Magtulok kay Jesucristo

Ni Elder Kim B. Clark

Sang Kapitoan

Kon magtulok kita kay Jesucristo, buligan Niya kita nga tumanon ang aton mga kasugtanan kag tungdan sing maayo ang aton mga tawag bilang mga elder sa Israel.

Sang si Jesus naglakat sa dalan malapit sa Capernaum¹ nga napalibutan sang madamo nga mga tawo, isa ka babayi nga nagaantus sang malubha nga masakit sa sulod sang dose katuig ang nagdab-ot kag nagtandog sang sidsid sang Iya kunop. Sa gilayon, naayo sia.²

Mabasa sa balaan nga mga kasulatan nga si Jesus, pagkabatyag “nga ang [gahum] naggwa sa [Iya],”³ “nagliso sa tunga sang punsok”⁴ kag naghulonghulong sia … sa pagtan-aw sang nakahimo sini.”⁵ “Kag sang nakita sang babayi nga wala sia malipdi,”⁶ ”naghapa sa iya atubangan kag nagsugid sa iya sang bug-os nga kamatuoran.”⁷

Si Jesus nagsiling sia sa iya, Anak, ang imo pagtuo nag-ayo sa imo; lakat sa paghidaet.”⁸

Ginluwas ni Jesucristo ang babayi. Naayo ang iya lawas, pero sang nagliso si Jesus sa pagtan-aw sa iya, ginpahayag niya ang iya pagtuo sa Iya kag gin-ayo Niya ang iya tagipusuon.⁹ Naghambal sia sa iya nga may pagpalangga, ginpasalig sia sang Iya pagkahamuot, kag ginbugayan sia sang Iya paghidaet.¹⁰

Mga kauturan, bilang mga manugdala sang balaan nga priesthood, kabahin kita sang buluhaton sa pagluwas. Sang nagligad nga tuig ang Ginuo nagbutang sang pagpamuno sining buluhaton direkta sa mga abaga sang mga elder sa Israel.¹¹ May makapukaw kita nga mando halin sa Ginuo—nga nagahikot upod sa aton mga utod nga babayi, dapat kita mag-alagad sa mas balaan nga paagi, magpadasig sa pagtipon sang Israel sa pihak kag pihak sang tabon, magpahamtang sang aton mga panimalay bilang mga dalangpan sang pagtuo kag pagtuon sang ebanghelyo, kag maghanda sang kalibutan para sa Ika-duha nga Pagkari ni Jesucristo.¹²

Kasubong sa tanan nga butang, ang Manluluwas nagpakita sa aton sang paagi: kinahanglan naton magsalig kag mag-alagad kay Jesucristo pareho sa Iya pagsalig kag pag-alagad sa Iya Amay.¹³ Ang Manluluwas naghambal sa sini nga paagi sa Propetang si Joseph Smith:

“Magtulok sa akon sa tagsa ka panghunahuna; indi magduhaduha, indi magkahadlok.

“Binag-binaga ang mga pilas nga naglapos sa akon kilid, kag amo man ang agi sang mga lansang sa akon mga kamot kag tiil; mangin matutum, tumana ang akon mga kasugoan, kag magapanubli kamo sang ginharian sang langit.”¹⁴

Sa kabuhi antes sa duta si Jesus nagpromisa sa Iya Amay nga himuon Niya ang pagbuot sang Iya Amay kag mangin ang aton Manluluwas kag Manunubos. Sang ang Iya Amay nagpamangkot, “Sin-o ang akon ipadala?”¹⁵ Si Jesus nagsabat:

“Yari ako, ipadala ako.”¹⁶

“Amay, ang imo pagbuot ang matuman, kag ang himaya mangin imo sa wala’y katubtuban.”¹⁷

Sa bug-os Niya nga dutan-on nga kabuhi si Jesus nagtuman sinang promisa. Sing mapainubuson, malulo, kag may pagpalangga, gintudlo Niya ang doktrina sang Iya Amay kag ginhimo ang buluhaton sang Iya amay nga may gahum kag awtoridad nga ginhatag sa Iya sang Iya Amay.¹⁸

Ginhatag ni Jesus ang Iya tagipusuon sa Iya Amay. Siling niya:

“Ako nagahigugma sa Amay.”¹⁹

“Nagahimo ako sa gihapon sang kalahamut-an sa iya.”²⁰

“Nagkari ako … indi sa paghimo sang akon kabubut-on, kundi sang kabubut-on [sang Amay, nga] nagpadala sa akon.”²¹

Sa Iya kasakit sa Getsemani nagpangamuyo Sia, “Apang indi ang akon kabubut-on kundi ang imo, paghimuon.”²²

Kon ang Ginuo nagapanawag sa mga elder sa Israel nga “magtulok sa akon sa tagsa ka panghunahuna” kag “binagbinaga ang mga pilas” sa Iya nabanhaw nga lawas, panawagan ini sa pagtalikod sa sala kag sa kalibutan kag sa pagliso sa Iya kag pagpalangga kag pagtuman sa Iya. . Panawagan ini sa pagtudlo sang Iya doktrina kag paghimo sang Iya buluhaton sa Iya pamaagi. Gani, panawagan ini nga magsalig sa Iya sing lubos, itugyan ang aton pagbuot kag ihatag ang aton mga tagipusuon sa Iya, kag paagi sa Iya nagatubos nga gahum mangin pareho sa Iya.²³

Mga kauturan, kon magtulok kita kay Jesucristo pakamaayohon Niya kita nga mangin Iya mga elder sa Israel—mapainubuson, malulo, masinulundon, puno sang Iya gugma.²⁴ Kag dalhon naton ang kalipay kag mga bugay sang Iya ebanghelyo kag Iya Simbahan sa aton mga pamilya kag aton kauturan sa pihak kag pihak sang tabon.

Si Pres. Russell M. Nelson nag-agda sa aton sa pagtulok kay Jesucristo sa sini lang gid nga paagi: “Wala sing mahapos ukon duna tuhoy sa pagmangin labi kagamhanan nga mga disipulo. Ang aton pagtutok dapat ilansang sa Manluluwas kag Iya ebanghelyo. Mabudlay sa kaisipan ang maghimakas sa pagtulok sa Iya sa tagsa ka panghunahuna. Pero kon ginahimo naton, ang aton mga pagduhaduha kag mga kahadlok nagakadula.”²⁵

AngIlansang manami nga tinaga. Nagakahulugan ini nga iangot sing malig-on, mabihag kag magpabilin sing lubos.²⁸ Ginalansang naton ang aton pagtutok kay Jesucristo kag Iya ebanghelyo paagi sa pagtuman sang aton mga kasugtanan.

Kon ginatuman naton ang aton mga kasugtanan, ginaimpluwensyahan sini ang tanan naton nga ginahambal kag ginahimo. Nagapangabuhi kita sang kabuhi sang kasugtanan²⁷ nga puno sang simple, adlaw-adlaw nga mga buhat sang pagtuo nga nagapatutok sa aton kay Jesucristo: pangamuyo nga halin sa tagipusuon sa Iya ngalan, pagpaayaw sa Iya pulong, pagliso sa Iya sa paghinulsol sang aton mga sala, pagtuman sang Iya mga kasugoan, pag-ambit sang sakramento kag pagtipig nga balaan sang Iya Adlaw nga Inugpahuway, pagsimba sa Iya balaan nga templo sing masunson, kag paggamit sang Iya balaan nga priesthood sa pag-alagad sa mga anak sang Dios.

Ining mga buhat sang katutom sa kasugtanan nagabukas sang aton mga tagipusuon kag mga hunahuna sa nagatubos nga gahum sang Manluluwas kag sa nagapakabalaan nga impluwensya sang Balaan nga Espiritu. Dinalan sa dinalan ang Manluluwas nagabag-o sang aton mismo kinaugali, mas nagadalom ang aton pagkahaylo sa Iya kag ang aton mga kasugtanan mangin buhi sa aton mga tagipusuon.²⁸

Ang mga promisa nga ginahimo naton sa aton Langitnon nga Amay mangin bato-kalig-on nga mga panaad, nga aton pinakadaku nga mga handum. Ang mga promisa sang Langitnon nga Amay sa aton nagapuno sa aton sang kapasalamatan kag kalipay.²⁹ Ang aton mga kasugtanan indi na mangin patakaran lang nga aton ginasunod kundi ginapakamahal nga mga prinsipyo nga nagainspirar kag nagagiya sa aton kag nagalansang sang aton pagtutok kay Jesucristo.³⁰

Ining mga buhat sang katutom sarang maangkon sang tanan, bata kag tigulang. Kamo young men nga nagakapot sang balaan nga priesthood ni Aaron, ang tanan ko nga ginhambal sini nga gab-i nagakaigo sa inyo. Nagapasalamat ako sa Dios para sa inyo. Ginapatigayon ninyo nga ang sagrado nga mga ordinansa kag mga kasugtanan maambit sang minilyon ka mga Santos sa Ulihing mga Adlaw kada semana. Kon nagahanda, nagapakamaayo, ukon nagapasa kamo sang sakramento; nagaalagad; nagabautiso sa templo; nagaagda sang abyan sa isa ka kahiwatan; ukon nagatabang sa isa ka miyembro sang inyo korum, nagahimo kamo sang buluhaton sang kaluwasan. Kamo man makatulok kay Jesucristo kag makatuman ang inyo mga kasugtanan kada adlaw. Ginapromisa ko sa inyo nga kon himuon ninyo ini, mangin salaligan kamo nga mga alagad sang Ginuo karon kag mabakod nga mga elder sa Israel sa adlaw nga magaabot.

Mga kauturan, nakahibalo ako nga tanan ini daw makahalawhaw. Pero palihog dumduma ining mga pulong sang Manluluwas: “Indi ako isa lamang kay ang Amay kaupod nakon.”³¹ Amo man ina sa aton. Wala kita nagaisahanon. Ang Ginuong Jesucristo kag aton Langitnon nga Amay nagapalangga sa aton, kag kaupod naton Sila.³² Bangud si Jesus nagtulok sa Iya Amay kag gintapos ang dalayawon nga sakripisyo sang pagbayad-sala makatulok kita kay Jesucristo nga may pagsalig nga Iya kita buligan.

Wala sing bisan sin-o sa aton nga perpekto. Kon kis-a nagakaguot kita. Nagakatublag kita ukon ginaluyahan sang buot. Nagakasandad kita. Pero kon magtulok kita kay Jesucristo nga may mahinulsolon nga tagipusuon, alsahon Niya kita, tinloan sang aton mga sala, patawaron kita, kag ayuhon ang aton mga tagipusuon. Mapinasensyahon sia kag maayo; ang Iya nagatubos nga gugma wala nagauntat kag wala nagakapaslawan.³³ Buligan Niya kita nga tumanon ang aton mga kasugtanan kag tungdan sing maayo ang aton mga tawag bilang mga elder sa Israel.

Kag ang Amay magabugay sa aton sang tanan nga butang nga kinahanglanon sa pagpatuman sang Iya mga katuyuan— “mga butang … sa langit pati sa duta, ang kabuhi kag ang kasanag, ang Espiritu kag ang gahum nga ginpadala sa pagbuot sang Amay paagi kay Jesucristo nga iya Anak.”³⁴

Kon ang diosnon nga kasanag kag gahum nagailig sa aton mga kabuhi, tatlo ka milagroso nga mga butang ang matabo:

Una, makakita kita! Paagi sa rebelasyon masugdan naton ang pagtan-aw pareho sang pagtan-aw ni Jesus sa babayi: lampas sa gwa nga dagway lapus sa tagipusuon.³⁵ Sa aton pagtan-aw pareho sa pagtan-aw ni Jesus, ginabugayan Niya kita nga mapalangga ang aton mga ginaalagaran sang Iya gugma. Sa Iya bulig, ang aton mga ginaalagaran makakita sang Manluluwas kag mabatyagan ang Iya pagpalangga.³⁶

Ikaduha, may gahum kita sang priesthood! May awtoridad kita kag gahum sa paghulag sa ngalan ni Jesucristo “agud bugayan, giyahan, amligan, pabakuron, kag ayuhon ang iban” kag magdala sang mga milagro sa aton mga ginapalangga kag tipigan nga hilway sa peligro ang aton mga pag-asawahay kag mga pamilya.”³⁷

Ikatatlo, si Jesucristo magaupod sa aton! Kon diin kita makadto, magakadto Sia. Kon kita nagatudlo, magatudlo Sia. Kon kita nagapasulhay, magapasulhay Sia Kon kita nagabugay, magabugay Sia.³⁸

Kauturan, wala bala kita sing kabangdanan sa pagkasadya? May ara! Ginakaptan naton ang balaan nga priesthood sang Dios! Sa aton pagtulok kay Jesucristo, pagtuman sang aton mga kasugtanan, kag paglansang sang aton pagtutok sa Iya, magabuylog kita sa aton sisters kag magaalagad sa mas balaan nga paagi, tiponon ang nagalapta nga Israel sa pihak kag pihak sang tabon, pabakuron kag ihugpong ang aton mga pamilya, kag ihanda ang kalibutan para sa Ika-duha nga Pagkari sang Ginuong Jesucristo. Matabo ini. Nagasaksi ako.

Magatakop ako sa sining pangamuyo halin sa akon tagipusuon, nga tanan kita, kada isa, magtulok kay Jesucristo sa tagsa ka panghunahuna. Indi magduhaduha. Indi magkahadlok. Sa ngalan ni JesuCristo, amen.