Kunean te Kimwareirei inanon Kristo
Te kawai ae koaua ni kunea te kimwareirei n te maiu aei ti na raona Kristo man buokakiia tabeman.
Te Uea e aki tuangiia ara kairake n te Nakoanibonga ae te Aaron bwa a na karaoi bwaai ni kabane, ma te bwai are e tua e rang kamiimi man kakukurei.
Tabeua te ririki n nako, ara utu ae uarereke a rinanon baike aki toki n aitara ma ngaai utu n te aonaaba ae bwaka aei. Natira te mwaane ae te bina, Tanner Christian Lund, e reke irouna te kaentia. Bon te aomata ae kakateke, n aroia aika ruaiwa aia ririki. E bon kakamanga man tokonono ao, n te tai naba anne, e rangi n taua te aro. Te teteei ae kanga ai aron te anera, tokonoono ma e tamaroa. Ngke e uarereke ao ni katoa bong ti a totounako naba irouna n arona ni kunimwaan n ataei ma aki ongotaekana, ti kangai bwa e kona n riki bwa te burabeti ke te tia kimoa n te bangke. N ae ti te angana, taraakina bwa iai te mwaake ae na katikua n te aonaaba aei.
Ao ngkanne e a rang korakora aorakina. Imwiin teniua te ririki, bwainaoraki aika ngkai, n raonaki ma uoua oneakin riina ake a rootaki, are e a rootaki n te aoraki ae te pneumonia, are e kainnanoia bwa e na kabanea 10 te wiiki ni wene n aki namakinaaba iaon te mitiin. N ae kanga inanon te kakai, ti kairia n oki bwa e na kakabwaiaaki, ma e a manga oki riki te kaentia.
Teutana te tai imwaain matena, aorakin Tanner bwa a rootaki riina n te kaentia, e ngae ngke a rang korakora taian bwainaoraki, ma e bon maraki naba. E kuri kangaanga ae e na teirake man te kainiwene. Ni moaningabongin te Tabati teuana, tinana, ae Kallen, e rinnako n ana ruu bwa e na nooria bwa e uara imwaain ae a nako n taromauri ana utu. E rangi ni miimi ngke e nooria bwa e a bon tia n oneia ao n tekateka i tabon te kainiwene, ni korakai ni maraki ngke e iangoa kanimwan bwatinin ana kabaraaki. E tekateka Kalleen irarikina. “Tanner,” e taku, “ko koaua bwa ko konamaki n nako n taromauri? Ko bon riai n tiku n te auti ao n rawea motirawam n te bong aei.”
E tabe n taratara aontano. Bon te riikan ngaia. Iai ana kooram. Iai mwiokoana.
“N na riai ni kabuta te toa n te bong aei.”
“Eng, I kakoaua bwa iai temanna ae kona ni karaoa anne ibukim.”
Ao ngkanne e taku ana taeka: “Eng, ma … I noora aron teia aomata ngkana a taraai ngkana I kabuta te toa. I taku bwa a buokaki iai.”
Ngaia are e a buokia Kallen ni kanimwa bwatinin ana kabaraaki ao ni kabaea ana neketai, ao a buti nakon te umwantabu. Iai te bwai ae riki ae moan te kakawaki.
I roko n taromauri man au boowi are mai imwaaina ao ngaia moan te kamiimi ngke I a noora Tanner n tekateka n aia tabo taian riikan. E karaurau n taetae nakoiu Kalleen ni kaota bukin menana ikekei ao te bwai are e a tia n taekinna: “I taku bwa a buokaki iai aomata.”
Ao ngaia are I a mataku ngke a nako n te taibora n toa taian riikan. E raaraa temanna te riikan bwa akea korakorana ngke a anganaki te tuure ni kariki irouia tenaan ibonga. E aeaea waena Tanner ngke e nakon te tabo are e mwiokoaki iai ao e taua ni kamatoa tabon te kaintekatea bwa e na aki mwaing ngke e kabuta te toa.
Titebo ma e a bane n taraaki irouia aomata ake inanon te umwantabu, bwa e taraa ni korakai ngkai e karaoa tabena ae uarereke. N te aro anne iai te reirei ae rau ae reiakinaki rinanon ana mwakuri Tanner, ngkai e karaurau n nakonako man te rinan teuana nakon teuana—e mwaimwai teutana atuuna are e mara—n tei ibukin te Tia Kamaiu n te anga are a karaoia taian riikan. Rabwatana ngkoa n riikan ae korakora e nananga, uruaki, ao n ikoaki, n tauraoi ni korakai ni beku ni uouota kanikinaean ana Mwakuri ni Kamaiu te Tia Kamaiu inanon maiura.
N taraakina n aron ana iango ni kan riki bwa te riikan e karika ae ti iango n ae rang kaokoro naba—taekan te toa, taekan te Tia Kamaiu, ao taekaia riikan ao taan reirei ao ibonga.
I mimi n te kakai ae aki kona n taekinaki are e anganna te ungannano n te ingabong anne ni kaeka man ninikoria ni weteana ae uarereke bwa e na beku, ao ibukin korakoraia ma aia konabwai ara kairake ni kabane aika tabe n rikirake ngkai a uarokoiia ni kaekaa ana wewete te burabeti n riki bwa kaain ana taanga te Atua ao n ira mwakurin te kamaiuaki ao te karietataaki.
Ni katoa tai are e taua tureen te toa te riikan, ti kauringaki te rongorongo ae tabu are te Kabanea ni Katairiki, i Korokota, ao te tabo ni mate n te nne n aroka. Ngke e taetae te Tia Kamaiu nakoia Ana Abotoro, “Kam na karaoa aei bwa kanuringau,”1 E taetae naba rinanon ririki nakoira n tatabemaniia nako. E taekina te kakai are akea tokina are E na katauraoiia n riki bwa riikan ibukin taai aika a na roko, taan reirei, ao ibonga n anga Ana kanikina ao ni kaoiia natina bwa a na butimwaea Ana Mwakuri ni Kamaiu are e anga.
Ni kabane kanikina ibukin te otenanti n te toa e kaira ara iango nakon te bwaintangira anne. Ti iangoa te berena are E tabeutaia teuana te tai—ao te kariki are e tabeutaaki irouia ibonga, n te tai aei. Ti iangoa nanon te ran are e katabuaki, ngkekei ao ngkai, ngke taekan tataro n toa akanne are a nako mai wiia kairake n ibonga nako nanora ao nako karawa, ni kabooui berita are a tomaira nakon mwaakan raoi Kristo ibukin te kamaiuaki. N tain te otenanti n te toa, ti kona ni iangoia bwa tera ae nanonaki ngke te riikan e uota nakoira te kanikina ae tabu, e tei n te tabo are E na tei naba iai Iesu ngke arona bwa E mena ikanne, ni kakao ni kabebetei uotara ao ni kamaoi marakira.
E kakukurei bwa, ataeinimwaane ao ataeinnaine tiaki nanona bwa a na rinanon te aoraki bwa a aonga ni kunea te kimwareirei ao te kantaninga ni beku ibukin te Tia Kamaiu.
E reireiniira Unimwaane David A. Bednar bwa te rikirake ao n riki bwa mitinare bwa, ti riai ni karaoa are a karaoia mitinare, ao ngkanne, “te reirei i aon te reirei ao te tua i aon te tua, … [ti] kona ni karaurau n riki bwa mitinare … n aron are e kantaninga te Tia Kamaiu.”2
Ai arona naba, ngkan ti tangiria “ni kan riki n aron Iesu,”3 ti riai ni karaoa are e karaoia Iesu, ao n teuana te taeka ae kamiimi, e kabwarabwara te Uea bwa tera ae E karaoia: E taku, “Bwa nooria, bon aio au mwakuri ao mimitongiu—ni karekea te aki mamate ao te maiu ae akea tokina ibukin te aomata.”4
Ana mition te Tia Kamaiu n taainako ao n aki toki bon te beku ibukin Tamana man kamaiuakiia natina.
Te kawai ae koaua ni kunea te kimwareirei n te maiu aei ti na raona Kristo man buokakiia tabeman.
Aio te koaua ae bebete are e kaunga te burokuraem ibukiia Ataei ao Kairake.
Waaki ni kakukurei ni kabane ibukiia Ataei ao Kairake ao angareirei bon ibukin buokaia kairake n ataei bwa a na riki n aron Iesu man reitakira ma Ngaia n te mwakuri ibukin te kamaiuaki ao te karietataaki.
Te burokuraem ibukiia Ataei ao Kairake bon te bwai ni mwakuri ni buokiia ataein te Moanrinan n rikirake kanga ana reirei Kristo ao ni karekea te onimaki ae kaonaki n te nonoori n taraia bwa aekakira aron taraakin te kukurei. A kona ni karekea te kantaninga ao ni kariariai tokin kawai ni mwamwanangaa ao kawai ni kairi iaon kawain te berita, ike a na bwabetitoaki ao ni kamatoaki ma ana bwaintituaraoi te Tamnei ae Raoiroi ao n te tai ae waekoa a kaaina te kiraati n te kooram ao Bootaki n Ataeinnaine, ike a na namakina iai te kimwareirei ni buokiia aomata man karaoan ae kanga ana mwakuri ni ibuobuoki Kristo. A na katei aia kouru, aika bubura ao a uarereke, are e na karekea te baeranti nakon maiuia ao ni buokiia n riki n aiaron te Tia Kamaiu. Maungatabu ao Maekatiin, te Rao, ao te Gospel Living app a na buokiia ni kabotoa aia iangoa ni kunean te kimwareirei inanon Kristo. E na iai aia kantaninga ibukin kakabwaia ni kawakinan beeba ni kariaia nakon te tembora aika tianaki taia ao n namakina tamnein Eria rinanon ana kairoro te Tamnei ae Raoiroi ngkai a karekei kakabwaia man te tembora ao rongorongon te utu. A na kairaki man aia kakabwaia iroun te tamanuea. Inanon te tai, a na kona n noriia n nako n te tembora bwa a na kakorakoraaki n te mwaaka, ni kunea te kimwareirei ao n reitaki ma aia utu n akea tokina—ngkoa, ngkai, ao n taai aika a na roko.
Ni kaitara angaibuakan te aoraki ao kangaanga, ni kakoroa nanon bonganan bwanin aia burokuraem Ataei ao Kairake e bon teimatoa ni waaki karaoana—ma e kataweaki. A aki riai ara kairake n tataninga te aonaaba bwa e na kaetia moa ibon irouna imwain ae a na ataa moa te Tia Kamaiu. Tabeman a karaoi babaire ngkai are a na aki kona ni karaoi ngke a bon mataata ni kinakiia raoi—ao Ngaia.
Ao ngaia are te wewete ae katawe man ana tanga ni buaka te Atua n te kataneiai ae moan te kakawaki bwa “ni kabane a na ikarekebai ni mwakuri!”
Tiina ao kaaro, a kainnanoi ngkami natimi mwaane bwa kam na boutokaia ngkai ma nanomi n aron are mai imwaaina ngke a tabeainga ni baika a bebete aroia kanga meetera ao taian biin. Tiina ao kaaro, taan kairiiri n te Nakoanibonga ao te Bootaki n Ataeinnaine, ngkana a rootaki ami kairake, te burokuraem ibukiia Ataei ao Kairake e na kairiia nakon te Tia Kamaiu, ao e na uota te rau te Tia Kamaiu nakoia.5
Kooram ao beretitentii n te kiraati, teirake kakamwakuri ao rinea nnem ae eti n ana mwakuri te Uea.
Bitiobi, kaai ni mwakuri ni kabonganaan kiingin te nakoanibonga ma beretitenti n te kooram, ao am kooram—am uoote—a na bitaki n akea tokina.
Ao ngkami aika te roro ae rikirake, I kakoaua, bwa ngkami bon naati mwaane ao aine aika tangiraki iroun te Atua, ao iai Ana mwakuri ae kona karaoia ibukina.
Ngkai ko kakakoroa nanon nakoam, ma nanom ni kabane, marurungim, am iango, korakoram, ko na uotaki nakon tangiran te Atua ao ni kawakin am berita ao n onimakina Ana nakoanibonga ngkai ko mwakuri ni kakabwaiaia tabeman, ni moanna man oin mweengam.
I tataro bwa ko na uaiakinna, ma taboron korakoram are tau ibukin boong aikai, ni beku, ni kamwakura te onimaki, n rairananom, ao ni katamaroako ni katoa bong, n tau ni karekei kakabwaia man te tembora ao te kimwareirei ae reitinako are e roko tii rinanon ana euangkerio Iesu Kristo. I tataro bwa ko na katauraoiko n riki bwa te mitinare ae mwakuri korakora, te buumwaane ke te buuaine ae kakaonimaki, te karo ao te tina ae tatangira, bwa ko a tia n anganaki te berita bwa n te kabanea n tai ao ko na riki iai nakon are tibwangam man te riki bwa ana reirei Iesu Kristo ni koaua.
Ko bia ibuobuoki ni katauraoa te aonaaba ibukin okin te Tia Kamaiu man kaoakiia aomata ni kabane nakon Kristo ao ni karekei kakabwaia n Ana Mwakuri ni Kamaiu. N aran Iesu Kristo, amen.