’A vaiiho i te Atua ’ia upo’oti’a
E hina’aro ānei outou e vaiiho i te Atua ’ia upo’oti’a i roto i tō ’outou orara’a ? E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ?
E au mau taea’e ’e e au mau tuahine, e māuruuru rahi tō’u nō te mau parau poro’i nehenehe o teie ’āmuira’a, ’e nō tō’u ha’amaita’ira’a ’ia paraparau atu ia ’outou i teienei.
Hau i te 36 matahiti i teienei tō’u rirora’a ’ei ’āpōsetolo, ’ua haru tō’u mana’o i ni’a i te parau ha’api’ira’a o te ha’aputuputura’a o ’Īserā’ela. 1 ’Ua tupu te māere i roto iā’u nō ni’a i te mau mea ato’a o te reira ’ohipa, mai te mau tau tāvinira’a ’e te mau i’oa 2 ’o Aberahama, Isaaka ’e ’o Iakoba; tō rātou orara’a, ’e tā rātou mau vahine ; te fafaura’a tā te Atua i rave ’e ’o rātou e haere roa mai i ni’a i tā rātou mau huā’ai ; 3 te ha’apurarara’a o nā ’ōpu ’ahuru ma piti; ’e te mau parau tohu e rave rahi nō ni’a i te ha’aputuputura’a i tō tātou nei ’anotau.
’Ua tuatāpapa vau i te ha’aputuputura’a, ’ua pure nō te reira, ’e ’ua ’oa’oa vau i te mau pāpa’ira’a nō ni’a i te reira, ’e ’ua ani au i te Fatu ’ia fa’ananea i tō’u hāro’aro’ara’a.
Nō reira, ’a feruri nā i tō’u ’oa’oa ’a arata’ihia ai au i roto i te hō’ē ’itera’a ’āpī ’aita i maoro a’e nei. Nā roto i te tauturu a nā pīahi e piti nō te reo hebera, ’ua ha’api’i mai au ē, te hō’ē ’o te mau aura’a o te ta’o ra ’Īserā’ela i te reo hebera ’oia ho’i, « ’a vaiiho i te Atua ’ia upo’oti’a ». 4 Nō reira, te i’oa mau o ’Īserā’ela e parau ïa nō te hō’ē ta’ata ’o tē hina’aro ’ia vaiiho i te Atua ’ia upo’oti’a i roto i tōna orara’a. ’Ua fa’atupu te reira i te ’oa’oa i roto i tō’u vārua !
E mea faufa’a te ta’o hina’aro nō teie tātarara’a ’o Īsera’ela. 5 E ti’amāra’a tō tātou pā’āto’a. E nehenehe tātou e mā’iti ’ia riro nō ’Īserā’ela ’aore rā, ’aita. E nehenehe tātou e mā’iti ’ia vaiiho i te Atua ’ia upo’oti’a i roto i tō tātou orara’a, ’aore rā, ’aita. E nehenehe tātou e mā’iti ’ia vaiiho i te Atua ’ia riro ’ei fa’aurura’a pūai a’e i roto i tō tātou orara’a ’aore rā, ’aita.
’A ha’amana’o nā tātou, ma’a taime iti, i te hō’ē tauira’a rahi i roto i te orara’a ’o Iakoba, te mo’otua a Aberahama. I te vāhi tā Iakoba i topa te i’oa ’o Pēniela (’oia ho’i « te mata o te Atua »), 6 ’ua taputō ’o Iakoba i te hō’ē tītaura’a pāpū. ’Ua tāmatahia tōna ti’amāra’a. Nā roto i taua taputōra’a ra, ’ua ha’apāpū ’o Iakoba e aha te mea faufa’a a’e nōna. ’Ua fa’a’ite ’oia ē, ’ua hina’aro ’oia ’ia vaiiho i te Atua ’ia upo’oti’a i roto i tōna orara’a. ’Ei pāhonora’a, ’ua taui te Atua i te i’oa ’o Iakoba, ’o ’Īserā’ela 7 te aura’a, « ’a vaiiho i te Atua ’ia upo’oti’a ». I reira, ’ua fafau mai te Atua ia ’Īserā’ela ē, te mau ha’amaita’ira’a ato’a tei fa’ahitihia i ni’a i te upo’o ’o Aberahama, e riro ato’a ïa nōna. 8
Te vāhi pe’ape’a rā, ’ua ’ōfati ’o ’Īserā’ela i tā rātou mau fafaura’a i te Atua. ’Ua pehī rātou i te mau peropheta i te ’ōfa’i ’e ’aita rātou i hina’aro ’ia vaiiho i te Atua ’ia upo’oti’a i roto i tō rātou orara’a. I muri mai, ’ua ha’apurara te Atua ia rātou i nā poro e maha o te fenua nei. 9 Aua’e rā, i muri a’e, ’ua fafau mai ’oia e ha’aputuputu ia rātou, mai tei fa’a’itehia mai e Isaia : « I fa’aru’e au ia ’oe ma te riri iti ; e fa’aho’i mai rā vau ia ’oe ma te aroha rahi ». 10
Ma te tātarara’a hebera ’o ’Īserā’ela i roto i te ferurira’a, e aura’a hau atu tō te ha’aputuputura’a ’o ’Īserā’ela. Tē ha’aputuputu nei te Fatu i te feiā e hina’aro e vaiiho i te Atua ’ia upo’oti’a i roto i tō rātou orara’a. Tē ha’aputuputu nei te Fatu i te feiā ’o tē mā’iti ’ia vaiiho i te Atua ’ia riro ’ei fa’aurura’a faufa’a rahi a’e i roto i tō rātou orara’a.
Nō te mau tenetere e rave rahi, ’ua tohu te mau peropheta i teie ha’aputuputura’a, 11 ’e te tupu nei te reira i teienei ! ’Ei ’ōmuara’a faufa’a nō te tae-piti-ra’a mai ’o te Fatu, ’o te ’ohipa faufa’a roa a’e ïa i roto i te ao nei !
Teie ha’aputuputura’a hou te mireniuma, ’o te hō’ē ïa ’ohipa nō te ta’ata hō’ē nō te fa’arahira’a i te fa’aro’o ’e te itoito pae vārua nō te mau ta’ata e rave rahi mirioni. ’Ei mau melo nō te ’Ēkālesia a Iesu Mesia i te Feiā Mo’a i te mau Mahana Hope’a nei, ’aore rā, « te fafaura’a o ’Īserā’ela o te mahana hope’a nei », 12 ’ua fa’auehia tātou ’ia tauturu i te Fatu i roto i teie ’ohipa tumu. 13
’Ia paraparau ana’e tātou nō te ha’aputuputu ia ’Īserā’ela i nā pae e piti o te pāruru, tē parau nei ïa tātou nō te ’ohipa misiōnare, te hiero, ’e te ’ā’amu ’utuāfare. Tē parau ato’a nei tātou nō te patura’a i te fa’aro’o ’e i te ’itera’a pāpū i roto i te ’ā’au o te feiā i pīha’i iho tātou e ora ai, e ’ohipa ai, ’e e tāvini ai. I te mau taime atoʼa e rave tātou i te hō’ē mea ’o tē tauturu i te hō’ē ta’ata—i nā pae e piti o te paruru—nō te rave i tā rātou mau fafaura’a i te Atua, te tauturu ra tātou i te ha’aputuputura’a ia ’Īserā’ela.
’Aita i maoro a’enei, te vahine a te hō’ē o tā māua mau mo’otua, tē ’aro ra ’oia i te pae vārua. E pi’i au iāna ’o « Jill ». Noa atu te ha’apaera’a mā’a, te pure, ’e te mau ha’amaita’ira’a autahu’ara’a, fātata te metua tāne ’o Jill i te pohe. ’Ua mata’u ’oia ’o te mo’e tōna pāpā ’e tōna ’itera’a pāpū.
’Ua maoro te pō, ’ua paraparau mai tā’u vahine, te tuahine Wendy, i te fifi o Jill. ’Ia po’ipo’i a’e, ’ua tupu te mana’o i roto ia Wendy e fa’a’ite ia Jill ē, tā’u pāhonora’a i tāna ’arora’a pae vārua, hō’ē noa ïa ta’o ! Teie te ta‘o, e myope.
I muri a’e, ’ua fa’a’ite ’o Jill ia Wendy ē, i te ha’amatara’a, ’ua huru ’ē roa ’oia i tā’u pāhonora’a. ’Ua parau ’oia ē : « ’Ua feruri au ē, maita’i ē, e fafau mai ’o pāpā rū’au i te hō’ē temeio nō tō’u pāpā. ’Ua feruri noa vau ē, nō te aha ’o te ta’o myope te ta’o tei fa’ahepohia iāna ’ia parau ».
I muri a’e i te pohera’a o te metua tāne ’o Jill, ’ua vai noa teie ta’o myope i roto i tōna ferurira’a. ’Ua ’īriti ’oia i tōna ’ā’au ’ia rahi atu tōna ’ite i te aura’a nō te parau myope ’o te « ’hi’ora’a poto ’ua ha’amata tōna ferurira’a i te taui. I muri iho, ’ua parau a’era ’o Jill ē, « ’ua tura’i te myope iā’u ia fa’aea, ’ia feruri, ’e ’ia ora. Tē fa’a’ī nei taua ta’o ra iā’u i te hau i teienei. Tē fa’aha’amana’o mai nei te reira iā’u ’ia fa’a’a’ano i tā’u hi’ora’a ātea ’e ’ia ’imi i te mea mure ’ore. Tē fa’aha’amana’o mai nei te reira iā’u ē, tē vai ra hō’ē fa’anahora’a hanahana, ’e tē ora noa nei tō’u pāpā, ’e tē here nei ’e tē ara nei ’oia i ni’a iā’u.Nā te Myope i arata’i iā’u i te Atua ra ».
Tē ha’apeu rahi nei au i tā māua tamāhine mo’otua ho’ovai faufa’a rahi. I roto i taua taime ahoaho rahi ra o tōna orara’a, tē ha’api’i nei ’o Jill ’ia fāri’i i te hina’aro o te Atua nō tōna pāpā, ’e te hō’ē hi’ora’a ātea nō tōna iho orara’a. Nā roto i te mā’itira’a e vaiiho i te Atua ’ia upo’oti’a, tē roa’a nei iāna te hau.
Mai te mea e ti’a ia tātou, ’ua rau te rāve’a e nehenehe ai i teie tātarara’a hebera ’o ’Īserā’ela e tauturu ia tātou. ’A feruri na e nāhea tā tātou mau pure nō tā tātou mau misiōnare—’e nō tā tātou iho mau tauto’ora’a ’ia ha’aputuputu ia ’Īserā’ela—e nehenehe ai e taui, ma teie ha’api’ira’a i roto i te ferurira’a. Tē pure pinepine nei tātou ’ia arata’ihia tātou ’e te mau misiōnare i te feiā tei ineine nō te fāri’i i te mau parau mau o te ’evanelia a Iesu Mesia i fa’aho’i-fa’ahou-hia mai. Tē uiui nei tō’u mana’o ē, e arata’ihia tātou ’ia vai ra, ’ia tāparu ana’e tātou ’ia ’ite i te feiā tei hina’aro e vaiiho i te Atua ’ia upo’oti’a i roto i rātou orara’a ?
E nehenehe tātou e arata’ihia i te tahi mau ta’ata ’aita i ti’aturi a’e nei i te Atua ’aore rā, ia Iesu Mesia, ’o tē hina’aro nei rā i teienei e ha’api’i nō ni’a ia rāua ’e i tā rāua fa’anahora’a nō te ’oa’oa. ’Ua fānauhia paha vetahi « i roto i te fafaura’a » 14 terā rā, mai taua taime ra, ’ua fa’aātea ’ē i te ’ē’a nō te fafaura’a. ’Ua ineine paha rātou i teienei nō te tātarahapa, nō te ho’i mai, ’e nō te vaiiho i te Atua ’ia upo’oti’a. E nehenehe tātou e tauturu ia rātou nā roto i te fāri’i-maita’i-ra’a ia rātou ma te rima ’e te ’ā’au mahora. ’E te tahi pae i reira tātou e arata’ihia ai, tē feruri noa ra paha rātou ē, te vai ra hō’ē mea e ma’iri ra i roto i tō rātou orara’a. Rātou ato’a, tē hina’aro nei rātou i te ’īra’a ’e i te ’oa’oa e fāri’ihia e te feiā tei ineine ’ia vaiiho i te Atua ’ia upo’oti’a i roto i tō rātou orara’a.
E mea ’ā’ano te upe’a ’evanelia nō te ha’aputuputu ia ’Īserā’ela i ha’apurarahia. Tē vai ra te pārahira’a nō te ta’ata tāta’itahi ’o tē hina’aro e fāri’i hope roa i te ’evanelia a Iesu Mesia. E riro mai te ta’ata fa’afāriu tāta’itahi ’ei hō’ē o te mau tamari’i nō te fafaura’a a te Atua, 15 nā roto ānei i te fānaura’a ’aore rā, te fa’a’amura’a. E riro mai te ta’ata tāta’itahi ’ei fatu ’āi’a hope roa nō te mau mea ato’a tā te Atua i fafau i te mau tamari’i ha’apa’o maita’i ’o ’Īserā’ela ! 16
E pūai hanahana tō tātou tāta’itahi nō te mea, e tamari’i tāta’itahi tātou nā te Atua. E mea ’aifāito te ta’ata tāta’itahi i mua i tōna aro. Te mau tupura’a o teie parau mau e mea hōhonu ïa. Te mau taea’e ’e te mau tuahine, ’a fa’aro’o maita’i mai na i te mea tā’u e parau atu. ’Aita te Atua i here i te hō’ē taura ta’ata hau atu i te tahi. E mea māramarama maita’i tāna ha’api’ira’a tumu nō ni’a i teie parau. Tē ani nei ’oia i te mau ta’ata ato’a ’ia haere mai iāna ra, « te ’ere’ere ’e te ’uo’uo, te titi ’e te ti’amā, te tāne ’e te vahine ». 17
Tē ha’apāpū atu nei au ia ’outou ē, ’aita tō ’outou ti’ara’a i mua i te Atua e fa’ata’ahia i te ’ū o tō ’outou ’iri. Te au maita’i ’aore rā te au maita’i ’ore i te Atua, tei te huru ïa o tō ’outou ha’amorira’a i te Atua ’e i tāna mau fa’auera’a ’e ’eiaha rā i te ’ū o tō ’outou ’iri.
Tē ’oto nei au nō te mau māuiui tā tō tātou mau taea’e ’e mau tuahine ’ere’ere e fa’aruru nei nā te ao ato’a nei nō te au ’ore i te taura ta’ata ’e te hāmani-’ino-ra’a. I teie mahana, tē ti’aoro nei au i tō tātou mau melo ’ia fa’a’ite i te hi’ora’a ma te vaiiho-roa-ra’a i te mau haere’a ’e te mau ’ohipa hāmani-’ino-ra’a.i Tē tāparu nei au ia ’outou ia fa’arahi i te fa’atura nō te mau tamari’i ato’a a te Atua.
Te uira’a nō tātou tāta’itahi, noa atu te huru o te taura ta’ata, hō’ē ā ïa huru. E hina’aro ānei ’outou e vaiiho i te Atua ’ia upo’oti’a i roto i tō ’outou orara’a ? E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ? E vaiiho ānei ’outou i tāna mau parau, tāna mau fa’auera’a, ’e tāna mau fafaura’a ’ia fa’auru i te ’ohipa tā ’outou e rave i te mahana tāta’itahi ? E vaiiho ānei ’outou i tōna reo ’ia riro ’ei reo mātāmua i ni’a a’e i te tahi atu ? E hina’aro ānei ’outou e vaiiho i te mau mea ato’a tāna e hina’aro ’ia rave ’outou, ’ia nā ni’a a’e i te tahi atu mau hina’aro ? E hina’aro ānei ’outou ’ia horomi’ihia tō ’outou hina’aro i roto i tōna ? 18
’A feruri e nāhea te hō’ē hina’aro mai teie te huru i te ha’amaita’i ia ’outou. Mai te mea ’aita ’outou i fa’aipoipohia ’e te ’imi ra ’outou i te hō’ē hoa mure ’ore, e tauturu tō ’outou hina’aro ’ia riro « nō ’Īserā’ela » ’ia fa’aoti ’o vai tē arapae, ’e nāhea.
Mai te mea ’ua fa’aipoipohia ’outou i te hō’ē hoa tei ’ōfati i tāna mau fafaura’a, nā tō ’outou hina’aro e vaiiho i te Atua ’ia upo’oti’a i roto i tō ’outou orara’a e fa’ati’a i tā ’outou mau fafaura’a ’e te Atua ’ia vai maita’i noa. E fa’aora te Fa’aora i tō ’outou ’ā’au ’oto. E vetea te mau ra’i ’ia ’imi ana’e ’outou ’ia ’ite nāhea ’ia haere i mua. ’Aita e tītauhia ia ’outou ’ia ’ōvere haere noa ’aore rā, ’ia uiui noa te mana’o.
Mai te mea ē, e uira’a ’ā’au tae tā ’outou nō ni’a i te ’evanelia ’aore rā, te ’Ēkālesia, mai te mea ē, e mā’iti ’outou ’ia vaiiho i te Atua ’ia upo’oti’a, e arata’ihia ’outou nō te ’ite ’e nō te hāro’aro’a i te mau parau mau pāpū ’e te mure ’ore ’o tē arata’i i tō ’outou orara’a, ’e ’o tē tauturu ia ’outou ’ia ti’a pāpū i ni’a i te ’ē’a ’o te fafaura’a.
’Ia fārerei ana’e ’outou i te fa’ahemara’a—noa atu ē, e tae mai te fa’ahemara’a i te taime ’ua rohirohi ’outou, ’aore rā, ’o ’outou ana’e, ’aore rā, ’aita ’outou e ta’ahia mai ra—’a feruri i te itoito tā ’outou e nehenehe e ha’aputu nā roto i te mā’itira’a e vaiiho i te Atua ’ia upo’oti’a i roto i tō ’outou orara’a, ’e ’a tāparu ai ’outou iāna ’ia ha’apūai ia ’outou.
’Ia riro ana’e tō ’outou hina’aro rahi a’e ’ia vaiiho i te Atua ’ia upo’oti’a, ’ia riro ’ei tuha’a nō ’Īserā’ela, e rave rahi mau fa’aotira’a e riro mai ’ei mea ’ōhie a’e. E rave rahi mau fifi ’o tē riro mai ’ei mau fifi ’ore ! E ’ite ’outou nāhea ’ia fa’anehenehe maita’i a’e ia ’outou. E ’ite ’outou e aha tē hi’o ’e tē tai’o, i hea e hōro’a ai i tō ’outou taime, ’e e ’āpiti ’outou ’ia vai. E ’ite ’outou e aha tā ’outou e hina’aro e rave fa’aoti. E ’ite ’outou i te huru ta’ata tā ’outou e hina’aro mau ’ia riro mai.
I teienei e au mau taea’e ’e e au mau tuahine here, e tītauhia nā mea e piti, te fa’aro’o ’e te itoito nō te vaiiho i te Atua ’ia upo’oti’a. E tītauhia te ’ohipa pae vārua tu’utu’u ’ore ’e te ’eta’eta nō te tātarahapa ’e nō te pāto’i i te ta’ata nātura nā roto i te tāra’ehara a Iesu Mesia. 19 E tītauhia te tauto’ora’a tāmau i te mau mahana ato’a nō te fa’ananea i te mau peu ta’ata iho nō te tuatāpapa i te ’evanelia, nō te ha’api’i hau atu nō ni’a i te Metua i te ao ra ’e ia Iesu Mesia, ’e nō te ’imi ’e ’ia pāhono i te heheura’a a te ta’ata iho.
I roto i teie mau tau ’ārepurepu tā te ’āpōsetolo Paulo i tohu na, 20 ’aita ’o Sātane e tāmata fa’ahou nei e huna i tāna mau ’arora’a i te fa’anahora’a a te Atua. ’Ua ’ū’ana roa te ’ino. Nō reira, te rāve’a hō’ē roa nō te ora mai i te pae vārua ’o te fa’aotira’a ïa e vaiiho i te Atua ’ia upo’oti’a i roto i tō tātou orara’a, ’ia ha’api’i mai i te fa’aro’o i tōna reo, ’e ’ia fa’a’ohipa i tō tātou pūai nō te tauturu i te ha’aputuputura’a ia ’Īserā’ela.
I teienei, e aha te mana’o o te Fatu nō ni’a i te mau ta’ata e vaiiho i te Atua ’ia upo’oti’a ? E mea maita’i roa te ha’apotora’a parau a Nephi : « e aroha [te Fatu] i te ta’ata e hina’aro iāna ’ei Atua nō rātou. « Inaha, i aroha mai ’oia i tō tātou mau metua ! ’e ’ua fafau ’oia ia rātou, ’oia ho’i ia Aberahama, ’e ia Isaaka, ’e ia Iakoba, ’e ’ua mana’o ā ho’i ’oia i tāna ra faufa’a ». 21
’E e aha tā te Fatu e hina’aro e rave nō ’Īserā’ela ? ’Ua fafau te Fatu ē, e ’aro ’oia « i tā [tātou] ra mau ’arora’a, ’e i tā tō [tātou] mau tamari’i ’arora’a, ’e tā te mau tamari’i ho’i nō tā tō [tātou] mau tamari’i ato’a ho’i [’arora’a]… ’e tae noa atu i te toru ’e te mahara’a ’o te u’i. 22
’A tuatāpapa ai ’outou i tā ’outou mau pāpa’ira’a mo’a i roto i nā ono ’āva’e i muri nei, tē fa’aitoito atu nei au ia ’outou ’ia hāmani i te hō’ē tāpura nō te mau mea ato’a tā te Fatu i fafau e rave ’oia nō te fafaura’a a ’Īserā’ela. Tē mana’o nei au ē, e māere ’outou ! ’A feruri hōhonu i teie mau parau fafau. ’A paraparau i te reira i tō ’outou ’utuāfare ’e te mau hoa. I muri iho, ’a ora ’e ’a hi’o i teie mau parau fafau ’ia tupu i roto i tō ’outou iho orara’a.
E au mau taea’e ’e e au mau tuahine here, mai te mea e mā’iti ’outou e vaiiho i te Atua ’ia upo’oti’a i roto i tō ’outou orara’a, ’e ’ite ’outou iho ē, « e Atua temeio » tō tātou Atua 23 ’Ei nūna’a ta’ata, e mau tamari’i fafauhia tātou nāna, ’e e pi’ihia tātou i tōna ra i’oa. Tē fa’a’ite pāpū nei au i te reira nā roto i te i‘oa mo‘a ’o Iesu Mesia ra, ’āmene.