Sa Diin Ini Magapadulong?
Mas maayo ang aton mga pagpili kag desisyon kon tulukon naton ang mga alternatibo kag padaluman kon diin ini magapadulong.
Ang ginpanumbalik nga ebanghelyo ni Jesucristo nagapaisog sa aton nga panumdumon ang palaabuton. Ginapaathag sini ang katuyuan sang mortal nga kabuhi kag ang kamatuoran sang kabuhi nga magasunod. Nagatudlo ini sang dalagko nga mga ideya parte sa palaabuton agud giyahan ang aton mga aksyon sa karon.
Sa kabaliskaran, kita tanan may mga kilala nga nagaulikid lamang sa subong: gastuha ini subong, magkalipay subong, kag indi magkabalaka para sa palaabuton.
Ang aton karon kag ang aton palaabuton mas mangin malipayon kon ginapanumdom naton pirme ang palaabuton. Sa paghimo naton sang mga desisyon sa karon, dapat naton pirme pamangkuton, “Sa diin ini magapadulong?”
I.
Pila sa mga desisyon mga pagpili sa tunga sang maggiho ukon indi maggiho. Nakabati ako sang subong nga halimbawa sang pagpili sa isa ka komperensya sa stake sa Estados Unidos madamo na nga tuig ang nagligad.
Ang ginhiwatan isa ka matahum nga kampus sa kolehiyo. Isa ka grupo sang bataon nga mga estudyante ang nagapinungko sa hilamon. Ang manughambal nga naglaragway sining sirkumstansya nagsiling nga nagatan-aw sila sang isa ka matahum nga eskwirel nga may dako, madabong nga ikog nga nagahampang sa idalom sang puno sang matahum nga kahoy nga tugas. Kon kaisa yara ini sa dalom, kis-a nagasaka-panaog kag nagalibot sa puno. Pero ngaa ining pamilyar nga talan-awon makatawag sang atensyon sang mga estudyante?
Nagahapa sa hilamon sa indi malayo amo ang isa ka Irish setter nga ido. Sia amo ang interes sang mga estudyante, kag ang eskwirel amo ang interes sini. Tagsa nga ang eskwirel malipdan sang kahoy, nagakamang ang ido palapit sing pila ka dangaw kag dayon magbalik sa iya kuno abi wala labot nga plastar. Amo ini ang ginkawilihan sang mga estudyante. Mahipos kag wala nagagiho, ang ila mga mata natutok sa hitabo nga ang resulta nagaamat athag.
Sang ulihi, malapit na kaayo ang ido sang ginsakmal kag nalab-ot gid ang eskwirel sa iya baba. Nahinalian, ang grupo sang mga estudyante nagdinalagan kag gin-agaw ang diutay nga sapat sa ido, pero ulihi na ang tanan. Patay na ang eskwirel.
Ang bisan sin-o sa grupo pwede gid kuntani nga magpaandam sa eskwirel bisan ano nga oras paagi sa pagkaway sang kamot ukon pagsinggit, pero wala gid sang naghimo sini. Nagtan-aw lang sila samtang nagahilapit ang indi malikawan nga resulta. Wala sing nagpamangkot, “Sa diin ini magapadulong?” Sang natabo ang maathag na nga daan, ang tanan nagdinaguso agud punggan ang resulta, pero ulihi na. Masubo nga paghinulsol na lang ang ila mahatag.
Inang matuod nga istorya makabig nga isa ka palaanggiran. Madapat ini sa mga butang nga makita naton sa aton mismo kabuhi kag sa kabuhi kag sitwasyon sang yara sa palibot naton. Kon makita naton ang mga peligro nga nagahilapit sa mga tawo ukon butang nga aton pinalangga, makapili kita mga maghambal ukon maggiho ukon maghipos. Makapaayo ang magpamangkot sa kaugalingon, “Diin ini magapadulong?” Kon ang mga konsikwensya hinali kag seryoso, indi mahimo nga wala kita sa buhaton. Kinahanglan kita magpalab-ot sang nagakaigo nga paandam ukon magsuporta sang nagakaigo nga pangontra samtang may oras pa.
Ang mga desisyon nga bag-o ko lang ginlaragway nagalakip sang pagpili sa tunga sa pag-aksyon ukon indi pag-aksyon. Komon amo ang mga pagpili sa tunga sang isa ka ukon iban pa nga aksyon. Ini nagalakip sang pagpili sa tunga sang maayo ukon malain, pero sa masami mga pagpili sa duha ka maayo. Bisan sa ini, maayo nga magpamangkot kon diin ini magapadulong. Nagapili kita pirme sa tunga sang duha ka maayo, masami sa kon paano naton gamiton ang aton oras. Wala sang malain sa paghampang sang video games ukon pagtext ukon pagtan-aw sang TV ukon pag-istorya sa cell phone. Apang ang tagsa sini nagalakip sang ginatawag “bili sang oportunidad,” buot silingon nga kon mag-usik kita sang tiyempro sa paghimo sang isa ka butang, mawad-an kita sang oportunidad nga himuon ang isa pa. Sigurado ako nga nakita ninyo nga kinahanglan naton takson sing mahinalungon kon ano ang madula sa aton sa oras nga ginahimo naton ang isa ka kahiwatan, bisan pa nga maayo man ini.
Sang nagligad may pamulong-pulong ako nga gintig-ulohan “Good, Better, Best.” Sa sina nga mensahe nagsiling ako nga “bangod lang nga ang isa ka bagay maayo wala nagakahulugan nga himuon mo ini. Ang kadamuon sang maayo nga mga butang nga sarang naton himuon masobra pa sa oras nga yara agud himuon ang mga ini. May mga butang nga mas maayo sangsa maayo, kag amo ini ang mga butang nga dapat hatagan sang prayoridad sa aton mga kabuhi. … Kinahanglan naton pabay-an ang pila ka maayo nga butang agud pilion ang mas maayo ukon pinakamaayo.”1
Pasangkara ang panulukan. Ano bala ang epekto sa aton palaabuton sang mga desisyon nga aton ginahimo sa karon? Tandai ang importansya sang pagkuha sang edukasyon, pagtuon sang ebanghelyo, pagbag-o sang aton mga kasugtanan paagi sa pag-ambit sang sakramento, kag pagtambong sa templo.
II.
Ang “Sa diin ini magapadulong?” importante man sa pagpili kon paano naton markahan ukon hunahunaon ang aton kaugalingon. Labing importante, ang tagsa sa aton isa ka anak sang Dios nga may potensyal nga kapalaran sang wala’y katapusan nga kabuhi. Ang tagsa ka marka, kalakip na ang trabaho, rasa, pisikal nga kinaiya, ukon mga kadungganan, temporaryo ukon witi-witi sa bahin sang wala’y katapusan. Indi pagpilia nga markahan ang inyo kaugalingon ukon kabigon ang inyo kaugalingon sa paagi nga ginalimitahan ninyo ang lalab-uton nga inyo pagalab-uton.
Mga kauturan, kag sa mga sister nga mahimo maglantaw ukon magbasa sang akon ihambal diri, kabay nga nakahibalo kamo kon ngaa ang inyo mga lider nagahatag sang panudlo kag laygay nga ginahatag namon sa inyo. Palangga namon kamo, kag ang aton Amay nga Langitnon kag ang Iya Anak nga si Jesucristo, nagapalangga sa inyo. Ang ila plano para sa aton amo ang “dakong plano sang kalipayan” (Alma 42:8). Inang plano kag ang Ila mga kasuguan kag mga ordinansa kag mga kasugtanan magadala sa aton sa pinakadako nga kalipay kag kasadya sa sini nga kabuhi kag sa kabuhi nga magaabot. Bilang mga alagad sang Amay kag sang Anak, nagatudlo kami kag nagalaygay subong nga Ila ginamando paagi sa Balaan nga Espiritu. Wala kami sang iban nga luyag magluwas sa paghambal sang matuod kag paisugon kamo nga himuon ang Ila nga ginbalay nga dalan padulong sa kabuhi nga wala’y katapusan, “nga amo ang pinakadako sa tanan nga mga dulot sang Dios” (Mga Doktrina kag mga Kasugtanan 14:7).
III.
Yari ang isa pa ka halimbawa sang epekto sa palaabuton sang mga desisyon nga ginhimo sa karon. Ang ining halimbawa may kaangtanan sa pagpili nga magsakripisyo sa karon agud malab-ot ang isa ka importante nga lalab-uton sa palaabuton.
Sa isa ka komperensya sa stake sa Cali, Colombia, isa ka sister ang nagsugid kon paano sia kag ang iya palamanhon naghandum nga makasal sa templo, pero sadto nga tion ang pinakamalapit nga templo yara pa sa Peru. Sa malawig nga tion, ginsupot nila ang ila kwarta para pamlete sa bus. Sang ulihi nagsakay sila sa bus pakadto sa Bogotá, pero sang pag-abot nila didto, natukiban nila nga ubos na ang tanan nga pulungkuan sa bus pakadto sa Lima, Peru. Pwede sila magpuli nga wala makasal ukon magpakasal sa gwa sa templo. Maayo lang, may isa pa ka paagi. Pwede sila magsakay sa bus pakadto sa Lima kon handa sila magpungko sa salog sang bus sa bug-os nga lima-ka-adlaw kag lima-ka-gab-i nga biyahe. Ginpili nila nga himuon ini. Siling niya nga mabudlay yadto, bisan pa nga pila sa mga pasahero ang nagtanyag nga makapungko sila sa ila lugar para makaunat-unat sila sa salog.
Ang nanamian ko sa iya pamulong-pulong amo ang pahayag sining sister nga nagapasalamat sia nga sia kag ang iya bana nakakadto sa templo sa sini nga paagi, tungod ginbag-o sini ang ila pagkabig sa ebanghelyo kag sa ila pagkabig sa kasal sa templo. Ang Ginuo nagbugay sa ila sang pagtubo nga nagahalin sa pagsakripisyo. Ginsambit man niya nga ang ila lima-ka-adlaw nga biyahe pakadto sa templo nagresulta sang mas dako sa pagpabakod sang ila espirituhanon sangsa madamo nga pagbisita sa templo nga wala sing sakripisyo.
Sa mga tinuig matapos ko mabatian ang amo nga panaksihon, ginapanumdom ko kon ano ayhan ang nangin kabuhi sinang mag-asawa kon lain ang ila ginpili—ang ipaiway ang sakripisyo nga kinahanglan agud makasal sa templo.
Mga kauturan, madamo kita sang mga pagpili nga ginahimo sa kabuhi, ang iban dalagko kag ang iban daw magagmay lang. Kon balikdon naton, makita naton kon daw ano kadako ang kinalain nga matuga sang pila naton ka pagpili sa aton mga kabuhi. Mas maayo ang aton mga pagpili kag desisyon kon tulukon naton ang mga alternatibo kag padaluman kon diin ini magapadulong. Sa aton paghimo sini, ginasunod naton ang laygay ni Pangulong Russell M. Nelson nga magsugod nga ginapanumdom ang resulta.2 Para sa aton, ang katapusan amo ang banas sang kasugtanan paagi sa templo padulong sa kabuhi nga wala’y katapusan ang pinakadako sa tanan nga mga dulot sang Dios.
Nagapamatuod ako kay Jesucristo kag sang mga epekto sang Iya Pagpasag-uli kag sa iban pa nga mga kamatuoran sang Iya wala’y katubtuban nga ebanghelyo sa ngalan ni Jesucristo, amen.