Melai er a Klisichel a Dios lokiu a Telbiil
Sel morael ra rael e ra telbiil, el ngara techolbchelid el mora templo ma chelsel a klengar er kau, e ak yaksok er kau ersel klisiich el lotekau a ikel beriusel a tekingel a klechad.
Tial mlo merek el Ongeteruich ma tal buil, eng mlarngii a techellek el mlo olterekokl er sel Templo er a Belém Brazil. Ng mle ungil techall ma deureng el mlo obengterir a re mla mechedaol el chedal a Ikelesai el ngara diluches er a Brazil. Seikid el taem, e ak mlo medengei el kmo a Belém a siseball el morsel kot el mesisiich el omoachel el ngara beluulechad, el Amazon River.
Meng diak el iior er a klisichel, eng erul taem er a tal rak e ngarngii a ngodech el dubech el ongasireng. Sel sekum me a sils, ma buil, ma beluulechad a mo blechobech el melemalt, ea mesisiich el iull a omerius el mo remel, lomtok er a meral teltelel a lomaoch a ralm. Iull el 6 meters a telongoklel1 el merael el mo cheroid el kmeed el 50 kilometers2el merael bedul remel a llechukl er a rekord. Tial ongasireng, el dodengelii el remekl el iull, a lomekedong er ngii tial beluu el pororoca, ma lechub eng “mesisiich el merrumk” e leng tial kedelal el ngerel. Ng klemerang a de dul kmo tial kedelal a Amazon a kirel loltirakl er a klisiich er a babeluades.
E diua Amazon, kid a ngarngii a meral teletelel a orretel a klengar er kid; me kede blechoel loltirakl er ngii. E diua Amazon, loba klisichel a babeluades eng sebeched el kudmokl a ngodech el tekoi. Eng bleketakl, el diak el sebechel el di kid elmo ngariou a rengud, orenges a tekoi, malechub el soad lodars a rengud el mora Dios. Ngdi sel bode uaisei e kede obult, el lmuut elmo kiei el lobengkel a Dios, e nguu sel blingeled el diak a ulebengelel klengar.
Meng diak el de uai ea Amazon, leng sebeched el melilt el kmo kede moltirakl ra klisichel a babeluades malechub e kede “di obengkel a berius.”3 Sel dorael el lomtok ra berius eng kmal chetiteuokel. Ngdi sel doltirakl “a ikel longitikaik a Chedaol Reng” e dongeroid a ikel mekngit el omilkingel a sechal malechub ea redil,4 eng sebeched el nguu sel klisichel a Osobel me lobult a klengar er kid, sel klisiich elmo meruul a meringel el tekoi.
A President Russell M. Nelson a ulsisechakl er kid el mekerang sel dongetmokl er tial tekoi. Ng yaksok, “A dertal chad el kutmokl a telbiil ersel blil a techolbechelid me a templo—e otirakl—a mla toketekii a rolel el morsel klisichel a Jesus Kristo … [el tikeuid] el morbab ersel klisichel tial mechitechetong el beluulechad.”5 Ng belkul a kmo, ng sebeched el ngmai a klisichel a Dios, engdi kede mo er Ngii lokiu a chedaol el telbiil.
Nguchei ra beluulechad e ra lobeob, ea Dios a kiltmokl a telbiil el ual roled el luchul e kid, el Rengelekel, a mo dmak Lobengkel. Ngultuil er a diak a ulebengelel, e diak el mengodech el llach, Ngii a milketakl a ikel teletael el dobult, e mo suobel, e ngoriakl. A chelsel tial klengar, e kede kutmokl a telbiil e meruul a chedaol reuol ra priesthood e yaksok elmo meruul a ikel tekoi lolengit er kid a Dios, esel lobult, ea Dios a yaksok er kid a ulterkokl el klengeltengat.6
A telbiil a yaksok e kired el kldmokl el kirel, e ungil bleketakl er a rengud, e mo mui el kulii.7 A domak ra telbiil lobengkel a Dios a ngodech er sel kuk di domekbeot a tekoi ra telbiil. A kot, ea klisichel a priesthood a usbechall. Ongerung, a ou ralm mesils el telbiil a diak a urekodel el klisichel el tikeuid el morbab er sel mengurs el rolel a klechad. Kede kudmokl a telbiil sel sekum eng ngara rengud el rokir el mo ungil lotireklii el kutmeklii.8 Kede mo ngelekel a Dios er a telbiil e nguu a rengedel, tokuni sel lulecholt er a rengud el mui loltirakl er a telbiil.
A belkul a rael e ra telbiil a melutk el kirel a betok el telbiil el ngoikid el mora Kristo e mo moak el mo er Ngii. Ngokiu tial lotil a telbiil, eng sebeched el ngmai er Ngii a klisiich el diak a ulebengelel. A rael omuchel lokiu ra klaumerang ra Jesus Kristo ma ouchel reng, lokiuelel a techolbechelid e mo nguu a Chedaol Reng.9 A Jesus Kristo a ulechotii er kid el mekerang a de siiseb er sel rael sera bol metecholb.10 A doltirakl er a Ebangkelio ra Beches el Renged ra tekingir a reua Markus ma Lukas, ea Demad ra Babeluades a bleketakl el melekoi ra Jesus er sel techolbechelid er Ngii, el kmul kmo, “Kau a betik e ra renguk el Ngelekek; ngokiu er kau e ak dmeu a renguk.” Sel de siseb ersel rael ra telbiil lokiu a techolbechelid, e ak mo omtab er a Demad ra Babeluades el melekoi ra osisiu el tekoi el mera derta er kid: “Kau a betik er a renguk el ngelekek el Ngak a dmeu a renguk el kirem. Molemolem.”11
Sera techolbechelid mesel dolai ra chedaol el belsoil,12 e kede sioning el kmo kede kongei el nguu a ngklel a Jesus Kristo.13 Sel belkul tiang a kmo, bode kerkikl ersel ngara Uodel Renged el llach, “Ng diak morrekakl er a ngklel a Rubak el Dios er kau.”14. Sel dorenges er chelechal taem, ea oderngesed er ngii a ua le mekuul el kirel a diak a omenguul ra usbechelel a ngklel a Rubak. Ngii el llach a uldimukl er ngii, ngdi sel luleklatk a lmuut loberaod. Sel tekoi ra Hebru sel domult er ngii el “nguu” a belkul a kmo “kiderii el morbab” malechub eng “olengii,” el di ua chad e loba a banderang e lolecholt er ngii lobengterir a cheldebechel malechub a tara chad.15 Sel domult ra tekoi el “klimang” a belkul a “bechachau” malechub eng “cheleblad.”16 Sel llach el diak morrekakl ra ngklel a Rubak a belkul a kmo, “Kau a diak el kirem lomes er kau loltirakl ra Jesus Kristo dil le merekmo le ngarngii a rengum el lungil lomtechei er Ngii.”
Ke de meral mo oltirakl e omtechei er Ngii lungil sel ngarngii ra rengud e omekesang el nguu a ngklel a Jesus Kristo lokiu a telbiil. A telbiled a meskid a klisiich el kiei er a rael er a telbiil e leng deleuill er kid lobengkel a Jesus Kristo me a Demad er a Babeluades a mla mengodech. Kid a moak el mo er Tir lokiu a rengodel el telbiil.
Tial rael er a telbiil a mekrolid el mora chedaol ruoll er a templo, el ua chedaol el klisiich er a templo.17 Tial chedaol el klisiich el sengk er a Dios a cheledaol el telbiil el ngii a omak er kid elmo cherrungel el bedul Ngii. Ngar sel chedaol el klisiich, e kid a tibir, a kot, el mo melasem el mo oltirakl a llechul a Dios; ongerung, mo ouchel kirel a kengtid loba ngariou me a delmedemek el reng; ongedei, kiei loltirakl er a ebangkelio er a Jesus Kristo. Kede meruul tiang sel louedikel a klaumerang er kid el mo er Ngii, el meruul a telbiil lobengkel a Dios sel denguu a chedaol ruoll ra mo suobel ma ngar el mo cherechar, e oltirakl a ikekid el telbiil er a chelsel a klengar er kid, e melasem el mo kiei loltirakl a ikel eru el meklou el llach el mo ou beltik el reng el mo er a Dios ma re kmeed er kid. E sel oungeua, e kid, a tibir el mo oltirakl er sel llach er a klikiid er a teletael er a deleboes ea, ongeim, a odersid ma rokui el dolab el Rubak a ulemekngeltengat er kid el kirel el mo meleketek er a Ikelesia er Ngii.18
Sel doruul e doltirakl a telbiil er a templo, e kede mo ngmai a lmuut el klemedengei el kirel a moktek er a Rubak e nguu sel cherrengelel a Chedaol Reng.19 Ke de ngmai a ulekrael el mera klengar er kid. Ke de mukeroul er a otirekled meng diak kedi dolemolem, el diak a ngeral dodengei el ngalek.20 Ke debai, mo kiei loba osengel a diak a ulebengelel e mengai el lmuut el mo soad el mesiou er a Dios me a rebebil. Ke de mengai el lmuut el meleketek er a duch el mo rukui a mokted er kid er tial klengar. Kede mo selbechakl el kirel a mekngit,21 e ngoriakl a klisiched el mo odngakl a ngibesereng e mo ouchel a rengud sel de mesibas.22 Sel de rebet, e sel omeletked er a telbiled lobengkel a Dios a ngosukid el lemuut el mora tial rael. Me sel domak er kid el mora klisichel a Dios, e kid a mo pororoca, el sebeched el mo omtok er a rolel a beluulechad, er a klengar er kid el mo cherechar. Me se le uaisei, ea blingeled a mo mengodech e le sel rael er a telbiil a mekrolid el mo nguu a ngarbab el klebkall me a diak a ulebengelel klengar.23
A urekodel el telbiil a milkedmokl er a chelsel a blil a techolbechelid me a chelsel a templo a dirrek el meskid a klisiich el mo mesisiich er a ringel me a klengitelreng.24 A suobel el obengkel a ikal telbiil a mo mengebekakl ra omeroled e meskid a urunguled, ongelaod, me a budech.
A delak el mechas ma demak el rubak er a Lena Sofia me a Matts Leander Renlund a ngilai a klisichel a Dios lulekiu a telbiil er a techolbechelid sera le bol chedal a Ikelesia er a 1912, er a beluu ra Finland. Te mle ungil a rengrir el mo tebedechel sel kot el rechelel a Ikelesia er a Finland.
A Leander a mlad er a secher el tb er a eim el rak ruriul el Lena a mle dioll er a ongeteruich el ngelekir. Ngkeikid el ngalek, el demak, a mlechell er sera erul buil ruriul er a lemad a Leander. A Lena a mle doklterir a dimlak el dil bechil ng dirrek el teuid el ngelekel er a chelsir a reteruich el ngalek. Leng dimlak a ngera er ngii leng mesobil, eng milengebuul. Mlo lluich el rak el dimlak el bo lungil a cheliuel. E sel mellomes, eng mle meringel losiik a kelir. E sel kebesengei, eng omekerreu er tirkel rechedal a telungalek er ngii el metkung. Ng meringel er kid el mesa el kmo ng milekerang ra loruul a ikang.
A Lena mle sebechel lotekangel leng mle medengei el kmo a mlad el bechil me a rengelekel a sebechir el mo telungalek er ngii el mo cherechar. Sel suobel er a klengeltengat er a templo, uldimukl ersel diak a ulebengelel telungalek, a milsa budech e leng ngii el mle oumerang er sel klisichel a omerenged. Sera le ngara beluulechad, eng dimlak el nguu a chedaol klisiich malechub el milrenged el mora Leander, engdi a Leander a mle mesisiich el mengetikaik er a klengar er ngii e mle tebedechel a urungulel el kirel a ngarmedal.
Sera, 1938, ea Lena a uldars a rekord me a chedaol ruoll ra templo me bol sebechel mekedmokl el kirir a re mla mad el telungalek er ngii, ra bebil e ra mle kot el rekord el mlodars er a Finland. Uriul er a le mad, ea chedaol ruoll er a templo a milkedmokl er a rebebil el kirel, Leander, me a tirkel mla mad el rengelekel. Ngokiu a chad el omtechei er ngii, eng ngiluu a chedaol klisiich, a Lena me a Leander a mlo moak el terung, me a re mla mad el rengelekir me a demak a mlo moak el mo er tir. Diua rebebil, a Lena a “mlad el ngara klaumerang, ng dirkak el ngai a yaksok, engdi mle ngar cheroid e mes, … [mle] mengesuseu er ngii, e ngilai el sichedekl ra rengul.”25
A Lena a mle kiei el di uai a bla lengai a ikal telbiil er a klengar er ngii. Ng mle medengei el kmo a telbiil er a techolbechelid er ngii me a chedaol belsoil a mekur el mora Osobel. Ng “milcherei a omeltkel ersel chedaol el basio el le ngarngii a [Olsobel] meng msang a ikel loureng a rengul.”26 A Lena a ulemes er ngii el tara klou longasireng ra Dios el ngii a silubii el kirel a diak a ulebengelel telungalk ruchei ra bol lolchesuar a ikel kereor ra klengar er ngii. Ngokiu a telbiil, eng ngiluu sel klisichel a Dios e lotekangel e ngoriakl er a ikel mengurusii el lodechelakl ra ongarem ma ringel.
Sel morael ra rael ra telbiil, el ngara techolbechelid el mora templo ma chelsel a klengar er kau, e ak yaksok er kau ersel klisiich lotekau a ikel beriusel a tekingel a klechad—klisiich el mesuub, klisiich el louchel e mo cheledaol, klisich el mo metik a urunguled, ongelaod, ma deurreng sel bo mchau a ringel er a klengar. Ak yaksok er kau ma telungalek er kau el selbechakl el kirel a ikel longitikaik ra cherarou, tokuni sel sekum a templo a klou el moktek er a klengar er kau.
Sel bom moltirakl ra Kristo e moak elmo er Ngii ma Demad ra Babeluades e lokiu a telbiil, eng ngarngii a kora ngodech elmo dubech. Kobult e mo mecherungel er a Jesus Kristo.27 Kau a mo ngalek er a telbiil ra Dios e mo oudiukes er a Rengedel.28 Ak mo omtab er a Demad ra Babeluades el melekoi er kau, “Kau a betik er a renguk el ngelekek el Ngak a dmeu a renguk el kirem. A kuutkeu er kau el me remei.” El ngara a ngklel a Jesus Kristo, amen.