Odudu Ukeme Spirit
Ami nyema ndinɔ ekikere ŋkpɔ itiɔn emi ikemede ndinam man awam nnyin inyene eti ukeme spirit.
Ndima nditɔ-eka mi irenowo ye iban, ami mmema mbufo. Ami mmedara ke ifet emi nditiŋ ikɔ ye mbufo mfin emi. Ami mebɔŋ akam nte ekpeme mbufo ebaŋa ukɔbɔ mme asua man enyene odudu ebaŋa mme mfina mbufo.
Mme usuk mfina edi se owo efen mikanke ikut. Usuk ewɔrɔ eda aŋwa-aŋwa. Ekɔŋ emi ewanade ke Easten Europe edi kiet ke otu emi. Ami meka Ukraine ye Russia ediwak ini. mi mme idut oro, mbon owo, ye usem mmɔ. Ami meseme nyuŋ mbɔŋ akam mbaŋa kpukpru mbon eke enwam emi esimde. Nte Ufɔk Abasi nnyin ke inam kpukpru se ikemede ndinwam mbon emi enyenede mfina enyung edomode ndibɔhɔ. Imibeŋe ofuri owo ite eka-iso etre udia enyuŋ ebɔŋ akam enɔ ofuri mbon emi edude ke mfina emi. Ekɔŋ ekededi abiat kpukpru se Ɔbɔŋ Jesus Christ adade ɔnɔ ye se Enye ekpepde.
Owo nnyin ndomo kiet ikemeke ndikara mme idut mme ido mbon efen mme eke mbon ufɔkemana nnyin. Edi nnyin imikeme ndikara idem nnyin. Utom mi mfin emi, ndima nditɔ eka, edi nditre mme ekɔŋ emi edude ke esit mbufo, ufɔk, mbufo ye uwem mbufo. Sin kpukpru udɔŋ ekededi ke ndifina mbon efen—mme udɔŋ oro ekpedi iyaresit, idiɔk utiŋ-ikɔ, mme ndisua owo emi ekeduede fi. Andinyaŋa ɔnɔ uyo ete yak iwɔŋɔre mbaŋ eken,1 ete ima mme asua nnyin, inyuŋ ibɔŋ akam inɔ mbon emi ebiatde nnyin.2
Ɔsɔŋ ndisana iyatesit emi owo eduede nnyin iyak. Ɔsɔŋ ndifen nnɔ mbon emi edinam mmɔ osobode mbon emi miduehe. Edi, Andiyaŋa ɔdɔhɔ nnyin “ete ifen inɔ kpukpru owo.”3
Nnyin idi ikɔt Ɔbɔŋ Emem. Idahaemi, nnyin iyom emem emi Enye ikpɔŋ ɔnɔde. Didie ke nnyin iyom emem ke ererimbot ke ini nnyin kiet-kiet miyomkei emem ye esit kiet inɔ idem nnyin? Nditɔ eka iren ye iban, mɔfiɔk ke se ntiŋde idihe mmem mmem. Edi ikɔt Jesus Christ ana nte enim uwut-ŋkpɔ enɔ mbon efen. Ami mbeŋe mbufo nte yak enam kpukpru se ekemede nditre mme ekɔŋ esit-idem emi enwanade ke mme esit ye uwem mbufo idahaemi.
Yak ntim nwut utom emi ke nditiŋ mbaŋa ukpep-ŋkpɔ kiet emi ŋketide ke ini ŋkesede mbre basketball.
Ke mbre oro, akpa ikpehe ekedi ɔkpɔsɔŋ, eka iso eka edem. Ndien, ke mkpere utit akpa ikpehe, owo kiet ke otu mbon mbre oro ama esin nkaŋ oko ɔyɔhɔ ita. Ke ini ɔkɔsuhɔde ekpri ini man mbre etre, owo mbre kiet efen emen ball oro onyuŋ esin kiet efen ke ini edɔhɔde ete etre! Ke ntre mbon mbre nkaŋ oro ema eka nduɔk odudu ye ibat inaŋ awakde akan nkaŋ eken ye akwa idara. Mmɔ eda ukeme oro eduk ɔyɔhɔ ikpehe iba enyuŋ ekan ke mbre oro.
Ukeme spirit edi nkpɔ odudu. Kpukpru nnyin imikut utɔ emi ke ini kiet mme eken—nte uwut-ŋkpɔ, ke ŋkpɔ-isaŋ emi ɔtɔŋɔde ndisɔp mme eneni emi akabade edi utɔk.
Ke ntre ami mbup nte, nso ida ukeme spiritidi? Nnyin imikut nti ye idiɔk ukeme. Nnyin imifiɔk ikɔt Jesus Christ emi ekekabare esit enyuŋ ekɔri ke mbuɔtidem mmɔ. Edi nnyin ŋko imifiɔk nti mme enyene mbuɔtidem emi ekewɔrɔde ekpɔŋ usuŋ. Ukeme ekeme ndidi ke usuŋ iba.
Akananam nnyin iyomke eti ukeme spirit ikan nte iyomde idahaemi, man anwana ye nsɔsɔp idiɔk ye mme nkim-nkim idiɔŋɔ eke ɔkɔride ke eyo emi. Eti ukeme spirit ayada nnyin aka iso iso ke ufɔt ndik ye nyekidem emi udɔŋɔ, ofum-akpa, unyek-isɔŋ, ye mme ekɔŋ edade edi. Ukeme spirit ayanam nnyin ikan iyɔ mme idiɔk ewan emi andidiɔk awanade kpukpru ini ndien abiat uduak esie ndiwiri itiat idak isɔŋ spirit nnyin.
Ediwak edinam ekeme ndidemere eti ukeme spirit. Ŋkop-item, ima, nsuhɔre-idem, utom, ye esit ekɔm4 edi usuk.
Mfin emi nyenɔ ekikere ŋkpɔ itiɔn emi ikemede ndinam man anwam nnyin ndinyene eti ukeme spirit.
Akpa: Duk ke usuŋ ediomi nyuŋ du do.
Ibighike-bighe, ami mma nyene ata ndap eke ami nkesobode ye ata akamba eboho mme owo Mmɔ ema ebup mi ediwak mbume, andiwak nkan abangade usung edomo ye nte oro edide ata akpan-nkpɔ.
Ke ndap mi oro, ami nam-anwanga ke nnyin iduk usung ediomo ke ndina bpatism nyung nam akpa ediomo ye Abasi.5 Ini kiet ekededi emi nnyin idiade udia Ɔbɔŋ, nnyin ifiak iwɔŋɔ ndida enyiŋ Andinyaŋa nnɔ idem nnyin, nditi Enye, nnyuŋ nnim mme mbet Esie.6 Ke ibɔrɔ, Abasi anam nnyin ifiɔk ite ke kpukpru ini Spirit Abasi eyedu ye nnyin.
Edikem nnyin ifiak inam mme ediomi ke temple, emi nnyin ibɔde mme ikpɔ eŋwɔŋɔ efen. Mme edinam ye mme ediomi enam nnyin inyene odudu nte Abasi. Usuŋ ediomi edi ŋkukure usuŋ emi adade aka edimenere ye nsinsi uwem.
Ke ndap mi oro, ekem nnwan kiet ama obup danga owo emi akabiatde ediomi esie ekemede ndifiak nduk ke usung ediomi. Ibɔrɔ nkenɔde ke mbume esie mi ada mi aka ɔyɔhɔ ekikere mi iba:
Kop idara ke ndikabare esit ke usen ke usen.
Didie ke eidkabare esit ɔfɔn? Alma ama ekpep ete yak nnyin “ukukwɔrɔ ŋkpɔ efen ke mibɔhɔke edikabaresit ye mbuɔtidem ke Abasi.”7 Eyom ete yak kpukpru owo emi ɔfiɔkde idem ye emi oyomde nsi nsi ubɔŋ akabare esit.8 Owo isioho owo ndomo kiet ifep. Ke ediyarare emi ekenɔde Prophet Joseph Smith, Abasi ama asua ɔnɔ mme akpa adausuŋ ke Ufɔk Abasi ke ntak emi mmɔ mikpepke ikɔ Abasi inɔ nditɔ mmɔ.9 Edikabare esit edi akpan usuŋ ndika iso. Mbuɔtidem ada nnyin aka usuŋ ediomi.
Mbɔk kufehe ndik mme ndisik ini nkabaresit. Satan enem esit abaŋa ukut mbufo. Tre enye do. Esio odudu esie ke uwem mbufo! Etɔŋɔ ke mfin emi ekop inem ndisio owo ererimbot mfep ke uwem mbufo.10 Andinyaŋa ama nnyin akpan akpan ke ini nnyin ikabaresit. Enye ama ɔŋwɔŋɔ ete “mme obot ekpedaha, mme ŋkoŋ-ŋkoŋ isɔŋ ekpesik … ima mi idikpɔŋke mbufo.”11
Edieke ekerede ke imikpɔŋ usuŋ ediomi ika anyan mme ibihi ikaha ndien usuŋ mfiak edem iduhe, idihe akpan ikɔ.12 Mbɔk sobo ye bishop mme branch president fo. Enye edi isuŋ Abasi ndien eyewam fi ndinyene idaraesit ye ufɔn eke edikabare esit.
Idahaemi, ikɔ item: Ndifiak ŋka usuŋ ediomi iwɔrɔke ite ke uwem eyemem. Usuŋ emi ɔsɔŋ ndien usuk ini eyetie nte ɔdɔk obot.13 Ndidɔk emi, ke akpanikɔ, edi ndidomo nyuŋ mkpep nnyin, nyet edu nnyin, nnyuŋ nwam nnyin ndidi ndisana owo. Enye edi nkukure usung adade ekesim ndaha-ubong. Prophet nnyin14 emen owot ndaha edidiong ye inem eke mbio emi enimde mbet Abasi. Koro sese, ediɔŋ mmɔ ke kpukpru ŋkpɔ, ke obukidem ye ke spirit mbiba; ndien edieke mmɔ ebuɔtde idem tutu esim utit eyebɔ mmɔ esin ke heaven … [ndien] eduŋ ye Abasi ke nsi nsi inemesit.”15
Ndisaŋa ke usuŋ ediomi, ye ndikabare esit ke usen ke usen, ada eti ukeme spirit edi.
Ɔyɔhɔ ekikere ita mi: Kpep baŋa Abasi ye nte Enye anamde ŋkpɔ.
Mfina kiet emi nnyin inyenede mfin edi ndibahare mme akpanikɔ Abasi nsio mkpɔŋ mme nsu Satan. Oro edi ntak emi Abasi ɔnɔde nnyin item ete “ibɔŋ akam kpukpru ini, … man [nnyin] ikan Satan, inyuŋ … ibɔhɔ ubɔk ikɔt Satan emi enamde utom esie.”16
Moses ama ɔnɔ uwut-ŋkpɔ kiet ndikpep ndifiɔk ukpuhɔre ke Abasi ye Satan. Ke ini Satan ekedide ndidomo Moses, enye ama okut ŋkari esie koro ikibihike enye ama enyene nneme iso ye iso ye Abasi. Moses ama ɔsɔp ɔfiɔk se Satan ekedide ndien ɔnɔ enye uyo ete adaha.17 Ke ini Satan ekeyirede, Moses ama ɔfiɔk nte okotde Abasi oyom uwam. Moses ama ɔbɔ edisana odudu ndien afiakaduat idiɔk owo, ete, “Daha kpɔŋ mi, Satan, koro Abasi kiet emi ikpɔŋ ke ami ndikpono.”18
Nnyin inyene nditiene uwutnkpo oro. Esio odudu Satan ke uwem mbufo efep! Mbɔk eku tiene enye eduɔ eduk “obube ukut ye anana utit nsobo esie.”19
Ke ata usɔp, Ikɔ ntiense emi miwɔrɔke ida ke usen ke usen “ye eti ikɔ Abasi”20 ekeme ndikpa. Ke ntre, usuŋ ndikan ŋkari Satan edi mmem mmem: ana nte nnyin ikpono Abasi ke usen ke usen inyuŋ ikpep gospel Esie. Mebeŋe nte yak mbufo eyak Abasi akara uwem mbufo. Yak akamba ini mbufo enɔ Abasi. Nte enamde emi, se se itibede inɔ eti ukeme spirit mbufo.
Ekikere ɔyɔhɔ 4: Yom nyuŋ yene idorenyin baŋa mme utibe ŋkpɔ.
Moroni ama ɔdɔhɔ ete ke “Abasi itreke ndidi Abasi mme utibe ŋkpɔ.”21 Kpukpru ŋwed ikɔ Abasi anam efiɔk nte Abasi oyomde ndituk mme uwem mbon emi ebuɔtde idem ke Enye.22 Enye ama abahare Ididuot Inyaŋ ɔnɔ Moses, awam Nephi ndibɔ mme usan brass, onyuŋ afiak emen Ufɔk Abasi Esie edi oto ke Prophet Joseph Smith. Mme utibe ŋkpɔ emi kiet kiet ema eda ini ndien ikidihe ukem ukem se mbon oro ekeyomde eto Abasi.
Ke ukem usuŋ oro, Abasi eyediɔŋ mbufo ye mme utibe ŋkpɔ edieke mbufo ebuɔtde idem ye Enye, “iyikke ŋkpɔ ndomokiet.”23 Nam utom spirit man eyom mme utibe ŋkpɔ. Da akam beŋe Abasi ndinyene utɔ mbuɔtidem oro. Meŋwɔŋɔ ke emekeme ndikut ke idem fo ete ke Jesus Christ “ɔnɔ owo mmemidem odudu; ndien mbon minyeneke enye ɔkɔri odudu mmɔ.”24 Mme ŋkpɔ ifaŋ eyenam ukeme spirit fo ɔsɔp akan ndifiɔk ke Abasi ke awam fi ndimenere obot ke uwem fo mfep.
Ekikere ɔyɔhɔ 5: Tre enwan ke uwem fo.
Mefiak mbeŋe nte yak etre mme enwan ke uwem fo . Suhɔre idem, nyene uko, ye odudu emi oyomde man akan efen ɔnɔ ndien ekan efen enɔ fi. Andinyaŋa ɔŋwɔŋɔ ete “edieke [nnyin] ifende inɔ mbon efen ke mme ndudue mmɔ, Ete [nnyin] ke Heaven eyefen ɔnɔ [nnyin] ŋko.”25
Iyidia usɔrɔ Easter ke usen iba ama ebe. Ke ufɔt mfin ye ini oro, medɔhɔ yak etre ewan ke idem fo emi edride fi ɔnɔ isɔŋ. Ndi ekɔm okpon akan emi ndinɔ Jesus Christ ke ntak Mkpa usio-isop Esie? Edieke ɔsɔŋde ndifen nnɔ, beŋe yom odudu to iyip usio-isop Jesus Christ ete ediwam fi. Nte anamde emi, meŋwɔŋɔ ke emem ye ɔkpɔsɔŋ ukeme spirit eyesim fi.
Ke ini Andinyaŋa ɔkɔduɔkde iyip ɔnɔ ofuri ubon owo, Enye ama eberede usuŋ ete kpukpru mbon etienede Enye enyene edikɔk, ukeme, ye odudu edifak Esie. Mme ufaŋ spirit emi edu enɔ kpukpru mbon emi eyomde ndikop nto Enye nyuŋ ntiene Enye.
Ndima nditɔ eka mi, ye ofuri ebeŋe ke esit mi, medɔhɔ yak eduk ke usuŋ ediomi enyuŋ edu do. Kop idara ke ndikabare esit ke usen ke usen. Kpep baŋa Abasi ye nte Enye anamde ŋkpɔ. Eyom enyuŋ enyene idorenyin ebaŋa mme utibe ŋkpɔ. Edomo nditre ewan ke uwem mbufo.
Nte mbufo enamde mme ŋkpɔ emi, meŋwɔŋɔ ke eyekan eka iso ke usuŋ ediomi ke akamba ukeme, usehe mme mfina emi enyenede. Ndien meŋwɔŋɔ ke eyekan ebe idomo, enyene emem ke esit, ewɔrɔ-ufin eto ndik, enyuŋ etim eboho ke mme ufɔkemana mbufo.
Abasi odu uwem! Jesus edi Christ! Enye odu uwem! Enye ama nnyin, ndien eyewam nnyin. K’emi ke ntiŋ ikɔ ntiense ke edisana enyiŋ Jesus Christ, amen.