Buhata Unsay Labing Mahinungdanon
Samtang atong isentro ang atong kinabuhi diha ni Jesukristo, kita mapanalanginan og espirituhanong kalig-on, pagkakontento, ug kalipay.
Dili pa lang dugay, usa ka minahal nga higala mibati nga mobisita sa usa ka babaye sa iyang ward. Gibaliwala lang niya ang pag-aghat tungod kay wala kaayo siya makaila niya—morag wala kini kapuslanan. Apan tungod kay ang iyang hunahuna nagsige og balikbalik, nakadesisyon siya nga tumanon ang pag-aghat. Tungod kay siya mibati na nga dili komportable sa buhaton nga pagbisita, siya naghunahuna nga ang pagdala og usa ka butang ngadto sa sister makatabang nga mawala ang iyang kahigwaos. Sa pagkatinuod dili siya mahimong moadto nga walay dala! Busa mipalit siya og usa ka container nga ice cream, ug miadto siya aron sugdan ang unsay iyang gikabalak-an nga bakikaw nga pagbisita.
Siya nanuktok sa pultahan sa babaye, ug wala madugay mitubag ang sister. Ang akong higala mitunol niya sa ice cream nga gisulod og brown nga bulsita, ug ang panagsultihanay nagsugod. Wala madugay naamgohan sa akong higala nganong kinahanglan nga mobisita. Samtang nanglingkod sila sa atubangan nga balkon, ang babaye misulti sa daghang hagit nga iyang giatubang. Human sa usa ka oras nga panag-istoryahanay sa init nga panahon sa summer, ang akong higala nakamatikod nga ang ice cream nalanay sa bulsita.
Miingon siya, “Pasayloa ko kay ang imong ice cream nalanay!”
Ang babaye malumong mitubag, “OK ra! Dili ko pwede og dunay gatas!”
Diha sa usa ka damgo, ang Ginoo misulti ni propeta Lehi, “Bulahan ikaw Lehi, tungod sa mga butang nga ikaw mibuhat.”1
Ang pagkahimong disipulo ni Jesukristo naglangkob og labaw pa kay sa molaom o motuo. Kini nagkinahanglan og paningkamot, paglihok, ug pasalig. Kini nagkinahanglan nga kita adunay buhaton, nga “magtuman sa pulong, ug dili kay magpaminaw ra.”2
Bahin sa nalanay nga ice cream, unsay labing mahinungdanon? Ang ice cream ba? O ang akong higala nga mihimo lang og usa ka butang?
Ako adunay nindot nga kasinatian uban sa usa ka pinalangga nga batan-ong babaye nga sinsero kaayo og pangutana: “Sister Craven, giunsa nimo pagkahibalo nga ang bisan unsa mahitungod sa Simbahan tinuod? Tungod kay ako walay gibati.”
Sa wala pa motubag, ako nangutana una niya og pipila ka pangutana. “Sultihi ko mahitungod sa imong personal nga pagtuon sa kasulatan.”
Siya mitubag, “Wala ko magbasa sa mga kasulatan.”
Ako nangutana, “Kumusta man ang imong pamilya? Nagdungan ba mo sa pagtuon sa Dali, Sunod Kanako?”
Miingon siya, “Wala.”
Ako nangutana mahitungod sa iyang mga pag-ampo: “Unsa man ang imong bation kon mag-ampo ka?”
Ang iyang tubag: “Wala ko mag-ampo.”
Ang akong tubag niya yano ra: “Kon ikaw gusto nga masayod sa bisan unsa, ikaw kinahanglang adunay buhaton.”
Dili ba kana tinuod kon kita adunay gustong makat-onan o masayran? Ako midapit sa akong bag-ong higala sa pagsugod sa pagbuhat sa ebanghelyo ni Jesukristo: pag-ampo, pagtuon, pagserbisyo sa uban, ug pagsalig sa Ginoo. Ang pagkakabig dili moabot kon walay gihimo. Kini moabot pinaagi sa gahom sa Espiritu Santo kon kita mohimo og tinuyo nga paningkamot aron masayod pinaagi sa pagpangutana, pagpangita, ug pagpanuktok. Kini moabot pinaagi sa pagbuhat.3
Diha sa Doktrina ug mga Pakigsaad, ang Ginoo usahay nag-ingon, “Dili igsapayan.”4 Kini nakapamalandong nako nga kon ang ubang mga butang dili mahinungdanon, o dili kaayo mahinungdanon, adunay mga butang gayod nga labing mahinungdanon. Sa atong mga paningkamot sa pagbuhat og usa ka butang o pagbuhat og bisan unsa nga butang, kita tingali mangutana sa atong kaugalingon, “Unsay labing mahinungdanon?”
Ang mga tig-advertise kanunay nga mogamit og mga slogan sama sa “Mahinungdanon” o “Kinahanglan Gayod nga Aduna Niini” nga naglaom sa pagdani nato aron motuo nga ang produkto nga ilang gibaligya importante sa atong kalipay o kaayohan. Apan ang ilang gibaligya tinuod ba gayod nga mahinungdanon? Kita tinuod ba gayod nga kinahanglang aduna niini? Kini tinuod ba gayod nga mahinungdanon?
Ania ang pipila ka hunahuna nga angayng ikonsiderar. Unsay labing mahinungdanon?
-
Kon pila ka “like” ang atong makuha sa atong mga post sa social media? O kon unsa kita ka pinangga ug ka bililhon sa atong Langitnong Amahan?
-
Pagsul-ob sa bag-ong uso nga sinina? O pagpakita og pagtahod sa atong mga lawas pinaagi sa pagsinina og tarong?
-
Pagkaplag og tubag pinaagi sa pagpangita diha sa internet? O pagdawat og mga tubag gikan sa Dios pinaagi sa Espiritu Santo?
-
Gusto pa og daghan? O makontento sa unsay gihatag kanato?
Si Presidente Russell M. Nelson nagtudlo:
“Uban sa Espiritu Santo nga maoy inyong kauban, dili kamo mabutahan sa kultura sa pagkabantugan nga popular kaayo sa atong katilingban. Mahimo kamong mas maalamon kay sa nanglabay nga mga henerasyon. …
“Pagpakita og sumbanan alang sa tibuok kalibotan!”5
Kini nagkinahanglan og paningkamot aron magpabiling nakapokus sa unsay tinuod gayod nga mahinungdanon alang sa malungtarong kalipay. Si Satanas walay laing mas gusto kay sa atong pagbaliwala sa atong mahangtorong bili, nga modala nato ngadto sa pag-usik sa bililhong oras, mga talento, o espirituhanong kalig-on diha sa mga butang nga dili mahinungdanon. Ako modapit sa matag usa kanato nga mainampoong ikonsiderar kanang mga butang nga makabalda nato gikan sa paghimo sa unsay labing mahinungdanon.
Ang magtutudlo sa grade three sa among kinamagulangang anak nga lalaki mitudlo sa iyang klase sa “pagkontrolar sa inyong utok.” Kini usa ka pagpahinumdom sa iyang batan-on nga mga estudyante nga sila ang mokontrolar sa ilang mga hunahuna ug sa ingon makakontrolar sa unsay ilang buhaton. Akong pahinumdoman ang akong kaugalingon sa “pagkontrolar sa akong utok” kon akong makita ang akong kaugalingon nga nahilambigit sa mga butang nga dili kaayo mahinungdanon.
Usa ka estudyante sa high school bag-ohay lang nga misulti nako nga nahimong popular sa pipila ka batan-on sa Simbahan nga ibaliwala ang mga sugo uban sa kalkulado nga plano nga maghinulsol lang unya. “Dako nila kining garbo,” ako gisultihan. Sa pagkatinuod ang Ginoo mopadayon sa pagpasaylo niadtong mapaubsanong naghinulsol “uban sa tinuod nga katuyoan.”6 Apan ang maloloy-on nga Pag-ula sa Manluluwas kinahanglang dili gayod gamiton sa ingon nianang binugal-bugal nga paagi. Kita nahibalo sa sambingay sa usa ka nawala nga karnero. Siyempre, ang magbalantay sa karnero mobiya sa laing 99 ka karnero aron mangita sa usa nga nahisalaag. Apan mahunahuna ba ninyo ang kalipay nga madala niadtong mipili nga maapil sa 99 ngadto sa Maayong Magbalantay? Sa mga nagkahiusa ug nagtinabangay sa usag usa sa pagtuman sa ilang mga pakigsaad? Mahanduraw ba ninyo kon sama sa unsa kaha ang kalibotan o inyong eskwelahan o inyong trabahoan o inyong panimalay kon ang pagkamasulundon mao ang popular nga butang nga buhaton? Dili kini mahitungod sa paghimo sa kinabuhi sa hingpit nga paagi—mahitungod kini sa pagkaplag og kalipay samtang naghimo sa atong labing maayo sa pagtuman sa mga pakigsaad nga atong gihimo ngadto sa Ginoo.
Ingon nga ang kalibotan nagpahayag og dugang nga pagduhaduha mahitungod sa Dios ug ang kalibog ug mga pagpamugos nagkagrabe, mao kini ang panahon nga kita mopaduol og maayo sa propeta. Kay siya mao man ang tigpama-ba sa Ginoo, kita makasalig nga unsay iyang giawhag, gitambag, ug gihangyo nga atong buhaton mao ang mga butang nga labing mahinungdanon.
Bisan og dili kini sayon, sa kanunay adunay paagi nga mabuhat ang saktong butang. Samtang nakig-istorya sa grupo sa mga higala sa eskwelahan, usa ka batan-ong babaye nasakitan sa dihang ang panagsultihanay miabot ngadto sa pagsaway sa mga sumbanan sa Simbahan. Siya nakaamgo nga dili siya mahimong magpakahilom—siya kinahanglang adunay buhaton. Sa matinahurong paagi, misulti siya bahin sa gugma sa Langitnong Amahan ug kon sa unsang paagi nga ang mga sugo nga Iyang gihatag makapanalangin ug makapanalipod sa Iyang mga anak. Sayon ra unta kadto niya nga walay buhaton. Apan unsay labing mahinungdanon? Mosunod lang sa panon? O mobarog isip usa ka saksi sa Dios sa “tanan nga mga panahon ug diha sa tanan nga mga butang, ug diha sa tanan nga mga dapit”?7
Kon ang gipahiuli nga Simbahan ni Jesukristo mogawas gikan sa kangiob, kita kinahanglan gayod nga mogawas gikan sa kangiob. Isip kababayen-an nga nagtuman sa mga pakigsaad, kita kinahanglan gayod nga mopadan-ag sa atong kahayag sa ebanghelyo sa tibuok kalibotan pinaagi sa paglihok ug pagkamaayong ehemplo. Kita magkaubang mohimo niini isip mga anak nga babaye sa Dios—usa ka pwersa sa 8.2 ka milyon nga kababayen-an nga nag-edad og 11 ug lapas pa, kansang buhat managsama gayod. Kita nagpundok sa Israel kon kita moapil sa buhat sa kaluwasan ug kahimayaan: maningkamot sa pagsunod sa ebanghelyo ni Jesukristo, moamuma sa uban nga nanginahanglan, modapit sa tanan sa pagdawat sa ebanghelyo, ug mohiusa sa mga pamilya alang sa kahangtoran.8 Ang ebanghelyo ni Jesukristo mao ang ebanghelyo sa aksiyon ug ebanghelyo sa kalipay! Dili nato ipakaubos ang atong kapasidad sa pagbuhat nianang mga butang nga labing mahinungdanon. Ang atong balaanong kabilin naghatag nato og kadasig ug pagsalig sa pagbuhat ug mamahimo sa tanan nga ang atong Langitnong Amahan nasayod nga kita mamahimo.
Ang tema sa kabatan-onan alang niining tuiga naggikan sa Mga Panultihon 3:5–6:
“Salig sa Ginoo sa bug-os mong kasingkasing. Ayaw gayod pagsalig sa imong kaalam.
“Hinumdomi siya sa tanan mong buhaton ug tultolan ka niya sa matarong nga dalan.”
Ang usa ka mahinungdanong elemento sa pagsalig diha sa Ginoo mao ang pagpadayon, motuo nga Siya mogiya nato bisan kon kita wala sa tanang tubag.
Mga sister, dili kini mahitungod sa ice cream. Ug dili kini mahitungod sa pagbuhat og daghan pa. Kini mahitungod sa pagbuhat sa unsay mahinungdanon. Kini mao ang paggamit sa doktrina ni Kristo sa atong mga kinabuhi samtang naningkamot kita nga mas mahisama Niya.
Kon mas mobuhat kita aron magpabiling lig-on diha sa dalan sa pakigsaad, mas molambo ang atong hugot nga pagtuo diha ni Jesukristo. Kon mas molambo ang atong hugot nga pagtuo, mas magtinguha kita sa paghinulsol. Ug kon mas maghinulsol kita, mas molig-on ang atong relasyon sa pakigsaad ngadto sa Dios. Kana nga relasyon sa pakigsaad mopaduol nato ngadto sa templo tungod kay ang pagtuman sa mga pakigsaad sa templo mao ang paagi nga kita makalahutay ngadto sa kataposan.
Samtang atong isentro ang atong kinabuhi diha ni Jesukristo, kita magiyahan sa pagbuhat sa unsay labing mahinungdanon. Ug kita mapanalanginan og espirituhanong kalig-on, pagkakontento, ug kalipay! Sa ngalan ni Jesukristo, amen.