Diosnon nga Pagkadiskuntento

Ni Michelle D. Craig

Unang Manuglaygay sa Kabilogan nga Pangulohan sang Young Women

Ang diosnon nga pagkadiskontento makapahulag sa aton sa pagbuhat nga may pagtuo, pagsunod sa pangagda sang Manluluwas sa paghimo sang maayo, kag paghatag sang aton kabuhi sing mapainubuson sa Iya.

Sang sa elementarya ako, nagaagi kami magpauli sa sementado nga banas nga nagalikoliko pasaka sa kilid sang isa ka bungyod. May isa pa gid ka banas nga indi sementado, nga ginatawag “banas sang mga lalaki” Ang banas sang mga lalaki yab-ukon nga alagyan pataklad diretso sa ibabaw sang bungyod. Mas malip-ot ini pero mas taklaron. Sang bata akon, nahibal-an ko nga mataklad ko ang bisan ano nga banas nga mataklad sang mga lalaki. Mas importante, nahibal-an ko nga nagakabuhi ako sa ulihing mga adlaw kag dapat ako maghimo sang mabudlay nga mga butang, pareho sa mga pionero—kag luyag ko mangin handa. Gani, kon kis-a, nagapaulihi ako sa grupo sang akon mga abyan sa sementado nga banas, ginauba ang akon sapatos, kag nagataklad tiniil sa banas sang mga lalaki. Ginatinguhaan ko nga pabakuron ang akon mga tiil.

Sang sa Primary ako, amo ina sa panumduman ko ang akon mahimo agud maghanda. Subong, lain ang nahibal-an ko! Imbis magtaklad tiniil sa mga banas sa bukid, nakahibalo ako nga mahanda ko ang akon mga tiil nga maglakat sa dalan sang kasugtanan paagi sa pagbaton sang mga pangagda sang Balaan nga Espiritu. Kay ang Ginuo, paagi sa Iya propeta, nagatawag sa aton nga magkabuhi kag magtatap sa “paagi nga mas mataas kag mas balaan” kag mangin “mas maayo.”¹

Ining panawagan sang propeta sa pag-akto, upod ang aton duna nga ihibalo nga sarang kita maghimo sing labaw pa, kon kaisa nagapukaw sa aton sang gintawag ni Elder Neal A. Maxwell nga “diosnon nga pagkadiskontento.”² Ang Diosnon nga pagkadiskuntento nagaabot kon ginakumparar naton ang kon “ano kita subong [sa] kon ano ang sarang kita mangin“³ Ang tagsa sa aton, kon matinud-anon kita, nagabatyag sang antad sa kon diin kag sin-o kita subong, kag sa diin kag sin-o luyag naton mangin. Nagahandum kita sing mas daku nga personal nga kapasidad. May amo kita sina nga mga balatyagon bangud mga anak kita sang Dios, natawo nga may Kasanag ni Cristo ugaling nagakabuhi sa di-perpekto nga kalibutan. Ining mga balatyagon halin sa Dios kag nagapukaw sang gilayon nga pagbuhat.

Dapat naton palig-onon ang mga balatyagon sang diosnon nga pagkadiskontento nga nagatawag sa aton sa paagi nga mas mataas, samtang nagakilala kag nagalikaw sa imitasyon ni Satanas—ang makaparalisa nga pagluya sang buot. Isa ini ka malahalon nga oportunidad nga ginakakunyagan ni Satanas nga sudlon. Makapili kita nga maglakat sa mas mataas nga banas nga nagadala sa aton sa pagpangita sa Dios kag Iya kalinong kag grasya, ukon mamati kay Satanas, nga nagapaarak sa aton sang mga mensahe nga indi gid kita mangin bastante: bastante kamanggaranon, bastante kaalam, bastante katahum, ukon bastante ka ano pa man. Ang aton pagkadiskontento sarang mangin diosnon—ukon makaguba.

Magbuhat nga may Pagtuo

Isa ka paagi nga mahibal-an ang kinalain sang diosnon nga pagkadiskontento sa imitasyon ni Satanas amo nga ang diosnon nga pagkadiskontento nagadala sa aton sa matinuohon nga pagbuhat. Ang diosnon nga pagkadiskontento indi pangagda sa paghimo sang kon ano lang ang komportable para sa aton, kag indi man ini magdala sa aton sa kawala’y paglaum. Natun-an ko nga kon magpadayon ako sa pagpanumdum sang tanan nga indi ako amo,wala ako nagauswag kag mas nabudlayan ako nga mabatyagan kag sundon ang Espiritu.⁴

Sang lamharon pa sia, nahibal-an gid ni Joseph Smith ang iya mga kakulangan kag nabalaka sa kaayuhan “sang [iya] imortal nga kalag.” Sa iya mga pulong, “ang akon hunahuna nagkasubo gid, kay natublag ako sang akon mga sala, kag …nagkalisod para sa akon mga sala kag sa mga sala sang kalibutan.”⁵ Nagdala ini sa iya sa “serioso nga pagpanumdum kag daku nga di-pagkahim-os.”⁶ Pamilyar bala ini sa pamatin-an? Ikaw bala indi mahim-os ukon nagakasubo sa imo mga kakulangan?

Bueno, si Joseph may ginhimo. . Siling niya, “Pirme ako nagahambal sa akon kaugalingon: Ano ang himuon?”⁷ Si Joseph nagbuhat nga may pagtuo. Nagdangop sia sa balaan nga mga kasulatan, ginbasa ang pangagda sa Santiago 1:5, kag nagpangayo sang bulig sa Dios. Ang resulta nga palanan-awon nagbukas sang Pagpanumbalik. Mapasalamaton gid ako nga ang diosnon nga pagkadiskontento ni Joseph, ang tion sang iya di-pagkahim-os kag kagumon, nagtulod sa iya sa matinuohon nga pagbuhat.

Sundon ang mga Pagpaisog sa Paghimo sang Maayo

Ang kalibutan masami nagagamit sang mga balatyagon sang pagkadiskontento bilang rason sa pagkamaiyaiyahon, sa pagtutok sang hunahuna sa kaugalingon kag sa nagligad kag sa tuman nga pagpanumdum kon sin-o ako, ano ang indi ako kag ano ang luyag ko . Ang diosnon nga pagkadiskontento nagatulod sa aton sa pagsunod sa ehemplo sang Manluluwas nga “naglibot sa paghimo sang maayo.”⁸ Sa aton paglakat sa banas sang pagkadisipulo, nagabaton kita sang espirituhanon nga mga pagpabatyag sa pagdab-ot sa iban.

Isa ka istorya nga nabatian ko tinuig na ang nagligad ang nagbulig sa akon nga makilala kag dayon mag-akto sa mga pagpabatyag halin sa Balaan nga Espiritu., Si Sister Bonnie Parkin, anay Pangkabilogan nga Pangulo sang Relief Society, nagpaambit sang masunod:

“Si Susan manami gid nga sastre. Si President [Spencer W.] Kimball nagpuyo sa [iya] ward. Isa ka Dominggo, nakita ni Susan nga may bag-o sia nga amerikana. Bag-o lang sia gindalhan sang iya amay … sing matahum nga tela nga seda. Sa banta ni Susan ang tela manami himuon nga kurbata nga iterno sa bag-o nga amerikana ni President Kimball. Gani sang Lunes gintahi niya ang kurbata. Ginputos niya ini sa manipis nga papel kag naglakat sa bangga pakadto sa balay ni President Kimball.

“Sang malapit na sia sa pwertahan, gulpi sia nag-pundo kag namensar, ‘Sin-o ako para maghimo sang kurbata para sa propeta? Madamo na seguro ang iya sini.’ Nga pat-od niya nga nagsala sia, naghana sia sa pagbalik.

“Amo man ang pag-abri ni Sister Kimball sang pwertahan kag nagsiling, ‘Uy, Susan!’

“Nga ginanerbiyos kag nahuya, nagsiling si Susan, ‘Nakita ko nga bag-o ang amerikana ni President Kimbal sang Dominggo. Gindal-an ako ni Papa sang mga seda halin sa New York … kag gani ginhimuan ko sia sang kurbata.’

“Antes si Susan makapadayon, ginpauntat sia ni Sister Kimball, gin-agbayan, kag nagsiling: ‘Susan, indi gid pagpunggi ang maalwan nga tuyo.’”⁹

Nanamian ako sina!. “Indi gid pagpunggi ang maalwan nga tuyo.” Kon kis-a kon nagapanumdum akon sa paghimo sang isa ka butang sa isa ka tawo, indi ako segurado kon pagpabatyag ini ukon akon lang panghunahuna. Pero ginapahanumdum ako nga, “Inang iya sang Dios nagapangagda kag nagapangganyat sa paghimo sang maayo sing dalayon; gani, ang tagsa ka butang nga nagapangagda kag nagapangganyat sa paghimo sang maayo, kag sa pagpalangga sa Dios, kag sa pag-alagad sa iya, may pagtuytoy sang Dios.”¹⁰

Kon bala ang mga ini direkta nga pagpabatyag ukon mga huyog lang sa pagbulig, ang maayong buhat indi gid mausik kay ang “putli nga pagmahal wala gid nagakapaslaw”¹¹—kag indi gid sala nga pagsabat.

Sa masami ang tiempo mabudlay, kag talagsa lang nga mahibal-an naton ang epekto sang magagmay naton nga mga buhat sang pag-alagad. Pero kon kis-a, mabatyagan naton nga nangin instrumento kita sa mga kamot sang Dios kag mangin mapasalamaton kita sa paghibalo nga ang Balaan nga Espiritu nga nagabuhat paagi sa aton, pagpahayag sang kahamuot sang Dios.

Sisters, Ikaw kag ako makapangamuyo nga ang Balaan nga Espiritu magpakita sa aton sang “tanan nga butang nga dapat [naton] himuon,”¹² bisan pa ang aton listahan sang ulobrahon puno na. Kon ginapabatyag, sarang naton anay bayaan ang mga ulobrahon sa balay ukon ipaiway ang mga butang nga ginapaabot sang iban nga aton himuon agud magbasa sa isa ka bata, magbisita sa isa ka abyan, magbantay sang mga bata sang kaingod, ukon mag-alagad sa templo. Sa matuod lang—nagalista man ako; nanamian ako magtsek sang mga natapos ko himuon. Pero ang katawhay maangkon sa paghibalo nga ang pagmangin mas maayo indi buot silingon paghimo sing mas madamo. Ang pagresponde sa pagkadiskontento paagi sa pagdesisyon nga sundon ang mga pagpabatyag nagabag-o sang akon pagkabig sa “akon tiempo,” kag ginalantaw ko ang mga tawo, indi bilang mga upang, kundi bilang ang katuyuan sang akon kabuhi.

Ang Diosnon nga Pagkadiskontento Nagadala sa aton kay Cristo

Ang diosnon nga pagkadiskontento nagaresulta sa pagpaubos, indi sa kaluoy-sa-kaugalingon ukon sa pagluya-sang-buot nga maangkon sa mga pagkumparar kon diin pirme kita ginakulabus. Ang nagatipig-kasugtanan nga mga babayi may lainlain nga kadakuon kag korte; ang ila mga pamilya, ila mga inagihan, kag ila mga kahimtangan magkatuhay.

Siyempre, tanan kita magakabus gid sa aton diosnon nga potensyal, kag may kamatuoran sa ihibalo nga kon isahanon lang indi kita bastante. Pero ang maayong balita sang ebanghelyo amo nga sa grasya sang Dios, bastante kita. Sa bulig ni Cristo, mahimo naton ang tanan.¹³ Ang balaan nga mga kasulatan nagapromisa nga “makasalapo kita sang kaayo nga magbulig sa tion sang panginahanglan.”¹⁴

Ang wala ginapaabot nga kamatuoran amo nga ang aton mga kahuyang mangin bugay kon ang mga ini nagahimo sa aton nga mapainubuson kag nagaliso sa aton kay Cristo.¹⁵ Ang pagkadiskuntento mangin diosnon kon mapainubuson kita nga magpalapit kay Cristo sa aton kakulang, imbis nga magpangalag-ag sa kaluoy-sa-kaugalingon.

Sa pagkamatuod, ang mga milagro ni Jesus nagasugod sa pagkilala sang kakulang, panginahanglan, kapaslawan, ukon kabus nga ikasarang. Nadumduman ninyo ang mga tinapay kag mga isda? Ang tagsa ka manunulat sang Ebanghelyo nagasugid kon paano si Jesus milagroso nga nagpakaon sang linibo nga nagsunod sa Iya.¹⁶ Pero ang istorya nagasugod sa pagkilala sang mga disipulo sang ila kakulangan; namarasmasan nila nga may “lima lang sila ka tinapay kag duha ka magagmay nga isda: pero ano bala ang mga ini sa tuman kadamo?”¹⁷ Husto ang mga disipulo: wala sila sing bastante nga pagkaon, pero ginhatag nila kay Jesus ang yara sa ila kag dayon naghimoSia sang milagro.

Nakabatyag bala kamo nga ang inyo mga talento kag mga regalo tuman ka gamay para sa buluhaton sa palaabuton? Nakabatyag ako. Pero ikaw kag ako sarang maghatag kay Cristo sang kon ano ang yara sa aton, kag himuon niya nga epektibo ang aton mga pagpangabudlay. Ang imo itanyag sobra sangsa bastante—sa pihak sang imo tawhanon nga kaluyahon kag mga kahuyang— kon magsandig ka sa grasya sang Dios.

Ang kamatuoran amo nga isa lang ka henerasyon ang antad sang Dios sa aton—ang kada isa anak sang Dios.¹⁸ Kag pareho sa nahimo Niya sing alalangay sa mga propeta kag sa ordinaryo nga mga lalaki kag babayi sa mga dinag-on, tuyo sang Langitnon nga Amay nga bag-uhon kita.

Si C.S. Lewis nagpaathag sang nagabag-o nga gahum sang Dios sa sini nga paagi: “Huna-hunaa ang imo kaugalingon nga isa ka buhi nga balay. Ang Dios nagkari sa pagkaayo sinang balay. Sa una, ayhan, mahangpan mo ang Iya ginahimo. Ginakay-o niya ang ililigan sang tubig kag ginakapolan ang mga buslot sa atop kag iban pa; nahibal-an mo nga inang mga obra kinahanglan himuon kag gani wala ka nasorpresa. Pero sang ulihi nagsugod sia pangguba sa balay agud maghimo sing dalagku nga mga pagbag-o. … [Kahibalo ka,] nagapatindog Sia sang balay nga lain sangsa imo ginahunahuna. Abi mo ginahimo ka nga isa ka disente nga payag, gali kay nagapatindog sia sang isa ka palasyo. Tuyo Niya nga magkari kag magpuyo diri. Mismo”¹⁹

Bangud sa nagapasag-uli nga sakripisyo sang Manluluwas, sarang kita mangin tupong sa mga buluhaton sa palaabuton. Ang mga propeta nagpanudlo nga, sa aton pagtaklad sa banas sang pagkadisipulo, mapakabalaan kita paagi sa grasya ni Cristo. Ang diosnon nga pagkadiskontento makapahulag sa aton sa pagbuhat nga may pagtuo, magsunod sa pangagda sang Manluluwas sa paghimo sang maayo, kag maghatag sang aton kabuhi sing mapainubuson sa Iya. Sa ngalan ni JesuCristo, amen.