Lako Mai mo Okati
Keimami sa sureti ira kece na luve ni Kalou e vuravura taucoko mera mai tomani keda ena sasaga cecere oqo.
Kemuni na taciqu kei na ganequ, kei na itokani lomani, ena veimacawa, o ira na lewe ni Lotu i Jisu Karisito ni Yalododonu Edaidai e vuravura raraba era qarava na Tamada Vakalomalagi lomani, na Kalou ka Tui ni vuravura, kei na Luvena Daulomani, o Jisu Karisito. Eda tugana na bula kei na ivakavuvuli i Jisu Karisito—na tamata duadua ga e bula voli sa sega ni cala, na Lami ni Kalou sa savasava sara. Ena veigauna e rawa kina, eda sa taura na sakaramede meda vakananuma kina na Nona solibula ka kila ni o Koya sa usutu ni noda bula.
Eda sa lomani Koya ka dokai Koya. Ena vuku ni Nona loloma levu ka tawamudu, a vakararawataki ka mate me baleti iko kei au. A dolava laivi na matamata ni mate, vorolaka na bai a tawasei ira tu na itokani kei ira na daulomani,1 ka kauta mai na inuinui vei ira sa sega nodra inuinui, vakabulai ira na tauvimate, ka vueti ira na vesuki tu.2
Ki Vua eda sa solia na yaloda, noda bula, kei na noda sokalou e veisiga. Ena vuku ni ka oqo, “eda sa veivosakitaki Karisito, eda reki ena vukui Karisito, eda vunautaki Karisito … me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.”3
Cakacakataka na Bula Vakatisaipeli
Ia, ni da sa tisaipeli i Jisu Karisito sa oka kina vakalevu cake mai na noda tukuna ka vunautaki Karisito wale tiko ga. Na iVakabula Vakai Koya a vakalesua mai na Nona Lotu me vukei keda ena salatu meda rawa ni vakataki Koya. Na Lotu i Jisu Karisito ni Yalododonu Edaidai sa tuvanaki me vakarautaka na veimadigi me vakayacori kina na veika bibi ni bula vakatisaipeli. Mai na noda vakaitavi ena Lotu, eda vulica meda kila ka cakacaka ena veivakauqeti ni Yalo Tabu. Eda vakatorocaketaka na ivakarau meda lako yani ena yalololoma kei na lomavinaka kivei ira na tamata.
Oqo e dua na sasaga ni gauna taucoko ni bula, ka gadrevi me caka tikoga.
O ira na dauqito qaqa era vakayagataka e vuqa na auwa mera cakava tikoga na gacagaca bibi ni nodra qito. O ira na nasi, daunineti, idinia ni nukilia, vakakina o au na daunivakasaqa qaqa ena valenikana nei Harriet sa mai gugumatua ka kila-ka walega ni keimami cakacakataka tikoga na neimami taledi.
Niu pailate ni waqavuka, au dau vakavulici ira na pailate ena noqu vakayagataka na simuleita—e dua na misini vereverea e vakatotomuria na vuka. Na simuleita e sega walega ni vukei ira na pailate mera vulica na veika bibi ni vuka; sa vakatara talega mera sotava ka cakacakataka na leqa tubukoso era rawa ni sotava ena gauna era na vukataka dina tiko e dua na waqavuka dina.
Sa tautauvata vakakina na ivakavuvuli oqo vei ira na tisaipeli i Jisu Karisito.
Ni da vakaitavi vagumatua ena Lotu i Jisu Karisito kei na kena veimadigi duidui cecere ena vukei keda meda vakavakarau vinaka cake baleta na veisau ni bula, se cava ga e yaco mai. Oi keda na lewe ni Lotu, eda sa vakayaloqaqataki meda tabadromuci keda ena vosa ni Kalou maivei ira na Nona parofita, ni gauna makawa kei na siga nikua. Ena masu ena yalodina kei na yalomalumalumu vua na Tamada Vakalomalagi, eda sa vulica meda kila rawa na domo ni Yalo Tabu. Eda sa ciqoma na veikacivi meda cakacaka yani, veivakavulici, tuvatuva, veiqaravi, ka veiliutaki. Na veimadigi oqo sa rawa kina meda tubu cake ena yaloda, vakasama, kei na itovo.
Era na vukei keda meda vakavakarau meda cakava ka maroroya na veiyalayalati tabu ena vakalougatataki keda ena bula oqo kei na bula sa tarava mai.
Mai, Tomani Keimami!
Keimami sa sureti ira kece na luve ni Kalou e vuravura taucoko mera mai tomani keda ena sasaga cecere oqo. Lako mai ka raica! Ena gauna veibolei mada ga oqo ni coronavirus, meda sota ga ena onolaini. Sotavi ira na neimami daukaulotu ena onolaini. Mai raica sara ga vakai iko na cava e cakava tiko na Lotu oqo! Ena gauna sa sivi kina na veigauna dredre oqo, ni gole mai neimami itikotiko kei na neimami vanua ni sokalou!
Keimami sa sureti kemuni mo ni gole mai ka mai veivuke. Lako mai ka veiqaravi vata kei keimami, na veiqaravi vei ira na luve ni Kalou, ka muria na we ni yava ni iVakabula, ka cakava na vuravura oqo me vanua vinaka cake.
Lako mai mo okati! O na vakaukauwataki keimami cake. Ena qai yaco mo vinaka cake, yalovinaka cake, ka marau vakalevu cake talega. Ena titobu sara na nomu vakabauta ka gugumatua cake—ka rawata mo vorata na veitubuyaki kei na veivakatovolei tawakilai ni bula oqo.
Mo na qai tekivu vakacava? E levu tu na kena sala dodonu.
Keimami sa sureti kemuni mo ni wilika na iVola i Momani. Ke sega vei iko e dua na kena ilavelave, sa rawa mo wilika ena ChurchofJesusChrist.org4 se katona ena app ni iVola i Momani. Na iVola i Momani sa dua tale na ivakadinadina i Jisu Karisito ka sa itokani ni Veiyalayalati Makawa kei na ka Vou. Eda sa taleitaki ira na ivolanikalou tabu oqo ka vuli mai kina.
Keimami sa veisureti mo ni taura e so na gauna ena ComeuntoChrist.org mo ni kunea kina na veika era sa vakavulica ka vakabauta tiko na lewe ni Lotu.
Sureti ira na daukaulotu mera sikovi kemuni ena onolaini se vakatikitiki ena nomuni itikotiko ke rawa—sa tu vei ira na itukutuku ni inuinui kei na veivakabulai. O ira na daukaulotu oqo era sa luvei keimami tagane kei na yalewa vakasakiti era sa veiqaravi tiko ena vuqa na vanua e vuravura raraba ena nodra dui gauna kei na ilavo.
Ena Lotu i Jisu Karisito, o na kunea kina e dua na vuvale tamata era sa sega soti ni duidui maivei kemuni. O na kunei ira na tamata era gadreva tu na nomu veivuke ka ra gadreva mera vukei iko ni ko sasaga tiko mo yacova nomu vinaka taucoko—na tamata a bulia na Kalou mo mai vakataka.
Na Veikaroni ni iVakabula sa Nodra na Tamata Kecega.
O na rairai vakasamataka tiko, “Au sa caka cala ena noqu bula. Au sega mada ni vakadeitaka niu na rawa ni vakila niu sa okati tu ena Lotu i Jisu Karisito. E sega ni rawa vua na Kalou me via taleitaka e dua e vakataki au.”
E dina ni o Jisu Karisito, sa “Tui ni tui,”5 na Mesaia, na Luve ni Kalou bula,”6 sa karona vakabibi sara na luvena yadua kece na Kalou. E kauwai mai se cava ga na ituvaki ni dua na tamata—dravudravua se vutuniyau, valavala ca se kilikili kaya. Ena Nona bula e vuravura, a veiqaravi na iVakabula ki na tamata kecega: vei ira na bula marau ka rawa-ka, vei ira na rarawa kei na yali, kei ira sa sega na nodra inuinui. Sa vakavuqa, o ira na tamata a veiqaravi kina ka liutaka o Koya era sega tu ni kilai, totoka, se vutuniyau. Vakavuqa, o ira sa laveta cake o Koya e sega na ka mera dolea mai ia ena vakavinavinaka ga, ena yalomalua, kei na gagadre mera bula vakabauta.
Kevaka a vakayagataka o Jisu na Nona bula eke ena veiqaravi vei ira “sa lailai oqo,”7 ena sega beka ni lomani ira nikua? E sega beka e dua na vanua ena Nona Lotu me baleti ira kece na luve ni Kalou? O ira mada ga era vakila ni ra tawayaga, guilecavi, se galili?
E sega na iyalayala ni vinaka sara mo na rawata mo rawata kina na loloma soliwale ni Kalou. Na nomu masu e sega ni gadrevi me rogo levu se matata se tuvanaki matau me rawa ni yaco ki lomalagi.
Na ka dina, na Kalou e sega ni vakamareqeta ga e dua8—na veika sa vakasakita o vuravura sa sega ni vakaibalebale Vua. E kila o Koya na yalomu, ka sa lomani iko se cava ga na nomu itutu, ilavo o taukena tu, se iwiliwili era muria mai na Instagram.
Ni da sa vagolea yani na yaloda vua na Tamada Vakalomalagi ka toro voleka Vua, eda na vakila ni sa toro voleka mai vei keda.9
Eda sa Luvena lomani kece sara.
Sa vakakina o ira sa cati Koya
O ira mada ga, sa vaka na gone walitolito, ka cidroi, era sa cudruva na Kalou kei na Nona Lotu, era sa tawana nodra beqi, ka curu i tuba vakasauri ka kaya ni ra sa dro yani ka sega tale ni lesu mai.
Ni dua na gone sa dro mai vale, ena sega ni raica o koya na nodra kauwai na itubutubu era rai tiko yani e katubaleka. Ena yalo malumalumu, era raici ira na luvedra tagane se yalewa ni ra sa lako—ka ra nuitaka tiko ni luvedra vakamareqeti ena vulica e dua na ka mai na ka vakamosi yalo oqo ka rairai raica na bula ena dua na mata vou—ka yaco mera lesu rawa tale i vale.
Sa vakakina oqo vua na Tamada Vakalomalagi. Sa wawa tiko o Koya meda lesu mai.
Na nomu iVakabula, ena wai ni matana dauloloma kei na yalololoma, sa waraka nomu lesu mai. Ena gauna mada ga o vakila kina ni ko sa yawa mai vua na Kalou, ena raici iko o Koya; ena yalololoma vei iko o Koya ka na cici yani me mokoti iko.10
Lako mai mo okati.
Sa Vakatara na Kalou Meda Vuli mai na Noda Caka Cala
Eda sa dauveilakoyaki ena salatu ni bula oqo ena vaqasaqara na ibalebale ni bula kei na dina cecere. Vakavuqa, eda sa dau raica tu ga na sala sa tu e matada e liu—eda sega ni raica rawa na igole e na sala ena mua kivei. Na Tamada Vakalomalagi e sega ni solia vei keda na isaunitaro kece. Sa namaki keda meda sasagataka ga e vuqa na ka baleti keda. Sa namaki keda meda vakabauta—ena gauna mada ga ni dredre me caka.
Sa namaki keda meda vakatudonutaka na tabada ka tauyavutaka e dua na iwali—e dua na suitu lailai—ka kalawa tale yani ki liu.
Oqori na sala eda sa vuli kina ka tubu.
O na vinakata dina beka me voci vakavudi vei iko na veika kece? O na gadreva dina beka me saumi na taro kecega? Sa mapetaki oti na icavacava yadua?
Au vakabauta ni vuqa vei keda ena wawale koso vakatotolo me baleta na veiliutaki matailalai vakalomalagi vakaoqo. Eda sa vulica na lesoni bibi ni bula oqo mai na veika eda sotava. Mai na noda vuli mai na noda caka cala. Mai na veivutuni kei na kila vakai keda ni “ivalavala ca sa sega ni bula marau.”11
O Jisu Karisito, na Luve ni Kalou, a mate me kakua ni rawai keda na noda caka cala ka tarova vakadua na noda tubu cake. Ena vukuna, sa rawa meda veivutuni, ka yaco na noda caka cala me ikakalawa ki na reki e cecere sara.
E sega ni gadrevi mo lako duadua ena sala oqo. Sa sega ni laivi keda na Tamada Vakalomalagi meda cumuwaqara ena butobuto.
Oqo na vuna, ena vula itubutubu ni 1820, a rairai mai o Koya kei na Luvena, o Jisu Karisito, ki vua e dua na cauravou, o Josefa Simici.
Vakasamataka mada vakalailai oya! Na Kalou ni vuravura taucoko sa rairai vua na tamata!
Oqo e a isevu ni vuqa na ka a sotava o Josefa vata kei na Kalou kei ira eso tale na kai lomalagi. E vuqa na vosa era cavuta o ira na tamata vakalou oqo ki vua era sa volai tu ena ivolanikalou ni Lotu i Jisu Karisito ni Yalododonu Edaidai. E rawarawa ni ra tauri. Sa rawa vua e dua me wilika ka vuli mai kina na itukutuku ni Kalou sa solia mai vei keda nikua.
Keimami sa sureti kemuni mo ni vulica vakai kemuni.
A se cauravou sara o Josefa Simici ena gauna a ciqoma kina na ivakatakila oqo. E vuqa vei ira a yaco mai ni se bera mada ga ni yabaki 30.12 A sega vua na kila, ka vei so na tamata, era rairai kaya ni sega soti ni vuli vinaka me parofita ni Turaga.
Ia e kacivi koya ga kina na Turaga—ni vakamuri tiko e dua na iwalewale eda kunea ena ivolanikalou.
Na Kalou a sega ni waraka e dua na tamata uasivi sara me vakalesua mai na kosipeli.
Ke a cakava, se wawa tiko beka ga oqo.
O Josefa a vakataki iko ga kei au. E dina ni a caka cala, a vakayagataki koya na Kalou me vakayacora rawa na Nona inaki cecere.
Sa dau tukuna wasoma o Peresitedi Thomas S. Monson na vosa ni ivakasala oqo: “O koya sa kaciva na Turaga, sa lesi koya na Turaga.”13
Na iApositolo o Paula a vakasalataki ira na Yalododonu e Korinica: “Ni dou sa raica, na veiwekani, na kena ivalavala ni nomudou kacivi; ni sa sega ni lewevuqa era sa vuku vakayago; sa sega ni lewe vuqa era sa kaukauwa; sa sega ni lewevuqa era sa turaga me sa kacivi.”14
Na Kalou sa vakayagataki ira sa malumalumu kei ira na tamata wale me ra cakava na Nona inaki. Na dina oqo sa tu me ivakadinadina ni oqo sa kaukauwa ni Kalou, sega ni mai vua na tamata, sa caka rawa kina na Nona cakacaka e vuravura.15
Rogoci Koya, Muri Koya
Ena gauna a rairai kina na Kalou kivei Josefa Simici, a vakatakilai Luvena, o Jisu Karisito, ka kaya, “Mo rogoci Koya.”16
A vakayagataka o Josefa na vo ni nona gauna ni bula ena rogoci Koya ka muri Koya.
Me vakataki Josefa, na noda bula vakatisaipeli sa tekivu ena lewa meda rogoca ka muria na iVakabula o Jisu Karisito.
Kevaka o sa gadreva mo muri Koya, vakacokotaka nomu vakabauta ka taura vei iko na Nona kauveilatai.
O na raica ni ko sa oka tu ena Nona Lotu—e dua na vanua vinaka ka veikaroni e rawa mo lewena ena sasaga cecere ni bula vakatisaipeli kei na marau.
Sa noqu inuinui ena gauna ni yabaki rua na drau oqo ni iMatai ni Raivotu, eda na vakasamataka ka vulica kina na Vakalesui Mai ni Lotu i Jisu Karisito, eda na kila kina ni sa sega walega ni dua na itukutuku ni veigauna. O iko kei au daru sa tiki bibi ni italanoa cecere oqo, sa tomani tiko ga.
Sa qai cava beka, na nodaru itavi?
Sai koya meda vuli vei Jisu Karisito. Meda sa vulica na Nona vosa. Meda sa rogoca ka muri Koya ena noda vakaitavi vagumatua ena cakacaka cecere oqo. Au sa veisureti mo ni gole mai ka mai oka kina!.
E sega ni tukuni mo vinaka sara. Ena gadrevi ga me tiko na nomu gagadre mo vakatorocaketaka na nomu vakabauta ka toro voleka Vua ena veisiga.
Sa noda itavi meda lomana ka qarava na Turaga ka lomana ka qaravi ira na luve ni Kalou.
Ni ko cakava oqo, ena ovici iko na Kalou ena Nona loloma, reki, kei na veidusimaki eso ena bula oqo, ena gauna mada ga ni veika dredre sara, kei na kena e tarava.
Au sa vakadinadinataka oqo kau sa solia vei kemuni na noqu veivakalougatataki ena vakavinavinaka titobu kei na loloma vei kemuni yadua, ena yaca i Jisu Karisito, emeni.