O Se Talatuu o le Faamalosiauga
Ou te fautuaina outou ina ia faaauau pea ona taumafai ia agavaa e toe foi atu i le Tama Faalelagi ma Iesu Keriso.
Ou uso e ma tuafafine pele, ou te faafetai i le faapotopoto ai ma outou i lenei konafesi aoao o Le Ekalesia a Iesu Keriso o le Au Paia o Aso e Gata Ai. Ua matou lagonaina lo outou faatuatua ma lo outou alolofa po o fea lava o outou i ai. Ua faagaeetia i tatou i aoaoga musuia, o molimau mamana, ma musika maoae.
Ou te fautuaina outou ina ia faaauau pea ona taumafai ia agavaa e toe foi atu i le Tama Faalelagi ma Iesu Keriso. Po o fea lava o e i ai i luga o le ala o feagaiga, o le a e maua lava se tauiviga e faasagatau i tofotofoga faaletino o le olaga nei ma le tetee foi a Satani.
E pei ona sa ta’u mai ia te au e lo’u tina, pe a ou faitio i se mea faigata, “E, Hal ioe e faigata. O le mea e tatau ai. O le olaga o se tofotofoga.”
Sa mafai ona ia fai mai ma le toafimalie lena mea, e ataata foi, aua sa ia iloaina ni mea se lua. Po o le a lava le tauiviga, o le mea e sili ona taua o le taunuu lea i le aiga e faatasi ai ma lona Tama Faalelagi. Ma sa ia iloa e mafai ona ia faia e ala i le faatuatua i lona Faaola.
Sa ia lagonaina Lona latalata mai ia te ia. I aso ina ua ia iloa o le a maliu, sa ia talanoa mai ia te au e uiga i le Faaola a o taoto i lona potumoe. Sa i ai se faitotoa agai i se isi potu i autafa o lona moega. Sa ataata o ia ma tilotilo atu i le faitotoa ina ua ia talanoa toafimalie mai e uiga i le le o toe mamao ona vaai lea ia te Ia. Ou te manatua pea lo’u vaai atu i le faitotoa ma vaai faalemafaufau i le potu i tua atu.
Ua i ai nei o ia i le lalolagi o agaga. Sa mafai ona taula’i ona mata i le taui sa ia manao ai e ui i tausaga o tofotofoga faaletino ma faaletagata lava ia.
O le talatuu o le faamalosiauga sa ia tuua mo i matou e sili ona faamatalaina i le Moronae 7, lea o loo faamalosiau ai e Mamona lona atalii ma lona nuu. O se talatuu o le faamalosiauga i se fanau e faapei ona faia e lo’u tina i lona aiga. Sa pasi atu e Mamona lena talatuu o le faamalosiauga ia i latou uma e i ai se naunautaiga ia agavaa, i o latou tofotofoga uma faaletino, mo le ola e faavavau.
O loo amata e Mamona i fuaiupu muamua o le Moronae 7 i se molimau ia Iesu Keriso, o agelu, ma le Agaga o Keriso, lea ua mafai ai e tatou ona iloa le lelei mai le leaga ma mafai ai ona filifili le mea tonu.
Ua ia tuu faamuamua Iesu Keriso, e faapei foi o i latou uma o e ua faamanuiaina i le tuuina atu o le faamalosiauga ia i latou na tauivi aga’i i luga i luga o le ala i lo latou aiga faalelagi.
“Ona e le mafai ona faaolaina o se tagata, e tusa ma fetalaiga a Keriso, vagana ai ua latou faatuatua i lona suafa; o le mea lea, afai ua le toe i ai nei mea, ua le toe i ai foi se faatuatua; ma ua matua leaga lava le tulaga o tagata, ona o le a pei i latou e peiseai e leai se togiola ua faia.
“Ae faauta, ou uso pele e, ua ou matauina ni mea lelei mai ia te outou, ona ua ou matauina ua outou faatuatua ia Keriso ona o lo outou agamalu; ona a na fai tou te le faatuatua ia te ia po ua outou le agavaa e faitaulia i totonu o tagata o lana ekalesia.”1
Na vaai Mamona i le agamalu o se mau faamaonia lea o le malosi o lo latou faatuatua. Sa ia vaaia na latou faalagolago i le Faaola. Na ia faamalosiau ia i latou e ala i le matauina o lena faatuatua. Sa faaauau Mamona i le tuuina atu ia i latou o le faamalosiauga e ala i le fesoasoani ia i latou ia iloa o lo latou faatuatua ma le agamalu o le a fausia ai lo latou mautinoa ma lo latou talitonuga e manuia i a latou tauiviga.
“O lenei foi, ou uso pele e, ou te fia tautala atu ia te outou e uiga i le faamoemoe. E mafai faapefea ona outou maua o le faatuatua, vagana ai ua ia te outou le faamoemoe?
“Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga.
“O le mea lea, afai ua i ai i se tagata le faatuatua e tatau ona i ai ia te ia le faamoemoe; ona a aunoa ma le faatuatua e le mafai ona i ai se faamoemoe.
“O lenei foi, faauta ou te fai atu ia te outou e le mafai ona i ai ia te ia le faatuatua ma le faamoemoe, vagana ai ua agamalu, ma maualalo o ia i le loto.”2
Ona faamalosiau atu lea o Mamona ia te i latou e ala i le molimau atu faapea o loo latou i ai i luga o le ala mo le mauaina o le meaalofa o o latou loto ua faatumuina i le alofa mama o Keriso. Na ia lalagaina faatasi mo i latou ia fegalegaleaiga o le faatuatua ia Iesu Keriso, agamalu, lotomaualalo, le Agaga Paia, ma le faamoemoe mausali i le mauaina o le taui o le ola e faavavau. Na ia faamalosiauina i latou faapenei:
“Ona e leai se tasi e ono talia i luma o le Atua, vagana ai i latou o e ua agamalu ma maualalalo i le loto; ma afai e agamalu ma maualalo se tagata i le loto, ma tautino atu i le mana o le Agaga Paia o Iesu o le Keriso, e ao ina i ai ia te ia le alofa mama; aua afai e le i ai ia te ia le alofa mama, o se mea noa o ia; o le mea lea e ao ai ina i ai ia te ia le alofa mama.”3
O le toe tepa i tua, ua ou iloa ai nei le ala mafai ai e lena meaalofa o le alofa mama---le alofa mama o Keriso---ona faamalolosi, ta’iala, lagolago, ma suia lo’u tina i le tauiviga i lona ala i le aiga [faalelagi].
“Ma o le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava, e le faaitagofie, e le mafaufau i se mea leaga, ma e le olioli i le amioletonu ae olioli i le upu moni, e onosaia mea uma, e talia mea uma, e faamoemoe i mea uma, e onosai i mea uma.
“O le mea lea, ou uso pele e, afai e le ia te outou le alofa mama o ni mea noa outou, ona e le uma le alofa mama. O le mea lea, ia outou fusi ai i le alofa mama, le mea ua silisili lea i mea uma, ona e iu mea uma—
“Ae o le alofa mama o le alofa le pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.
“O le mea lea, ou uso pele e, ia outou tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea o outou ma atalii o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamaina i tatou e pei lava ona mama o ia.”4
Ou te faafetai mo le faamalosiauga o le faataitaiga ma aoaoga a Mamona. Ua faamanuiaina ai a’u faapea foi e ala i le talatuu a lo’u tina. O perofeta mai ia Atamu e oo mai i le taimi nei, ua faamalosia a’u e ala i a latou aoaoga ma faataitaiga.
Ona o le faaaloalo ia i latou ou te iloa patino ma o latou aiga, ua ou filifili ai ia le sailia e faamaonia mai faamatalaga o a latou tauiviga pe talanoa faalauaitele e uiga i a latou meaalofa maoae. Ae o mea ua ou vaaia ua faamalosiauina ai au ma suia ai a’u mo le lelei atili.
I se tulaga lamatia o le osofa’ia o lona tulaga ma’oti, o le a ou faaopoopo atu ai se lipoti puupuu o le faamalosiauga a lo’u toalua. Ou te faia lea mea ma le faaeteete. O ia o se tagata e tulaga ma’oti lava, e le sailia pe fiafia i ni faaviivii.
Ua 60 tausaga talu ona ma faaipoipo. Ona o lena aafiaga, ua ou malamalama ai nei i le uiga o nei upu faatusi paia: faatuatua, faamoemoe, agamalu, onosai, e le sailia e ia ana mea, e olioli i le mea moni, e le mafaufau leaga, ma e sili atu i na mea uma, o le alofa mama.5 I luga o le faavae o lena aafiaga, e mafai ai ona ou tuu atu la’u molimau faapea e foliga mai e mafai e tagata soifua ona latou tauaveina na talitonuga ofoofogia i o latou olaga i aso taitasi a o latou tula’i a’e mai mala o le olaga.
E faitau miliona outou o loo faafofoga mai ua silafia na ituaiga o tagata. O le toatele o outou o tagata faapena. Tatou te manaomia uma na ituaiga faataitaiga o faamalosiauga ma ni uo alolofa.
Pe a lua nonofo ma se tasi o la latou tuafafine po o se uso o auaunaga, ua e suitulaga i le Alii. Mafaufau i le mea Na te faia pe fetalai atu ai. O le a Ia valaaulia i latou e o mai ia te Ia. Na Te faamalosiauina i latou. O le a Ia matauina ma faaviivii atu i le amataga o le suiga o le a manaomia ona latou fai. O Ia foi le faataitaiga atoatoa mo i latou e mulimuli ai.
E le mafai e se tasi ona faia atoatoa lena mea, ae o le faalogologo i lenei konafesi, e mafai ai ona e iloa o loo e i ai i luga o le ala. E silafia e le Faaola auiliiliga o au tauiviga. Na Te silafia ou gafatia sili e tuputupu ae ai i le faatuatua, faamoemoe, ma le alofa mama.
O poloaiga ma feagaiga ua Ia ofoina atu ia te oe e le o ni su’ega e pulea ai oe. O ni meaalofa e si’i a’e ai oe agai atu i le mauaina o meaalofa uma a le Atua ma le toefoi atu i le aiga i lou Tama Faalelagi ma le Alii, o e alolofa ia te oe.
Na totogi e Iesu Keriso le tau mo a tatou agasala. E mai ona fai mo tatou lena faamanuiaga o le ola faavavau pe afai o le a lava lo tatou faatuatua ia te Ia e salamo ai ma avea e faapei o se tamaitiiti, mama a’ia’i ma saunia e maua meaalofa aupito sili o meaalofa uma a le Atua.
Ou te tatalo o le a outou taliaina Lana valaaulia ma o le a outou ofoiina atu i isi o fanau a lo tatou Tama Faalelagi.
Ou te tatalo mo o tatou faifeautalai i le salafa o le lalolagi. Talosia ia musuia i latou e faamalosi atu i tagata taitoatasi ia mananao ma ia talitonu o le valaaulia e mai ia Iesu Keriso e ala i Ana auauna o e ua tauaveina Lona suafa i o latou luga.
Ou te molimau atu o loo soifua o Ia ma o loo ta’ita’ia Lana Ekalesia. O a’u o Lana molimau. O Peresitene Russell M. Nelson o le perofeta soifua a le Atua mo le lalolagi uma. Ou te iloa e moni lena mea. I le suafa paia o Iesu Keriso, amene.