Wɔnam Mormon Nwoma no Tum do Hunii
Otwar dɛ hɛn nyina yenya sũahu na nokwar no tum a ɔwɔ Mormon Nwoma no mu no hu hɛn.
Sɛ meserɛ nsakyereefo wɔ hɔn efiefie a, nsɛmbisa no mu kor a metaa pɛ bisa hɔn no nye mbrɛ wɔnye hɔn ebusua ebusua sii sũaa Asɔr no ho asɛm na mbrɛ wosii nyaa hɔn enuma. Ɔmmfa ho sɛ nyimpa a ɔwɔ mu dɛm mber no bɔhyew anaa ɔnnkɔr asɔr mfe pii. Daa nyiano no yɛ kor ara: wɔtsew hɔn enyim ara yie, na wɔhyɛ ase kã mbrɛ wosii hun hɔn ho asɛm. Nokwar, ɔyɛ dɛ nsakyeree asɛm no tse dɛ mbrɛ wosii hun hɛn ho asɛm daa daa.
Jesus Christ Nankasa nye ndzɛmba a wɔayeyew ho Ewuradze. Ndzɛmba a wɔayeyew hia no. Dɛm na siantsir nokwar ara Ɔkyerɛkyerɛɛ mbɛbusɛm ebiasa a yehu no wɔ Luke tsir 15: abɛbusɛm wɔ oguan a ɔayew, kɔɔberba a ɔayew, na ewiei koraa, ɔba dzesɛɛfo ho. Nsɛm horow yinom wɔ ngyinado kor: siantsir a wɔyewee no mmfa ho. Ɔmmfa ho mpo sɛ nna wonyim dɛ wɔayeyew a. Dɛwdzi nkã-tse nhyɛdo bi wɔ hɔ a ɔtsẽa mu dɛ, “Hom nye me ndzi dɛw; osiandɛ meehu [dza] ɔyewee no.’’1 Ewiei no, biribiara nnyew mma No.2
Ewiaber yi, mepɛ dɛ menye hom kyɛ ndzɛmba a wɔsom bo ma me dodow no mu kor—mbrɛ wosii hun marankasa ho asɛm.
Aka kakra ma medzi mfe 15 [duenum] no, me wɔfa Manuel Bustos, too nsa frɛɛ me dɛ me mbra United States ha mbasera ɔno na n’ebusua. Nna iyi bɛyɛ kwan kɛse ama me a medze bosua Borɔfo kasa no bi. Nna mo wɔfa edzi kan asakyer aba Asɔr mfe pii, na nna ɔwɔ asɛmpasomafo sunsum kɛsenara. Ebia iyi ntsi na me maame, nna minnyim hwee no, nye no kasae na ɔkãa dɛ adze kor na obegyina do dze apen ɔfrɛ no do: dɛ ɔrommbɔ mbɔdzen ndzɛfɛwdzɛfɛw me ma memmbɛyɛ n’Asɔrba. Nna yɛyɛ Catholicfo, na ebutsentsen akɔ, na nna siantsir biara nnyi hɔ dɛ yɛsesã. Mo wɔfa peen do koraa na odzii n’asɛm do ara ma dɛ nna ɔmmpɛ dɛ obeyi nsɛmbisa ara mpo ano a ɔfa Asɔr no ho.
Nokwar, nna dza mo wɔfa na ne yer ɔbaa pa, Majorie, nnkotum ekwetsir nye hɔn nyimpa ban a wɔyɛ.3
Wɔmaa me pia a nna nwoma mbuukuu korabea kɛse wɔ mu. Nna mutum hu dɛ Mormon Nwoma nkorkor bɛyɛ 200 [aha ebien] wɔ kasa ahorow mu wɔ hɔ, a hɔn mu 20 [eduonu] wɔ Spanish kasa mu.
Da kor bi, m’asɛmpɛ ntsi, miyii Spanish kasa Mormon Nwoma no no kor.
Nna ɔyɛ kor no a n’ekyir bruu haahar a, ɔbɔfo Moroni mfonyin wɔ n’enyim no bi a. Mubuei no, wɔ krataa a odzi kan do no nna wɔakyerɛw anohoba a odzi do no: “Na ber a hom nsa bɛkã dɛm ndzɛmba yi no, mutu hom fo dɛ hom mbisa Nyankopɔn, Onnyiewiei Egya no wɔ Christ ne dzin mu, dɛ sɛ dɛm ndzɛmba yinom nnyɛ nokwar a; na sɛ hom dze nokwar akoma bisa, pra hom akoma mu, na hom nya gyedzi wɔ Christ no mu a, ɔnam Sunsum Krɔnkrɔn no tum do bɛda nokwar a ɔwɔ mu no edzi akyerɛ hom.
Na afei ɔdze kaa ho dɛ: “Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu.’’4
Ɔyɛ dzen dɛ mebɛkyerɛkyerɛ nsunsuando a kyerɛwsɛm yinom nyaa no wɔ m’adwen na m’akoma do mu. Nokwar, nna moronnhwehwɛ “nokwar no.’’ Nna meyɛ abasirba, n’enyi gye n’abrabɔ ho a, kusum fofor yi yɛ no dɛw.
Naaso, anohoba no da m’adwen do no, nsumaamu ara mehyɛɛ ase kenkan buukuu no. Merekenkan pii no, metsee ase dɛ nokwar ara sɛ mepɛ dɛ minya biribi fi iyi mu a, ɔwɔ dɛ mehyɛ ase bɔ mpaa. Na hɛn nyina nyim dza osi sɛ hom si egyinae dɛ hom rennkenkan nko na mbom hom bɔbɔ mpaa so wɔ Mormon Nwoma no ho a. Nyew, dɛmara na osii mo do Nna ɔyɛ biribi nwanwa na soronko dodow—nyew, dɛmara dɛ dza osii nyimpa ɔpepe do wɔ wiadze mfɛndzanan nyina no. Menam Sunsum Krɔnkrɔn no tum do bohun dɛ Mormon Nwoma no yɛ Nokwar.
Afei mokɔr mo wɔfa hɔ kɛkyerɛkyerɛɛ no dza oesi mu dze kyerɛɛ no na dɛm no mayɛ krado dɛ wonuma me. Mo wɔfa enntum ammfa n’ahobow ennsuma. Ɔkɛtsenaa ne hɛn mu, twuwii kɔr wimuhɛn gyinabea, na afei ɔdze me tsikitsi a medze bɛsan ekyir akɔ fie brɛɛ me, a asɛnsin a me maame ne dzin wɔdo a ɔse no tsiabaa dɛ, “Minnyim iyi ho hwee!’’
Kwan bi mu no nna odzi bem. Mormon Nwoma no tum no ankasa ahwehwɛ me.
Beberee noara wɔ hɔ a wɔnam asɛmpasomafo anwanwafo a wɔwɔ wiadze nyina hɔn do na wɔdze hun hɔn, kor biara no wɔ akwan nwanwa mu. Anaa ebia wɔnam anyɛnkofo a Nyankopɔn hyɛ daa dze hɔn ba hɔn akwan mu do na wɔdze hun hɔn. Obotum mpo ayɛ dɛ obi fi mbasantsen yi mu anaa ɔnam hɔn ewuakɔr mu kor do na wɔdze hun hom.5 Ma ɔtse biara no, ama yɛakɔ kan wɔ ankorankor nokwar nsakyeree ho no, ntsɛmara sen dɛ ɔbɛka ekyir no, otwar dɛ hɔn nyina wonya na wodua nokwar tum a ɔwɔ Mormon Nwoma mu do dze hu hɔn. Ber kor noara no, otwar dɛ wosi ankorankor gyinae dze yɛ enyimpi si a ɔyɛ dzen dɛ wɔbɛper edzi Ne mbrasɛm do.
Mesanee kɔr Buenos Aires no, me maame hun nokwar ara dɛ mepɛ dɛ wonuma me. Osiandɛ nna mowɔ biribi dɛ asowadzen sunsum no ntsi, nkyɛ ɔboko etsia me no, nyansa mu ara odzii m’afã. Na mpo a nna onnyim no, ɔnoara yɛɛ m’enuma mpɛnsapɛnsamu no. Nokwar, nna ne mpɛnsapɛnsamu no mu dɔ kyɛn dza hɛn asɛmpasomafo yɛ no. Ɔkãa kyerɛɛ me dɛ: “Sɛ ipɛ dɛ wonuma wo a, mo bɔboa wo. Mbom odzi kan no mibebisa wo nsɛmbisa bi na mepɛ dɛ edwen ho yie na iyi me ano nokwar mu. Ana igye to wo do dɛ ibɔkɔ asɔr nokwar mu ara Kwesida biara?”
Mekãa kyerɛ no dɛ, “Nyew, ɔyɛ nokwar, mebɛyɛ dɛm.’’
“Ana ewɔ adwen bi wɔ mber tsentsen a wodzi wɔ asɔr a?’’
Mekãa dɛ, “Nyew, minyim.’’
Obuaa dɛ, “Oye, sɛ wonuma wo a, mobɔ hwɛ no pefee dɛ ebɔkɔ.’’ Afei obisaa me dɛ sɛ nokwar ara mowɔ pɛ dɛ monnkɔnom nsãdzen anaa sigyarɛt dabiarada.
Miyii no ano dɛ, “ Nyew ɔyɛ nokwar, mibedzi no so do dɛmara.’’
A ɔdze kãa ho dɛ, “Sɛ wonuma wo a, mobɔhwɛ no pefee dɛ ibedzi do. Na ɔkɔɔr do dɛmara bisaa me asɛm wɔ mbrasɛm biara ho.
Nna mo wɔfa afrɛ me maame dɛ mma ɔnnhaw noho, na ɔnnkɛkyɛr na m’enyi nnkɛgye asɔr noho bio. Mfe anan ekyir no, mber a menyaa me ɔfrɛ dɛ monkɔsom wɔ Uruguay Monevideo Mission no, me maame frɛɛ mo wɔfa bisaa no mber pɛpɛɛpɛ a m’enyi nnkɛgye asɔr no ho bio. Nokwar no nye dɛ ofi mber a wonumaa me no, me maame enya enyigye mbordo.
Mubohun dɛ Mormon Nwoma no yɛɛ ehiadze tsitsir wɔ nsakyeree kwan no mu ber a ahyɛase no obenya anohoba no dɛ “obiara a obedzi no mu nsɛm do no ɔbɛbɛn Nyankopɔn.’’6
Nephi kyerɛkyerɛɛ Mormon Nwoma no botae tsitsir wɔ kwan yi mu dɛ:
“Na yesi nketse kyerɛw dze adandan hɛn mba, na hɛn enuanom so, ma wɔaagye Christ edzi, na wɔaakã hɔn nye Nyame abɔmu. …
“Na [ntsi] yɛkã Christ ho asɛm, yedzi dɛw wɔ Christ mu, yɛbɔ Christ ho asɛmpa no dawur, [na] yɛhyɛ Christ ho nkɔm, … ama hɛn mba eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.”7
Dɛm botae krɔnkrɔn no hyɛ Mormon Nwoma no mu nyina.
Iyi ho siantsir ntsi, ɔkenkanfo biara a ɔdze enyimpi bosũa no nokwar mu, a ɔdze mpaabɔ sunsum no, nnkosũa Christ ho nsɛm nko mbom obosũa efi Christ hɔ—tsitsir ara sɛ wosi egyinae dɛ “wɔdze Nyame no nokwar asɛm no bedzi dwuma’’8 na osian ekyingye ntsi oennyi no annkyen9 a ofi dza binom aka wɔ ndzɛmba a hɔnara wɔnnkenkan ho no da a.
President Russell M. Nelson dwendwen ho dɛ: “Sɛ modwen Mormon Nwoma no ho a, modwen kasafua tum ho. Mormon Nwoma no nokwar no wɔ tum dze sã yarba, dze kyekye werɛ, dze san ananmu, dze boa, dze hyɛ dzen, dze ma akoma tɔ yamu, na ɔma hɛn akra enyi gye.’’10
Me ɔfrɛ ewiaber yi nye dɛ me kyerɛkyerɛ hɛn mu biara, a mber tsentsen a yɛayɛ Asɔrba mmfa ho, nye dɛ yɛmma kwan ma Mormon Nwoma no nokwar ho tum no nhu hɛn na omfua hɛn bio, na dabiara ber a yɛdze enyimia hwehwɛ ankorankor nyikyerɛ. Ɔbɛyɛ hɔ sɛ yɛma ho kwan a.
Megye dase enyidzi mu dɛ Jesus Christ n’asɛmpa ne mãhyɛ wɔ Mormon Nwoma no mu na Sunsum Krɔnkrɔn no besi nokwar ho pi ber biara ama obiara a, ɔdze nokwar akoma, hwehwɛ nyimdzee dze fa hɔn kra no nkwagye ho.11 Jesus Christ ne dzin mu, amen.