A Nger a Blechoel el Jesus Kristo
Ngii di el ngera el ker malechub a chetituokel tekoi el mchelbangel, e a nger a blechoel de betik er a klengar me a osisecheklel a Jesus Kristo.
Rodam me a rodos, ke de meral mloungil mai a chedaol subeled er a ikal erul klebesei. A remengitakl a meral mle ungil. Tirkel mlo mengedecheduch a mle dongu er a Rubak. Ak meluluuch me komo olengit er a Chedaol Reng el mo mekrael er kemiu er a omesubii sel bo momtab aikal klemerang el mlosisechakl er tial de ngarngii e mengedecheduch. Aika meral mlodurokl er a babeluades.
Tial mei el sandei a Sandei el Baskua. Tia sel ngii a kot el klou a belkul loldanges er ngii a rechedal a klechelid el oltirakl er a Jesus Kristo. Sel ngii a kmal uchul e kid a outkeu er a Kurismas a Baskua. Sel Mei, Moltirakl er Ngak el suobel er chelechal sandei a mo odbechau el mo mesuub er sel ngarbab el sisebellel a Osobel el mora Jerusalem, me sera longikiid er a templo, sera bolcharm er a Sers er a Gethsemane, sera le Mekerus, klebokel el Okisel, me a ikel bek el taem er a bol dum el mor tirkel roltirkal er Ngii.1
Bo molchesiu aikal chedaol bades e msiik a bek er rolel el mo mereng a sulel a Demad er a Babeluades el uldureklii a Dita el Ngelekel.2 E le a uchul a Jesus Kristo, eng sebeched el mo ouchel a rengud e mo nguu a klausubes er a kngtid. E leng Ngii a uchul, ea derta er kid a mo mekiis ra kodall.
Ak dirrek lolengit er kemiu el lmuut el mo mesuub er sel cheldechedechal a Osobel er a bol dum el mora rechedal a Nephi er a beluu er a Merikel, el llechukl el ngara 3 Nephi. Ng diak el meketeket ruchei er a le mei, ea oto ra Ngerel a mlorenges er tirkal chad, uldimukl a ikakid el mildung el ongit:
Kau ng diak el sebechem er chelechang el lmuut el me er ngak, e bo mobult, me bol sebechek lomekungil er kau?
Mesang, a kuldars a klechubchub loleker er kau, meng kel sebechel el mei, a bok nguu.”3
Rodam me a rodos, a Jesus Kristo a oldars er tial osisiu el ongit lekor kau er a chelechal sils. A kulengit er kau el mei e bo er Ngii me bol sebechel lomekungil er kau! Ngii a mo omekungil er kau er a kngtim sel obo mouchel. Ngii a mo omekungil er kau er a klengit el reng me a dakt. Ngii a mo omekungil er kau er a telemall el ngar kau er tial beluulechad.
Ngii di el ngera el ker malechub a chetituokel tekoi el mchelbangel, e a nger a blechoel de betik er a klengar me a osisecheklel a Jesus Kristo. Mluut el subii a Tngakireng er Ngii, beltikelreng er Ngii, klechubchub er Ngii, Osisecheklel, ma mla moluut el ebangkelio er Ngii er a omekungil me a merael moungil. Mobult el mo er Ngii! Moltirakl er Ngii!
A Jesus Kristo ea uchul a okedecherul a templo. A derta er ngii a chedaol Blil. A meruul a telbiil me a meruul a meklou a belkul chedaol ruoll er a templo, me a dirrek osiik rolel el mo kmeed er Ngii er a templo, a mo omekngeltengat er a klengar er kemiu el bebil er a omengull ma odanges a diak el sebechel meskemiu. Tiaikid a uchul, e kemam a chemoit a rokui el klisicham me a ikel klengeltengat er a templo a mo sebechel mora rokui el chedal a ikelesia el meliuekl er a beluulechad. Chelechal sils, e a kuba klou el omereng el saul e mo ouchais a uldesuam el mo omekedechor a beches el templo er aika el derta el basio:
-
Retalhuleu, Guatemala
-
Iquitos, Peru
-
Teresina, Brazil
-
Natal, Brazil
-
Tuguegarao City, Philippines
-
Iloilo, Philippines
-
Jakarta, Indonesia
-
Hamburg, Germany
-
Lethbridge, Alberta, Canada
-
San Jose, California
-
Bakersfield, California
-
Springfield, Missouri
-
Charlotte, North Carolina
-
Winchester, Virginia
-
Harrisburg, Pennsylvania
Rodam me a rodos er ngak, ak sioning el kmo a Jesus Kristo a omekrael a tekingel a Ikelesia er Ngii. Ak ouchais el kmo a doltirakl er Ngii a dital rael el mora di ngarngii el deurreng. Ak medengei el kmo a Klisichel a memetengel er a roltirakl-a telbiil el chedal, el bleiull er a “llemalt e oba klisichel a Dios el klebkall el ngarbab.”4 A kuchotii a klaumerang er ngak, loba beltkil a renguk me a klengeltengat el mera derta er kemiu, el ngara chedaol ngklel a Jesus Kristo, amen.