Sister ro ilo Zaion
Kom̧ naaj juon kajoor aorōk ilo aintok Israel im ilo ejake kumi in armej in Zaion.
Sister ro aō rejitōn bōro, ij jeraam̧m̧an n̄an ekōnono ilo iien in em̧m̧an ilo bwebwenato an laļ in. Aolep raan, jej epaakeļo̧k iien eo aiboojoj n̄e Rilo̧mo̧o̧r eo Jisōs Kraist enaaj bar itok n̄an laļ. Jej jeļā jet men an iien ko renana me enaaj itok m̧okta jān itok eo An, aaet būruwōd rej obrak kōn lan̄lōn̄ im lōke kōn barāinwōt jeļā kōn kallim̧ur ko raiboojoj me renaaj kūrm̧ool m̧otka jān An jepļaaktok.
Āinwōt leddik ro rejitōn bōro nejin Jemedwōj Ilan̄, im āinwōt leddik ro nejin Irooj Jisōs Kraist ilo aelōn̄ in kiin̄ eo An, 1 kom̧ij kōm̧m̧ane juon m̧ōttan aorōk ilo iien ko raorōk repād im̧aan. Jej jeļā bwe Rilo̧mo̧o̧r eo enaaj itok n̄an armej ro me raar aiintok doon im m̧aanjabpopo n̄an mour āinwōt armej ro raar kōm̧m̧ane ilo jikin kweilo̧k eo an Inōk. Armej ro raar juon wōt ilo tōmak ilo Jisōs Kraist im raar lukkuun in erreo jon̄an raar bōkļo̧k er n̄an lan̄.
En̄in ej kōmeļeļe eo kar kwaļo̧k an Irooj kōn ta enaaj kar waļo̧k n̄an armej ro an Inōk im ta enaaj waļo̧k ilo tōre in iien bōk eddo eo āliktata an tarlep in iien ko.
“Im raan eo enaaj itok im laļ enaaj kakkije, a m̧okta jān raan eo lan̄ ko naaj kōmaroki, im juon kalbubu in marok jilōn̄lōn̄ enaaj kalbubu laļ; im lan̄ ko renaaj m̧akūtkūt, im barāinwōt laļ; im en̄taan ko reļļap renaaj pād ilubwiljin ro nejin armej raņ, a armej ro Aō I naaj oņaake er;
Im wānōk I naaj jilkinlaļļo̧k jān lan̄; im m̧ool I naaj jilkinļo̧k jān laļ, n̄an kam̧ool kōn Nejū Iaar Make Keotake; jerkakpeje eo An jān ro remej; aaet, im barāinwōt jerkakpeje eo an armej otemjeļo̧k; im wānōk im m̧ool I naaj kōm̧m̧an bwe ren pooke laļ āinwōt juon ibwijleplep, n̄an aintok ro Aō rikāālet jān m̧ōttan ko emān an laļ in, n̄an jikin eo me I naaj kōpooje, juon Jikin Kwelo̧k Ekwōjarjar, bwe armej ro Aō ren maron̄ kan̄ōrn̄ōre ipier, im reim̧aanļo̧k n̄an iien itok eo an; bwe enaaj pād em̧ nuknuk eo Aō, im naaj ņa etan Zaion, juon Jerusalem Ekāāl.
“Im Irooj eba n̄an Inok: Innām kwe im aolep jikin kwelo̧k eo am renaaj ioon er ijo, im Jenaaj bōk er ilo ubōd, im renaaj lo kōj; im jenaaj wōtlo̧k ioon kōnwaer, im renaaj wōtlo̧k ioon kōnwad, im kōjwōj naaj mejenmaik doon;
“Im ilo ijōņ ijo Jikū enaaj pād, im enaaj Zaion, eo enaaj wōnm̧aantak jān aolep mennin kōm̧anm̧an ko me Iaar kōm̧m̧ani; im kōn tōrean eo juon to̧ujin iiō ko laļ enaaj kakkije.” 2
Kom̧ sister ro, kom̧ij leddik ro nejin, kom̧ij leddik ro jibūn, im kōrā ro kom̧ kar lale er naaj juon m̧ōttan eo ekanooj aorōk an ejake jukjuk in pād eo an armej ro me renaaj koba ilo iaio aiboojoj ippān Rilo̧mo̧o̧r eo. Kom̧ naaj juon kajoor aorōk ilo aintok Israel im ilo ejake kumi in armej in Zaion me renaaj jokwe ilo aenōm̧m̧an ilo Jerusalem eo Ekāāl.
Irooj ekar, kōn rikanaan ro An, kar kōm̧m̧ane juon kallim̧ur n̄an kom̧. Ilo raan ko jinoin tata an Doulul eo an Kōrā ro, Rikanaan Josep Smith ekar ba n̄an sister ro, “Eļan̄n̄e kom̧ naaj lukkuun kōjerbal jim̧we ko me ewōr an juon armej, ejjeļo̧k juon men emaron̄ bōbrae enjeļ ro jān aer m̧ōttami.” 3
Kōjatdikdik kabwilōn̄lōn̄ jab in ej pād ilo kom̧, im kar kōpooj kom̧ n̄an e.
Būreejtōn Gordon B. Hinckley ekar ba:
“Kom̧ sister ro … kom̧ij jab jaorōkļo̧k jān em̧m̧aan ro ilo karōk eo an Jemed n̄an m̧ōņōņō eo indeeo im em̧m̧an eo an ajri ro Nejin. Kom̧ij lukkuun in m̧ōttan aorōk an karōk jab eo.
“Ilo ami jako karōk eo ejjab maron̄ in jerbal. Ilo ami jako aolepān karōk in lo̧mo̧o̧r eo ejjamin naaj jerbal. …
“Kom̧ kajjojo ej juon leddik nejin Anij, kar kōpālpel kōn juon jolet ekwojarjar.” 4
Rikanaan eo ad kiiō, Būreejtōn Russell M. Nelson, ekar letok kōmeļeļe in kōn m̧ōttan eo kom̧ij kōm̧m̧ane ilo m̧aanjabpopo eo n̄an itok eo an Rilo̧mo̧o̧r:
“Epen bwe kwōn jon̄e jon̄an kajoor in me … epād ippān kōrā rein, ejjab kōn baam̧le wōt ak ilo Kabun̄ eo an Irooj, āinwōt kōrā in pālele ro, jet bubu; āinwōt kōrā ro jeid im jatid ak nej jined; āinwōt jet rūkaki im ritōl; im eļaptata āinwōt jet waanjon̄ak im rijojomar tōmak.
“Menin em̗ool ilo aolep epepen ko an gospel jān tōre ko an Adam im Eve. Aaet kōrā ro ilo epepen in rejeņoļo̧k jān kōrā ro jet jet kōnke epepen in ejeņoļo̧k jān epepen ko jet Jeņoļo̧k in ej boktok jim̗or maron̄ ko im eddo ko.” 5
Tōre in bōk eddo in ejenolo̧k kōnke Irooj enaaj tōl kōj n̄an erom pojak āinwōt jikin kweilo̧k eo an Inōk. Ekar kōmeļeļeik jān rijilōk ro im rikanaan ro An ta eo oktak eo enaaj n̄an juon kumi in armej in Zaion naaj bōk koņaan.
Elder Bruce R. McConkie ekar katakin:
“[Tōre eo an Inōk] ekar juon tōre ejerawiwi im nana, juon tōre in maroklep im jum̧ae, juon tōre in tariņae im jepepļo̧k, juon tōre ej tōlļo̧k n̄an karreo eo an laļ in kōn dān.
“Inōk, mekarta, ekar tiljek. E ‘ekar lo Irooj,’ im kar kōnono ippān ‘jelm̧ae doon’ āinwōt an juon em̧m̧aan kōnono ippān eo juon. (Moses 7:4.) Irooj ekar jilkinļo̧k e n̄an kwaļo̧k ukweļo̧k n̄an laļ in, im kakien e n̄an ‘peptaij ilo etan Jemān, im etan Nejin, eo eobrak kōn jouj im m̧ool, im etan Jetōb Kwōjarjar, eo ej kam̧ool kōn Jemān im Nejin.’ (Moses 7:11.) Inōk ekar kōm̧m̧ani bujen ko im kar ain juon jarlepju an ritōmak ro rem̧ool, aolepāer raar erom lukkuun tiljek jon̄an ‘Irooj eaar itok im jokwe ippān armej ro An, im rekar jokwe ilo wānōk,’ im raar jeraam̧m̧an jān ijo eutiej. ‘Im Irooj eaar ņa etan armej ro An Zaion, kōnke rekar juon wōt ilo bōro im juon wōt ilo ļōmņak, im rekar jokwe ilo wānōk; im ar ejjeļo̧k rijeram̧ōl ilubwiljier.’ (Moses 7:18.) …
“Ālkin an Irooj kar ņa etan armej ro an Zaion, jeje ko rekwojarjar ej ba bwe Inōk ‘eaar kalōk juon jikin kwelo̧k kar etan Jikin Kwelo̧k Ekwōjarjar, em̧ool Zaion;’ bwe Zaion ‘kar bōklōn̄ļo̧k ilo lan̄’ ijo ‘bwe Anij eaar bōk e lōn̄ļo̧k ilo Ubōn make;” im “jān iien eo m̧aanļo̧k eaar etal ennaan eo, Zaion e emootļo̧k.’ (Moses 7:19, 21, 69.) …
“Ejja Zaion in wōt mee kar bōk lōn̄ļo̧k n̄an lan̄ enaaj bar jepļaaktok … n̄e Irooj ej bōktok juon alen Zaion, im rijolet ro an renaaj koba ippān Jerusalem eo ekāāl, eo enaaj bar ejaak.” 6
Eļan̄n̄e iien ko etto rej m̧ōttan juon men eļapļo̧k an aorōk tokālik, ilo iien eo an itok eo an Rilo̧mo̧o̧r eo, leddik ro nejin me em̧wilaļ aer kallim̧ur n̄an bujen ko aer ippān Anij naaj ļapļo̧k jān jimettan in ro me rej m̧aanjabpopo n̄an karuwaineneik E n̄e Ej itok. Bōtaab jekdo̧o̧n ta oran eo, ami jipan̄ ilo ejaake bōro kuk eo ibwilijin armej ro raar m̧aanjabpopo n̄an Zaion eo naaj ļapļo̧k jān jimettan.
Inaaj jiron̄ kom̧ etek ij tōmak bwe enaaj āindein. Bok in Mormon ej letok juon bwebwenato kōn juon kumi in armej in Zaion. Kom̧ij keememej ke bwe ekar ālkin kar katakin er, iakwe, im kōjeraam̧m̧an jān jerkakpeje Rilo̧mo̧o̧r eo bwe “eaar ejjeļo̧k jum̧ae doon ilo āneo, kōnke iakwe eo an Anij eo eaar pād ilo būruōn armej ro.” 7
Iminene eo aō ekar katakin eō bwe leddik ro nejin Jemādwōj Ilan̄ ewōr juon aer menin letok n̄an kōm̧akūtļo̧k aikwelel im n̄an kōmejajaik jim̧we kōn iakwe eo aer kōn Anij im kōn iakwe eo an Anij rej jipan̄ ro rej jerbal n̄an er.
Ikar kam̧ool e menin ke ikar jodikdik ke branch eo am edik rekar kweilo̧k ilo m̧weo ikar dik im rūttoļo̧k ie. Būratōr eo aō im n̄a kar kōm̧ro wōt rikabwijer ro an Aaronic Priesthood, jema ekar e wōt rikabwijer Melkesidek Priesthood eo. Būreejtōn eo an Doulul eo an Kōrā ro an branch eo ekar juon rioktak eo em ļeo pālen ekar jab m̧ōņōņō kōn jerbal eo an ilo Kabun̄ in. Membōr ro raar aolep sister ro rōrūtto ejjeļo̧k juon rikabwijer priesthood ilo im̧ōko im̧wer. Ikar lale an jinō im sister ro iakwe, ļōn̄jak, im kea kōn doon ilo jab likjab. Ij kile kiiō bwe kar letok n̄an eō juon arromeļo̧k ekadu kitien an Zaion.
Ekkatak eo aō ilo kareel eo an kōrā ro retiljek ekar wōnm̧aanļo̧k wōt ilo juon branch edik an Kabun̄ in ilo Albuquerque, New Mexico. Ikar lale an lio pāleen branch būreejtōn eo, lio pāleen district būreejtōn eo, im būreejtōn eo an Doulul eo an Kōrā ro raar kōm̧m̧aan bwe aolep rikāāl ro im rioktak ro ren en̄jake m̧ōņōņō. Jabōt eo ikar em̧m̧akūt jān Albuquerque, ālkin ruo iiō in lale an kareel eo an sister ro ijo, stake eo kein kajuon ekar ejaak. Kiiō Irooj ekar likūt juon tampeļ ijōņ.
Kiiō ij kōnono kōn Boston, ijo ikar jerbal ilo district būreejtōnji eo me ekar tōl branch ko reddik aolepān ruo state ko. Ekar wōr iakwelel ko me elōn̄ļo̧k jān juon kōttan raar ņa mejļaer kōn iakwe im joļo̧k bōd an kōrā ro me raar jipan̄ kōmeraik bōro ko. Jabōt eo ikar em̧m̧akūt jān Boston, juon membōr in Būreejtōnji eo Kein Kajuon ekar ejake stake eo kein kajuon ilo Massachusetts. Ewōr juon tampeļ ijōņ kiiō, epakeļo̧k ijo district būreejtōn eo ekar jokwe ie m̧okta. Kar bar bōktok n̄an niknik ilo Kabun̄ in im tok ālkin kar kur e n̄an jerbal āinwōt juon stake būreejtōn innām āinwōt juon mijen būreejtōn, kar kareele jān juon lio pālele etiljek im iakwe.
Sister ro, kar lewaj n̄an kom̧ kōjeraam̧m̧an eo an leddik ro nejin Anij kōn menin letok ko rein juon. Kom̧ kar bōtkok ippāmi tok n̄an mour wabanban juon kajoor ilo jetōb n̄an naajdik ro jet im n̄an ļōn̄aj er lōn̄lōn̄ n̄an iakwe eo im erreo eo me enaaj kōkarbōb er n̄an mour ippān doon ilo juon jukjukin pād an Zaion. Ekar jab kōn jide bwe Doulul eo an Kōrā ro, doulul eo m̧oktata an Kabun̄ in ejake eļap tata n̄an leddik ro nejin Jemādwōj Ilan̄, epād ippān m̧ato eo an “Iakwe-Em̧ool Ej Jamin Jako.”
Iakwe-em̧ool ej akwe eo erreo an Kraist. Im ej tōmak ilo E im tarlep in jelet ko an Pinmuur eo An indeeo me enaaj kōkarbōb kom̧, im ro kom̧ij iakwe im jerbal n̄an er, bwe menin letok eo eaiboojoj n̄an mour ilo jukjuk in pād eo im wāween mour ilo Zaion me kar kallim̧ur kake etto. Ijo kom̧ naaj sister ro ilo Zaion, iakwe ilo armej jān Irooj im ro kom̧ kar kōjeraam̧m̧an er.
Ij kam̧ool bwe kom̧ij citizen ro an aelōn̄ in kiin̄ eo an Irooj ioon laļ in. Kom̧ij leddik ro nejin juon Jemedwōj Ilan̄ eo ej iakwe, eo ekar jilkintok kom̧ n̄an laļ in kōn menin letok ko ejej uwaer me kar kallim̧uri kom̧ n̄an kōjerbali n̄an kōjeraam̧m̧an ro jet. Ij kallim̧uri kom̧ bwe Irooj enaaj tōl kom̧ kōn pein, kōn Jetōb Kwojarjar eo. Enaaj etal im̧ami ilo ami jipan̄ E kōpooj armej ro An erom Zaion An kar kallim̧ur kake. Ij kwaļo̧k aō kam̧ool ilo et eo ekwojarjar etan Jisōs Kraist, amen.