Nso Ke Nnyin Ikpep Emi Midifreke
Edieke esede uwem mbufo ye akam, menim ke eyekut ediwak usung emi Abasi anwamde mbufo ke ini nsongo-mkpo emi.
Ndima ndito eka mi iren, ami mma mbet uto mbono emi. Akpatre ini emi ikinyenede mbono eke mme akama itie oku ekedi ke April 2019. Ediwak mkpo etibe ke isua iba emi ebede mi!. Usuk mbufo emenana mbon ima mbufo. Usuk enana utom, idibi udia, mme nsongidem. Nko usuk enana emem mme idorenyin ebanga ini iso. Ami mefuho ye mbufo kiet kiet emi enyenede mme mfina kiet mme efen. Ami mebong akam ofuri ofuri ini nte Abasi odong mbufo esit. Nte mbufo ekade iso ndiyak Abasi akara ke uwem mbufo, ami mefiok ke Enye ekere abanga mbufo ofuri ofuri ini.
Ke ufot mme unana emi nnyin inyenede, nnyin imida mme mkpo efen inyene. Usuk enyene ata mbuotidem ke Ete nnyin ke Heaven ye Eyen Esie, Jesus Christ. Ediwak eda ekut uwem ke usung efen—eda ekut ke nsinsi usung. Ekeme ndidi ke emetim odu ye mbon emi amade onyung etim odu ye Abasi. Ami mekere ke emenyene ukeme ndikop nto Enye nyung mbɔ eriyarare nno idem mbufo. Mme okposong idomo esino ufang emi mukpunyeneke ke usung efen ete ekori.
Kere banga isua iba emi ebede mi!. Didie ke mbufo ekori? Nso nkpo ke mbufo ekekpeb? Emekeme ndikere ke akpana ifiak inyong 2019 ikidung do. Edi edieke esede uwem mbufo ye akam, menim ke eyekut ediwak usung emi Abasi anwamde mbufo ke ini nsongo-mkpo emi, anwamde mbufo ndisin ifik, mfon nkan akpa—ndi ata owo Abasi.
Mefiok ke Abasi enyene ikpo ye utibe uduak abanga mbufo—kiet kiet ye ofuri mbufo. Ke mbom ye ime, Enye odoho ete:
“Mbufo edi mkpri ndito, ndien mbufo itimke ifiok kanga adanga akamba edidiong emi Ete … enyenede ono mbufo;
“Ndien mbufo ikemeke ndiyo ofuri nkpo idahaemi; nte ededi, esong esit, koro Ami nyeda mbufo usung.”1
Ndima ndito eka mi iren, ami meno iko ntiense nte ke ekedi Enye, onyung edi Enye, ke akpaniko ada nnyin usung, nte nnyin iyomde ndikop nto Enye. Enye oyom yak nnyin ikori inyung ikpep, ito—usuk ini akpan akpan ito—afanikong.
Afanikong edi akamba andikpep. Nso ke mbufo ekpep ke isua iba emi ebede emi mbufo eyomde nditi? Iboro mbufo edi sanga sanga ono mbufo, edi mekeme ndino ekikere mbanga ukpep-mkpo inang emi nkerede ke nnyin imikpep ye emi midifreke.
Ukpe-mkpo 1: Ufok Edi Akpan Ebiet Mbuotidem ye Ndikpono.
Ediwak ini ke ini Abasi onode nnyin item abanga mfina utit eyo, Enye eteme etei: “Eda ke edisana ebiet, ekunyung ufehe ndik.”2 Mme “edisana ebiet” emi ke akpaniko esine mme temple Jehovah ye mme ebiet mbono. Edi nte nnyin mikanke isobo ke mme ebiet emi, nnyin imikpep ite ke ebiet kiet emi asanade akan ke ererimbot edi ufok idung—in, kpa ufok mbufo .
Ndito eka iren, mbufo ekama itie oku Abasi. “Unen itie oku eyire kiet ye mme odudu heaven.”3 Mbufo ye ufokemana mbufo emenam mme edinam itie-oku. Edi ke “mme edinam [itie oku ke] odudu Abasi ayarare.”4 Odudu oro odu ono mbufo ye mbon ufok mbufo ke ufok mbufo nte mbufo enimde mme ediomi emi mbufo ekenamde.5
Ke isua Ikie-ye-anang-ye-ition emi ekebede, ukem usen emi, April 3, 1836, Elijah afiak ayak mme ukpohode itie-oku ono man eda edian mme ufokemana nnyin ke nsinsi. Oro edi ntak enemde ndi-nam udia-Obong ke ufok mbufo. Didie ke mbufo ekere ke okotuk mbon ufok mbufo ndikut mbufo—ete mmo, ete ete mmo, ebe, eyen, mme eyeneka mmo eren—namde edisana edinam oro? Nso ke edinam man eka iso enyene uto ntuk oro ke ufok mbufo?
Emekeme nikere ke odu se anade nte eka iso enam man enam ufok mbufo edi ebiet mbuotidem. Edieke edide ntre, mbok enam! Edieke odode nwan, kok ibuot ye nwan fo nte nka fo ke akpan utom emi. Ekpri utom ifang ekpon ekan utom enyem. Tongo ke idahaemi tutu Abasi afiak edi, nnyin kiet kiet imiyom ufok nnyin edi ebit emem ye ukpeme.6
Mme ido ye mme edu emi edade Spirit edi eyenam edisana okori ke ufok mbufo. Edi akpan nko ete ke edisana eyesop edieke odude mkpo ndomo kiet ke uwem mbufo mme mbohoidung mbufo emi ayatde edisana Spirit esit, koro ke ini oro “mme heaven efiak edem.”7
Ndi akanam mekere ntak emi Abasi oyomde nnyin inam ufok nnyin edi ebiet ndikpep ye ndinam iko Abasi? Idighe ndibenge nnyin idem, nyung nwam nnyin, ke ini udongo ikpong. Nnyin nditre ndisobo otokiet eyetre. Edi, nsinifik mbufo ndinam ufok mbufo edi akpan ebiet mbuotidem inaha etre. Nte mbuotidem ye edisana ekade isong isong ke idiok ererimbot emi, udong mbufo ndinyene ndisana ebiet eyekori. Medoho yak mbufo eka iso ndinam ufok mbufo edi ndisana ebiet “ekunyung ufehe ndik”8 ukpong akpan utom oro.
Ukpep-mkpo 2: Nnyin Imiyom Kiet Eken.
Abasi oyom nnyin idiana kiet inyung inwam kiet eken. Oro edi ntak emi Enye esinde nnyin kiet kiet ke ufok ye ke mme ward ye mme stake. Oro edi ntak emi Enye odohode ye inwam inyung inam utom ino kiet eken. Oro edi ntak emi Enye odohode nnyin idung ke ererimbot edi ikudi eke ererimbot.9 Nnyin imikeme ndinam mkpo ke ini idianade kiet ikan ke ini idide ikpong.10 Uduak inemesit Abasi eyedi ikpikpu edieke ndito Esie midianake ye kiet eken.
Udongo emi ke ererimbot edi sanga sanga koro esim ofuri owo ke ererimbot ke ukem ukem ini. Ke ini usuk owo ebode ufen ekan mbon efen, edi otuk kpukpru nnyin ke usung kiet mme eken. Ke ntak emi, afanikong nnyin enyene ukeme nditang ndito Abasi ndian kiet ke usung emi mitibeke akpa. Ke ntre, ami mbup nte, ndi mfinam emi anam mbufo ediana ye mbohoidung mbufo—ye ndito eka iren ye iban ke efak ye ke obio mbufo?
Ke usung emi, ikpo mbet iba emi ekeme ndinam nnyin ete: akpa, ima Abasi ye, iba, ima mbohoidung nnyin.11 Nnyin iwut ima nnyin ke ndinam utom.
Edieke mbufo efiokde owo emi edide ikpong, yom enye—mbufo ekpedi ikpong nko! Inaha enyene ntak mme etop mme utom ndinam. Edoho ete mokom eyung ewut ima mbufo. Technology ekeme ndinwam. Mme udongo odu mme iduhe, ana nte edima eyen Abasi ofiok ete ke enye idighe ikpong!
Ukpep-mkpo 3: Eboho Idaha Itie Oku Okpong Akan Mbono
Ke ini udongo emi, ema etre mme mbono ke Sunday ke esisit ini. Enim usuk mbono idahaemi ke ke internet. Edi, utom emi Abasi okonode eboho mme akama idaha itie oku ikinaha nte etre ke itie mbono ikpong. Mme mbono edi ekpri ubak se akanade nte eda eboho oro enam ye se enye akande anam.
Ndito eka mi iren eke Idaha itie oku Aaron ye eboho mme ebio-owo, etat ekikere mbufo ebanga ntak emi nnyin inyenede mme eboho emi. Didie ke Abasi oyom mbufo eda eboho mbufo enam utom Esie—idahaemi? Eyom eriyarare eto Abasi. Esuhore idem mbufo! Ebuk! Ekpang-utong! Edieke ekotde mbufo nte mme ada usung, ekok ibuot nte presidency ye mbon eboho oro nko. Se ikot mme idaha mbufo ekpededi ke idaha itie oku, yak Abasi akara ke nsin-ifik mbufo nte mbon eboho ye ke utom mbufo. Kut ye inemesit edinen ido emi edinamde nte mbufo “enamde eti utom.”12 Mme eboho edu ke akpan itie ndisɔp nnwam ndibok Israel ke nkang veil mbiba.
Ukpep-mkpo 4: Nnyin Itim Ikop Ito Jesus Christ Ke Ini Nnyin Idade Sung
Nnyin idung ke ini emi etingde nte prophecy ke anyan ini, ke ini “kpukpru nkpo edidude ke ndutime; ndien ke akpaniko, esit mme owo eyebianga mmo; koro ndik eyedi esim kpukpru owo.”13 Oro ekedi akpaniko mbemiso ini udongo, eyenyung edi akpaniko ke udongo ama okure. Ntime ke ererimbot eyeka iso okori. Ke ndidomo, uyo Abasi idighe “uyo akamba uyom, edi … enye [edi] sung-sung uyo, [nte] edong odu, ndien enye [oduk] esim ukpong.”14 Man ekop sung-sung uyo emi, ana nte mbufo nko edi sung-sung!15
Ke esisit ini, udongo emi akpan mme edinam emi ekpedude ke uwem nnyin. Idibighike nnyin iyimek ndifiak nyoho uwem nnyin ye uyom ye ntime ererimbot. Midighe nnyin imikeme ndida ini nnyin nkop uyo Abasi nte onode nda-usung, ndongesit, ye emem. Ini ndopuyo edi edisana ini—ini emi edidade eriyarare ye emem isop idi.
Kpep ndinyene ini nno idem mbufo ye mbon emi emade. Eyak Esit Mbufo eno Abasi ke akam. Eda ini esin idem mbufo ke ukpep nwed Abasi ye ukpono ke temple.
Ndima ndito eka mi iren, Abasi oyom nnyin ikpep ediwak mkpo ito se nnyin ikutde ke ini udongo emi. Ami nsiak inang ikpong. Ami medoho yak mbufo esiak eke mbufo, etim ese, enyung ebuana enye ye mbon emi mbufo emade.
Ini iso ayama ono ikot Abasi emi enamde ediomi mmo.16 Abasi eyekot ndito Esio emi ekamade itie oku mmo nte odotde man ediong, edongesit, enyung esongo mme owo idem man enwam ebenge ererimbot ye mme owo idem ebanga Edidi Esie Oyoho iba. Ana nte nnyin kiet kiet inam mkpo idot ye edisana udori-ubok emi ikibode. Nnyin imikeme ndinam emi! Ami ntie ntiense, ke ndiwut ima mi nno mbufo owo kiet kiet, ndima ndito-ete mi, ke edisana enying Jesus Christ, amen.