin temanna. E boboto te botaki iaon Iesu Kristo, ao ti kona n namakina te Tamnei. Ti karikiraeaki, ao ara koaua a kakorakoraaki. Ngkana a kakoaua raoi n ukora te koaua rao n te Ekaretia, n te tai n taromauri, a na kona n ataia bwa aio bon Ana Ekaretia Iesu Kristo.
Bon te kakabwaia noran ae ara bootaki n te Ekaretia bwa rinean te tai ibukira ni koauan Kristo ao ni kaotia nakon te Atua ae ti kimwareirei ni katoka aran Natina iaora.
Ngkai, n a kaota te katooto ae mwakaroiroi ni katokakin iaora aran Iesu Kristo man kaotan ara koaua Irouna rinanon ara mwakuri.
N Aokati ae nako, I raona Unimwaane Johnathan S. Schmitt nakon kaukan neweabaan te Feather River California Tembora i Yuba City. Ikekei E reke au tai ni kairiia kurubu n tain te kaneweaba n te tembora. Teuana mai ibuakon kurubu aikai iai kaaina ae te membwa n te Ekaretia, ae Virgil Atkinson, ao itiman raoraona man aro ake tabeua. N rabanen te kaneweaba, i nanon te tembora n te ru ni kabaebae, e rangi n rotaki nanon te Tari Artkinson ngke e kaota ana tangira ibukiia raoraona ake a roko n te tembora n te bong anne. Imwiin raoi ae e tia, e teirake te aine temanna man te kurubu ao e taku, “Ti bane n tangira Virgil. Akea te tai ae e tia iai ni kairoroa ana koaua iaora. Ma e aki naba maamaa n ana koaua. E ti maiuakina te bwai are e kakoauaa.”
I nanon ririki, maiun te Tari Atkinson n aron Kristo e riki bwa te kakoaua ae korakora nakoia raoraona. Ana katooto bon te kakoaua ae korakora bwa e a tia ni katoka iaona aran Kristo.
Ni kainana, n na tibwa te reirei are I reiakinna bwa ti na kanga ni katokaa iaora aran Kristo ao n kaokaota koauan Kristo man kabonganaan etin aran te Ekaretia.
Beretitenti Nelson, Ana burabeti te Atua ae maiu, n te rongorongo n te maungatabu ni kabuta n 2018 ae atunaki “Etin Aran te Ekaretia,” e taku: “E bon kaetaki. Bon te bwai ae e tua te Uea. Bon tiaki Iotebwa Timiti ae arana te Ekaretia are kaokaki; ai uana naba ma Moomon. Bon te Tia Kamaiu are taku, ‘Bwa anne aran au ekaretia ni boong aika kaitira, ae Ana Ekaretia Iesu Kristo ibukiia aika Itiaki ni Boong aika Kaitira’ [Reirei ao Berita aika Tabu 115:4].”6
Ti bane ni kitana te maungatabu ni kabuta n te bong anne ni kamatoaa ao ni motinanoia ni iriira te burabeti ao ni kabongana aran te Ekaretia ae kaokaki man te tai anne. I bon tarataraai bwa N a kakoauaa bwa I kabongana aran te Ekaretia ae eti. Tabeua taai ni moanakina, I kataia n taraia raoi bwa N aki kariaia ni manga oki rikaaki nakon aroaro ake mai i mwaaina. Ni moan kataakina, I namakina te mweeraoi ni kabonganakin aran te Ekaretia ae kaokaki. I kaotia bwa n angiin te tai, I bon waekoa n taekina aran te Ekaretia ni kawaekoa. I raraoma bwa a na aki rangi n ongora nakon bwaninin aran te Ekaretia aomata ao a na bae ni iangoia bwa e rangi n abwabwaki.
Ma, I a ataia imwiina bwa taekinan bwaninin aran te Ekaretia ni bon nanonna e anganai te tai ae kakawaki n taekina aran Iesu Kristo ao ni bon etina ni kaota kakoauaan te Tia Kamaiu man kaotan Arana n aran Ana Ekaretia. I noria naba bwa ngkana I taekina etin aran te Ekaretia ma tabeman, I katoatai n uringa Iesu Kristo ao n namakina Ana kairoro inanon maiu.
Man iriiran te burabeti, ti kona ni bane n reiakinna n kaota koauan riki Iesu Kristo man kabonganaan eitn aran te Ekaretia, ngaia are ti bon katoka iaora bwaninin aran te Uea.
Ni moaningabongin te tabati aei, I kukurei ni kakoauaa bwa Beretitenti Nelson bon ana burabeti te Atua ae maiu ao bwa Ana Ekaretia Iesu Kristo Ibukiia Aika Itiaki ni Boong aika Kaitira bon ana Ekaretia Kristo ae kaokaki. I kakoaua ma te nanorinano iaon Natin te Atua ao n Rikina mai ieta. Bon Ana Moan Nati te Atua ao Natina ae Tangiraki, ara Tia Kamaiu ao te Tia Kabooi Maiura, te Manuera.7 N aran Iesu Kristo, amen.