Mma Ndaadaa Me
Ber a yɛyɛ setsie ma Nyame ne mbrasɛm no, aber nyina wobegya hɛn akɔ kwan tɔɔtsen no do na wɔnnkedaadaa hɛn.
Ndɛ, medze afotusɛm ma obiara, mbom nkaanka hom ebusuasantsen a wɔreba no—Primary mbofra, young men, na young womenfo. Ewuradze no nkɔnhyɛnyi ma hɛn nda yi, President Russell M. Nelson, dɔ hom papaapa—ara ma ɔakasa akyerɛ hom mu dodow mfeda wɔ wiadze nyina mu mbabun mpaabɔsom a wɔbɔɔ no dawur, a ne dzin dze “Israel Enyidado.”1 Yɛtaa tse President Nelson dɛ ɔrefrɛ hom dɛmara—“Israel enyidado” no, na Jesus Christ N’Asɔr wɔdze asan ananmu aba no ne ndaamba.
M’anyɛnkofo nkakraba, mepɛ dɛ mekyɛ ebusua mu nsɛm ebien bi, dze hyɛ ase.
Dalmatianyi a Ɔtɔdo 102 no
Mfe pii abɛsen kɔ no, mifi edwuma mu dur fie no, ɔyɛɛ me ahobow dɛ muhun ka ho edur fufuw a ɔayeyɛ beebiara—famu, garage abow no ho—na hɛn mbrekese dan kɔkɔɔ no ho. Mohwɛɛ no yie na muhun dɛ ka ho edur no nnwowee. Edur anamɔn no tsenee kɔr dan n’ekyir ntsi mekãa do. Hɔ no, muhun me mfe-enum babanyin no a edur no brɔsoo dze ne nsamu na ɔtaa hɛn bɔdɔm no do. Nna hɛn Labrador tutum fɛfɛw no ne fã ayeyɛ fufuw!
“Ebɛnadze na ereyɛ yi?” Medze ndze hyew bisae.
Me ba no gyae, ɔhwɛɛ me, hwɛɛ bɔdɔm no, hwɛɛ edur brɔsoo no a ka ho edur fi do rososɔ no, na ɔkãa dɛ, “Mepɛ dɛ ɔyɛ dɛ bɔdɔm tutum nsisii no a ɔwɔ sene no mu no, inyim, kor a ɔka Dalmatiafo a wɔtɔdo 101 [ɔha na baako] no.
Modɔ hɛn bɔdɔm no. Modween dɛ odzi mu, mbom dɛm da no nna me ba banyin no wɔ adwen fofor.
Nsensanee Egyinambowa Ba
Asɛm a odzi do fa me Nanakansowa Grover ho a ɔtse fie bi a ɔwɔ ekurase bi a, ɔmmbɛn kuropɔn no. Nna Uncle ayɛ panyin papaapa. Yɛdwen ho dɛ hɛn mba mbanyin nhyia no ansaana oewu. Ntsi, ewiaber bi, yetuu kaar twaa kwan tsentsen kɔr no suaba hɔ. Yɛbɔɔ mu tsenaa ase nye no dzii nkɔmbɔ na yɛnye hɛn mba no kyerɛɛ no. Yɛammbɔ nkɔmbɔ annkyɛr na hɛn mbanyimba beenu yi, w’enya bɛyɛ mfe enum na esia, pɛɛ dɛ wɔkɔ abowano kedzi agor.
Uncle Grover, tsee hɔn ebisadze no, ɔbɔɔ ne tsir adze a n’enyim bɛɛn hɔn dze. Nna n’enyim awow ara yie na mbofra no nnyim no yie ntsi, nna wosuro no kakra. Ɔkãa kyerɛ hɔn, ɔabɔ ne ndze adze no dɛ, “Hom nhwɛ yie—skunk pii wɔ hɔ. Yɛtsee iyi no, emi na Lesa hɛn akoma tui mbordo, yesuoroo dɛ skunk bi bopuw bɔr egu hɔn do. Annkyɛr na mbanyimba no kɔr abowano dɛ wɔrekedzi agor na yɛsɔɔw hɛn nkɔmbɔdzi no do.
Ekyir no, ber yɛtse kaar mu rokɔ fie no, mebisaa mbanyimba no “Ana hom hun skunk bi a? Hɔn mu ɔbaako buaa dɛ, “Oho, yennhu skunk biara, mbom yehun egyinamowa tuntum kakraba a nsensanee fufuw wɔ n’ekyir.
Ɔdaadaafo Kɛse no
Nsɛm yinom fa mbofra a wonnyim hwee a woruhu biribi afa abrabɔ na dza ɔwɔ hɔ a ɔma yɛyerɛw hɛn ano, naaso wɔkyerɛ hɛn dza ɔyɛ hu ara yie.
Hɛn asɛm a odzi kan mu no, nna hɛn babanyin kakraba no wɔ bɔdɔm fɛɛfɛw a ɔnye no dzi agor; naaso ɔtaam ka ho edur gallam na, brɔsoo dze ne nsamu no, a ɔayɛɛ n’adwen dɛ ɔbɛyɛ dza oesusu ho no.
Asɛm ɔtɔ do ebien mu no, nna mbanyimba no nnyim enyanyandze a wohyia skunk a obotum aba. Wonnyim dza wohyiae ankasa ntsi, nna esian biara botum ato hɔn. Nsɛm yinom fa innyim dza ehyia ho—erodwen dɛ dza ihu ampaara no yɛ adze fofor bi. Ebien ne nyina mu no, nna nsunsuando no yɛ kakrabaa.
Naaso, ndɛ dodowara nye dɛm nsɛm yinom ara dze aper wɔ kwan kɛse do. Wonntum nnhu mbrɛ ndzɛmba tse ankasa, anaa nokwar no mmee hɔn. Nhyɛdo tum horow yi regyam ndɛ a wɔagye enyim awen no dɛ obegya hɛn efi nokwar pefee no ho. Ndaadaa na atorsɛm yinom tra yɛbɔfom dɛ yennyim biribi yie na ɔtaa dɛ nsunsuando no nnyɛ kakraba, mbom mbusu kɛse a.
Satan, ator nyina egya no, ɔdaadaafo kɛse no, bɛpɛ dɛ yenya nsɛmbisa wɔ mbrɛ ndzɛmba tse ho anaa yebu enyi gu onnyiewiei nokwar do anaa wɔdze dza ɔyɛ dɛ ɔyɛ enyisɔ ara yie sesã. “Ɔnye Nyankopɔn n’ahotseweefo kõe”2 na ɔahwer mfe petsepeepee ayɛ ho nhyehyɛɛ na ɔawea ho wɔ kwan a ɔdze tu Nyame mba aso ma wɔgye dzi dɛ papa yɛ bɔn na bɔn yɛ papa.
Ɔagye dzin ama ho dɛ otum tu ɔnnkyebofo hɔn aso dɛ skunk yɛ ngyinambowa ara anaa dɛ edze ka ho edur a ibotum asesã Labrador ma ɔabɛyɛ Dalmatianyi!
Afei hom ma yɛndan nkɔ nkyerɛkyerɛ iyi ara do a yebohu no wɔ kyerɛwsɛm mu ber a Ewuradze no nkɔnhyɛnyi Moses hyiaa asɛm iyi ara bi enyim na enyim no. “Wohwiim Moses kɔr bepɔw tsentsenntsen bi do[;] … ohun Nyame enyim na enyim, na ɔnye no kasae.”3 Nyankopɔn kyerɛkyerɛɛ Moses faa ne onnyiewiei su ho. Kansa Moses yɛ ɔnnkyebo na onndzi mu mpo a, Nyankopɔn kyerɛkyerɛɛ Moses dɛ ɔyɛ “nyia me Woo no Kotoo no ne saso, na nyia me Woo no Kotoo no na ɔbɛyɛ Agyenkwa no.”4
Yerutwa no sin, enyido-adzehu nwanwa yi mu no Moses hun Nyankopɔn, na osũaa biribi so a ohia papaapa a ɔfa noho, dɛ ampara ɔyɛ Nyame ne ba.
Tsie no yie dza osii ber a enyido-adzehu nwanwa yi twae no. “Na ɔbaa dɛ Satan bae bɔsɔɔ no hwɛe “rese dɛ, “Moses, nyimpa, ba som me!”5 Akokodur mu ara Moses buaa dɛ: Ɔwonye woana? Na hwɛ, meyɛ Nyame, ne ba na mesɛ nyia Ɔwoo no Kortoo no no; na w’enyimnyam wɔ hen a ɔwɔ dɛ mosom wo?”6
Yɛrekã a, Moses see dɛ, “Irunntum ndaadaa me, osiandɛ minyim me nyimpa ban. Wɔbɔɔ me wɔ Nyankopɔn no su do. Ɔwo nnyi Ne kan na enyimnyam no. Ntsi dɛn ntsi na ɔsɛ dɛ mosom wo anaa motɔ wo ndaadaa efir mu?”
Afei hom ntsie no yie mbrɛ Moses kɔ do ma mbuae. Ɔpaa mu kã dɛ, “Fi ha fi, Satan; mma ndaadaa me.7
Pii na yebotum esũa efi Moses no mbuae ndamyɛ mu ma abɔnsam no nsɔhwɛ no. Moto nsa frɛ wo dɛ bua wɔ dɛm kwan noara do sɛ etse nsɔhwɛ ne nhyɛdo ho nkã a. Kã dɛ: “Fi ha fi!” fa hyɛ wo kra ne tamfo no. Ɔwo nnyi enyimnyam biara. Nnsɔ me nnhwɛ anaa nndzi me ator! Osiandɛ minyim dɛ meyɛ Nyame ne ba. Na me bɛfrɛ me Nyame aber nyina agye No mboa.”
Naaso, otsĩafo nngyaa n’adwenbɔn no a ɔdze daadaa hɛn na obu hɛn enyimtsia no ara kwa. Na oenngyaa Moses so dɛmara, mbom ɔpɛ dɛ ɔbɛma no werɛ efir ne daapem nyimpa ban no.
Na tse dɛ ma abofra rekakamu gyangyan no, “Satan dze ndze kɛse tsẽatsẽaa mu wɔ asaase no do, na ɔhyɛɛ dɛ: Emi nye nyia a Wɔwoo no Kotoo no no, som me.”8
Hom mma yɛmbobɔ do. Ana hom tsee dza sesei ɔkãe? “Emi nye nyia a Wɔwoo no Kotoo no no Som me!”
Nnhaw woho; merennyɛ wo hwee—mennyɛ skunk; meyɛ egyinambowa tuntum na fufuw a onnyim hwee.
Nkyii Moses frɛɛ Nyame na onyaa No sor ahoɔdzen. Abɔnsam noho popoe na asaase wosowee mpo a, Moses annyɛ. Nna ne ndze pefee a ɔnnsesã. Ɔpaa mu kãa dɛ, “Fi me nkyɛn fi Satan, osiandɛ Nyame kor yi nko na mobɔsom no, nyia ɔyɛ enyimnyam Nyame no.”9
Ewiei no, “ofii Moses n’enyim kɔree.”10
Ewuradze puei na Ohyiraa Moses wɔ ne setsie ho no, Ewuradze see dɛ:
“Nhyira akã wo, Moses, … na wɔbɛma woho ayɛ dzen sen esu pii. …
“Na hwɛ, menye wo wɔ hɔ, kesi wo nkwa nda ewiei mpo.”11
Mbrɛ Moses sii gyinaa pintsinn wɔ abɔnsam enyim no yɛ mfatoho nkenyan ara yie ma hɛn mu kor biara, a hɛn abrabɔ mu gyinabew mmfa ho. Ɔyɛ nsɛm a ɔyɛ ndam ma wo ankorankor—dɛ ibohu dza ɔyɛ dɛ eyɛ sɛ ɔyɛ dɛ ɔrebɛdaadaa wo a. Ɔwo, tse dɛ Moses no, wɔdze ɔsor mboa ho akyɛdze ehyira wo.
Mbrasɛm na Nhyira
Ibesi dɛn benya ɔsor mboa yi, tse dɛ ma Moses nyae no mpo, na wɔannkɛdaadaa wo anaa ebɛma nsɔhwɛ kwan? Wosii kwan pefee a ɔsor mboa bodua do no pi wɔ berano yi, ber a Ewuradze Nankasa paa mu kãa dɛ: “Dɛm ntsi, emi Ewuradze, a minyim mbusu a ɔbɛba adasamba a wɔwɔ asaase do no ntsi, mefrɛɛ m’akowaa Joseph Smith, Kakraba, na mekasaa kyerɛɛ no fir sor, na memaa no mbrasɛm.”12 Yerutwa no sin a, yebotum akã dɛ Ewuradze a, Onyim “ewiei fi ahyɛse” no,13 nyim nkõdzen soronko a ɔwɔ hɛn da yi mu. Dɛm ntsi, Ɔama hɛn kwan a yebodua do egyina etsia ɔhaw na nsɔhwɛ horow, a dodowara dua abɔnsam ne ndaadaa na no ntoabɔ no nsunsuando pɔkyee ba.
Kwan no nnyɛ kyinkyinɛnn. Nyame dua N’asomfo do nye hɛn, Ne mba, kasa, na Ɔma hɛn mbrasɛm. Yebotum akã dɛm nyiyimu no sesei meserae kãe no dɛ “Emi, Ewuradze, mafrɛ mo somfo [President Russel M. Nelson], na mekasaa kyerɛɛ no fi sor, na memaa no mbrasɛm.” Ana ɔno nnyɛ nokwar a ɔyɛ enyimnyam?
Megye dase nokwar mu dɛ Ewuradze nye Joseph Smith kasaa fi sor ampa, dze Enyido-adzehu a Odzi Kan nwanwa no rehyɛ ase. Ɔkasa kyerɛ President Nelson so wɔ hɛn mber yi mu. Megye dase dɛ Nyame nye tsetseber do nkɔnhyɛfo kasae na ɔmaa hɔn mbrasɛm a wɔawen no dɛ obegya Ne mba akɔ enyigye wɔ abrabɔ yi mu na enyimnyam wɔ dza ɔreba no mu.
Nyame kɔ do dze mbrasɛm ma hɛn nkɔnhyɛnyi tseasefo no ndɛ. Mfatoho pii wɔ hɔ—asɛmpa adzesua a wɔyɛ no fie a Asɔr ma ho abamba; erosom abɛsesã fie akyerɛkyerɛ na visiting teaching, nsakyer wɔ temple nhyehyɛɛ na ayɛdze horow mu, na Mbofra na Mbabun nhyehyɛɛ no. Hɛn Ɔsor Egya dɔfo na Ne Ba, Jesus Christ, a Ɔdze Agyenkwa N’Asɔr nsan ananmu aba asaase yi do bio na Wɔafrɛ nkɔnhyɛnyi wɔ hɛn nda yi mu no, Hɔn papayɛ na ayamuhyehye no yɛ me nwanwa. Jesus Christ asɛmpa Nsanananmu no sesã awerɛhow mber dze amayɛ mber si ananmu.
Emumuyɛdze Nnyɛ Enyigyedze Ara Da
Setsie ma mbrasɛm a wɔdze ama hɛn nkɔnhyɛnyi nye adze tsitsir nko a ɔma yekwetsir ɔdaadaafo ne ndaadaa na nhyɛdo bɔn no mbom ɔma yenya daapem enyigye na dɛwdzi. Ɔsor nhyehyɛɛ no nnyɛ kyinkyinɛnn: tseneneeyɛ, anaa setsie ma mbrasɛm no, dze nhyira ba, na nhyira dze enyigye, anaa dɛwdzi, ba hɛn abrabɔ mu.
Naaso, wɔ kwan noara do a abɔnsam bɔɔ mbɔdzen dɛ ɔbɛdaadaa Moses no, ɔrohwehwɛ adaadaa wo. Oepetuw daa dɛ ɔyɛ adze bi a ɔnnyɛ. Daa ɔbɔ mbɔdzen dɛ ɔdze no su ankasa besie. Ɔkã dɛ setsie bɛma w’abrabɔ ayɛ awerɛhow na dɛ ɔbɛgye w’enyigye efi hɔ.
Ana ibotum adwen n’akwan horow a ɔdze daadaa? Mfatoho, ɔdze ɔsɛɛ nsunsuando a ɔwɔ ndur bɔn na nsãnom mu no suma na mbom osusu dɛ ɔdze enyigye bɛba. Ɔdze hɛn hyɛ ndzɛmba bɔn ahorow a obotum aba abaefo social media do, a ntõtõho a ɔnnhyɛ nkuran na ahopɔw mbordo kã ho. Bio so, ɔkata sum na ɔsɛɛ ndzɛmba ahorow a ɔwɔ abaefo internet do, tse dɛ ehuhuw mfonyin, internet do ntoabɔ na nsisi, nsɛnhun a ɔdze ekyingye na suro hyɛ akoma na hɛn adwen mu. Nyansa kwan do no ɔwasa ndaadaa dɛ, “Hom nka mo do ara, na hom benya ahomka ampara.”
Nsɛm bi a wɔakyerɛɛw no wɔ Mormon Nwoma no mu mfe ɔha pii abɛsen kɔ no, ho hia ara yie ma hɛn nda yi mu: Emumuyɛdze nnyɛ enyigyedze ara da.”14 Nkyɛ yeetum ehu Satan ne ndaadaa horow yie. Yengyina na yenhu atorsɛm na onyia ɔrohwehwɛ asɛɛ hɛn akra na oewia efi hɛn hɔ hɛn ndɛ enyigye na ndaamba enyimnyam no.
Mo nuanom na me nkyerɛbaa adɔfo, otwar dɛ yɛkɔ do yɛ nokwafo na hɛn enyidahɔ, osiandɛ ɔno nko nye kwan a yɛdze bohu nokwar no na yedua N’asomfo mu yɛatse Ewuradze ne ndze. “Osiandɛ Sunsum no kã nokwar no na onndzi ator. … Wɔada ndzɛmba yi edzi akyerɛ hɛn pefee, wɔ hɛn akra no nkwagye ntsi. … Osiandɛ Nyankopɔn kãa ho nsɛm so kyerɛɛ tsetseberdo nkɔnhyɛfo no.”15 Yɛyɛ Tumfo Nyankopɔn n’ahotseweefo, Israel enyidado no. Ana yɛbɔfom? “Yɛbɛsan anaa yeboguan ɔkõ no? Oho! Nyame ne mbrasɛm, na yɛdze ɔkra, akoma, na nsa begyina nokwar mu daapem.”16
Megye me dasee wɔ Israel Krɔnkrɔnnyi no ho—dzin Jesus Christ mpo no. Megye dase wɔ No dɔ a ɔtahye, nokwar na enyigye a ɔnam No ɔmmbɔadze na onnyiewiei afɔrbɔ do yeenya. Ber a yɛyɛ setsie ma Ne mbrasɛm no, wobegya hɛn aber nyina akɔ kwan tɔɔtsen no do na wɔnnkedaadaa hɛn. Wɔ Jesus Christ ne dzin krɔnkrɔn no mu, amen.