Video: “Kamo ang Mga Babayi nga Nakita Na Niya Ngadaan”
Sang 1979 ara si Pangulong Spencer W. Kimball sa ospital kag ginpangabay niya ang iya asawa nga si Camilla, nga basahon ang iya pamulong-pulong sa pangkabilogan nga miting sang kababayin-an.
Sister Camilla Kimball: “Ang dako nga bahin sang pagtubo nga maabot sa Simbahan sa ulihing mga adlaw magaabot bangud madamo sa maayo nga mga babayi sa kalibutan (nga masami may pagkaespirituhanon) ang magapalapit sa Simbahan nga tigdamo. Matabo ini sa bagay nga ang kababayin-an sang Simbahan magpakita sang pagkamatarong kag kaathag sa paghambal sa ila kabuhi kag sa bagay nga ang kababayin-an sang Simbahan makabig nga pinasahi kag lain—sa huwaran nga pamaagi—sa kababayin-an sang kalibutan.”1
Pangulong Russell M. Nelson: “Pinalangga kong kauturan, kamo nga importante namon nga mga kaupod sa sining ulihing mga adlaw, ang adlaw nga nakita na ngadaan ni Pangulong Kimball amo karon. Kamo ang kababayin-an nga iya nakita na ngadaan! Ang inyo kadungganon, kasanag, gugma, kaalam, kaisog, karakter, pagtuo, kag matarong nga pangabuhi magaengganyo sang maayo nga kababayin-an sa kalibutan, upod sang ila mga pamilya, sa Simbahan sa indi matupungan nga kadamuon!
“Kinahanglan … namon ang inyo kabakod, ang inyo pagkahaylo, ang kalig-on sang inyo pagpati, ang inyo ikasarang sa pagpanguna, ang inyo kaalam, kag ang inyo mga tingug. Ang ginharian sang Dios indi kag indi mangin kompleto kon wala ang kababayin-an nga nagahimo sang sagrado nga mga kasugtanan kag dayon nagatipig sini, kababayin-an nga makahambal nga may gahum kag awtoridad sang Dios! …
“… Ano man ang inyo calling, ano man ang inyo mga sirkumstansya, kinahanglan namon ang inyo mga impresyon, inyo mga panan-aw, kag inyo inspirasyon. Kinahanglan ninyo nga maghambal kag magprangka sa mga konseho sang ward kag stake. Kinahanglan namon ang tagsa ka kasado nga sister nga maghambal bilang ‘nagaamot kag bug-os nga katuwang’ sa inyo pag-isa sa inyo bana sa pagdumala sang inyo pamilya. Kasado ukon solo-lawas, kamo nga mga sister may pinasahi nga mga ikasarang kag espesyal nga paghangop nga inyo nabaton bilang mga regalo halin sa Dios. Kami nga mga kauturan nga lalaki indi makakopya sang inyo pinasahi nga impluwensya.
“Nahibal-an namon nga ang katapusan kag labing daku sang tanan nga pagtuga amo ang pagtuga sang babayi! Kinahanglan namon ang inyo kusog! …
“… Nagapasalamat ako sa inyo, mga kauturan nga babayi, kag ginabendisyunan kamo nga magtindog sa bug-os ninyo nga pagkatawo, nga tumanon ang katuyuan sang pagtuga sa inyo, samtang ululupod nga nagabuligay sa sining sagrado nga buluhaton. Ululupod naton nga ihanda ang kalibutan para sa Ika-duha nga Pagkari sang Ginuo.”2