Jesus Christ: Andikpeme Ukpong Nnyin
Nte nnyin inehede ikabare-esit ke mme idioknkpo nnyin, nnyin iyeyak uwa ufak Christ akabare enyene ufon ofuri-ofuri ke uwem nnyin.
Ndima ndito-eka mi irenowo ye iban, ke ediyama usenubok Easter emi esit mi adara nte ntide ata ediye, enyene-utenge, ata anana-ibat edinam emi akadade-itie ke ofuri mbuk ubonowo—uwa ufak eke Obong nnyin, Jesus Christ. Nti iko eke prophet Isaiah owut akamba ye ima eke usuhore ye uwa Andinyanga ke ibuot ofuri ndito Abasi.
“Ke akpaniko edi mfuho nnyin ke enye akada, edi ubiak nnyin ke enye okobiom, ndien nnyin ise ite ke Abasi ɔkɔtɔ enye, oyibe enye, onyung ɔtuhɔ enye.
“Edi enye akada unan abanga mme idiok ido nnyin, anuaha abanga mme ukwang-nkpo nnyin: ufen odoro enye ke idem man nnyin ikut emem; ndien inia esie ɔkɔk nnyin.”1
Ke ndimen ofuri idiɔknkpɔ ubonowo ndori ke idemesie, ke idiok edikong enye ke cross, ndien akan mkpa ke oyoho usen ita,2 Jesus akanam ata edisana ufɔn ono edinam Passover emi ekenimde eno Israel kini eset.3 Ke ndinam prophecy oworo-osu, Enye ono Idemesie ye nsongurua iyip esie ono nte akamba ye akpatre uwa,4 man ekekem ye idiongo eset emi enamde ke ndidara Passover Obong.5 Ke ndinam ntre, Christ okut ndutuhɔ ke ikpokidem ye spirit emi owo mikemeke ndikere mfiok. Andinyanga ke Idemesie odoho ete:
“Koro sese, ami, Abasi, mmɔyɔ ofuri nkpɔ emi nnɔ ofuri owo, …
“Ndutuho emi anamde mi, kpa Abasi, andikpon nkan ofuri nkpo, ndinyek oto ke ubiak ye iyip ediworo ke ndudu kiet-kiet, nyung mbo ufen ke ikpokidem ye ke spirit—man otodo ami nkuwong ndot-ndot cup oro, nyung nnyeŋ—
“Nte ededi, ubong enyene Ete, ndien ami mmenam nyung nkure mbenge-idem mi nno ndito owo.”6
Christ ama anam uduak Ete okure7 ke anana-adanga ye uwa mbom Esie. Enye ama akan ifot mkpa ikpokidem ye eke spirit,8 emi okodukde ererimbot oto ke Iduo,9 ono nnyin eti ufang ndinyene nsinsi erinyanga-ukpong.10
Jesus ikpong ekedi nkokure Owo emi ekemede ndinam man ifiok nsinsi ye edisana uwa emi nno nnyin.11 Ema ememek enyung esio Enye enim ke Akwa Esop ke Heaven, mbemiso ekebobot ererimbot.12 Ndika iso, ke ndimana nto eka eke-obukdem, Enye ama ɔbɔ mkpa ikpokidem, edi otode Abasi, nte Ikpong-ikpong Eyen emi Ebonde eke Ete, Enye enyene odudu ndiyak uwem Esie ndien edikem afiak ɔbɔ uwem.13 Ndidian do, Christ okodu edisana uwem emi minyeneke ndo ndien, mmodo, iduhe ke idak se utip-ikpe oyomde.14 Ke ubak mme ndaha efen Prophet Joseph Smith ekekpeb ete:
“Erinyanga ikemeke ndidi nnɔ ererimbot ke Jesus Christ editie-ubiong miduhe.
Abasi … ama ebenge enim uwa ke edino Eyen Esie, emi edinode edi ke edikem ini man … ediberede usung emi owo ekemede ndiduk kiso Jehovah.”15
Kini otode ke uwa Esie Andinyanga edisio odudu mkpa ikpokidem ke mfon,16 Enye ikesioho utom nnyin ke ndikabare-esit ke idioknkpo emi nnyin ikenamde.17 Edi, Enye ono nnyin edinem ikoot ndinam mkpe-mbiere nno Ete Nsinsi nnyin. Oto ke Jesus Christ ye uwa ufak Esie, nnyin imekeme ndinyene akwa akwa ukpuhode ke ekiere ye esit, inyene obufa ido, mbiba ino Abasi ye uwem ke ofuri ndaha.18 Ini emi nnyin inehede ikabare-esit ke idioknkpo nnyin, inyung iwongore esit ye uduak nnyin ino Abasi ye mbet Esie, nnyin imikeme ndibo erifen-nno Esie inyung ikop odudu Edisana Spirit Esie ke akamba ndaha. Ye mbom, nnyin itre edinyene ekikere mbanga ntotungo ufen emi Andinyanga ɔkɔbɔde.19
Eno edikabare-esit edi ndiwut mfonido emi Abasi enyenede ono ndito Esie, ndien oro edi ediwut akwa odudu Esie ke ndinwam nnyin man ikan idioknkpo emi nnyin ikenamde. Nko edi idiongo ime ye anyan-ime eke edima Ete nnyin enyenede ono kabanga mmemidem eke ikpɔkidem ye nam-ndue nnyin. President Russell M. Nelson, edima prophet nyinn, okot eno emi nte “ukpohode ekenode ekikere inemesit ye emem.”20
Ndima ufan mi, ami mmetie ntiense nno mbufo nte ke nnyin itimde itua-mkpofiok ke idioknkpo nnyin,21 nnyin iyeyak uwa ufak Christ akabare enyene ufon ofuri-ofuri ke uwem nnyin.22 Nnyin iyeworo ke ufun idioknkpo, ikut idara ke isang uwem isong nnyin,inyung ikabare idot ndibo nsinsi erinyanga, emi ekenimde totongo ke ntongo ererimbot eno ofuri mbon emi enimde Jesus Christ ke akpaniko enyung eduk ebine Enye.23
Ke ndidian ye ndino akwa eno erinyanga emi, Andinyanga ono nnyin uboho ye ndongesit ke nte nnyin iyode ukut, idomo, ye mmemidem eke uwem, ke esit edide ndaha emi nnyin ikutde mmi-mmi emi ke idiok-udongo ini emi. Ami mmesɔngɔ nnɔ mbufo nte ke Christ enehede ofiok mme afanikong emi mbufo ekutde ke uwem isong Enye ofiok ofuri idot, ndutuhɔ, ye ubiak ikpɔkidem nko ye mfina ekikere ye eke sprit emi nnyin ikutde. Esit Esie oyohoye mbom, ndien kpukpru ini Enye ebenge-idem ndiyɔ nnyin. Emi edi ntre koro Enye ke idemesie ama-ofiok onyung ada ubiak eke mmemidem ye unan nnyin ke obukidem odori ke Idemesie.24
Ke sung-sung ye nsuhore-idem ke esit, Enye ama osuhore akan kpukpru nkpo onyung onyime ndibo nsahi, esine, ye esuene nto owo, ke ama ɔkɔbɔ unan oto ke ndudue ye idioknkpo nnyin. Enye ɔkɔbɔ ufen emi ono kpukpru owo, ndimen ofuri idioknkpo ererimbot odori ke Idemesie,25 ndien ekem edikabare edi andikpeme ukpong nnyin ke akpatre.
Nte nnyin isanagde ikpere Enye, iyak spirit nnyin ino ukpeme Esie, nnyin iyekeme ndimen okpono Esie ndori ke idem nnyin, emi ememde, ndien mbiomo Esie, emi eferede, ndien idibo enwongo ndongesit ye nduok-odudu oro. Ndika-iso, nnyin iyebo osongo emi ofuri nnyin iyomde man ikan ukut, mmemidem, ye mfuho eke uwem, emi ekenehede osong ndiyo keunwam ye odudu ukok Esie mikpiduhe.26 Nwed Abasi ekpeb nnyin ete “top mbiomo nno Jehovah, ndien enye eyekama fi.”27 “Ndien ke ini oro yak Abasi ɔnɔ [nnyin] ete mbiomo [mbufo] efere, oto ke idaresit Eyen [esie].”28
Ekperede utit isua oko, ami nkop mkpa edima ebe ye nnwan kiet, Mario ye Regina Emerick, emi eketimde ema Abasi enyung ebede efepke ufang usen inang ekpong kiet eken otode ke ntak udongo COVID-19.
Kiet kotu eyeneren mmo kiet, emi edide bishop idahaemi ke Brazil, eting emi ono mi ete: “Ama osong ndikut ete ye eka mi ekpongde ererimbot emi ke ndaha oro, edi ami mmenehede nkut ubok Abasi ke uwem mi ke ufot unomo oro,koroami mmebo osongo ye emem emi ayangade ifiok mi. Oto ke mbuotidem mike Jesus Christ ye Erisio-isop Esie, ami mmebo edisana unwam man nsongo nyung ndong mbon ufokemana mi esit ye ofuri mbon emi ekenwamde nnyin kini idomo emi. Okposuk edi utibe-nkpo emi kpukpru owo ekeyomde mitibeke, ke idem mi ami ndi ntiense eke ediwak utibenkpo efen emi eketibede ke uwem mi ye ke uwem mbon ufokemana mi. Ami mma nkop ata emem emi okodukde ntotungo esit mi, ono mi idorenyin ye uko ke ima eke Andinyanga ye ke uduak inemesit eke Abasi enyenede ono ndito Esie. Ami mkpeb nte ke ata usen emi oyohode ye mfuho, ubok ima Andinyanga anyanare ofuri ini kini nnyin iyomde Enye ke ofuri esit, odudu, ekikere, ye ukeme nnyin.”
Ndima ndito-eka mi irenowo ye iban, ke Easter Sunday emi, ami nno okpon-etop ntiense mi nte ke Jesus ama eset ke mkpa ndien ke Enye odu uwem. Ami mmetie ntiense nno mbufo nte otode Enye ye anana-adanga Erisio-isop Esie, Andinyanga ama ono nnyin usung ndikan mkpa, eke ikpokidem ye eke spirit. Ke ndidian ke mme ikpɔ edidiong emi, Enye nko ono nnyin ndongesit ye osongo ke mkposong. Ami nsongo nno mbufo nte ke nnyin ibuotde idem ke Jesus Christ ye ke edisana uwa ufak Esie, iyɔ ke mbuotidem nnyin ikesim utit, nnyin iyedara mme enwongo eke edima Ete Heaven nnyin, emi anamde ofuri nkpo ke odudu Esie ndinwam nnyin ifiak ika iso Esie ke usen kiet. Emi edi utom Esie ye ubong Esie!29 Ami mmetie ntiense nno mbufo nte ke Jesus edi Christ, Andifak ererimbot, Messiah emi ekenwongode, Eriset-ke-mkpa ye uwem.30 Ndien ami mbuana akpaniko emi ye mbufo ke edisana enying Esie, Ikpong-ikpong emi Ete Obonde, Andinyanga nnyin, Jesus Christ, amen.