Bwaintangira aika Onoti mairoun te Atua
E kona te maiu ni kaonaki ma te kimwareirei, te kukurei, te kantaninga, ao te tangira ngkana ti kamwakura teutana te onimaki ae koaua inanon Kristo.
Tariu ao mwaaneu, ti a bon tibwa tia n ira te bootaki n taromauri, te mwakuri are e kona n uringaki rikaaki nakon te Baibara ngke tibun Iteraera ake ngkoa a ikotaki bwa a na namakina rokon te Uea ao ni bukamarui Ana kakabwaia.1 Iai tibwangara ni maiu n te tai ngke e a manga kaokaki te mwakuri aei are ngkoa rinanon te burabeti Iotebwa Timiti.2 I kaumaki ngkami bwa kam na korei baike kam namakin inanon ami tienoo ni kaineti ma te tai ae moan te tabu ae kam iria.
N te tai ae nako, ti kaboo nakon ara burabeti ae tangiraki, Beretitenti Thomas S. Monson. E ngae ngke ti bane n tangiria, ti kakaitau bwa e a tia te Uea ni wetea te burabeti ae boou, Beretitenti Russell M. Nelson, bwa e na tararua Ana Ekaretia. N te kawai ae barongaaki raoi ti moana ngkai te mwakoro ae boou n rongorongon ara Ekaretia. Aei bon ana bwaintangira ae rangi ni kakaawaki te Atua.
Ngkai ti kamatoa Beretitenti Nelson man ara katebai, ti tei bwa taan kakoaua imatan te Atua ao n ataia bwa boni ngaia are e na oneamwiin Beretitenti Monson. Ma ara katei bai, ti berita bwa ti na ongo n ana taeka ngkai e karekei ana kaetieti te Uea.
E taku te Uea:
“Kam na ongo nakon ana [e kanonaaki te Beretitenti n te Ekaretia] taeka ma tua ni kabane ake e na anga nakoimi n te tai are e karekei …;
“Bwa ana taeka kam na karekei, n aron ae bon man oin wiiu, ma te taotaonakin nano ao te onimaki ni kabanea.”3
I kinaa ara burabeti-beretitenti ae boou inanon 60 te ririki. I beku ma ngaia n te Kooram n Abotoro n te Tengaun ma Uoman ibukin 33 te ririki, ao Ngai te tia kakoaua bwa bain te Uea e a tia ni katauraoia n riki bwa ara abotoro n tararua ao te burabeti n anga kiingin te nakoanibonga ae tabu iaon te aonaaba. Au kantaninga bwa ngaira n tatabemaniira ti kamatoa n ae bwanin ao ana kauntira ao n irii aia kaetieti. Ti butimwaaia naba Unimwaane Gong ao Unimwaane Soares bwa kaain te Kooram n te Tengaun ma Uoman.
Imwiin Mangautin Iesu, te tai are ti bukamaruia n te Itita n te wiikente ae mimitong aei, E kaoti nakoia Ana reirei ao te taku, “E na mena te rau iroumi: I kanakoingkami n ai aron Tamau ngke E kanakomaiai.”4 Taraa te mwakuri ni mwaneka aika uoua—te Atua e kanakomaia Natina. Te Nati e kanakomaia Ana toro—mwaane ao aine—ni katiai Aia mwakuri.
Ti riai n aki miimi n ataia bwa aomata aikanne a weteaki bwa a na karaoa ana mwakuri te Uea ao bon aomata aika aki tau. Karaki inanon te Baibara a kaota rongorongoia mwaane ao aine ake a weteaki iroun te Atua bwa a na katiaa te mwakuri ae kakannato—natin Tamara are i Karawa mwaane ao aine aika raoiroi a weteaki bwa a na beku ni mwiokoaia inanon te Ekaretia, ni kataia ni karaoa aia kabanea n tamaroa, ma akea mai buakoia ae kororaoi. E koaua naba aei ibukira.
Anganakira koauan mamaarara n aomata ao kabwakara, ti na kanga ni waaki nako ni boutokaira ao ni kamatoaira imarenara n tatabemaniira? E moanaki ma te onimaki—te onimaki ae koaua, ma nanom raoi iroun te Uea Iesu Kristo. Te onimaki iroun te Tia Kamaiu bon te mon tua n reirein ana euangkerio Iesu Kristo.
Tabeua te ririki n nako I kawara te Aba ae Tabu. Ngkai ti buti irarikin te aroka ae te mwakeke, te tarekita i BYU Ierutarem Tienta e titiraki ngkana I a ti n noora atin te mwakeke. I bon tuai, ngaia are ti a tei. E kaota nakoiu atin te aroka ae te mwakeke. A rangin kamiimi bwa a uarereke.
Ngkanne I uringa ana reirei Iesu: “Ba e koaua ae I a tuangkami ba ngkana iai ami onimaki n ai aron uan te makeke, ao ngkana kam kangai nakon te maunga anne, Mae ngkoe, nako ikekei; ao e boni máe; ao bon akea te bái teuana ae kam aki kona.”5
Ngkana iai ara onimaki n aron uaan te mwakeke, e kona te Uea ni buokiira ni katoki kataaki n te bwarannano ao ara nanououa n ara beku aika imwaaira ngkai ti beku ma natin te Atua, n raonaki ma kaain ara utu, ao naake a tuai kaaina te Ekaretia.
Tariu ao mwaaneu, e kona te maiu ni kaonaki ma te kimwareirei, te kukurei, te kantaninga, ao te tangira ngkana ti kamwakura teutana te onimaki ae koaua inanon Kristo—te onimaki ae ai aron uaan te mwakeke.
Unimwaane George A. Smith e uring tabeua taeka n reirei ake e anganaki iroun te Burabeti Iotebwa Timiti: “E tuangai I riai n aki bwarannano, ni kaangaanga ake I rinanona. Ngkana I inako n te kinono i Nova Scotia ao te Rocky Mountain ni kabane are a toka iaou, I riai n aki bwarannano ma N na teimatoa, ni kamwakura au onimaki, ao ni kateimatoa te ninikoria ao I riai n tokanikai ni kaitarai kariiri n te kabanea n tai.”6
Ti riai n uringa ana kabwarabwara Bauro: “I bon konai bái ni kabane iroun Teuare e kakorakorai.”7 Ataakin aei bon teuana te bwaintangira ae kakaawaki mairoun te Atua.
N raonakin bwaintangira aika I a tia n taekin, a rangi ni mwaiti riki. Te bwaintangira ibukin te bong ae te Tabati, te toa, buokakiia tabeman, ao ana bwaintangira te Atua ae akea kabotauana ibukin ara Tia Kamaiu.
Mwaakan te bong ae te Tabati bon te bwai are ti na rinanona n te taromauri ao n te mweenga e bon kakukurei, e kakimwareirei, ao n namakinan Tamnein te Uea n akea te katabetabeaki.
Angiina a kariaia ni kabanei maiuia n aonraain ma bwaai aika timwaati—taian tikuriin aika a kaotai mataia n te ngaina ao te bong ao bwain ongora inanon taningaia are a buraokina bwanaan te Tamnei ae maraara man rau. Ngkana ti aki karekea ara tai ni kanakoi bwain taningara ni kakauongo, ti na bae ni kabuai ara tai n ongo bwanaana are e taku, “Tei moa, ao kam na atai ba te Atua Ngai.”8 Ngkai, bon akea kariuan te kareketai ni birimwakaan rabakau aika boou ake a kairaki mairoun te Uea, ma ti riai ni wanawana n aron kabonganakiia. Uringnga, te bwaintangira ibukin te bong ae te Tabati.
Te kakabwaia ni karekean te toa n te bootaki n toa tiaki karaoan te mwakuri n te aro ae e taneiai te aba iai ke te bwai ae ti karaoia. Bon tii 70 te miniti ni bwaninin te wiiki ngke ti kona n toki ao ni karekea riki te rau, te kimwareirei, ao te kukurei inanon maiura.
Kanakin te toa ao kaboouan ara berita bon te kanikina mairoura nakon te Uea bwa ti ururingnga n taainako. Ana Mwakuri ni Kamaiu bon ana bwaintaninga n akoi te Atua.
Te tibwanga n taromauri nakoia natin te Tama are i Karawa bon te tai n iriira ana katoto Natina ae Tangiraki ni beku i bon imarenara.
Tabeua taai n taromauri a bon riai—inanon ara utu, nakoara n ara Ekaretia, ao ti na iriiri bootaki n taromauri n te kaawa.
Kaain te Ekaretia—mwaane ao aine—a riai n aki rawa, ngkana a tangiria, ni kan rineaki nakon tabeua ana rinan nakoa te tautaeka n taabo ake a mena iai. Kaotan ara iango n te bong aei ao ae kakawaki inanon ara reirei, ara kaawa, ao abara. Ike e mena iai ana tautaeka te botanaomata, bon ara beku ngaira kaain te aro ni rinerine ibukiia mwaane ao aine ake a karineaki ake a tauraoi ni beku.
Mwaitin taai ni beku aika bon riai—n akea te katabeaki—ao n roko ngkai ti karoko irouia tabeman ake ti kaitibo ma ngaiia ni mwanangara ni maiura aei. Uringa Iesu ngke e reireina te rooia bwa ti riai n tangira te Atua ao raoraora n ai arora ni kabonganaan te Itamaria ae raoiroi bwa te katoto.9
Te ibuobuoki e karekea te tai are ti na oota iai ni maiun ao ana mwakuri Kristo. E roko bwa e na beku, n aron are e reireiaki ni koroboki aika tabu, “n ai aron naba Natin te Aomata ngkae E aki nako mai ba e na tautoronia aomata, ma E roko ba e na toro irouia aomata, ao ba e na anga maiuna ba unoraia aomata aika bati.”10
E bae n anga ana kabwarabwara Betero ae tamaroa ibukin ana mwakuri te Tia Kamaiu inanon nimaua te taeka ngke e kaineti nakon Iesu, “are nakonako ni karaoa ae raoiroi.”11
Te Uea Iesu Kristo bon ara bwaintangira ae onoti mai buakon ana bwaintangira ni kabane te Atua. “E taku Iesu … , Boni Ngai te kawai, ao te koaua, ao te maiu: akea ane nako n te Tama, ba ti i Rou.”12
Nibwaai e kunea kakawakin ara Tia Kamaiu ngke e kabwarabwara, “Ao ti kaakarabakauakina Kristo, ao ti kimwareirei iroun Kristo, ao ti tataekina Kristo, ao ti taetae ni burabeti ibukin Kristo, ao ti koroi kanoan ara taetae ni burabeti bwa antai ake a na kawaria ibukin kamaunan aia bure.”13 Ti riai ni kateimatoa Kristo bwa boton maiura n taainako ao n taabo nako.
Ti riai n uringnga bwa bon arana are e kaoti iaon ara tabo n taromauri; ti bwabetitoaki n arana; ao ti kamatoaaki, katabuaki, entaaunaki, ao ni kabaeaki n te mare n Arana. Ti kana te toa ao ni berita bwa ti na katoka arana iaora—ao n riki bwa Kiritian ni koaua. N te kabane, ti butiaki n te tataro n toa “n aki toki n ururingnga.”14
Ngkai ti katauraoi ibukin Tabatin te Itita ningabong, ti na uringnga bwa e kakannato Kristo. Boni Ngaia te Tia Moti ae raoiroi, te tia Tei Imarenara ae kakaonimaki, te Tia Kabooira ae kakabwaiaaki, te tia Kawakin Tibu ae Raoiroi, te Mesia ae beritanaki, te Rao ae Koaua, ao a mwaiti, ake iaona riki. Bon te bwaintangira ni koaua ae kakaawaki nakoira mairoun Tamara.
N arora n riki kanga ana reirei, a mwaiti ara bubuti, tabeaiangara, ao mwiokoara. E ngae n anne, tabeua waaki ni kakukurei a riai n taainako n riki bwa aan kainakin te Ekaretia. “Mangaia are,” e tua te Uea “bwaina te kakaonimaki; teei n te nakoa are I a tia n anganiko; buokiia ake a mamaara, tabeki rake baai ake a tine, ao ni kakorakorai bubuaniwae aika aki konamaki.”15
Aei ana mwakuri te Ekaretia! Aei bon te aro ni kiritian ae itiaki! Aei te euangkerio ni koaua n te namakin ngkai ti buokiia, n tabekiia rake, ao ni kakorakoraiia naake a kainnano n te tamnei ao n te rabwata! Karaoakina e tangiriira bwa ti na kawariia ao ni buokiia,16 bwa aia kakoaua n aia onimaki iroun te Tama are i Karawa ao Iesu Kristo ao Ana Mwakuri ni Kamaiu a na kamatoaaki raoi inanoia.
E bia te Uea buokiira ao ni kakabwaiaira ni kawakin ara bwaintangira aika mwaiti aika onoti mairoun te Atua, n raonaki ma kainakin Ana Ekaretia are e kaokaki. I tataro bwa ti na kaonaki ma te tangira ibukiia natin te Tama are i Karawa ao ni kona n noori kainnanoia ao n tauraoi ni kaekai aia titiraki ao tabeaiangaia ibukin te euangkerio ae itiaki ao kawai n akoi ake a na karikirakea te atatai ao te kakaitau i bon imarenara.
I kakoaua bwa Iesu Kristo bon ara Tia Kamaiu. Te bwai are ti na reireinaki n te maungatabu ni kabuta aei e roko man aia kairi abotoro ao burabeti, mairouia Mataniwi ni Kabuta, ao taan kairiiri aine ake Aobitia ni Kabuta n te Ekaretia. Au kantaninga bwa ana kimwareirei ao ana rau te Uea e memena iroura n tatabemaniira bon au tataro n aran Iesu Kristo, amen.