Tuua aika Uoua aika Moan te Korakora
Ti riai ni kataia ni kawakin tuua aika a korakora aikai. Ni karaoan aei ti nakonako n te kawai ae e irariki imarenan te tua ao te tangira.
Mwaneu aika a tangiraki n ana euangkerio Iesu Kristo, I kamauri ngkami ngkai tabemi ae moan te rietata bwa taan kawakina te utu ae akea tokina. E a tia n reirei Beretitenti Russell M. Nelson, “E kaokaki te Ekaretia bwa aonga ni karikaki utu, kabaeaki, ao ni karietataaki n akea tokina.”1 Te reirei anne iai bwaai aika a kakawaki ibukiia tekoraki ake a ataaki bwa binabinamwaane, binabinaine, ake a tangiriia mwaane ao aine, ke naake e onikai teia, ae a kinaki bwa LGBT.2 E a tia ni kauringiira Beretitenti Nelson bwa ti aki “riai n ae [ti a bon] boboraoi naba ni iango bwa ti na tangiriira imarenara.”3 Taeka n reirei ni burabeti aikai a kakawaki ibukiia utu ni maroroakin kaekaan titiraki mai irouia ataei ao te roronrikirake. I a tia n tataromwaka ni ukora te tamnei bwa N a taetae nakoia te koraki aikai ibukina bwa bon ngkoe ae ko na rootaki man taian titiraki aikai, ae a kaineti ke n aki taraa ni kaineti nakoia utu ni kabane n te Ekaretia.
I.
I moana man tuua aika Uoua aika Moan te Korakora are e reireia Iesu .
“Ko na tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea.
“Moa te tua aei ao e korakora.
“Ao ai aron naba are te kauoua, Ko na tangira raom n ai aron tangiram ibon iroum.”4
Nanon aio bwa ti tuangaki bwa tina tangiriia aomata nako, ngkai ana reirei ni kaikonaki Iesu iaon te Itamaria are e raoiroi e reireia bwa aomata ni kabane bon raoraora.5 Ma ara nanomatoa ni kawakina te kauoua n tua aio e na aki karikiira bwa ti na mwaninga te are te moan, n tangira te Atua ma nanora, tamneira, ao wanawanara. Ti kaota te tangira anne man “kawakin[an] [Ana] tua.”6 Te Atua e kantaningaira bwa ti na ongotaeka nakon Ana tua ibukina bwa bon ti man te ongoeaba anne, ni ikotaki ma te rairanano, ti kona n okiria ao n maeaka Imatana ao n riki ni kororaoi n ai Arona.
N ana marooro n taai aika a tibwa nako nakoia kairake aika a ikawai n te Ekaretia e taetae Beretitenti Russell M. Nelson iaon te bwai ae e arana bwa “te reitaki ae matoatoa imarenan ana tangira te Atua ao Ana tua.”7 Te tua ae e kaeti riki ao ni kakaawaki nakon kangaanga ake a kaineti nakoia ake a ataaki bwa Binabinaine/Binabinamwaane bon ana tua te Atua iaon te mare ao raona ae tuan te itiaki. Aikai a uaia ni kakawaki n Ana babaire Tamara are i Karawa ibukiia Natina. E reirei Beretitenti Nelson “Ana tua te Atua a bane n riki ni kabane man Ana tangira ae akea tokina ibukira ao Ana kantaninga ibukira bwa ti na riki n aron are ti bon konaa.”8
E reirei Beretitenti Nelson: “A mwaiti aba … ae a tia ni kariaia te mare imarenan te mwaane ma te mwaane ao te aine ma te aine. Ngkai ngaira kaain te Ekaretia, ti karinea tuan te aba … ni ikotaki ma te mare n te tua. Ni koauana, ni bon arona, bwa n te moan tai … te mare e katabuaki iroun te Atua! Ni karokoa te bong aei e kabwarabwaraaki ibon Irouna bwa bon imarenan te mwaane ao te aine. Te Atua e tuai bita Ana kabwarabwara iaon te mare.”
E reitia Beretitenti Nelson: “Te Atua e bon tuai naba bita Ana tua iaon tuan te itiaki. Te kainibaire ibukin te rin n te tembora e tuai bitaki.”9
E kauringiira Beretitenti Nelson bwa “mwiokoara ngkai Abotoro ngaira bwa ti na reiakina te koaua ao akea riki. Te mwioko anne e aki anganiira [Abotoro] te kariaiakaki ni bitii tuua aika a rietata. ”10 Ngaia are, mwaneu aika tangiraki, taan kairiiri n te Ekaretia a na riai n tainako n reirei kakaawakin te mare ae e onoti imarenan te mwaane ao te aine ao te tua are e irekereke ae tuan te itiaki.
II.
Te mwakuri n Ana Ekaretia Iesu Kristo ibukiia Aika Itiaki ni Boong aika Kaitira e bon bane riki iaon katauraoaia natin te Atua nakon te aba n uea are te tiretio, ao riki ibukin te kabanea n rietata ni mimitong, te karietaataki ke te maiu are akea tokina. Te kabanea n rietata n tabo e kona n reke rinanon te mare are akea tokina.11 Te maiu are akea tokina e kaairaki ma te mwaaka ni karikibwai are ti karekea ni katiteuanakin te mwaane ao te aine12—are e kabwarabwaraaki inanon kaotioti aika ngkai bwa “reitakin aia kariki n aki totoki.”13
N ana taetae nakoia kairake ni ikawai e reirei Beretitenti Nelson, “Maiuakinan ana tua te Atua e na kamanoko ngkai ko kekerake nakon te karietataaki”14—aio bon, te riki n aron te Atua, ma te maiu ae e karietataaki ao n rikira ae mai ieta n aroia ara Karo i Karawa. Anne bon te tabo ae ti kan roko iai ma ake ti bane n tangiriia. Ibukin te tangira anne, ti aki kona ni karika ara tangira bwa e na onea mwiin te tua ao te babaire ao ana mwakuri te Atua, are ti ataia bwa e na karekea te kukurei ae moan te korakora nakoia ake ti tangiriia.
Ma a rangi ni mwaiti ake ti tangiriia, ni ikotaki ma tabeman ake iai irouia te euangkerio, ake a aki kakoauaa ke a rineia n aki kan ira ana tua te Atua ibukin te mare ao tuan te itiaki. Tera aroia?
Ana reirei te Atua e kaotia bwa ngaira ni kabane Natina ao E a tia ni karikiira bwa ti na kukurei.15 Ni kaotioti aika ngkai a reirei bwa te Atua e a tia ni katauraoa te babaire ibukin baike ti na rinanona n te maiu aei are ni kabane a kona ni rineia bwa a na ongotaeka n ukora Ana kabanea n rietaata ni kakabwaia ke ni karaoi rinerine are e na kairiia nakon te abanuea teuana are e rinano mimitongina.16 Ibukin ana tangira te Atua ae e korakora nakoia ni kabane Natina, abanuea ake a rinano akanne a bon rangi n tamaroa riki nakon are a kantaningaia aomata n te maiu aei.17 Ana Mwakuri ni Kamaiu Iesu Kristo e kariki aikai ni kabane, ngkai E “kamimitonga te Tama, ao ni kamaiuia ni kabane ana mwakuri baina.18
III.
I a tia n taetae iaon te moan tua, ma aron are te kauoua? Ti na kanga ni kawakina te tua n tangiria raora? Ti ukoria ni kairoroia ara membwa bwa tekoraki ake a irii aia reirei binabinamwaane, binabinaine, ake a tangiriia mwaane ao aine, ke naake a onikii teia a riai ni butimwaeaki ma ana tangiria te Tia Kamaiu are e tuangiira bwa ti na kaotia nakoia ni kabane kain rarikira. Ngaia are, ngke e a kariaiakaki te mare imarenan te mwaane ma te mwaane ao te aine ma te aine iaon Amerika, te Moan Beretitentii ao te Kooram n te Tengaun ma Uoman a taekina: “Ana euangkerio Iesu Kristo e reireiniira bwa ti na tatangira ao ni karinerine nakoia aomata ni kabane—e ngae ngkana ti aki boraoi n te iango. Ti kamatoa bwa te koraki ake a taua ni kabonganai tuua ke babaire man motin te bowi ni kariaia te mare imarenan te mwaane ma te mwaane ao te aine ma te aine e na aki karaoaki ae e aki riai nakoia.”19
Ao riki, ti riai n aki bwainikirinia naake tiaki titebo ara koaua ao motinano ma ngaiia.20 Te kananokawaki, tabeman aomata ake a kaitarai kangaanga aikai a reitinako n namakina karinanoakiia ao aki butimwaeakiia iroua tabeman membwa ao taan kairiiri inanon mweengara, uoote, ao titeiki. Ti riai ni bane ni kataia n akoakoi ao ni mwamwanano .
IV.
Ma tao ni bukina ae ti aki atai, a bane ni kakaokoro kakaewenako inanon baike ti rinanoi ni maiura aio. Ma ti ataia bwa te Atua e na buokiira n tatabemaniira n tokanikai iaon kakaewenako aikai ngkana ti nanona raoi ukeran Ana ibuobuoki. Imwiin rinanoakin kangaanga ao n rairannano ibukin uruakan taian tua ake ti a tia n reiakinaki, ti bane ni katauaki nakon te abanuea ae mimitong. Te toki ao te kabanea ni motikitaeka bon iroun te Uea, ae ti ngaia ae iai irouna te atatai are e kainanoa, te rabakau, ao te nanoanga ni motiki taekara nako.
N te tai aei ti riai ni kataia ni kawakin tuua aika a korakora aikai. Ni karaoan aei, ti nakonako n te kawai ae e irariki imarenan te tua ao te tangira—kawakin tuua ao n nakonako ni kawain te berita, ngkai ti tangiriia raoraora iaon kawaira. Te nakonako iaon kawain te berita aei e kainanoa ae ti na ukora te kairiiri mai karawa bwa tera ae ti na buotokaia ao ae ti na kaitaraa ao ti na kanga n tangira ao n ongora ni karinerine ao n reirei n te kawai anne. N nakonakora iaon kawain te berita e kainanoaki ae ti na aki nanououa iaon taian tua ma ti na kaota bwaninin te atatai ao te tangira. N nakonakora ti na riai ni iangoia ataei ake a kaotia bwa a tangira imarenaia ae mwaane ke ae bon aine, ma e aki kaungaaki te waekoa n atongiia n aroia anne ibukina bwa a mwaiti ataei ake e a manga bitaki aron aia namakin.21 Nakonakora e kaitaraa manga karekeaia ake a na taonako man kawain te berita ao e kakeaa te boutoka nakoia ake a kairiia aomata ni kararoaia ma te Uea. N aikai ni kabane ti uringnga bwa e berita te Uea bwa te kantaninga n tokina bon te kimwareirei ao te kakabwaia nakoia ni kabane ake a kawakin Ana tua.
V.
Tiina ao kaaro ao ngaira ni kabane ti mwiokoaki bwa ti na reireia tuua aika uoua aika moan te korakora. Ibukiia aine n te Ekaretia, Beretitenti Spencer W. Kimball e kabarabwaraa te beku anne n te taeka ni burabeti aei: “Mwaitin te rikirake ae korakora are e roko nakon te Ekaretia n te kabanea ni bong e na roko ibukin mwaitia aine aika raraoi n te aonaaba … a na katikaki nakon te Ekaretia n te mwaiti ae korakora. E riki aei bwa kaotana bwa ainen te Ekaretia a kakaraoa te raoiroi ao kaotakiia inanon maiuia ao noorakiia nakon te karinan are a riki bwa ainen te Ekareia aika a onoti ao a kaokoro mairouia ainen te aonaaba.… Ngaia are aine bon banna ni katoto n te Ekaretia a na riki iai bwa te korakora ae tamaroa inanon te ware ao te rikirake n tamnei n te Ekaretia n te kabanea ni bong.”22
N taekinan te taetae ni burabeti anne, Beretitenti Russell M. Nelson e taekina bwa “te bong are e a kaman noria Beretitenti Kimball bon te bong aei. Ngkami aine aika a kaman noraki!”23 E uarereke iroura ngaira ake ti ongo te taetae ni burabeti aei 40 te ririki n nako n ataia bwa mai ibuakoia ake a kamaiuaki n te Ekaretia irouia aine ngaia bon raoraoia ao aia utu ake a kaririaki ngkai ni bwai aika a moanibwai n te aonaaba ao kamwamwane aika aki rang mataata. Au tataro ao au kakabwaia bwa ko na reirei ao ni mwakuri ni kakoroa nanon te taetae ni burabeti anne, n Aran Iesu Kristo, amen.