Soposopono non Nuku
Ua afeiochu kemi ren kinamwe me wattenon nuku non ewe Samon.
Pwi me fefninei mi acheingicheing, ren ach sia tori nesoponon ei mwichenap mi amwarar, sia apasa ach kinisou ngeni ewe Samon. Ekkewe kon ra echipwer me ekkewe porous mi ammefen.
Atun ei mwichenap, sia fen weri chommong mettoch mi auchea. Non ei achechemen 200 ier, sia fen awora eu esinesin ngeni ewe fonufan minne a affata ewe ennetin ewe Niwinsefaniton ewe kapas allimen Jises Kraist non unus.
Sia asufonu ewe Niwinsefanito ren ewe Puchorun Hosanna.
Sia pwari ew minafon esisin mi esisina ach nuku non ewe Samon Jises Kraist me epwe pwarano porousen me pisekin Mwichefen mi kapunguno.
Sia fen tingor ew ranin echikipin me iotek non fonufan, pwe ewe semwen non fonufan epwe aukuk, chon aninis repwe tumun, pekin moni epwe pochokununo, me manau epwe niwinsefan ngeni nonnomun. Ei echikipin epwe fis non Animu mwen Paska, April 10. Iwe iei epwe eu Animu mi amwarar!
Non nan Raninfel epwe Raninfelin Paska, nupwen sipwe pwan asufonu sefan ewe Achasefan me Manausefanin ach Samon Jises Kraist. Pokiten An Achasefan, An niffangen manausefan epwe fis ngeni meinisin mi fen manau. Me An niffangen manau esemuch epwe fis meinisin mi fich ngeni pokiten ar nukuchar ngeni angangepin me pwon mi pin ra fori non An tempel mi pin.
Ekkewe chommong emmefenin pekin ei April 2020 mwichenapen mwichefen—me ewe wik mi pin iei a poputan—ra tongeni achufengen non ekkei kapas seni nang: “Ausening ngeni I.” 1 Sia iotek pwe ami ekieki usun Samach won Nang, ewe a apasa ekkenan kapas, me won Noun we, Jises Kraist, epwe kon auchea non ami chechemeni met a fen fis. Sia iotek pwe oupwe poputa sefan ne ennetin rongorong, ausenging, me apwonueta met ewe Chon Amanau a apasa. 2 Ua pwon pwe kukkuno nuokus me napeno nuku epwe epwe tapweto.
Kinisou ren ami mochen fori imwemi repwe ennetin neenien tumunun nuku, ikewe ewe Ngunun ewe Samon epwe nonnom. Ach sukunen kaeo kapas allim, Feito, Tapweto Mwiri, epwe soposopono ne efeiochu manauemi. Ami ettures ne achocho—pwan non ekkewe fansoun nupwen oupwe mefi pwe ouse fetanoch—epwe siwini manauemi, manauen ami famini, me ewe fonufan. Sipwe pochokununo nupwen sia winiti chon kuno mi pwaracho noun ewe Samon, ne penni I me kapas fan itan, ian chok sipwe nom ia.
Iei, sipwe kapas usun tempel. Mi wor 168 tempel mi epinipinino non ewe fonufan. Ekkoch ir mi chok nom kinikinin akokkot me foruta. Nupwen kokkotun ach sipwe kauta eu tempel mi fo a esinesin, a winiti eu kinikinin ach uruo mi pin.
Menin epwe sokkono ach sipwe esinesin minafon tempel nupwen meinisin ach kewe tempel ir mi kesip.
Nap seni ipuku ier a no, Preseten Wilford Woodruff a osini usun nonnomuch, usun mi mak non an we iotekin epinipinin ewe Salt Lake Tempel, a fis non 1893. Ekkoch me nein menin oua fen kuna ekkoch kinikinin an ei iotek mi amwarar me won social media.
Rongorong ekkei tingor me ren emon soufoosun Kot mi pechekun: “Nupwen noum aramas resap tufichin tonong non ei imw mi pin … me ra riaffou me nom non osukosuk, pwennino ren weires … me repwe akunnu meser ngeni Imwom ei me tingorek fan iten ngaseno, fan iten aninis, fan iten Om manaman epwe torir, aua sio Ngonuk, kopwe nenetiw seni Neniom mi pin non uomoumoch … me ausening ngeni ar kechiw. Ika nupwen semiriten Noum aramas, non ekkan ier repwe feito, repwe keimuno, seni ei neni, ren och popun, … me repwe kechiw ngonuk seni anonnonen ar weires me riaffoun om kopwe ngenir ngaseno, aua tekison ne tingor En kopwe … ausenging ar kechiw, me mut ngenir ewe feioch ra tingor.” 3
Pwi me fefinei, atun ach riaffou nupwen tempel ra kesip, ami mi tongeni aea manamanen ami kewe pwonen tempel me endowment nupwen ami mi asamonu ami pwon mi pin. Ouse mochen oupwe aea ei fansoun nupwen ekkewe tempel mi kesip ne sopweno ne manau mi fich ngeni tempel ika winiti mi nimenimoch ngeni tempel.
Kapas usun ewe tempel ngeni ami famini me chiechiemi. Pokiten Jises Kraist mi nom nukanapen mettoch meinisin sia fori non ewe tempel, nupwen oua ekiek usun ewe tempel oupwene ekiek usun I. Kaeo me iotek pwe oupwe sinei usun ewe manaman me mirit minne oua fen feioch ren—are oupwe fen feioch ren.
Ikenai sia pwapwa ne esinesin usun kokkotun foruta wanu minafo temple non ekkei neni: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; and Shanghai, People’s Republic of China.
Non ekkewe wanu neni meinisin, chon kokkotuni imwen ewe Mwichefen repwe angang ren chon angangen ekkewe neni pwe ekkewe temple repwe eu iwmen ning ne fiti nenier kewe.
Ewe kokkotun eu temple non Dubai a fiis pokiten ewe etiwa mi kirekireoch, minne sia esinna ren kinisou.
Weweitin ewe kokkot ren Shanghai a men auchea. Ren nap seni rue ier, chon nimenimoch ne tongong non ewe temple non ewe People‘s Republic of China ra tonong non ewe Hong Kong China Temple. Nge non July 2019, ewe temple a kesip fan iten angangen foresefani mi fen kokkot fan chommong.
Non Shanghai, eu ochun imwen sokkopaten popun epwe atufichi ngeni chon mwichefen non China ne sopweno ne fiti non ekkewe angangepinen ewe temple—non ewe People’s Republic of China—fan iter me ar kewe neuo. 4
Non fonu meinisin, ewe Mwichefen a aiti an kewe memper ne asofunit, anneasochisi me apechekuna ewe annukun muun. 5 Sia aiti ewe auchean ewe famini, chon tumunuochun semerit me chon fonu mi och. Pokiten sia asofuniti ekkewe annuk me nongonongen ewe People’s Republic of China, ewe Mwichefen ese tinano missionari mi afanafan ngeni ia; are sisap fori iei.
Mwichen chon Expatriate me China repwe sopweno ne mwichefesen. Ewe napanapen ewe Mwichefen won pekin muun ese mwo siwin. Non akkaewin aean ewe imw, tufichin tonong epwe ren kokkot akkom chok. Ewe imwen ewe Samon non Shanghai esap eu neni minne chon wasona seni ekkoch fonu repwe tongeni feino ngeni.
Ekkei wanu minafon tempel repwe efeiochu manauen chommong aramas ekkewe mi manau me mi mano. Tempel ir auchean kinikinin ewe Niwinsefaniton ewe unusochun ewe kapas allimen Jises Kraist. Non an Kot umoumoch me kirkiroch, I a wato efeiochun tempel arap ngeni Noun kewe ekis meinisin.
Ren ewe Niwinsefanito mi soposopono, Ngang mi sinei pwe Kot epwe sopweno ne pwarano chommong mettoch mi amwarar me auchea fan asengesin An muu won fonufan. 6 Ena muu iei Ewe Mwichefenin Jises Kraist ren Aramas mi Pin non Fansoun Soponon.
Achengicheng pwi me fefinei, ua pwarata ai tong ngenikemi. Atun ei fansoun noninen me fatangaw, me upwe aea ewe mumuta mi nom rei, ua mochen wata womi ew feiochun aposel.
Ua afeiochu kemi ren kinamwe me wattenon nuku non ewe Samon. 7
Ua efeiochu kemi pwe oupwe mochen aier me winiti usun I iteiten ran. 8
Ua efeiochu kemi pwe oupwe sinei pwe Soufos Joseph Smith in ewe soufosun ewe Niwinsefaniton ewe kapas allimen Jises Kraist non unusen.
Ika epwe wor semwen neimi me atongemi kewe, ua watiw ew efeiochun chikar, epwe nonno ngeni mochenin ewe Samon.
Ua efeiochu kemi, apachata sefan ai tong ren emon me emon ami, non ewe it mi pin iten Jises Kraist, amen.