Chufengen ne Awesi an Kot Angang
Ewe an a kon mwitir mokutun ach sipwe awesi wisach kewe mi auchea, sipwe angang fengen, efeioch seni manamanen ewe mumutan ewe pristut.
Achengichen pwi me mongeei mi auchea, uwa fokkun chengen ai nonnom remi Ika ian ka na ouwa rongorong me ian, ua tinano ai mochen turufukemino pwi kewe non pei me kapongen won kumuch fiti memefin netipei ngeni mongeei kewe. Sia fiti ewe angangen Kot mi Napanap.
Nupwen sia ekiek usun Adam me Eve, napengeni sia akkom ekieki usun unusochun manauer non ewe Atake Eden. Ua ekieki pwe mi ranoch fansoun meinisin—ese kon pwichikar me ese kon pat—me chommong, foun ira mi anno me chon ira ra mar unukur pwe repwe chok mwongo met chok ra sani. Pokiten a ew minafon fonufan ngenir, a chommong met repwe kuna, iwe iteiten ran mi emeseik nupwen ra nom ren ekkewe man me katon nenier mi ning. Ra pwan angei annuk repwe aneasochisi me a sokkono aanen ar fori ekkenan ourour, minne a efisata noninen me osukosuk.1 Nge nupwen met ra finata a siwini manauer feinfeino, ra kaeo ne angang fengen me achufengen ne awesi ekkewe popun Kot a awora fan iter—me fan iten Noun semirit.
Iei oupwe anchangei pwan ei chok pea non manauer won fonufan. Ra angang fan iten aner, ekkoch ekkewe man ra ekieki ir pwe mwongo, me mi wor osukosuk mi weires ra tongeni chok awesi ika ra ourour me iotek fengen. Ua ekieki pwe mi wor ekkoch fansoun a sokkono ar ekiek ren ifa usun repwe awesi ekkenan osukosuk. Nge, ren ewe Turutiw, ra kaeo pwe mi auchea ar repwe mokutukut non tipew me tong. Non ar kaeo seni Kot, ra kaeo ewe kokkoten amanau me ekkewe nongonongen ewe kapas allimen Jises Kraist minne ra fori ena kokkot epwe tufich. Pokiten ir mi weweiti pwe ar kewe popun won fonufan me met repwe angang ngeni mi chok nonnofengen, ra menemenoch me fetanoch ne kaeo ar repwe angang fengen non tong me wenechar.
Nupwen ra oupwatiw semirit, Adam me Eve ra aiti ar famini met ra fen kaeo seni chon kuno seni nang. Ra achocho ne anisi nour kewe ar repwe pwan weweiti me etiwa ekkenan nongonong minne repwe fori ar repwe pwapwa non ei manau, pwan amoneta ar repwe niwin ngeni semer me iner non nang mwirin ar tufich a napeno me ar aneasochis ngeni Kot. Non ena mwokutukut, Adam me Eve ra kaeo ar repwe aucheani sokofesenin ar pochokun me aninis fengen non ar angang mi auchea.2
Nupwen pukuen ier me ngeroun ier ea feitto me no, an mwan me fefin aninis seni nang me anongonong fengen a ngaweno ren porous mi muan me wewengaw. Non fansoun nefinen ena nepoputan mi amwarar non ewe Ataken Eden me iei, ewe chon koum a fen fetanoch non an mochen ne eimufeseni mwan me fefin non an achocho ne akkufu ngunuch. Lucifer mi sinei pwe ika i mi tongeni atai ewe chufengen an mwan me fefin ra mefi, ika mi tongeni aosukosuka kich usun aucheach me wisach ren ach kewe pwon mi pin, i epwe fetanoch ne atai famini, minne ir repwe chok ew feinfeino.
Setan a pesei ne anonnofengen pwe ew pisek epwe awora memefin nap seni ika kis seni emon, a opano ewe ennet pwe wesetan sokkonon mwan me fefin ra feito seni Kot me ir me ru mi auchea. A sotuni ne ekisatiw an fefin aninis ngeni ewe famini me neni, ina minne a akukunatiw ar murinon ourour. An mochen pwe epwe pesei ew fiu fan iten nemenem nap seni ew apwapwan sokonon aninis an mwan me fefin minne ir mi achiechi fengen me aninis ngeni etipew.
Iwe, non ekkewe ier me non unusen fonufan, weweochun ewe anongonong fengen nge sokofesenin anins me wisen fefin me mwan a moreno. Fefin non chommong mwichen aramas ra winiti chon aneasochisi mwan nap seni ar repwe chiechi fengen, ar mwokutukut ra aukuk. Fefeita non pekin ngun a mangeno non ekkenan fansoun rochopwak; enntin, kukkun saram non pekin ngun a tongeni tonong non ekiek me netip mi uren oreni ne nemenem.
Iwe mwirin ewe saramen ewe kapas allim mi niwinsefan a sarameno “nap seni saramen ewe akkar”3 nupwen Kot ewe Sam me Noun we, Jises Kraist, ra pwato ren ewe at Joseph Smith non ewe fansoun uwan me chon ira ra pichiu non 1890 non ena nenien ira mi pin non upstate New York. Ena nemasepwi a poputani chommongun pwarata seni nang. Ewe mumutan ewe pristut an Kot ina ew me nein akkomwen kinikinin an Kraist we wesetan Mwichefen epwe niwinsefan. Nupwen ewe Niwinsefanito a soposopono ne pwano, mwan me fefin ra poputa ne esinna sefan auchean me tufichin angang fengen, mumuta me emwen non ei angang mi pin me ren I.
Non 1842, nupwen ekkewe fefin non ewe Mwichefen mi keran chok poputan ra mochen forata ew mwich ne aninis non ewe angang, Preseten Joseph Smith a mefi ourour pwe epwe etettenir “fan ewe pristut mwirin tettenin ewe pristut.”4 A apasa, “Iei ua ngeni kemi ewe mumuta non iten Kot …—iei ewe nepoputan ekkewe ran mi murino.”5 Me seni ewe fansoun ena mumuta a kun, tufichin sukun, kofomen, me moni fan iten fefin a poputa ne wakateno non unusen fonufan.6
An ewe Mwichefen ei minafon mwich fan iten fefin, itan Fin Anisi, a sokkono seni ekkoch mwichen fefin pokiten a foruta me ren emon soufos ewe a foffor ren ewe mumutan pristut an epwe ngeni fefin ewe mumuta, wis mi pin, me wisen non tettenin ewe Mwichefen, nge esap keimuseni.7
Seni an ewe Soufos Joseph Smith fansoun ngeni ach, ewe niwinsefanito mi soposopono ren mettoch meinisin a wato mirit usun auchean ewe mumuta me pochokunen ewe pristut ne anisi mwan me fefin ne awesi wiser seni nang. Akkarapeto chok sia kaeo pwe fefin mi ewis fan emwenien emon mi kamwoch ekkewe kiien ewe pristut ra angang ren mumutan pristut non wiser kewe.8
Non October 2019, Preseten Russell M. Nelson a afanafana pwe fefin mi endow non ewe tempel a wor rer manamanen pristut non manauer me non imwer ika repwe aneasochisi ekkewe pwon mi pin ra fori ren Kot.9 A awewei pwe ekkewe “nang mi fokkun suuk ngeni fefin ekkewe rafen endowed ren an Kot manaman mi feito seni ar pwon mi pin non ewe pristut usun chok ekkewe mwan ekkewe ra angei ewe pristut.” Me a pesei fefin meinisin ar “repwe aea an ewe Chon Amanau we manaman ne anisi ar famini me ekkewe ka tonger.”10
Iwe met wewen ngonuk me ngang? Ifa usun ach weweiti mumutan pristut me manaman a siwini manauach? Ew me nein ekkewe ki ina ach sipwe weweiti pwe nupwen fefin me mwan ra angang fengen11sia awesi chommong nap seni angang fesen. Wisach mi wewe fengen resap okkuf fengen. Inamo ika fefin rese epinipin ngeni wisen pristut, usun mi affat akkom, fefin ra feioch ren manamanen pristut nupwen ra apwonueta ar pwon mi pin, me ra angang ren ewe pristut nupwen ra ewis ngeni ew wis.
Non ew ningochun ran non August, a wor rei ewe tufich ai upwe momot ren Preseten Russell M. Nelson non imwen Joseph me Emma Smith we mi forsefan non Harmony, Pennsylvania, arap ngeni ikewe ewe Pristut seni Aaron a niwinsefan non ei fansoun. Non am aporous, Preseten Nelson a kapas usun auchean wisen fefin me non ewe Niwinsefanito.
President Nelson:Ew me nein ekkewe mettoch mi auchea ua chemeni nupwen ua feito ren ei neenien Niwinsefaniton ewe Pristut ina ewe auchean wis fefin ra fori non ewe Niwinsefanito.
“Nupwen Joseph a keran poputan ne chiakuni ewe Puken Mormon, ion a wisen mak? Iwe, i a fori ekis, nge esap unusen. Emma a aninis.
“Iwe mwirin ua ekieki an Joseph feinno nein ekkewe ira an epwe iotek arap ngeni imwer non Palmyra, New York. Ian a no ia? A feinno nein ekkewe Ira mi Pin. Pwata a feinno ikewe? Pokiten ikena ie inan we a no ia nupwen a mochen iotek.
“Ir chok ruomon me nein ekkewe fefin a wor auchean wiser me non ewe Niwinsefaniton ewe Pristut me non Niwinsefaniton ewe Mwichefen. Ese wor tipemwaramwar, kich mi tongeni apasa pwe punuwach kewe ir mi pwan auchea ikenai usur chok me nom. Ewer, ir mi auchea.”
Usun Emma me Lucy me Joseph, sia angangoch nupwen sia mochen kaeo fengen me sia chufengen non ach mochen winiti chon kunon Jises Kraist me anisi ekkoch won ena aan.
Sia kaeo pwe “pristut a efeiochu manauen noun Kot non chommong napanap. … Non wis non [Mwichefen] angangepin non tempel, nefinen famini, me mosonosonen, an emon iamwiri, fefin me mwan Souneng Non Fansoun Soponon ra angang ren manamanen me mumutan pristut. Ewe anongonong fengen an mwan me fefin ne awesi an Kot angang ren An manaman ina ionapen ewe kapas allimen Jises Kraist mi niwinsefan me ren ewe Soufos Joseph Smith.”12
Tipeew mi auchea ngeni ewe angang mi pin sia tufich me kokko ngeni ne fori, nge esap chok fisita. Epwe wor angang me fansoun ne ennetin ourour fengen—ne ausenging fengen, weweiti an ekkoch ekiek, me aporousa memef—nge ewe foffor a punguno ren finioch mi pung. Ika wisach non imw are non Mwichefen, ewe aan mi kon murino ne apwonueta tufichich seni nang ina ach sipwe angang fengen, feioch me ren ewe manaman me mumutan An pristut non wisach mi sokkono nge ir mi wewe fengen.
Met usun nikinikin ena chiechi fengen non manaueni fefin pwon ikenai? Upwe ngeni kemi ew awewe.
Alison me John a wor ar ewe chiechi fengen mi ew chok sokkun. Ra fiti efoch pasiken mi ru mwotun ne emmis ne samwoch me samwoch. An epwe tufich ar repwe okkuf won ena wa, ekkewe ruemon chon fiti repwe angechur. Repwe chok nonnopok ne pereinging ngeni epek non ewe fansoun mi fich. Ewe emon esap nemeni ewe pwan emon, nge repwe porous fengen non fatafatochun ar repwe en me fori wisan. Ewe kaptin, a nom mwen, a nemeni inet repwe pureiki me inet repwe uta. Ewe emon, a nom mwirin, mi auchea epwe attonaochu met a fis me epwe mwoneta an epwe apochokuna ika ra ekis mangeno are apwetete ika ra kon arap ngeni pwan ekkoch chon pasiken. Repwe aninis fengen ar repwe fetanoch me tikeri met ra mochen.
Alison a awewei: “Nepoputan we, ewe emon non neenien ewe kaptin epwe apasa ‘Uta’ nupwen mi auchea aupwe uta me ‘Pureiki’ nupwen mi auchea aupwe kouno ne pwupwu. Mwirin ekkoch fansoun, ewe emon chon mwirin a kaeo an epwe esinna inet ewe kaptin epwene apasa uta ika pureiki, ese namot epwe chiwen kapas. Am oua kaeo am oupwe esinna ifa usun emon me emon me inet emon a pekus me [mwirin] ewe pwan emon epwe anganga met ewe emon ese tongeni. A wesen usun apinukunuk me angang fengen.”13
John me Alison rese chok chufengen ne pwupwu war we pasiken, nge ir mi pwan etipew non ar pupunu. Emon me emon ir a mochen ewe emon epwe pwapwa nap seni i; ra kutta ochun emon me emon ir me anganga ne ochueno met mi auchea non manauer epwe ochuno. Ra ekkesiwin ne emwen me ekkesiwin ne angang weires nupwen ewe emon a pekus. Ra aucheani an emon me emon aninis me kuna penuwochun ar osukosuk nupwen ra ochufengeni ar sinei me pisek. Ir mi ennetin ririfengen ren ewe tongen Kraist.
Ach sipwe esinna ewe tettenin angang fengen non tipeew mi auchea non ei ranin porousen “ngang akkom” mi pwennikich. Mi wor ren fefin niffang seni nang, mi sokkono,14 me a kawor ngenir wis, nge rese nap—are kis—auchear seni niffangen me wisen mwan. Meinisin ir mi foruta me ir mi auchea ne efisata an Samach won Nang kokkot ar repwe epwe ngeni Noun semirit ewe tufich ne apwonueta tufichir.
Ikenai, “mi auchea ngenikich fefin ekkewe mi wor ar pwaracho me mirit usun Inach Eve”15 ne chufengen ren mwongeer ne wato aramas ren Kraist.16 Mi auchea pwe mwan repwe ennetin chiechier nap seni ar ekieki pwe ina wiser ika pwomeni ir “tiptipin” chiener nupwen ekkewe fefin ra awesi ewe angang. Mi auchea an fefin repwe tipemecheres ne “feino mwer [me] angei [nenier] pusin me auchea”17 ussun chiechi nap seni ar ekieki pwe repwe fori mettoch meinisin won winikaper ika witi emon epwe urenir met repwe fori.18
Ach ekieki pwe fefin ir chon aninis mi auchea esap wewen ach forata “nonnofengen” nge usun ach weweiti nongonong mi ennet. Nap seni ach sipwe forata ew prokram an epwe efisata ena, sia tongeni angang ne aucheani fefin usun Kot mi aucheanir: pwe ir chiechi auchea non ewe angangen amanau me fefeita.
Sia monneta? Met sipwe achocho ne akkufu orenien nifinifin nge sipwe fen etiwa ekkewe tetten me oreni mi anongonong won nongonongen annuk? Preseten Russell M. Nelson a tingorei kich ne “angang fengen non ei angang mi pin … [ne] anisi amonata ewe fonufan ren ewe Aruwen Wareton ewe Samon.”19 Nupwen sipwe fori, sipwe kaeo ne aucheani an emon me emon aninis me anapano ochun met epwe apwonueta wisach mi pin. Sipwe mefi pwapwa mi watte nap seni sia fen mefi akkom.
Amwo emon me emon kich sipwe achufengen non aanen ewe Samon ne anisi An angang epwe soposopono. Non iten ach achengicheng Chon Amanau, Jises Kraist, amen.