Juon Jekjek Ekāāl Āinjuon Jān Mokta
Ij karuwaineneik kom̧ n̄an ukōt būruwōm̧i, am̧i ļōmņak, im jetōb eo ami en ļapļo̧k n̄an Jemedwōj Ilan̄ im Nejin, Jisōs Kraist.
Ro jeiū im jatū jitōnbōro, raan kein ruo an kweilo̧k in eļap rekanooj kar aibojooj. Ij errā ippān Elder Jeffrey R. Holland. Āinwōt an kar ba, ennaan ko, jar ko, im al ko rekar aolep im̧we jān Irooj. Ij kam̧m̧oolol aolep ro rekar bōk koņaer ilo jabdewōt wāween.
Jān kadiwōjļo̧k kein, ikar pijaik eok ilo ļōmņak eo aō ilo aō ron̄jake kweilo̧k in eļap. Ikar kajjitōk ippān Irooj n̄an jipan̄ eō meļeļe ta eo kwoj en̄jake, inepata kake, ak kajjieon̄ ņamejļan. Ikar ļōmņak ta eo imaron̄ kar ba n̄an kiil kweilo̧k in me enaaj iwōj n̄an kom̧ kōn laudin̄din̄ kōn ilju im jekļaj eo me ijeļā Irooj ekōņaan bwe kwon en̄jake.
Jej mour ilo juon tōre eaiboojoj, kar loe m̧okta jān rikanaan ro ium̧win epepen ko. En̄in ej tōre in bōk eddo eo ke ejjeļo̧k kōjeraam̧m̧an ko an jetōb renaaj m̧akoko in leļo̧k jān ro rewāppen. 1 Men̄e poktak ko an laļ in, 2 Irooj enaaj kōņaan bwe jen “reim̧aanļo̧k n̄an ilju im jekļaj kōn karōk elan̄lōn̄.” 3 Jen jab kōro̧o̧lole wiil ko ilo emememļo̧kjeņ ko an inne. Aiintok doon eo an Isreal ej wōnm̧aanļo̧k wōt. Irooj Jisōs Kraist ej tōl jerbal ko an Kabun̄ eo An, im enaaj bōk jibadbad ko an rekwojarjar.
Apan̄ eo n̄an kwe im n̄a ej n̄an kam̧m̧oole bwe kōj kajjojo renaaj bōk jibadbad eo an ekwojarjar. Rainin ekkā ad ron̄jake “juon jekjek ekāāl āinjuon jān m̧okta.” Eļan̄n̄e kwoj lukkuun kaorōke jekjek in āinjuon jān mokta im ekāāl ij karuwaineneik kom̧ n̄an ukōt būruwōm̧i, am̧i ļōmņak, im am ļapļo̧k n̄an Jemedwōj Ilan̄ im Nejin, Jisōs Kraist. Kōm̧m̧an bwe en jekjek eo am̧ ekāāl āinjuon jān m̧okta.”
Jelm̧ae jekjek eo am̧ ekāāl āinjuon jān m̧okta. Kappukot n̄an maron̄ erreeo ilo kōļmenļo̧kjeņ, naan, im kōm̧m̧an. Jerbal in karejar n̄an ro jet. Dāpij jibadbad eo an indeeo. Kōm̧m̧ane kūr eo am̧. Im jabdewōt apan̄ ko am̧, ro jeiū im jatū, mour kajjojo raan bwe kwōn ļapļo̧k am̧ m̧aanjabpopo n̄an ioon am̧ Rikōm̧anm̧an 4
En̄in ej etke ewōr ad tampeļ ko. Kain̄i ko an Irooj im bujen ko rej kōpooje kōj n̄an mour indeeo, kōjeraam̧m̧an reļļaptata an Anij. 5 Āinwōt am̧ jeļā, ajedeed in nan̄inmej in COVID ej aikuji juon iien ekadu n̄an kilōke tampeļ ko ad. Innām jej jino juon kōppeļaak eo etiljek, bar kōppeļļo̧ke phased ko. Ilo phase 2 kiiō ej pād ilo elōn̄ tampeļ ko, taujin ripālele ro rekar liāp im taujin ro rekar bōk menin letok eo kwojarjar eo aer ilo jejjo wōt allōn̄ ko rej jem̧ļo̧k ļo̧k. Kōm̧ij reim̧aanļo̧k n̄an raan eo n̄e aolep membōr ro rereeo an Kabun̄ in remaron̄ bar juon alen jerbale rūtto ro jibūer im jim̧aer etto im kabun̄jar ilo juon tampeļ ekwojarjar.
Kiiō ij m̧ōņōņō in kōjjeļļāik karōk in ekkāl ko an jiljino tampeļ ko n̄an maron̄ kalōki ilo laajrak in jikin kein: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; im Santa Cruz, Bolivia.
Ilo ad kalōk im kōkōm̧anm̧anļo̧k tampeļ kein, jej jar bwe kom̧ kajjojo renaaj kalōk im kōkōm̧anm̧anļo̧k kom̧ make bwe kom̧win maron̄ erreo n̄an deļo̧n̄e tampeļ eo ekwojarjar.
Kiiō, ro jeiū im jatū, ij kōjeraam̧m̧an kom̧ bwe kom̧win maron̄ obrak kōn aenōm̧m̧an eo an Irooj Jisōs Kraist. Aenōm̧m̧an eo An eļapļo̧k jān an aolep armej maron̄ meļeļe. 5 Ij kōjeraam̧m̧an eok kōn juon ikdeleel im maron̄ rej ļapļo̧k n̄an pokake kakien ko an Anij. Ij kallim̧ur bwe ilo am̧ kōm̧m̧an āindein, naaj wittidikdik eok kōn kōjeraam̧m̧an ko, ekoba peran eo eļapļo̧k, revelesōn ko reļļapļo̧k, ineem̧m̧an eo em̧m̧anļo̧k ilo m̧ōko im̧ōm̧, im lan̄lōn̄, aaet ilubwilijin pere ko.
Kōm̧m̧an bwe jen wōnm̧aanļo̧k ippān doon n̄an kakūrm̧ool maron̄ eo ad ekwojarjar—bwe kōpooj kōj make im laļ in n̄an Itok eo Kein Karuo an Irooj. Ij barāinwōt jar, kōn aō naan in iakwe n̄an kom̧, et eo ekwojarjar etan Jisōs Kraist, amen.