Fahsr nuh Met
Orekma luhn Leum fahsr nuh met.
Tamuhlwel ac tahmtahel sacohk, arulacna engan in oasr yuruwos ke kuht muhtwacwacack Toeni Luhlahp ke Alu luhn Jisus Kraist luhn Mwet Luhlahlfongi ke Lwen-sahflah ke Tahfuhn Yac 190. Nga luhngse in wi kowos ke lohm suwos kuhtwena acn ma kowos oasr kac tuhkweni lohng nuh sin pwen luhn mwet pahluh, mwet liyactwen, ac mwet eis fwackyuck ac mwet kol sahyac luhn Alu uh.
Fuhkah tarilacna lasr nuh ke technology ma oruh kuht in tuhkweni ke toeni luhlahp fin facluh luhn mwet lutlut luhn Jisus Kraist. Toeni luhlahp Eprel tari ah tuh liyeyuck sin mwet pucs liki kuhtwena met, ac kuht nuhnkuh muh ac sifilpac sikyak ohinge.
Nuh ke mahlwem inge, mas upac, e fihrihr yohk, ac ongaiyac sahyac tuh ahkfohsye facluh. Nga tuhng yuruwos kwewa suc misac mwet kowos luhngse. Ac nga pruhe sin mwet nohfohn suc kweok ingena.
Tuhsruhktuh, orekma luhn Leum srackna fahsr nuh met. Finne kuht enenuh in fahsreni, kosrwaclah inwacluhsr, toeni ke Zoom, kuht etwaclah in oruh ma siena ac kuht ma wo liki met. Pacl siena kuh in us mwe insewowo siena.
Misinacri lasr ac mwet kol luhn misin tuh suhmaht, insacnweacng, ac wo nuh pwacye. Finne misinacri uh enenuh in konwacack inkacnek sasuc, suhmaht in oruh orekma lalos, puhkantwen misin fahk muh elos luti yohk liki na met.
Oasr tempuhl ma kauli ke kuhtuh pacl, ac kuhtuh muhsahiyuckyak luhn tempuhl kohtlac, tuhsruhk ma nuhkwewa fahsr nuh met. Ke yac 2020, kuht ac muhtwacwacack muhsahiyuck luhn tempuhl 20 sasuc.
Orekma ke sramsram mahtuh luhn sucu yohkwelihk. Ward ac stek sasuc oreklac. Ac kuht kuloh in fahk muh Alu uh sang kuhfa in kahsruh nuh sin orekma 895 ke muhtwacn facl 150.
Yohkwelihk luhn lutlutkihn wosasuc ke lohm oruh in luhlahlfongi yohk ac sucu fokoko. Sie ninac el tuh suhmuhslah: “Kuht puhla fototo nuh sin tuhlihk nahtuhsr ac nuhtin nahtuhsr ke srihpen kuh tuhkweni ke Zoom Sacnri nuhkwewa. Kais sie eis pacl lal in fahk nuhnak lalos ke Fahsruh, Fahsr Tukuk. Pruhe ke mwet luhn sucu lasr eklac ke srihpen kuh kahlwem ma elos enenuh.”
Nga pruhe tuh kuht oacna mwet se orekmakihn pacl siena se in kapwack in nguhn. Kuht oasr fin facluh in srihkeyuck, in liye lah kuht fin ukwe Jisus Kraist, in auliyak, etwaclah, ac in kapwack. Nguhn lasr kena in kapwack. Ac kuh oruh wo emet ke kuht oasr ke inkacnek luhn olwelah.
Nuh ke ma inge, ac Pahpah tuhmasr Inkuhsrao ac Wen Nahtuhl, Jisus Kraist, luhngse kuht! Elos karihngihn kuht! Elos ac lipufacn Lalos liyekuhtyang. 1 Nga etuh ma inge pwacye.
Ke kuht tuhkweni lohng kahs ma Leum El moklweack mwet kuhlwacnsap Lal in fahk, nga suli kowos in motko ke olwelah ma Leum El oraclah. El fahk muh “kuhtwena mwet suc luhngse ac kuh in sruokyac na kahs luhn God, ma sa ac fokoko, ma fah srwaclihk kwewa kuhtasrihk … kikiacp luhn devil, ac kohllah mwet luhn Kraist ke sie inkacnek suwohs ac ohsrihksrihk.” 2
Nga pruhe tuh kowos fah sulaclah in sruok kahs luhn God oacna sulkackihnyuck ke toeni luhlahp se inge. Ac nga pruhe lah kowos kuh in puhla luhngse suwohs luhn Leum nuh suwos, 3 ke ine muhtahl luhn Jisus Kraist, amen.