Ataeinnaine n te Mwakuri
Ataeinnaine n tatabemaniia inanon te Ekaretia a riai n namakina ae iai kakawakiia, iai aia tai ni beku, ao n namakinna iai te bwai ae kakawaki n aia anganano nakon te mwakuri aei.
Te ririki ae nako, n ana tetere te nakoanibonga n te maungatabu ni kabuta, Bitiobi Gérald Caussé e taetae nakoia mwaane n te Ekaretia ni kabwarabwara a kanga kaain te nakoanibonga ae te Aaron ao te Merekitereka bon raao aika aki kona ni kamaenakoaki ni kakoroan bukin te mwakuri ni kamaiu.1 Te rongorongo anne e riki bwa te kakabwaia ae korakora ni buokiia ataeinimwaane n te Nakoanibonga ae te Aaron ake a tarai tabeia ake a karaoi ni katea uean te Atua iaon te aba. Aia reitaki ni mwakuri e kakorakora te Ekaretia ao ni uota te rairaki ae korakora ao te motinnano inanoia ara ataeinimwaane ngkai a tarai kakawakin aia anganano ao aron kamimiin te mwakuri aei.
N te bong aei I tangira au marooro n reitia ma te rongorongo anne ngkai I maroroakina taekaia ataeinainen te Ekaretia, ake a uaia ni kainnanoaki ao ni kakawaki ni kakoroa bukin ana mwakuri te Uea inanon aia utu ao n Ana Ekaretia.
N aron Bitiobi Caussé, I maeka n ana mwaanga ae uarereke te Ekaretia n ni mwaitin au tai n roronga, ao n angiin te tai I butiaki bwa N na katiai mwiokoau ao nakoau ake a taneiai n tia ni karaoaki irouia ikawai. N aron te katooto, naake ibuakora man n aia burokuraem kairake angiin te tai a ririmoa ni buoka te babaire ao ni kamwakuri waaki ni kakukurei ao taai aika a onoti. Ti karaoa te kaotioti, ti katea te kurubu n anene ni kamataku n ana waaki ni kakukurei te mwaanga, ao bon taan iriiri aika kakaonimaki n ana bootaki ni kabane te mwaanga. I weteaki bwa N na riki bwa te tia orotai n te mwaanga ao ni kaira te anene ni bootakin te toa ni katoa wiiki. Bon te taneiai ae korakora aei ibukin te aomata ae 16 ana ririki n tei imataia aomata n te mwaanga ni katoa Tabati ao ni kairiia n anenei kuuna n taromauri. I namakina kainnanoau ao n ataia bwa iai te bwai ae N na anganano iai. A onimakinai aomata bwa N na mena ikekei, ao I tangira te namakina ae iai bonganau. Te taneiai anne e buoka ni kakorakora au koaua ibukin Iesu Kristo, ao n aron are e karaoia Bitiobi Caussé, e katea aan maiu n ibuobuoki ibukin te euangkerio.
A riai membwa n tatabemaniia n ataia bwa mwaitira kainnanoan teuanne ke neienne. Iai te bwai ae kakawaki irouia Aomata n tatabemaniia ae a na anga ao iai aia tarena aika onoti ao aia konabwai ni reita nako te mwakuri ae kakawaki aei. Ara ataeinimwaane ake iai aia beku n te Nakoanibonga ae te Aaron a kabwarabwaraaki n Reirei ao Berita aika Tabu ake a kona n nooraki. E na taraa n aki mataata raoi nakoia ataeinnaine n te Ekaretia, aia karo, ao aia taan kairiiri bwa, man te tai are a bwabetitoaki iai, ataeinnaine iai katabeaia n aia berita bwa a na “tang ma ake a tang; eng, ao ni karau nanoia ake a kainnanoa karauan nanoia, ao riki n tei bwa taan kakoaua ibukin te Atua n taainako ao ni bwaai nako, n taabo nako ake [kam] nako iai, ni karokoa matemi.”2 Iai aia tai Ataeinnaine ni kakoroi bukin katabeaki aikai ngkana a beku inanon kiraati n te beretitentii, n aia kauntira kairake, ao inanon tabeua riki nakoa. Ataeinnaine n tatabemaniia inanon te Ekaretia a riai n namakina ae iai kakawakiia, iai aia tai ni beku, ao n namakinna iai te bwai ae kakawaki n ana anganano nakon te mwakuri aei.
N Aeniboki 2, ti reiakinna bwa te mwakuri ni kamaiu inanon ara uoote n raonaki ma “aia mwakuri ni mitinare kaain te aro, kateimatoakiia aika tibwa rairaki, kamarurungakiia kaain te aro aika aki kakaonimaki, mwakuri n te tembora ao rongorongon te utu, ao reireia te euangkerio.”3 Te mwakuri aei e kairaki irouia ara bitiobi aika kakaonimaki, ake iai irouia kiingin te nakoanibonga ibukin aia uoote. Ibukin ririki aika mwaiti, ara beretitentii aki toki n tabeka te titiraki aei, “Man aono raa aika a taekinaki ae a ria n aki irekereke iai ara ataeinnaine?” Te kaeka bwa iai aia anganano n aonon ni kabane te mwakuri aei.
N aron te katooto, I kaitibo n te tai ae nako ma tabeman ataeinnaine n aonon Las Vegas are a tia ni weteaki bwa taan kairiiri ibukin te uoote n te tembora ao n rongorongon te utu. A oti moamoaia ma te ungannano ngkai a kona n reirei ao ni buokiia kaain aia uoote ni kakaeiia aia bakatibu. Iai bonganan aia konabwai iaon te kaombiuta, a tia n reiakinaki aron kamanenaan te FamilySearch, ao ti kukurei n tibwaua te rabakau anne ma tabeman. E mataata bwa iai aia koaua ao otaia ni kakawakin kakaean araia aia bakatibu ake a tia ni mate bwa a aonga ni karaoaki otenanti ni kamaiu ibukiia inanon te tembora.
Tabeua namwakaina n nako, e reke au tai ni kataa te iango ma uoman ataeinnaine ae kaka 14 aia ririki. I karekei uoua katotoon ana akenta te kauntira ni uoote ao n angan Emma ao Maggie aia kaobi. I titirakiniia bwa a na wareka te akenta ao n taraia ngkana iai bwaai man te kauntira ni uoote ae a na karaoaki bwa a aonga ni kona n ibuobuoki. E nooria Emma bwa iai te utu ae boou ae e na mwaing nakon te uoote, ao e taku bwa e kona ni buokiia ni mwaing ao ni karin aia bwai. E taku bwa e kona ni karenaia n iraorao ma ataein te utu ao ni kaneweabaia n rauniia aia reirei ae boou. E nooria bwa iai ana katairiki te uoote ae e nang roko ao n namakinna bwa a mwaiti kawai aika e e kona n ibuobuoki iai.
E nooria Maggie bwa iai aomata aika a kara inanon te uoote ake a kainnanoa kawarakiia ao raonakiia. E taku bwa e tangiria ni kawariia ao ni buokiia kaain te aro aika a kara ao man kakateke. E namakinna naba bwa e kona n ibuobuoki n reireiniia kaain te uoote bwa a na kanga ni katea ao ni kamanena aia akaunti ibukin taabo ni kareke rongorongo. Akea teuana te bwai iaon akenta akanne ike a na aki kona n ibuobuoki iai ataeinnaine akanne!
Naake kaain te kauntira ni uoote, ke iai nakoaia n te uoote, taraia ataeinnaine bwa buoka aika rangi ni bongana ni buokia kainnano aika mwaiti inanon ara uoote? N ae taneiai iai te aba iai kaangaanga aika a tia ni karinanaki are e kainnanoa temanna bwa e na buoki, ao n angiin te tai ti bon tii iangoia ikawai inanon te uoote ni karaoi kainnano akanne. Ngkai a tia ni kaoaki kaain te Nakoanibonga ae te Aaron bwa a na mwkauri ma aia karo ao tabeman mwaane man te Nakoanibonga ae te Merekitereka, ara ataeinnaine a kona ni kabeabeanaki bwa a na katauraoa te ibuobuoki ao ni buoka kainnanoia kaain te uoote ma tinaia ke tabeman aine aika kakateke. A konabwai, a ingainga nanoia, ao n tauraoi ni karaoa ae mwaiti riki nakon ae tii te nanako n taromauri n te Tabati!
Ngkai ti iangoi tabeia ara ataeinnaine aika ti kantaningaia bwa a na karaoi n taai aika a na roko, ti bae n titirakiniira i bon iroura tera ara taneiai ae ti kona ni katauraoi ibukiia ngkai are a na buokiia n aia katauraoi bwa aonga n riki bwa mitinare, taan kamatebwaia te euangkerio, taan kairiiri n ana bootaki nako te Ekaretia, taan mwakuri n te tembora, buuaine, tiina, taan kairiiri, ao raao. A kona ni moanna ma ngkai ni kanoai taian beku akanne. Angiin te tai a titirakinaki Kairake bwa a na ibuobuoki n anga reirei n te Tabati n aia kiraati. A tauraoi ngkai taai ibukiia ataeinnaine ni karaoi mwakuri n ibuobuoki ake a tia ni karaoaki irouia taan mwakuri n te otenanti ke taan anganano ngkana a nako n te tembora ma kurubu ni kairake ni karaoa te bwabetito ibukiia maate. Ara ataeinnaine n te Moanrinan aika ikawai a kaoaki ngkai bwa a na ira te boowi ni Katauraoi ibukin te Tembora ao te Nakoanibonga. A reiakinna bwa mwaane, aine, kairake, ao ataei bon aomata n ana kakabwaia te nakoanibonga ao a bane ni kona ni karaoa te mwakuri ni kanakoraoa ana mwakuri te Uea.
Bitiobi, ti ataia bwa ami beku n angiin te tai ae a rawawata, ma ngkai teuana mai ibuakon am moanibwai n tararua te kooram n te Nakoanibonga ae te Aaron, e taekinaki n, Aeniboki 2 e kabwarabwara bwa “te bitiobi ao ana kauntira a katauraoa te kairiiri n te nakoanibonga ibukin aia bootaki Ataeinnaine. A tararuaia ao ni kakorakoraia ataeinnaine, ni mwakuri ni kaan ma kaaro ao taan kairiiri n te bootaki n Ataeinnaine inanon te waaki aio.” E taekinaki naba, “te bitiobi ma ana kauntira a riai n iri aia bootaki Ataeinnaine, mwakuri, ao waaki ni kakukurei.”4 Ti kakaitau ibukiia bitiobi ake a reke aia tai ni kawari aia kiraati Ataeinnaine ao are a katauraoa aia tai ataeinnaine n riki bwa taan karaoa te mwakuri nakon ae ti tarakiia tabeman bwa a karaoia. Kam rabwa ibukin kakoauaan ae ataeinnaine bon aomata aika kakawaki ni buoki kainnanoia kaain te uoote! Taai aikai ni beku ni kawai aika uaana a kakabwaiaia n ae mwaiti riki nakon waaki ni kakukurei ake a kaungaaki iai.
Nakoimi, ataeinnaine n te Ekaretia, ami ririki ni kairake e kona ni katabetabe ao ni kaangaanga. Ti nooria bwa angiina ibuakomi a korakai ma te kaangaanga ni kakawakiia i bon irouia, te raraoma, te kua ae korakora, ao tao te nanokawaki. Iangoia tabeman imwaain ae ko iangoiko, irarikin raraomam n am kaangaanga, e na aki kona ni katoki kaangaanga aikai, ma te ibuobuoki e kona ni kabebetea uotam ao ni kabebetea am kaangaanga. Teuana te kawai ae tamaroa ni karikirakea namakinan kakawakim ko na bon kaotia, rinanon ara tabeiaianga ao ara ibuobuoki nakoia tabeman, bwa iai bonganan are ti na anga.5 I kaungai ngkami ataeinnaine bwa kam na katei baimi n anganano ao ni kamwakuri baimi akanne ngkana kam noori kainnanoaia irarikimi. Ngkai kam kakoroa bukin katabeami n ami berita ao n ira katean uean te Atua, a na bwaro kakabwaia nakon maiumi ao kam na kunea te kimwareirei ae nano man teimatoa n riki bwa ana reirei.
Tariu ao mwaneu, a kamimi ara ataeinnaine. Iai aia tarena, nanoia ae akea tiana, korakoraia, ao a nanoanga ao n ibuobuoki. A tangiria ni kan ibuobuoki. A kainnanoia n ataia bwa a bongana ao ni kakawaki n te mwakuri ni kamaiu. N te kawai naba are a katauraoia ataeinimwaane n te Nakoanibonga ae te Aaron ibukin te mwakuri ae korakora riki ngkai a kibarake riki ataeinimwaane nakon te Nakoanibonga ae te Merekitereka, ara ataeinnaine a katauraoi n riki bwa kaain aia bootaki aine ae kakannato iaon te aba—te Bootaki n Aine. NI kabane ataeinnaine, aika bobotonaine, a korakora, man kakaonimaki ao ataeinimwaane a katauraoi n riki bwa buuaine ao buumwaane, ao tiina ao kaaro ake a na kaikawairake aia utu aika a tau ibukin uean te Atua ae te tiretio.
I kakoaua bwa ana mwakuri Tamara are i Karawa bon katauraoan te aki mamate ao te maiu ae akea tokina ibukiia Natina.6 Ara ataeinnaine aika kakawaki iai tabeia ae kakawaki ae a na karaoia ni kakoroa bukin te mwakuri ae korakora aei. N aran Iesu Kristo, amen.