Ana Kamaiu te Tia Kamaiu
Ngkana ti Nakoina, e na kamaiuira te Atua, ngkana tao e na kamaiuira ke n anganiira te korakora n tokanikai iaon kaangaanga nako.
Ni kaniia 2,000 te ririki n nako, e ruo mai iaon te maunga te Tia Kamaiu imwiin ana anga reirei iaon Taeka ni Kakabwaia ao tabeua reirein te euangkerio. Ngkai E nakonako, E kawara te mwaane ae aorakina te rebera. Te mwaane e kaota te rau ao te karinerine ngkai e katorobubua imatan Kristo, ni kakaea buokana man karawawatakina. E bebete ana bubuti: “Te Uea, ngkana ko kani kaitiakai, ao ko boni konai.”
Te Tia Kamaiu e arora baina ao, e ringa, ao E taku, “I kani kaitiakiko; ko na itiaki.”1
Ti reiakinaki ikai bwa ara Tia Kamaiu e tangiria ni kakabwaiaira n taainako. Tabeua kakabwaia a roko n te tai ae tawe, tabeua a maan, ao tabeua a na roko imwiin te maiu aei, ma bon iai tain kakabwaia n roko.
N ai aron te rebera, ti kona ni karekea te korakora ao te kabebeteaki n nano n te maiu aei man butimwaean Ana kantaninga ao n ataia ae E tangiria ni kakabwaiaira. Ti kona ni karekea te korakora ni kaitarai kaangaanga nako, n tokanikai iaon kariiri, ao n oota ao teimatoa inanon ara kaangaanga. N te koaua, inanon korakoran karawawatakina n Ana tai ni maiu, mwaakan te Tia Kamaiu n teimatoa e kakorakoraaki ngkai E taku nakon Tamana, “Ke e tauaki am taeka.”2
Te rebera e aki bakaea te bubuti ke n te aro n taumatoa. Ana taeka a kaota te anua ae nanorinano, ma te kantaninga ae korakora ma te nano ae koaua bwa e na karaoaki ana kantaninga te Tia Kamaiu. Aei te banna ni katooto n te anua are ti riai n roko iai nakon Kristo. Ti riai n nakon Kristo ma te kakoaua bwa Nanona bon te bwai ae tamaroa ibukin maiura ae mamate ao akea tokina n te tai aei ao n taainako. Iai ana nonori ibukin te maiu ae akea tokina ae akea iroura. Ti riai n nakon Kristo ma te nano ae koaua bwa a na anaaki ara kantaninga nakon ana kantaninga te Tama, ngkai Ngaia naba.3 Aei e na katauraoira ibukin te maiu ae akea tokina.
E boni kaangaanga iangoan te karawawataki n te rabwata ao n te namakin are e taonaki iai te rebera are e kawara te Tia Kamaiu. Te rebera e roota te ia ao te kun, e karika te taraabuaka ao mwaukun te rabwata. N reitia ma anne, e karika te aki boibuako. Temanna ae rootaki n te rebera e na riai ni kitaniia ana utu ao ni maeka n te tabo ae tionakoman te botanaomata. A aranaki rebera bwa a bareka, n rabwataia ao n tamneia. I bukin aio, ana tua Mote e tangiria bwa rebera ana bwainiia n ae raeuaki ao n takarua ni kangai “Kam’ara!” ngkai a nakonako.4 Ngkai a aoraki ao a ribaki, a maeka rebera n auti aika a uruaki ke te banga ni matang.5 E aki kaangaanga iangoana bwa te rebera are e kawara te Tia Kamaiu e bon rootaki.
N tabetai—n te kawai teuana ke te anga teuana, ngaira naba ti namakina te rootaki, ngkana tao man oin ara mwakuri ke mai irouia tabeman, ni kaeti ma aroaro ake ti kona n taobarai ke ake ti aki kona. N aron te tai aei, ti kona ni katuka ara kantaninga inanon baina.
Tabeua te ririki n nako, Zulma—kainnabau, iterau ae tamaroa—e karekea tabeua te rongorongo ae kananokawaki uoua te wiiki imwaain maren temanna natira. E tibutaua ana tabo ni baware, ao e rikirake ni korakora. E a moanna n tibutaua ubuna, ao e waekoa ni karaoaki te korokoro nakoina. A mwaiti bwaai aika a roko n ana iango ao n tabeaianga nanona iai. E rangi ni kakaiaki te tibutaua aei? E na kanga n oki marurungin rabwatana? E na aki namakinibwai ubuna? A na korakorara aron te maraki? E na tiku te mwakamwaka iaon ubuna? E na manga oki te tibutaua ngkana e a tia ni koreaki? E na kona n ira maren natira te mwaane? Ngkai e wene n te ruu ni korokoro, e bon rootaki.
Inanon te tai ae rangi ni kakawaki anne, e wirikiriki te Tamnei nakoina bwa e riai ni butimwaea ana kantaninga te Uea. Ngkanne e baireia bwa e na katuka ana onimaki iroun te Atua. E korakora ana namakina bwa tera baika a na riki, Ana kantaninga bon te bwai ae tamaroa ibukina. E waekoa n raraunako ni matu n tain te korokoro.
Imwiina, e koroboki inanon ana taearii: “Iaon te taibora ni korokoro I bobaraki Imatam, ao n anga ngai nakon Am kantaninga, I namakinna bwa I a matu nako. I ataia I kona n Onimakinna, n ataia bwa akea te bwai ae buakaka ae roko mai Irouna.”
E kunea te korakora ao te kabebeteaki n nano man kataenikaian ana kantaninga nakon te Tama. N te bong anne, e korakora kakabwaiakina iroun te Atua.
Tera nako kaangaanga ake ti mena inanona, ti kona ni kamwakura ara onimaki n nakon Kristo ao ni kunea te Atua are ti kona n onimakinna. Ngkai temanna natiu , Gabriel, e koroboki tetaina:
Ni kaineti ma ae taku te burabeti, e ota matan te Atua n ai aron tai
ao e mainaina iranatuna ae ai aron te tino
ao bwanaana e bekorara n ai aron karongoan bwaron te karanga,
ao ni kabotauaki ma Ngaia akea manen te aomata. …
I rawawata ngkai I kunea bwa ngai naba akea manenau.
Ao ngkanne I a kunea kawaiu nakon te atua ae I kona n onimakinna.
Ao ngkanne I kunea bwa bon tii te Atua ae I kona n onimakinna.6
Te Atua are ti kona n omakinna e anga te kantaninga inanon kaangaanga nako. Ti kona n Onimakinna ibukina bwa E tangiriira ao n atai bwaai ni kabane.
Te rebera e kawara Kristo bwa e korakora te kantaninga. Akea buokana ae e anganna te aonaaba, akea naba kabebetean nanona. Ngaia are, bebeten ana ririing te Tia Kamaiu titebo ma te ririing ae nimamannei nako nanon tamneina ni kabane. Ti kona n iangoa namakinan ana kakaitau te rebera ae e karekea n ana ririing te Tia Kamaiu, ai moarara riki ngke e ongo te taeka “I kani kaitiakiko, ko na itiaki.”
E kaotaki n te karaki bwa “e a rina naba n toki reberana.”7
Ngaira naba ti kona n namakina bain te Tia Kamaiu n ririing, ao ni kamaiu. Bon te kimwareirei, te kantaninga, ao te kakaitau are a roko nakon tamneira n ataakina bwa E tangiria ni kaitiakiira! Ngkana ti Nakoina, e na kamaiuira te Atua, ngkana tao e na kamaiuira ke n anganiira te korakora n tokanikai iaon kaangaanga nako.
N aki katabeaki ma te bwai teuana, butimwaean Ana kantaninga—tiaki oin ara kantaninga—e na buokiira n atai ara kaangaanga. Akea te bwai ae buakaka ae roko mairoun te Atua. E ataa te bwai ae tamaroa ibukira. Tao E na bon aki kanakoi uotara n te tai ae waekoa. N tabetai E kona ni kabebetei uota akanne, n aron are E karaoia nakon Aramwa ao ana aomata.8 N tokin te tai, ibukin berita aika tabu, e na kabebeteaki te uota,9 tao n te maiu aei ke n te Maungauti ae tabu.
Te nano ae koaua are e na karaoaki Ana kantaninga, n raonaki ma ataakin rikin ara Tia Kamaiura ae mai iroun te Atua, e buokiira ni kakorakora te aekaki n onimaki are e kaotia te rebera bwa e aonga ni kaitiakaki. Iesu Kristo bon te Atua n tangira, te Atua ibukin te kantaninga, te Atua ibukin te kamaiu, te Atua are e tangira ni kakabwaiaira ao ni buokiira ni kaitiakiira. Anne ae E tangiria imwaain rokona n te aonaaba aei ngke E anga nanona bwa e na kamaiuira ngkana ti bwaka n riaon te tua. Anne ae E tangiria i Ketetemwane ngke E kaitara ma te maraki ae aki kona ni kabwarabwaraki n ana tai ni karawawataki ibukin boon ara bure. Anne te bwai ae E tangiria ngkai ngke E bubuti ibukira imatan te Tama.10 Anne bukina ngka E teimatoa n anga ana kakao: “Bane mai nako Iu, ngkami akana kam kua ao kam rawawata, ao N na motiki rawami.”11
E kona n kamaururngiira ao n tabekira rake ibukina bwa iai Ana konaa ni karaoia. E na uota Iaona marakin ni kabane te rabwata ao te tamnei bwa e na on nanona n te nanoanga bwa e aonga ni kona ni buokiira ni bwaai ni kabane ao ni kamarurungira ao n tabekira rake.12 Ana taeka Itaia, ae taekinaki iroun Abinataai, e anga n ae tamaroa ao n ringa te nano:
“E koaua bwa e a tia ni a korakai ibukin kairuara, ma n uouti rawawatara. …
“… Ma e a kaikoakaki ibukin riaoan tua iroura, ma ni maraki ibukin ara kairua; ao e na reke raura man te kangaanga are e rinanona; ao ti kamaiuaki man ikoakina.”13
Te iango ae ti te arona e taekinaki n te boem aei:
“O te Kabenta mai Natareta,
Te nano aei, ae uruaki n aki kona ni karaoaki,
Te maiu aei, e kamaerikirikiaki nakon te mate,
O, Ko kona ni kanakoraoia, te Kabenta?”
Ao man baina n akoi ae tauraoi,
Oin maiuna ae e renganaki
Ma maiura aika a uruaki, ni karokoa a riki
Te Karikibwai ae Boou—“bwaai ni kabane a boou.”
“Uruakin [te] kantaninga n [te] nano,
Te ingainga, iango, kantaninga, ao te onimaki,
Kakororaoaki n arona nako,
O, te Kabenta mai Natareta!”14
Ngkana ko namakinna bwa ko aki itiaki n aanga nako, ngkana ko namakina bwa ko rootaki, taiaoka ataia bwa ko kona ni kaitiakaki, ibukina bwa E tangiriko. Onimakinna bwa akea te bwai ae buakaka ae roko mai Irouna.
Ibukina bwa E “rinanon ae korakora riki ni bwaai ni kabane,”15 E karaoa te anga are bwaai ni kabane ake a uruaki inanon maiura a na kanakoraoaki, ao n aron ae ti kona ni kaiokaki ma te Atua. E nakoina bwai ni kabane are, iaon te aba ao bwai ake ikarawa, makuri ma te rau rinanon rarana iaon te kaibangaki.”16
Ti riai ni bane n nakon Kristo ni karaoi mwaneka ni kabane ake a kantaningaaki. Ngkai ti karaoia, e na riki bwa kateira ni kangai, “Te Uea, ngkana ko kona, karaoai bwa na itiaki.” Ngkana ti karaoia, ti kona ni karekea ana ririing ni kamaiu ara Mwaatita, irarikin tangin bwanaana ae tangira: “N na kaitiakiko, ko na itiaki.”
Te Tia Kamaiu bon te Atua ae ti kona n onimakinna. Boni Ngaia te Kristo, Teuare e Kabiraki, te Mesia, are I kakoaua N arana ae Tabu, Iesu Kristo, amen.