Xjultikankil li evangelio re tuqtuukilal
Wan li qaloq’laj teneb’ankil chixwotzb’al lix wankil ut lix tuqtuukilal li Jesukristo rik’in chixjunileb’ li te’ab’inq.
Ex was wiitz’in, nink’e jun sahil k’ulunik choq’ eere sa’ li jolomil ch’utub’aj-ib’! Yookin chaq chiroyb’eninkil li kutan a’in. Nintijok choq’ eere wulaj wulaj. Xintz’aama ajwi’ naq li ch’utub’aj-ib’ toorak’ob’resi chiqajunjunqal sa’ musiq’ej.
Chalen chaq li ch’utub’aj-ib’ xnume’, toj yookeb’ li qach’a’ajkilal. Li nimla kaqi yajel toj naxjal li qayu’am. Ut anajwan ch’a’ajkilanb’il li ruchich’och’ xb’aan li wech’ok-ib’, li yoo chixrahob’tesinkil k’iila millon chi winq, ixq, ut kok’al li maak’a’eb’ xmaak.
Eb’ li profeet ke’ril chaq junxil li qakutankil, naq te’wanje’q li pleet ut li esil chirix li pleet, naq chixjunil li ruchich’och’ taawanq chi choqinb’il.1 Jo’ aj taaqehom re li Jesukristo, naqatz’aama chiruheb’ laj jolominel tenamit naq te’xtuqub’ lix jalanileb’ chi maak’a’ li pleetik. Naqatz’aama chiru chixjunileb’ naq te’tijoq chirixeb’ li wankeb’ sa’ rajb’al ru, ut naq te’xtenq’aheb’ li rahob’tesinb’il, ut naq te’xsik’ xtenq’ li Qaawa’ re xraqb’al li ninqi wech’ok-ib’.
Ex was wiitz’in, jo’ maajun wa chaq, ajb’il ru lix evangelio li Jesukristo. Li wech’ok-ib’ naxmux ru chixjunil li kixk’ut li Kolonel. Ninra li Qaawa’ Jesukristo ut ninch’olob’ xyaalal naq lix evangelio a’an li jun ajwi’ li tuqub’ank taak’eemanq wi’ li tuqtuukilal. Lix evangelio a’an jun evangelio re tuqtuukilal.2
Lix evangelio a’an li jun ajwi’ li tuqub’ank naq yoo xxiweb’ naab’al sa’ ruchich’och’.3 A’in naxk’ut naq jwal aajel ru naq taqapaab’ lix taqlahom li Qaawa’ reheb’ lix tzolom naq “te’xik sa’ chixjunil li ruchich’och’, ut te’xjultika li evangelio chiru li junjunq li yo’ob’tesinb’il.”4 Wan li qaloq’laj teneb’ankil chixwotzb’al lix wankil ut lix tuqtuukilal li Jesukristo rik’in chixjunileb’ li te’ab’inq ut te’xk’e chi numtaak li Dios sa’ xyu’ameb’.
Chixjunileb’ li okenaqeb’ sa’ sumank xe’xyeechi’i naq te’xraheb’ li ras riitz’in ut te’xtenq’aheb’ li wankeb’ sa’ rajb’al ru. Naru naqak’ut li qapaab’aal chirix li Dios ut toowanq chi kawresinb’il re xsumenkileb’ li neke’patz’ok chirix “li oyb’enink wan qik’in.”5 Li junjunq qe wan xk’anjel sa’ xch’utub’ankil Israel.
Anajwan, ninyaab’asi chi kaw inch’ool naq li Qaawa’ naxpatz’ re chixjunileb’ li saaj winq li k’ulub’ejeb’ naq te’xkawresi rib’ ut te’xik sa’ mision. Choq’ reheb’ li saaj winq aj santil paab’anel, li k’anjelak choq’ misioneer a’an xteneb’ahom li tijonelil. Ex saaj winq, k’uulanb’ilex choq’ re li kutan a’in naq yoo chi uxmank lix yeechi’inb’il ch’utub’ankil Israel. Naq texk’anjelaq sa’ mision, tz’aqal texwanq sa’ xyi li xnimal ru k’anjel a’an!
Choq’ reheb’ li saaj ixq ut li ixq, nim xwankil li xik sa’ mision, a’ut moko teneb’anb’il ta. Neke’qara li misioneer ixq ut neke’qak’ul chi anchal qach’ool. Li nekeb’aanu sa’ li k’anjel a’in jwal nim xchaq’alil ru! Tijonqex re teenaw ma naraj li Qaawa’ naq texxik sa’ mision, ut li Santil Musiq’ej texxsume sa’ lee ch’ool ut sa’ lee k’a’uxl.
Ex insaaj amiiw, aajel eeru chiru li Qaawa’. Xexxk’uula toj sa’ li kutan a’in re textenq’anq chixch’utub’ankil Israel. Lee rajom chi k’anjelak sa’ mision, ma re jultikank aatin malaj re tenq’ank, texrosob’tesi laa’ex ut k’iheb’ chik. Naqak’uleb’ ajwi’ li misioneer tiixeb’ li neke’k’anjelak a’ yaal jo’ naru chiruheb’. Moko naru ta xtawb’al reeqajeb’ lix chaab’il k’anjel.
Chixjunileb’ li misioneer neke’k’utuk chirix ut neke’xch’olob’ xyaalal li Kolonel. Xmaak li musiq’ejil aak’ab’ wan wi’ li ruchich’och’, q’axal ajb’il ru lix saqen li Jesukristo jo’ maajun wa chaq. Wan xk’ulub’ chixjunileb’ li kristiaan chirab’inkil resil lix evangelio li Jesukristo. Wan xk’ulub’ chixjunileb’ li kristiaan chixnawb’al b’ar truuq te’xtaw li yo’onink ut li tuqtuukilal li “naxq’ax ru chixjunil li na’leb’.”6
Chiwanq li tuqtuukilal ut xtamik li musiq’ej eerik’in sa’ li ch’utub’aj-ib’ a’in. Chesik’aq ut chek’ulaq li k’utb’esinb’il na’leb’ choq’ eere sa’eb’ li ch’utam a’in, a’an li nintz’aama sa’ xk’ab’a’ li Jesukristo, amen.