Hagdanan sang Pagtuo
Ang kawala sang pagtuo nagapugong sang aton ikasarang nga makakita sang mga milagro, samtang ang pamensaron nga may pagtuo sa Manluluwas nagabukas sang mga gahum sang langit.
Paano ang mga hangkat sa kabuhi nagaapekto sang aton pagtuo kay Jesucristo? Kag ano ang mangin epekto sa aton pagtuo sa kalipay kag paghidaet nga aton ginaeksperiyensya sa sining kabuhi?
Ang tuig amo ang 1977. Ang telepono nagtunog, kag ang mensahe nagkumos sang amon mga dughan. Sanday Carolyn kag Doug Tebbs yara sa proseso sang pagsaylo sa ila bag-o nga balay sang makatapos sa graduate school. Ang elders quorum nagkadto sa pagpangkarga sa mahakot nga salakyan. Si Doug, nga ginaseguro nga ang dalan wala sang sablag antes mag-isol, nagtan-aw liwat sa ulihi nga tion. Ang wala niya makita amo nga ang iya gamay nga bata nga si Jennie, gulpi nagdalagan sa likod sang trak sang pag-isol gid niya. Sa isa ka lang pisok, ang ila pinalangga nga si Jennie napatay.
Ano dason ang matabo? Ang madalom nga kasakit bala nga ila nabatyagan kag ang indi matungkad nga kasubo sang mawad-an [sang mahal sa kabuhi] magatuga sang paglayoanay sang balatyagon sa tunga nanday Carolyn kag Doug, ukon magabugkos ini sang ila mga tagipusuon kag maglig-on sang ila pagtuo sa plano sang Amay nga Langitnon?
Ang dalan sa paglampuwas sa ila mga kalisdanan nangin malawig kag masakit, apang halin sa kon diin nag-abot ang espirituhanon nga kusog nga indi magdula sang paglaum, kundi “magpadayon sa [ila] banas.”1 Bisan paano ining tumalagsahon nga mag-asawa nangin mas Cristohanon pa gid gani. Mas komitido. Mas maluluy-on. Nagpati sila nga, sa Iya tion, ang Dios magakonsagrar sang ila mga kapipit-an para sa ila kaayuhan.2
Bisan nga ang kasakit kag ang kawad-an indi maghalin ukon madula sing lubos, sanday Carolyn kag Doug ginpaumpawan sang pasalig nga paagi sa pagpabilin nga mabaskog sa dalan sang kasugtanan, ang ila pinalangga nga si Jennie mangin ila sa katubtuban.3
Ang ila ehemplo nagpabaskog sang akon pagtuo sa plano sang Ginuo. Indi naton makita ang tanan. Sia makakita. Ginhambalan sang Ginuo si Joseph Smith sa Liberty Jail nga “ining tanan nga butang magahatag sa imo sang eksperiyensya, kag mangin para sa imo kaayohan. Ang Anak sang Tawo nanaog sa idalom sini tanan. Mas labaw ka pa bala sa iya?”4
Kon ginabaton naton ang pagbuot sang Ginuo, ginatudloan Niya kita nga maglakat upod sa Iya.5 Bilang isa ka bataon nga misyonero nga nagaserbisyo sa Tahiti sadto, ginpangabay ako nga bendisyonan ang nagamasakit nga lapsag. Gintungtong namon ang amon mga kamot sa iya ulo kag ginbendisyonan sia agud mag-ayo. Ang iya panglawas nagsugod sa pag-uswag, ugaling nagmasakit sia liwat. Sa ikaduha nga tion ginbendisyonan namon sia pero amo man gihapon ang resulta. Ang ikatatlo nga pagpangabay nag-abot. Nangamuyo kami sa Ginuo nga ang Iya pagbuot amo ang matuman. Sa indi madugay pagkatapos, ining diutay nga espiritu nagbalik sa iya langitnon nga puluy-an.
Nakabatyag kami sang paghidaet. Luyag namon nga mabuhi ang bata, apang ang Ginuo may iban nga mga plano. Ang pagbaton sang Iya pagbuot sa baylo sang aton pagbuot amo ang yabi agud masalapoan ang kalipay ano man ang aton mga sirkumstansya.
Ang simple naton nga pagtuo kay Jesuscristo sa pag-umpisa naton nga magtuon parte sa Iya mahimo magpabilin sa aton mga tagipusuon samtang aton ginaatubang ang mga hangkat sa kabuhi. Ang aton pagtuo sa Iya makagiya kag magagiya sa aton sa kakomplikado sang kabuhi. Sa pagkamatuod, aton matukiban nga may pagkasimple sa pihak sang kakomplikado sang kabuhi6 samtang nagapabilin kita nga “[malig-on] kay Cristo, nga may himpit nga kasanagan sang paglaum.”7
Kabahin sang katuyuan sang kabuhi amo ang tugotan ining potensyal nga mga sablag nga mangin tulungtungan sa aton pagsaka sinang akon ginatawag nga “hagdanan sang pagtuo”—hagdanan tungod nagapakita ini nga ang pagtuo indi nga wala nagabag-o. Mahimo ini magbaskog ukon magluya suno sa aton mga pagpili.
Samtang nagatinguha kita sa pagpasad sang pagtuo sa Manluluwas, mahimo nga wala naton lubos nga mahangpi ang gugma sang Dios para sa aton kag mahimo nga ginatuman ang Iya mga layi tungod lang obligado kita. Ang pagkakonsensya mahimo nga amo gani ang nagapahulag sa aton imbis nga gugma. Mahimo nga wala pa naton maeksperiyensyahan ang tunay nga koneksyon sa Iya.
Sa pagtinguha naton nga dugangan ang aton pagtuo, mahimo nga nagalibog ang aton ulo sa gintudlo ni Santiago. Iya kita ginpadumdum nga “ang pagtuo nga walay mga binuhatan patay.”8 Mahimo kita nga masandad kon magpamensar kita nga ang tanan nagadepende sa aton. Ang sobra nga pagdepende sa aton mga kaugalingon sarang mag-upang sang aton ikasarang sa pag-agom sang mga gahum sang langit.
Apang samtang nagapadayon kita padulong sa matuodtuod nga pagtuo kay Jesucristo ang aton pamensaron nagasugod sa pagbag-o. Ginakilala naton nga ang pagtuman kag pagtuo sa Manluluwas magahanda sa aton nga makaupod pirme ang Iya Espiritu.9 Ang pagtuman indi na makaulugtas, kundi isa na ka handum.10 Ginakilala naton nga ang pagtuman sang mga sugo sang Dios nagabulig sa aton nga mangin masaligan Niya. Upod sang Iya pagsalig nagaabot ang dugang nga panghangop. Ining panghangop nagagiya sang aton pagpanglakaton sa kabuhi kag nagatugot sa aton nga makita sing mas maathag ang dalanon nga dapat naton agyan.
Pero may madamo pa. Samtang ang aton pagtuo sa Manluluwas nagatubo, aton matalupangdan ang diutay nga pagbag-o nga nagalakip sang diosnon nga panghangop sang aton relasyon sa Dios—dalayon nga pagpalayo sa “Ano ang akon gusto?” pakadto sa “Ano ang gusto sang Dios?” Pareho sang Manluluwas, luyag naton mag-akto “indi suno sa pagbuot ko, kundi suno sa pagbuot mo.”11 Luyag naton himuon ang buluhaton sang Dios kag mangin instrumento sa Iya mga kamot.12
Ang aton pag-uswag wala sing katapusan. Si Pangulong Nelson nagtudlo nga madamo pa kaayo ang luyag sang Amay nga Langitnon nga aton mahibal-an.13 Samtang nagauswag kita, mas mahangpan naton ang gintudlo sang Ginuo kay Joseph Smith: “Kay kon tumanon ninyo ang akon mga kasugoan mabaton ninyo ang iya kabug-osan, kag mahimaya sa akon pareho nga nahimaya ako sa Amay; gani, ginasiling ko sa inyo, magabaton kamo sang grasya sa grasya.”14
Kon ano kataas ang aton sakaon sa hagdanan sang pagtuo aton ina desisyon. Si Elder Neil L. Andersen nagtudlo, “Ang pagtuo indi tsamba kundi ginapili.”15 Makapili kita nga himuon ang mga pagpili nga kinahanglanon agud magtubo ang aton pagtuo sa Manluluwas.
Pamensara ang epekto sang mga pagpili nga ginhimo sang si Laman kag Lemuel nanaog sa hagdanan sang pagtuo samtang si Nefi nagsaka pataas. May ara pa bala sing mas maathag nga representasyon sang kinalain sa tunga sang sabat ni Nefi nga “Malakat ako kag himuon”16 kag nanday Laman kag Lemuel, nga bag-o lang gid nakakita sang anghel, nagsiling nga “Paano itugyan sang Ginuo [si Laban sa aton mga kamot]?”17
Ang kawala sang pagtuo nagapugong sang aton ikasarang nga makakita sang mga milagro, samtang ang pamensaron nga may pagtuo sa Manluluwas nagabukas sang mga gahum sang langit.
Bisan pa nga mahuyang ang aton pagtuo, ang kamot sang Ginuo padayon nga magauntay sa pagbulig sa aton.18 Madamo nga tinuig na ang nagligad, nakabaton ako sing buluhaton nga i-organisar sang isa ka stake sa Nigeria. Anay nga lapit na lang gid, ginliwat ang petsa. May isa ka tawo sa stake nga nagdesisyon nga magabiya sa lugar sa una nga petsa sang komperensya. Indi sia luyag magrisgo nga tawagon bilang pangulo sang stake.
Samtang ara sia sa malayo natabuan sia sa isa ka dako nga aksidente, pero wala sia mahalitan. Nagtulod ini sa iya sa pagbinagbinag kon ngaa nakaluwas sia. Ginpanumdom niya liwat ang desisyon nga iya ginhimo. Naghinulsol sia kag mapainubuson nga nagtambong sa bag-o nga petsa sang komperensya. Kag huo, gintawag sia nga bag-o nga pangulo sang stake.
Si Elder Neal A. Maxwell nagtudlo: “Sa pagsanto gid lamang sang aton pagbuot sa pagbuot sang Dios nga ang bug-os nga kalipay aton masalapoan. Ang ano man nga mas manubo nagaresulta sa mas diutay nga bahin.”19
Pagkatapos nga himuon ang “tanan nga aton masarangan,” tion na dayon nga “maghulat … nga makita ang kaluwasan sang Dios.”20 Nakit-an ko ini samtang nagaserbisyo ako bilang ministering brother sa pamilya McCormick. Kasado sa sulod sang 21 ka tuig, si Mary Kay nagserbisyo sing matutom sa iya nga mga calling. Si Ken indi miyembro sang Simbahan kag wala sing interes nga mangin miyembro, apang kay palangga ang iya asawa, ginpili niya nga mag-upod sa iya simba.
Isa ka Domingo daw ginatulod ako nga magpaambit sang akon testimonya kay Ken. Ginpamangkot ko sia kon pwede. Ang iya sabat simple kag maathag: “Indi lang ah, salamat.”
Naglibog ang akon ulo. May nabatyagan ako kag gintinguhaan nga sundon ini. Daw kahapos mamensar nga nahimo ko na ang akon bahin. Apang pagkatapos sang pangamuyo kag pagbinagbinag, nakita ko nga bisan ang akon tinutuyo husto, nagsalig ako sing tuman sa akon kaugalingon kag diutay lang sa Ginuo.
Sang ulihi, nagbalik ako, nga may lain nga pamensaron. Magakadto ako bilang isa ka instrumento sa mga kamot sang Ginuo nga wala sang iban nga handum kundi ang sundon ang Espiritu. Upod sa akon matutom nga kaupod, si Gerald Cardon, nagsulod kami sa balay sang mga McCormick.
Gilayon pagkatapos, ginpabatyag ako nga agdahon si Gerald nga magkanta sang “I Know That My Redeemer Lives.”21 Gintulok nya ako nga may pangduhaduha, pero kay nagatuo sa akon pagtuo, ginhimo niya ini. Isa ka manami nga balatyagon ang nagpuno sang kuwarto. Ginpabatyag sa akon nga hagaron sanday Mary Kay kag Kristin, ang ila mga bata nga babayi, nga magpaambit sang ila mga testimonya. Samtang ginahimo nila ini, ang Espiritu mas nagbaskog. Sa pagkamatuod, pagkatapos sang testimonya ni Kristin, nag-alalagay ang mga luha sa guya ni Ken.22
Dios na ang nangin bahala. Ang mga tagipusuon wala lamang natandog kundi nagbag-o sa katubtuban. Ang baynte-uno ka tuig sang pagkawala’y pagtuo ginkakas paagi sa gahum sang Balaan nga Espiritu. Pagligad sang isa ka semana, si Ken ginbunyagan. Pagligad sang isa ka tuig, si Ken kag Mary Kay ginselyohan sa balay sang Ginuo para sa katuigan kag sa bug-os nga walay katapusan.
Nga magkaupod amon naeksperiyensyahan kon ano ang buot silingon sang buslan ang amon pagbuot sang pagbuot sang Ginuo, kag nagdugang ang amon pagtuo sa Iya.
Palihog binagbinaga ang masunod nga mga pamangkot nga ginpamangkot sang mga balaan nga propeta sang Dios samtang nagatinguha kamo sa pagsaka sa inyo hagdanan sang pagtuo:
Nahuksan bala ako sang bugal?22
Ginahatagan ko bala sang lugar sa akon tagipusuon ang pulong sang Dios?23
Ginatugutan ko bala nga makonsagrar ang akon mga kapipit-an para sa akon kaayohan?24
Nakahanda bala ako nga ang akon kabubut-on mapaidalom sa kabubut-on sang Amay?25
Kon akon nabatyagan ang huyog nga magkanta sang ambahanon sang nagatubos nga gugma, mabatyagan ko bala ina subong?26
Ginapapangibabaw ko bala ang Dios sa akon kabuhi?27
Kon nakita ninyo ang inyo dalanon sa karon nga nagakontra sa inyo pagtuo sa Manluluwas, palihog magpangita sang pamaagi nga magbalik sa Iya. Ang inyo pangkahitaasan kag inang iya sang inyo mga himata nagadepende dira.
Kabay nga magtanom kita sang mga binhi sang pagtuo sang madalom sa aton mga tagipusuon. Kabay nga saguron naton ining mga binhi samtang aton ginabugkos ang aton mga kaugalingon sa Manluluwas paagi sa pagtahod sang mga kasugtanan nga ginhimo naton upod sa Iya. Sa ngalan ni Jesucristo, amen.